Miishɛjemɔ Kɛha Mɛi ni Naa Nɔ Lɛ

BENI hii kɛ yei anɔkwafoi ni hi shi yɛ blema beaŋ lɛ naa nɔ lɛ, amɛkɛ hiɛdɔɔ sɔle amɛha Nyɔŋmɔ kɛha gbɛtsɔɔmɔ. Shi kɛlɛ, amɛŋɔɔ hegbɛ ni hi fe fɛɛ lɛ hu koni amɛkɛba nɔnaa lɛ shi, tamɔ hesaai ni akɛtsuɔ nii koni akɛje yiwalɔi adɛŋ lɛ nɛkɛ. Akɛ nɔkwɛmɔnɔ lɛ, he ni akɛfɔ̃ɔ Yehowa nɔ, ni mɔ lɛ diɛŋtsɛ mɔdɛŋbɔɔ fata he lɛ ji nɔ ni ye ebua David ni enyɛ eto etsui shi yɛ haomɔi ni ekɛkpe lɛ amli. Te wɔ hu wɔfeɔ tɛŋŋ ŋmɛnɛ?

Kɛ oona nɔ lɛ, ŋwanejee ko bɛ he akɛ obaaŋɔ hegbɛ lɛ koni okɛtao tsabaa kɛha onaagba lɛ. Akɛ nɔkwɛmɔnɔ lɛ, kɛ ona akɛ obɛ nitsumɔ lɛ, ani obɔŋ ohe mɔdɛŋ akɛ obaatao nitsumɔ ni sa ni baanyɛ akwɛ bo kɛ oweku lɛ? (1 Timoteo 5:8) Aloo kɛ oopiŋ yɛ gbɔmɔtsoŋ hela ko hewɔ lɛ, ani otaoŋ tsofafeemɔ mli yelikɛbuamɔ ni sa? Eyɛ miishɛɛ akɛ Yesu ni ná hewalɛ kɛjɛ Nyɔŋmɔ ŋɔɔ ni ekɛaatsa helai srɔtoi fɛɛ lɛ kpɛlɛ nɔ akɛ, ‘tsofatsɛ he hiaa mɛi ni he yeɔ lɛ.’ (Mateo 9:12) Shi kɛlɛ, ebaanyɛ eba lɛ akɛ jeee daa nɛɛ ni abaanyɛ ajie omanehului lɛ kɛya; shi ehe baahia ni oya nɔ oŋmɛ otsui shi kɛyashi he ko.

Mɛni hewɔ ni okɛ sane lɛ efɔ̃ɔɔ Yehowa Nyɔŋmɔ hiɛ yɛ sɔlemɔ mli? Akɛ nɔkwɛmɔnɔ lɛ, kɛ wɔmiitao nitsumɔ lɛ, wɔhe ni wɔkɛaafɔ̃ Nyɔŋmɔ nɔ yɛ sɔlemɔ mli lɛ baaye abua wɔ ni wɔte shi kɛshi kaa ni wɔkɛaakpɛlɛ nitsumɔ ni teɔ shi woɔ Biblia mli shishitoo mlai lɛ anɔ. Agbɛnɛ hu wɔbaakwa ‘gbɛ ni wɔɔdũ kɛjɛ hemɔkɛyeli lɛ mli’ kɛtsɔ hiɛjoomɔ kɛ shikasuɔmɔ nɔ. (1 Timoteo 6:10) Yɛ anɔkwale mli lɛ, kɛ wɔmiikpɛ yiŋ ni he hiaa ni kɔɔ nitsumɔ loo weku loo gbɔmɔtsoŋ hewalɛnamɔ he lɛ, wɔbaanyɛ ni wɔbo David ŋaawoo nɛɛ toi akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.”—Lala 55:23.

Sɔlemɔ ni jɛ tsui mli lɛ hu baaye abua wɔ koni wɔŋmɛ pɛpɛɛpɛ yɛ jwɛŋmɔŋ koni wɔnɔnaa lɛ akaye wɔnɔ. Bɔfo Paulo ni eji anɔkwa Kristofonyo lɛ ŋma akɛ: “Nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi  lɛ atã yɛ Nyɔŋmɔ hiɛ.” Mɛɛ gbɛ nɔ sɔlemɔ ni jɛ tsui mli lɛ baashɛje wɔmii yɛ? “Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Nyɔŋmɔ hejɔlɛ lɛ “fe jwɛŋmɔi fɛɛ.” No hewɔ lɛ, ebaanyɛ eha wɔfi shi shiŋŋ kɛ́ henumɔi ni haoɔ mɔ etsɔ tamɔ jatsu yɛ wɔnɔ. ‘Ebaabu wɔtsuii kɛ jwɛŋmɔŋ nyɛmɔi lɛ ahe,’ ni enɛ baaye ebua wɔ ni wɔkafee nɔ ko kpalakpala ni nilee bɛ mli, ni baaha ni wɔnɔnaa lɛ mli awo wu.

Sɔlemɔ baanyɛ ni ekɛ tsakemɔ ni sa kadimɔ aba bɔ ni shihilɛ ko yaa nɔ ehãa lɛ mli. Beni bɔfo Paulo batsɔ gboklɛfonyo yɛ Roma lɛ, ejɛ heshibaa mli ebi nanemɛi Kristofoi koni amɛsɔle amɛha lɛ. Mɛni hewɔ bɔfo Paulo bi enɛ? Eŋma amɛ akɛ: “Ni miikpa nyɛ fai babaoo akɛ nyɛfee nakai, koni akpale mi aha nyɛ oyá.” (Hebribii 13:19) Yɛ gbɛ kroko nɔ lɛ, Paulo le akɛ sɔlemɔ ni enanemɛi heyelilɔi lɛ aaakã he asɔle, ni Yehowa aaabo toi lɛ baanyɛ ekɛ tsakemɔ aba be ni abaajie lɛ lɛ he.—Filemon 22.

Ani sɔlemɔ baatsake nɔ ni baajɛ wɔnɔnaa lɛ mli aba lɛ? Ekolɛ ebaanyɛ. Shi kɛlɛ, esa ni wɔyɔse akɛ ebaanyɛ eba lɛ akɛ Yehowa Nyɔŋmɔ hãŋ wɔsɔlemɔi lɛ ahetoo yɛ gbɛ ni wɔbaasumɔ nɔ. Paulo sɔle shii abɔ yɛ “eheloo mli ŋmei” ko he, ekolɛ gbɔmɔtsoŋ naagba ko he. Yɛ nɔ najiaŋ ni Nyɔŋmɔ aaajie nɔnaa lɛ moŋ kɛya lɛ, ekɛɛ Paulo akɛ: “Miduromɔ lɛ fá hao, ejaakɛ mihewalɛ lɛ, gbedeefeemɔ mli eyeɔ emuu yɛ.”—2 Korintobii 12:7-9.

No hewɔ lɛ, ekolɛ ajieŋ wɔnaagbai lɛ amrɔ nɔŋŋ. Shi moŋ wɔbaaná hegbɛ ni wɔkɛtsɔɔ hekɛnɔfɔɔ ni wɔyɔɔ yɛ wɔŋwɛi Tsɛ lɛ mli. (Yakobo 1:2-4) Wɔbaanyɛ wɔná nɔmimaa akɛ kɛji akɛ Yehowa Nyɔŋmɔ ejieee nɔnaa lɛ kɛyaaa po lɛ, ebaanyɛ ‘eje gbɛ eha wɔ koni wɔje mli.’ (1 Korintobii 10:13) Esa kadimɔ akɛ atsɛɔ Yehowa akɛ “musuŋtsɔlɛi atsɛ kɛ miishɛjemɔ fɛɛ Nyɔŋmɔ.” (2 Korintobii 1:3, 4) Nyɔŋmɔ baanyɛ ni ekɛ nɔ ni he hiaa wɔ koni wɔŋmɛ wɔtsui shi lɛ aha wɔ, ni wɔyɛ naanɔ wala he hiɛnɔkamɔ.

Nyɔŋmɔ Wiemɔ, ni ji Biblia lɛ woɔ shi akɛ Yehowa “aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” (Kpojiemɔ 21:3, 4) Ani jeŋ ko ni nɔnaa bɛ mli lɛ yɛ naakpɛɛ tsɔ akɛ aaahe aye? Ebaanyɛ eba lɛ nakai kɛji akɛ óhi shi yɛ amanehului amli afii babaoo. Ni kɛlɛ, Nyɔŋmɔ ewo shi yɛ heyeli kɛmiijɛ gbeyeishemɔ kɛ amanehulu mli, ni eyiŋtoo lɛ baaba mli kɛ̃.—Yesaia 55:10, 11.

[Mfonirii ni yɔɔ baafa 9]

Kɛjɛ nijiaŋwujee mli kɛtee heyeli mli