Henilee Kpakpa

CHARLES ni tsuɔ nii yɛ Kenya univɛsiti lɛ laaje etɛlifoŋ ni ahiɛɔ lɛ gbi ko be mli ni ekpa kɛjɛ nitsumɔ kɛyaa shia lɛ. Yɛ Kenya lɛ, tɛlifoŋ nɛɛ kã he eji nibii ni haa shihilɛ feɔ ogbɔjɔ ni jara wa waa lɛ ekome.

Charles wie akɛ: “Mikpaaa gbɛ akɛ mɔ ko baaku sɛɛ ekɛbaha mi.” Shi kɛlɛ, yɛ gbii fioo komɛi asɛɛ lɛ, enaa kpɛ ehe beni atswa lɛ tɛlifoŋ kɛjɛ Yehowa Odasefoi anitsumɔhe nine ni yɔɔ Kenya lɛ. Ehiɛ fee lɛ yaa beni akɛɛ lɛ akɛ eba ni ebahe etɛlifoŋ lɛ! Charles ná ele akɛ, Yehowa Odasefoi abe-fɛɛ sɔɔlɔ ko kɛ lɛ fɛɛ ta tsɔne kometoo lɛ nɔŋŋ mli, ni lɛ ji mɔ na tɛlifoŋ lɛ. Be-fɛɛ sɔɔlɔ lɛ kɛ tɛlifoŋ lɛ ba nitsumɔhe nine lɛ, kɛbɔ mɔdɛŋ koni atao nɔtsɛ, ni yɛ naagbee lɛ, nitsulɔi ní kɛ amɛhe eha yɛ jɛmɛ lɛ anine shɛ Charles nɔ kɛtsɔ nɔmba ni yɔɔ tɛlifoŋ lɛ nɔ lɛ nɔ.

Yɛ wolo ni Charles ŋma eyaha nitsumɔhe nine lɛ mli lɛ, ewie akɛ: “Mihiɛ esɔ mɔdɛŋ ni nyɛbɔ yɛ tɔlɛi ni fata he lɛ fɛɛ sɛɛ ni nine kɛshɛ minɔ lɛ waa. Miida nyɛgbɛjianɔtoo lɛ mlibii ni na tɛlifoŋ lɛ, ni amɛná amɛle akɛ minɔ ni, ni amɛkɛku sɛɛ amɛkɛbaha mi lɛ shi waa diɛŋtsɛ. Ŋmɛnɛ, ewa akɛ aaaná mɔ ko ni yeɔ anɔkwa, shi kɛlɛ, eji miishɛɛ sane akɛ wɔyɛ mɛi fioo ni jieɔ amɛhe kpo akɛ Yehowa Nyɔŋmɔ anɔkwa Odasefoi.”

Ale Yehowa Odasefoi yɛ he fɛɛ he akɛ amɛyeɔ anɔkwa. Amɛkaseɔ bɔfo Paulo, mɔ ni kɛɛ akɛ: “Wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli” lɛ. (Hebribii 13:18; 1 Korintobii 11:1) Amɛnuɔ shishi akɛ jeŋba ni tamɔ nɛkɛ woɔ Yehowa Nyɔŋmɔ hiɛ nyam, taakɛ Yesu kɛɛ lɛ, akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛnifeemɔnii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.”—Mateo 5:16.