Okɛ Anunyam Aha Nyɔŋmɔ Shi Jeee Gbɔmɔ

YƐ NYƐSƐƐ nyɔji ni eho nɛɛ amli lɛ, mɛi fɛɛ ni sumɔɔ jalɛnifeemɔ ni yɔɔ je lɛŋ fɛɛ lɛ kase bɔ ni akɛ anunyam haa Nyɔŋmɔ beni amɛbua amɛhe naa yɛ “Okɛ Anunyam Aha Nyɔŋmɔ” Yehowa Odasefoi a-Kpokpaa Wulu nɔ Kpeei lɛ ashishi lɛ. Nyɛhaa ni wɔtĩa tsɔsemɔ he gbɛjianɔtoo ni akɛha yɛ jɛmɛ lɛ mli.

Gbɛjianɔtoo ni damɔ Biblia lɛ nɔ lɛ tsara nɔ gbii etɛ kɛha mɛi ni tee kpokpaa wulu nɔ kpee lɛ ateŋ mɛi babaoo, kɛ gbii ejwɛ kɛha mɛi ni nyɛ amɛtee majimaji ateŋ kpeei krɛdɛɛi lɛ. Yɛ fɛɛ mli lɛ, mɛi ni tee lɛ nu wiemɔi ni ajɛ Ŋmalɛ mli ni akɛha ni fá fe 30, ní nɔ ni fata he ji wiemɔi ni haa anáa mumɔŋ nibii ahe miishɛɛ waa, niiashikpamɔi ni woɔ hemɔkɛyeli mli hewalɛ, nɔkwɛmɔnii ni ma bɔ ni akɛ Biblia mli shishitoo mlai tsuɔ nii ahaa lɛ anɔ mi lɛ, kɛ drama ni akɛ blema hesaamɔ fee ni tsɔɔ kaai ni klɛŋklɛŋ afii 100 lɛ mli Kristofoi lɛ kɛkpe lɛ hu. Kɛ otee kpeei nɛɛ ateŋ eko lɛ, mɛni hewɔ otĩii saji otii ni oŋmala oshwie shi lɛ amli ekoŋŋ beni okaneɔ sane nɛɛ? Wɔyɛ nɔmimaa akɛ, ebaaku sɛɛ egbala ojwɛŋmɔ kɛba mumɔŋ okpɔlɔŋmɛɛ ni hi jogbaŋŋ lɛ nɔ yɛ gbɛ ni yɔɔ miishɛɛ nɔ, ni ebaafee tsɔsemɔ nii hu kɛha bo.

Klɛŋklɛŋ Gbi lɛ Saneyitso: ‘Yehowa, Bo Ji Mɔ ni Sa akɛ Oŋɔ Anunyam Lɛ’

Beni akɛ lala eje shishi ni asɔle sɛɛ lɛ, klɛŋklɛŋ wielɔ lɛ kɛ miishɛɛ here mɛi ni eba jɛmɛ lɛ fɛɛ atuu kɛ wiemɔ ni damɔ yiŋtoo titri hewɔ ni afeɔ kpee lɛ nɔ akɛ: “Wɔbabua Wɔhe Naa Koni Wɔwo Nyɔŋmɔ Hiɛ Nyam.” Beni wielɔ lɛ tsɛɔ Kpojiemɔ 4:11 lɛ sɛɛ lɛ, ema kpee muu lɛ fɛɛ saneyitso lɛ nɔ mi. Egbála nɔ ni anunyam ni akɛaaha Nyɔŋmɔ lɛ tsɔɔ lɛ mli oya nɔŋŋ. Beni ekɛ Lalai awolo lɛ tsuɔ nii lɛ, ema nɔ mi akɛ anunyam ni akɛhaa Nyɔŋmɔ lɛ biɔ ‘jamɔ,’ ‘shidaa’ kɛ ‘yijiemɔ.’—Lala 95:6; 100:4, 5; 111:1, 2.

Wiemɔ ni nyiɛ sɛɛ lɛ yitso ji “Ajɔɔ Mɛi ni Kɛ Anunyam Haa Nyɔŋmɔ Lɛ.” Wielɔ lɛ wie sane oti ko ni yɔɔ miishɛɛ he. Akɛni Yehowa Odasefoi ni fa fe akpekpei ekpaa lɛ yɛ shikpɔji 234 nɔ yɛ je lɛŋ fɛɛ hewɔ lɛ, abaanyɛ akɛɛ akɛ hulu lɛ enyɔɔɔ shi kɔkɔɔkɔ yɛ mɛi ni kɛ anunyam haa Yehowa lɛ anɔ. (Kpojiemɔ 7:15) Saji ni abibii Kristofoi hii kɛ yei babaoo ni yɔɔ be-fɛɛ sɔɔmɔ krɛdɛɛ lɛ eko mli lɛ ji nifeemɔ nɛɛ fã ko ni yɔɔ miishɛɛ ni ha toibolɔi lɛ atsui nyɔ amɛmli waa.

Wiemɔ ni tsa nɔ lɛ ji “Adebɔɔ Jajeɔ Nyɔŋmɔ Anunyam lɛ Etsɔɔ.” Eyɛ mli akɛ anuuu nibii ni yɔɔ ŋwɛi diɛŋtsɛ lɛ agbee moŋ, shi amɛjajeɔ Nyɔŋmɔ agbojee lɛ amɛtsɔɔ ni amɛyeɔ amɛbuaa wɔ koni wɔjie hiɛsɔɔ ni mli kwɔ kpo yɛ bɔ ni esusuɔ wɔhe lɛ hewɔ. Agbála enɛ mli jogbaŋŋ fitsofitso.— Yesaia 40:26.

Yiwaa, shitee-kɛ-woo, je lɛŋ nibii ni náa mɔ nɔ hewalɛ, kɛ eshafeemɔ sui lɛ kaa emuuyeli mli  ni anɔkwa Kristofoi hiɛ lɛ. No hewɔ lɛ wiemɔ ni ji “Bá Ojeŋ yɛ Emuuyeli Mli” lɛ hã toibolɔi lɛ fee dioo kɛbo toi jogbaŋŋ. Wielɔ lɛ susu Lala 26 lɛ kuku fɛɛ kuku he, ni ebi Odasefonyo ko ni miiya skul ni fee shiŋŋ yɛ jeŋba kpakpa mli lɛ kɛ mɔ kroko hu ni fiteɔ be babaoo tsɔ̃ yɛ hiɛtserɛjiemɔ ni esaaa he, shi agbɛnɛ efee tsakemɔi ni eye naagba lɛ nɔ kunim lɛ saji.

Wiemɔ krɛdɛɛ ni yitso ji “Anunyam Gbalɛ Ninaai Kanyaa Wɔ Koni Wɔya Nɔ!” lɛ kɛ leebi gbɛjianɔtoo lɛ ba naagbee. Wielɔ lɛ tsĩ nɔkwɛmɔnii ni kɔɔ gbalɔ Daniel kɛ bɔfo Yohane kɛ bɔfo Petro he lɛ tã akɛ mɛi ni anunyam gbalɛ ninaai ni tsɔɔ bɔ ni ato Nyɔŋmɔ Mesia Maŋtsɛyeli lɛ shishi aha kɛ bɔ ni etsuɔ nii ehaa lɛ kanya amɛhemɔkɛyelii. Kɛha mɛi ni ekolɛ amɛhiɛ eje amɛhe nɔ yɛ anɔkwale ni eji akɛ wɔyɛ naagbee gbii lɛ amli lɛ, wielɔ lɛ kɛɛ akɛ: “Wɔmiikpa gbɛ diɛŋtsɛ akɛ, mɛi ni tamɔ nɛkɛ lɛ baagbala amɛjwɛŋmɔ kɛya bɔ ni ba ni Kristo eba yɛ Maŋtsɛyeli anunyam mli lɛ ji nɔ ni yɔɔ diɛŋtsɛ lɛ nɔ, ni ebaaye ebua amɛ koni amɛná hewalɛ yɛ mumɔŋ ekoŋŋ.”

Aje shwane gbɛjianɔtoo lɛ shishi kɛ wiemɔ ni yitso ji “Ajie Yehowa Anunyam lɛ Kpo Atsɔɔ Heshibalɔi.” Wielɔ lɛ tsɔɔ bɔ ni Yehowa feɔ nɔkwɛmɔnɔ kpakpa yɛ heshibaa mli, eyɛ mli moŋ akɛ lɛ ji Mɔ ni nɔ kwɔ fe fɛɛ yɛ jeŋ muu lɛ fɛɛ. (Lala 18:36) Yehowa naa mɛi ni baa amɛhe shi yɛ anɔkwale mli lɛ mɔbɔ, shi eteɔ shi ewoɔ mɛi ni baa amɛhe shi beni amɛkɛ amɛtipɛŋfoi kɛ mɛi ni hiɛ gbɛhe ni nɔ kwɔ fe amɛ lɛ sharaa lɛ pɛ, ní amɛkɛ mɛi ni yɔɔ amɛshishi lɛ yeɔ yɛ gbɛ ni esaaa nɔ lɛ.—Lala 138:6.

No sɛɛ lɛ, akɛ Biblia mli gbalɛ ni yɔɔ wiemɔ ni ahaa kɛtsaraa nɔ lɛ mli ni maa fãi srɔtoi ni yɔɔ saneyitso titri ni ji “Amos Gbalɛ Lɛ—Shɛɛ Sane ni Ehiɛ Kɛha Wɔgbii Nɛɛ” lɛ mli lɛ anɔmimaa nyiɛ sɛɛ. Beni klɛŋklɛŋ wielɔ lɛ wieɔ Amos nɔkwɛmɔnɔ lɛ he lɛ, ema sɔ̃ ni kã wɔnɔ akɛ wɔbɔ mɛi akɔkɔ yɛ Yehowa kojomɔ ni baa lɛ he lɛ nɔ mi. Esane lɛ yitso ji “Shiɛmɔ Nyɔŋmɔ Wiemɔ lɛ Kɛ Ekãa.” Wielɔ ni ji enyɔ lɛ bi sane akɛ: “Ani be ko baashɛ ni Yehowa kɛ efɔŋfeemɔ kɛ nɔnaa baaba naagbee yɛ shikpɔŋ nɛɛ nɔ?” Esane lɛ yitso, ni ji “Kojomɔ ni Nyɔŋmɔ Kɛbaaba Mɛi Fɔji lɛ Anɔ” lɛ tsɔɔ akɛ kojomɔ ni Nyɔŋmɔ kɛhaa lɛ ja be fɛɛ be, anyɛɛɛ ajo naa foi, ni ekɛbaa mɛi ni sa hiɛkpatamɔ lɛ pɛ anɔ. Wielɔ ni kɛ wiemɔi ni ahaa kɛtsaraa nɔ lɛ ba naagbee lɛ gbala jwɛŋmɔ kɛba saneyitso ni ji “Yehowa Pɛiɔ Tsui lɛ Mli Ekwɛɔ” lɛ nɔ. Mɛi ni sumɔɔ akɛ amɛsa Yehowa hiɛ lɛ baabo wiemɔi ni yɔɔ Amos 5:15 lɛ toi akɛ: “Nyɛnyɛ̃a nɔ̃ fɔŋ, ní nyɛsumɔa nɔ̃ kpakpa.”

Abaanyɛ ni akɛ dãa ni wa tamɔ wein, ni hãa mɔ tsui nyãa lɛ atsu nii yɛ gbɛ ni ejaaa nɔ. Wielɔ lɛ tsĩ helooŋ kɛ mumɔŋ osharai ni jɛɔ dãa ni akɛ hiɛshikamɔ enuuu kɛji akɛ mɔ lɛ etɔɔɔ po lɛ mli kɛbaa lɛ tã yɛ ewiemɔ ni yitso ji “Kwa Dãanumɔ Shɛii He Tsɔne Lɛ” mli. Ekɛ shishitoo mla ko ni kudɔɔ mɔ hã akɛ: Akɛni esoro hewalɛ ni dãa falɛ ni anuɔ náa yɛ mɔ fɛɛ mɔ nɔ hewɔ lɛ, dãa falɛ fɛɛ falɛ ni fiteɔ ‘onilee kɛ jwɛŋmɔŋ nyɛmɔ’ lɛ fa tsɔ̃ kɛha bo.—Abɛi 3:21, 22.

Akɛni wɔyɛ jaramɔ bei amli hewɔ lɛ, saneyitso ni nyiɛ sɛɛ, ni ji “Yehowa, ‘Wɔmɔɔ ni Wa yɛ Haomɔ Bei Amli’” lɛ, shɛje toibolɔi lɛ amii. Sɔlemɔ, mumɔ krɔŋkrɔŋ lɛ, kɛ nanemɛi Kristofoi baanyɛ aye abua wɔ koni wɔdamɔ naa.

Naagbee wiemɔ kɛha gbi lɛ, ni ji “‘Shikpɔŋ Kpakpa Lɛ’—Paradeiso ni Akpaa Gbɛ lɛ He Mfoniri Bibioo” lɛ kɛ kpee lɛ ba naagbee kɛ miishɛɛ ní akpaaa gbɛ kɛha mɛi fɛɛ—wolo hee ko ni hiɛ Biblia shikpɔji ahe mfonirii babaoo ni ajie lɛ kpo! Eyitso ji ‘Kwɛmɔ Shikpɔŋ Kpakpa Lɛ.’

Gbi ni Ji Enyɔ lɛ Saneyitso: “Nyɛjajea Enunyam lɛ Nyɛtsɔɔa yɛ Jeŋmaji lɛ Ateŋ”

Beni asusu daa gbi ŋmalɛ lɛ he sɛɛ lɛ, akɛ wiemɔ ni ahaa kɛtsaraa nɔ ni ji enyɔ yɛ kpee lɛ shishi ni yitso ji “Nyɛkpɛ́a Yehowa Anunyam lɛ Nyɛtsɔɔa Tamɔ Ashwishwɛi” lɛ ha. Klɛŋklɛŋ fã lɛ susu “Sanekpakpa lɛ ni Wɔɔgbɛ Wɔshwã He Fɛɛ He” lɛ he, ni afee nɔkwɛmɔnii ni kɔɔ niiashikpamɔi diɛŋtsɛ ni aná yɛ shiɛmɔ nitsumɔ lɛ mli lɛ he lɛ afata he. Wielɔ ni ji enyɔ lɛ ha afee nɔkwɛmɔnii ni kɔɔ sɛɛsaramɔ he beni esusuɔ saneyitso ni ji “Hiɛhaanɔ lɛ ni Wɔɔjie yɛ Mɛi ni Ashwila Amɛ lɛ Ahiɛ” lɛ he lɛ. Saji ni abibii mɛi  ni yɔɔ sɔɔmɔ nitsumɔ lɛ mli niiashikpamɔi ni yɔɔ miishɛɛ yɛ naagbee wiemɔ ni ahaa kɛtsaraa nɔ nɛɛ mli ni yitso ji “Nakai ní Wɔɔfee Kɛteke Nɔ yɛ Wɔsɔɔmɔ Nitsumɔ lɛ Mli” lɛ ha wiemɔ lɛ fee nɔ ni yɔɔ miishɛɛ waa.

Gbɛjianɔtoo lɛ mli nifeemɔ ni nyiɛ sɛɛ lɛ hiɛ saneyitso akɛ “Anyɛ̃ɔ Amɛ Yakatswaa.” Nɔ ni fata he ji saji ni woɔ mɔ hewalɛ waa ni abibii aŋkroaŋkroi anɔkwafoi ni hiɛ amɛ emuuyeli lɛ mli yɛ shitee-kɛ-woo ni amɛkɛkpe lɛ amli yɛ Nyɔŋmɔ hewalɛ lɛ mli lɛ.

Nifeemɔ ni akpaa gbɛ babaoo yɛ kpeei ashishi ji baptisimɔ wiemɔ lɛ, ní nɔ ni nyiɛɔ sɛɛ ji nu mli kwraa ni akɛ mɛi fɛɛ ni sa kɛha baptisimɔ lɛ woɔ lɛ. Nu mli baptisimɔ feɔ mɔ he nɔ kwraa ni ejɔɔ eha Yehowa lɛ he okadi. No hewɔ lɛ saneyitso lɛ sa jogbaŋŋ akɛ: “Wɔhenɔjɔɔmɔ lɛ ni Wɔhiɔ Shi yɛ Naa lɛ Woɔ Nyɔŋmɔ Hiɛ Nyam.”

 Aje shwane gbɛjianɔtoo lɛ shishi kɛ wiemɔ ni haa mɔ pɛiɔ lɛ diɛŋtsɛ emli ekwɛɔ, ni ji “Susumɔ ni Tamɔ Kristo Nɔ̃ lɛ ni Aaaná yɛ Agbojee He.” Wielɔ lɛ tsĩ nɛkɛ sane oti ni yɔɔ miishɛɛ nɛɛ tã akɛ: Agbojee baa kɛtsɔɔ Kristo heshibaa lɛ ni aaakase lɛ nɔ. No hewɔ lɛ, esaaa akɛ Kristofonyo tiuɔ hegbɛ namɔ sɛɛ bɔni afee ni ekɛtao lɛ diɛŋtsɛ ehiɛ nyam. Esa akɛ ebi ehe akɛ, ‘Ani miisumɔ akɛ matsu nitsumɔi ni yeɔ ebuaa ni ayɔseŋ amrɔ nɔŋŋ lɛ ahe nii?’

Ani onuɔ he akɛ etɔ bo? Hetoo lɛ yɛ faŋŋ. Mɛi fɛɛ ahiɛ sɔ wiemɔ ni ji “Etɔ Wɔ, Shi Wɔgbɔjɔɔɔ” lɛ waa. Saji ni abibii Odasefoi ni etsɛ yɛ sɔɔmɔ lɛ mli lɛ tsɔɔ akɛ Yehowa baanyɛ ni ‘eha wɔhe awa kɛtsɔ emumɔ lɛ nɔ.’—Efesobii 3:16.

Mlihilɛ ji su ko ni akɛfɔɔɔ wɔ shi ehe miihia akɛ wɔkase. Ama nɛkɛ su ni he hiaa nɛɛ nɔ mi yɛ wiemɔ ni ji “Hã nii, Onine Akpɔ” lɛ mli. Ni atée sanebimɔ ko ni kanyaa mɔ nɛɛ shi akɛ: “Ani wɔfee klalo akɛ wɔkɛ nyɛmimɛi hii kɛ yei ni edara, ni he yeɔ, ni ehao, loo efee shoo lɛ aaaja wɔgbi lɛ mli minitii komɛi?”

Wiemɔ ni yitso ji “Kwɛmɔ Jogbaŋŋ yɛ ‘Mɛi Kpɔ̃ji Agbee’ He” lɛ gbala toibolɔi lɛ ajwɛŋmɔ waa. Nɛkɛ wiemɔ nɛɛ kɛ Yesu sɛɛnyiɛlɔi lɛ to gwantɛŋi ni boɔ lɛ pɛ toi akɛ “tookwɛlɔ kpakpa lɛ” he, ni amɛbooo “mɛi kpɔ̃ji agbee” ni baa kɛtsɔɔ gbɛjianɔtoi babaoo ni Abonsam kudɔɔ lɛ nɔ lɛ atoi.—Yohane 10:5, 14, 27.

Bɔni afee ni anu lalɔi akuu ko shishi lɛ esa akɛ amɛfee ekome kɛlá. Bɔni afee ni anɔkwa jálɔi ni yɔɔ je lɛŋ fɛɛ lɛ awo Nyɔŋmɔ hiɛ nyam lɛ, esa akɛ amɛfee ekome. No hewɔ lɛ wiemɔ ni ji “Nyɛkɛ ‘Naabu Kome’ Awoa Nyɔŋmɔ Hiɛ Nyam” lɛ kɛ tsɔsemɔ ni sɛɛnamɔ yɔɔ he hã yɛ bɔ ni wɔ fɛɛ wɔbaanyɛ wɔwie “wiemɔ krɔŋŋ” lɛ ní wɔsɔ̃mɔ Yehowa kɛ “gbee kome” lɛ mli.—Zefania 3:9.

Fɔlɔi, titri lɛ mɛi ni hiɛ gbekɛbii lɛ amii shɛ amɛhe waa yɛ naagbee wiemɔ kɛha gbi lɛ he, ni ji “Wɔbii Lɛ—Gboshinii ni Jara Wa.” Toibolɔi lɛ anaa kpɛ amɛhe waa kɛ miishɛɛ beni ajie wolo hee ko ni hiɛ baafai 256 lɛ kpo lɛ. Kasemɔ Nii Kɛjɛ Tsɔɔlɔ Kpele lɛ Ŋɔɔ lɛ ji wolo ko ni baaye abua fɔlɔi koni amɛná be ni kɛ mumɔŋ jɔɔmɔi baaba lɛ amɛha amɛbii ni ji nikeenii ni Nyɔŋmɔ kɛha amɛ lɛ.

Gbi ni Ji Etɛ lɛ Saneyitso: “Nyɛfea Nɔ Fɛɛ Nɔ Kɛwoa Nyɔŋmɔ Hiɛ Nyam”

Akɛ daa gbi ŋmalɛ lɛ mli kaimɔi lɛ je kpee lɛ naagbee gbi lɛ shishi yɛ mumɔŋ nibii ahe susumɔ naa. Nɛkɛ gbi nɛɛ gbɛjianɔtoo lɛ klɛŋklɛŋ fã lɛ gbala jwɛŋmɔ babaoo kɛtee weku gbɛjianɔtoo lɛ nɔ. Klɛŋklɛŋ wiemɔ ni ji “Fɔlɔi, Nyɛtswaa Weku Kɔkrɔɔ lɛ Nyɛmaa Shi” lɛ saa toibolɔi lɛ ajwɛŋmɔ kɛha wiemɔi ni baanyiɛ sɛɛ lɛ. Beni wielɔ lɛ etĩ gbɛnaa nii ni kã fɔlɔi anɔ akɛ amɛha amɛweku lɛ heloonaa hiamɔ nii lɛ mli sɛɛ lɛ, etsɔɔ mli akɛ fɔlɔi lɛ agbɛnaa nii titri ji ni amɛkɛ mumɔŋ hiamɔ nii ahã amɛbii lɛ.

 Wielɔ ni nyiɛ sɛɛ lɛ gbala jwɛŋmɔ kɛba gbekɛbii lɛ anɔ ni ekɛ amɛ susu saneyitso ni ji “Bɔ ni Oblahii kɛ Oblayei Jieɔ Yehowa Yi” lɛ he. Ewie akɛ oblahii kɛ oblayei lɛ tamɔ “bɔ” ni nɛɔ shwieɔ shi, ejaakɛ amɛyi fa babaoo ni amɛblahiiaŋ kɛ amɛblayeiaŋ ekãa lɛ haa mɔ náa miishɛɛ. Onukpai náa miishɛɛ akɛ amɛkɛ amɛ aaatsu nii yɛ Yehowa sɔɔmɔ lɛ mli. (Lala 110:3) Nɔ ni fata nɛkɛ fã nɛɛ he ji saji ni yɔɔ miishɛɛ ni abibii oblahii kɛ oblayei ni feɔ nɔkwɛmɔnɔ kpakpa lɛ.

Biblia mli drama ni akɛ blema hesaamɔ feɔ lɛ ji kpokpaa wulu nɔ kpeei lɛ fã ko ni anyaa he jogbaŋŋ, ni afee eko yɛ kpee nɛɛ shishi. Drama ni yitso ji “Odaseyeli yɛ Ekãa Naa yɛ Shitee-kɛ-Woo Fɛɛ Sɛɛ” lɛ gbala jwɛŋmɔ kɛtee klɛŋklɛŋ afii 100 lɛ mli Yesu sɛɛnyiɛlɔi lɛ anɔ. Ejeee hiɛtserɛjiemɔ folo ko kɛkɛ, shi nɔ ni he hiaa titri lɛ, etsɔɔ mɔ nii. Wiemɔ ni nyiɛ drama lɛ sɛɛ ni ji “Jajemɔ Sanekpakpa lɛ ‘ni Ofɔ̃ɔɔ’” lɛ ma saji otii ni yɔɔ drama lɛ mli lɛ anɔ mi.

Mɛi fɛɛ ni eba kpee lɛ shishi lɛ miikwɛ nɔ titri ni yɔɔ Hɔgbaa gbɛjianɔtoo lɛ mli lɛ, ni ji maŋshiɛmɔ ni yitso ji, “Namɛi Kɛ Anunyam Haa Nyɔŋmɔ Ŋmɛnɛ?” lɛ gbɛ. Wielɔ lɛ tsɔɔ bɔ ni jeŋ nilelɔi kɛ jamɔŋ kui lɛ nyɛko amɛkɛ anunyam aha Nyɔŋmɔ lɛ mli. Mɛi ni feɔ nakai pɛ ji mɛi ni egbɛi kã amɛnɔ, ni shiɛɔ ni amɛtsɔɔ anɔkwale ni kɔɔ Yehowa he lɛ, ni woɔ egbɛi lɛ hiɛ nyam yɛ anɔkwale mli lɛ.

Akɛ Buu-Mɔɔ wolo tɛtrɛɛ lɛ mli nikasemɔ kɛha nakai otsi lɛ naamuamɔ lɛ tsa maŋshiɛmɔ lɛ nɔ. Kɛkɛ ni akɛ naagbee wiemɔ ni ji, “‘Nyɛyaa nɔ Nyɛwoa Yibii Pii’ Kɛwoa Yehowa Hiɛ Nyam” lɛ ha. Wielɔ lɛ kɛ yiŋkpɛi nyɔŋma fɔ̃ toibolɔi lɛ fɛɛ ahiɛ koni amɛkpɛlɛ nɔ. Ekɔɔ gbɛ̀i srɔtoi ni abaanyɛ atsɔ nɔ ni akɛ anunyam aha Yehowa, wɔ-Bɔlɔ lɛ he. Ekome ni afee ni akɛkpɛlɛ nɔ akɛ “Hɛɛ” lɛ jije kɛtee shikpɔŋ lɛ naagbeehei lɛ tɔ̃ɔ yɛ kpeei ni afee lɛ fɛɛ ashishi.

No hewɔ lɛ, akɛ kpee lɛ ba naagbee be mli ni toibolɔi lɛ ateŋ mɔ fɛɛ mɔ jwɛŋmɔ yɔɔ saneyitso ni ji “Okɛ Anunyam Aha Nyɔŋmɔ” lɛ nɔ lɛ. Ni eba akɛ, kɛtsɔ Yehowa mumɔ lɛ kɛ egbɛjianɔtoo lɛ fã ni anaa lɛ nɔ lɛ, wɔkɛ anunyam aaahã Nyɔŋmɔ daa shi jeee adesai.

[Akrabatsa/Mfonirii ni yɔɔ baafa 23]

Majimaji Ateŋ Kpeei

Afee majimaji ateŋ kpeei ni he gbii ejwɛ yɛ Afrika, Asia, Australia, Europa, kɛ North America kɛ South America. Afɔ̃ Odasefoi komɛi anine kɛjɛ je lɛŋ he fɛɛ he kɛtee henaabuamɔi nɛɛ ashishi. Yɛ nɛkɛ gbɛ nɔ lɛ “ashɛje” gbɔi lɛ kɛ gbɔfeelɔi lɛ fɛɛ ‘amii.’ (Romabii 1:12) Atsĩɛ naanyobɔɔ ni yɔɔ momo lɛ hiɛ, ni aje eheei hu ashishi. Nɔ krɛdɛɛ ni fata majimaji ateŋ kpeei ahe gbɛjianɔtoo lɛ he ji “Amaniɛbɔi ni Jɛ Shikpɔji Krokomɛi Anɔ” lɛ.

[Akrabatsa/Mfonirii ni yɔɔ baafa 25]

Woji Heei ni Kɛ Anunyam Ha Nyɔŋmɔ

Ajie woji heei enyɔ kpo yɛ “Okɛ Anunyam Aha Nyɔŋmɔ” Kpokpaa Wulu nɔ Kpeei lɛ ashishi. Biblia shikpɔji ahe mfoniri wolo ni ji ‘Kwɛmɔ Shikpɔŋ Kpakpa Lɛ’ hiɛ wolo sɛɛ hàanɔ ni tsɛɔ, kɛ baafai 36 shikpɔji ahe mfonirii kɛ Biblia shikpɔji anɔ mfonirii ni ashá. Emli baafai lɛ eko fɛɛ eko hiɛ sui srɔtoi kɛ shikpɔji ahe mfonirii ni kɔɔ Ashur, Babilon, Media kɛ Persia, Hela, kɛ Roma jeŋ nɔyelii lɛ ahe. Shikpɔji ahe mfonirii srɔtoi ni kɔɔ Yesu sɔɔmɔ nitsumɔ lɛ kɛ Kristojamɔ mlilɛɛmɔ he lɛ hu yɛ mli.

Kasemɔ Nii Kɛjɛ Tsɔɔlɔ Kpele lɛ Ŋɔɔ lɛ ji wolo ko ni hiɛ baafai 256, kɛ emli mfonirii aaafee 230. Nibii pii yɛ mli ni ŋɔɔ ni abaanyɛ akɛ gbekɛbii asusu he kɛtsɔ emli mfonirii lɛ akwɛmɔ kɛkɛ nɔ, kɛ sanebimɔi ni yɔɔ wolo lɛ mli ni haa asusuɔ nii ahe lɛ hetoohamɔ. Afee nɛkɛ wolo hee nɛɛ koni ete shi ewo Satan tutuamɔi ni ekɛbaa wɔbii lɛ anɔ, koni ekɛfite amɛjeŋba kpakpa lɛ.

[Mfoniri ni yɔɔ baafa 23]

Maŋsɛɛ sanekpakpa shiɛlɔi gba niiashikpamɔi ni woɔ hemɔkɛyeli mli hewalɛ

[Mfoniri ni yɔɔ baafa 24]

Baptisimɔ ji “Okɛ Anunyam Aha Nyɔŋmɔ” kpeei lɛ fã ko ni he hiaa waa

[Mfoniri ni yɔɔ baafa 24]

Onukpai kɛ gbekɛbii fɛɛ náa Biblia mli dramai lɛ ahe miishɛɛ