Sanebimɔi ni Jɛ Kanelɔi Adɛŋ

Yɛ Nu Afua lɛ sɛɛ lɛ, Noa tsu okpo ko kɛjɛ adeka lɛ mli, ni eku sɛɛ kɛba ni “mutso baafɔ” ko ma enaa. Nɛgbɛ okpo lɛ ná baafɔ lɛ kɛjɛ?

Biblia lɛ kɛɔ wɔ akɛ, “nui lɛ he shi yɛ shikpɔŋ lɛ nɔ aahu po, ni ehà gɔji ni kwɔlɔ fɛɛ ni yɔɔ ŋwɛi shishi fɛɛ nɔ.” (1 Mose 7:19) Beni nu afua lɛ bɔi miimɔ lɛ, Noa tsu okpo ko shii etɛ—ni yɛ eko fɛɛ eko mli lɛ ehaa otsi kome hoɔ dã. Yɛ nɔ ni ji shii enyɔ lɛ nɔ lɛ, okpo lɛ ku esɛɛ kɛba ní “mutso baafɔ kɔ̃ enaa; ni Noa ná le akɛ nui lɛ emii yɛ shikpɔŋ lɛ nɔ.”—1 Mose 8:8-11.

Yɛ anɔkwale mli lɛ, amrɔ nɛɛ gbɛ ko bɛ ni abaanyɛ atsɔ nɔ ale be ni nu afua lɛ ye yɛ shikpɔŋ lɛ nɔ he ko pɔtɛɛ lɛ mli, ejaakɛ ŋwanejee ko bɛ he akɛ Nu Afua lɛ tsake bɔ ni shikpɔŋ lɛ shikamɔ yɔɔ ha lɛ hiɛ. Yɛ fɛɛ sɛɛ lɛ, eeenyɛ eba lɛ akɛ nui lɛ ta kpokpai babaoo nɔ yɛ bei kplaŋŋ mli, ni no ha tsei lɛ babaoo gboi. Shi kɛlɛ, eyɛ faŋŋ akɛ tsei lɛ ekomɛi tee nɔ amɛhi wala mli, ni no ha amɛbɔi baa ŋmɔŋ tsɛ̃mɔ ekoŋŋ beni nui lɛ emii sɛɛ.

The New Bible Dictionary lɛ kɛɔ yɛ mutso he akɛ: “Kɛji afo afɔ̃ shi lɛ, etsɛ̃rɛɔ ehee kɛjɛɔ eshishifãi lɛ ahe, ni no hewɔ lɛ tsei bibii aaashɛ enumɔ baanyɛ akwɛ̃ ekoŋŋ kɛjɛ eshishifãi lɛ ahe. Bei pii lɛ, mutsei ni eshwɛ fioo ni amɛbaagboi [ni miihe agboi] lɛ nyɛɔ amɛkwɛ̃ɔ yɛ nɛkɛ gbɛ nɔ nɔŋŋ.” The New Schaff-Herzog Encyclopedia of Religious Knowledge lɛ kɛɔ akɛ: “Etamɔ nɔ ni anyɛɛɛ akpata mutso hiɛ.” Adesa ko bɛ ŋmɛnɛ ni le nu afua lɛ mli saji fitsofitso, tamɔ ŋoo naawalɛ ni yɔɔ nu lɛ mli aloo bɔ ni nu lɛ mli edɔ loo emli yɔɔ ŋanii ha lɛ nɛkɛ. No hewɔ lɛ, wɔnyɛŋ wɔná nɔmimaa yɛ bɔ ni nu afua lɛ ná mutsei kɛ kwɛ̃ɛnii krokomɛi lɛ anɔ hewalɛ ha lɛ he.

Shi kɛlɛ, ŋa nɔ mutso nyɛɛɛ ahi shi yɛ kɔɔyɔɔ ŋanii mli, taakɛ eji yɛ gɔji ni nɔ kwɔlɔ anɔ lɛ. Bei pii lɛ, he ni enyɛɔ ekwɛ̃ɔ yɛ ji hei ni nɔkwɔlɛ shɛɛɛ mitai 1,000 ní kɛ́ aja mli lɛ, kɔɔyɔŋ jɔlɛ ŋanii ni yɔɔ jɛmɛ lɛ fe degree Celsius 10 lɛ. Wolo ni ji The Flood Reconsidered lɛ kɛɛ akɛ: “No hewɔ lɛ, Noa nyɛ edamɔ baafɔ ni atse kɛba lɛ nɔ emu sane naa akɛ jɔɔi ni yɔɔ shishigbɛ lɛ amli ebɔi gbimɔ.” Beni Noa ŋmɛɛ okpo lɛ he yɛ otsi sɛɛ lɛ, ekuuu esɛɛ kɛbaaa dɔŋŋ, ni tsɔɔ akɛ okpo lɛ ená kwɛ̃ɛnii babaoo kɛ hei ni sa hu ni ebaanyɛ esɔ̃.—1 Mose 8:12.