Sanebimɔi ni Jɛ Kanelɔi Adɛŋ

Mɛɛ shihilɛi ha Yuda kɛ yoo ko ni esusu akɛ eji ajwamaŋ lɛ ná bɔlɛ, taakɛ aŋma yɛ 1 Mose 38:15, 16 lɛ?

Eyɛ mli akɛ Yuda kɛ yoo ko ni esusu akɛ eji ajwamaŋ lɛ ná bɔlɛ moŋ, shi yɛ anɔkwale mli lɛ ejeee yoo ajwamaŋ. Taakɛ Mose Klɛŋklɛŋ Wolo lɛ yitso 38 lɛ tsɔɔ lɛ, enɛ ji nɔ ni ba.

Akɛni Yuda kromɔbinuu lɛ ‘fee ehe gbɔmɔ fɔŋ yɛ Yehowa hiɛ’ hewɔ lɛ agbe lɛ yɛ be mli ni enako ekɛ eŋa Tamar afɔ bihii. (1 Mose 38:7) Yɛ nakai beaŋ lɛ, nɔ ni afɔɔ feemɔ yɛ kusum naa ji wunyɛmi gbalashihilɛ mlibotemɔ. Enɛ biɔ ni kɛ́ nuu ko gbo ni ebɛ gboshiniyelɔ lɛ, enyɛmi nuu kɛ okulafo lɛ ahi shi ni ekɛ lɛ afɔ́ gboshiniyelɔ. Shi Yuda binuu ni ji enyɔ ni ji Ona, kpoo akɛ ebaatsu egbɛnaa nii lɛ he nii. No hewɔ lɛ egbo yɛ Nyɔŋmɔ kojomɔ hewɔ. Kɛkɛ ni Yuda ha eshaayoo Tamar ku esɛɛ kɛtee etsɛmɛi awe kɛyashi be mli ni Yuda binuu ni ji etɛ ni ji Shela baada bɔ ni sa koni ekɛ lɛ abote gbalashihilɛ mli. Shi kɛlɛ, beni be shwieɔ mli lɛ, Yuda haaa Shela kɛ Tamar abote gbalashihilɛ mli. No hewɔ lɛ beni Yuda ŋa lɛ gbo lɛ, Tamar tsɔ̃ ŋaa koni ekɛ Yuda Israelnyo lɛ, mɔ ni tsutsu lɛ eji eshaanuu lɛ afɔ gboshiniyelɔ. Efee enɛ kɛtsɔ ehe ni esaa tamɔ sɔlemɔtsuŋ ajwamaŋ ko, ni eyata he ni ele akɛ Yuda baafoŋ yɛ jɛmɛ lɛ.

Akɛni Yuda leee mɔ ni Tamar ji hewɔ lɛ, eŋɔ lɛ ni ekɛ lɛ ná bɔlɛ. Tamar jɛ nilee mli ehé okadi nibii komɛi kɛjɛ edɛŋ yɛ bɔlɛnamɔ hegbɛ ni ekɛha lɛ lɛ hewɔ, ni kɛtsɔ nɛkɛ nibii nɛɛ anɔ lɛ eha ele yɛ sɛɛ mli ákɛ lɛ ji mɔ ni ha ená musu lɛ. Beni anɔkwale lɛ je kpo lɛ, Yuda shwaaa lɛ, shi moŋ ekɛ heshibaa kɛɛ akɛ: “Jalɔ ji lɛ fe mi, akɛ nɔ ni miŋɔɔɔ lɛ mihaaa mibi Shela lɛ.” Ni nɔ ni sa jogbaŋŋ lɛ, “ehe esaaa ehe dɔŋŋ.”—1 Mose 38:26.

Yuda efeee ni ahi ejaakɛ eŋɔɔɔ Tamar ehaaa ebi Shela taakɛ ewo shi lɛ. Agbɛnɛ hu ekɛ yoo ko ni esusu akɛ eji sɔlemɔtsuŋ ajwamaŋ lɛ ná bɔlɛ. Enɛ teɔ shi ewoɔ Nyɔŋmɔ yiŋtoo akɛ nuu ana bɔlɛ yɛ gbalashihilɛ mli gbɛjianɔtoo lɛ pɛ mli lɛ hu. (1 Mose 2:24) Shi, yɛ anɔkwale mli lɛ, Yuda kɛ yoo ajwamaŋ ko naaa bɔlɛ. Yɛ no najiaŋ lɛ, eyaye ebi Shela najiaŋ yɛ wunyɛmi gbalashihilɛ mlibotemɔ lɛ mli ni eleee, ni no hewɔ lɛ efɔ́ bi ni mla kpɛlɛɔ nɔ.

Yɛ Tamar gbɛfaŋ lɛ, gbɛ ni ekɔ́ lɛ jeee jeŋba shara nifeemɔ. Abuuu ebii haaji lɛ akɛ amɛji ajwamaŋbii. Beni Boaz ni jɛ Betlehem lɛ ŋɔ Moabyoo Rut yɛ wunyɛmi gbalashihilɛ mlibotemɔ mli lɛ, onukpai ni yɔɔ Betlehem lɛ wie Tamar binuu Perez he ekpakpa, beni amɛkɛɛ Boaz akɛ: “Shwiei ní Yehowa aaatsɔ oblayoo nɛɛ nɔ ahao lɛ, aha owe lɛ atsɔ tamɔ Perez ní Tamar kɛ Yuda fɔ́ lɛ we lɛ.” (Rut 4:12) Atsĩ Perez hu tã afata Yesu Kristo blematsɛmɛi lɛ ahe.—Mateo 1:1-3; Luka 3:23-33.