Bɔ Ni Wɔjieɔ Wɔsuɔmɔ Kpo Wɔtsɔɔ Nyɔŋmɔ

SUƆMƆ ni anáa kɛha Nyɔŋmɔ lɛ jeee ehe nilee ko kɛkɛ ni anáa. Taakɛ Nyɔŋmɔ tsuji ni yɔɔ je lɛŋ fɛɛ lɛ baanyɛ aye he odase lɛ, anɔkwa suɔmɔ ni mɔ ko yɔɔ kɛha Nyɔŋmɔ lɛ mli waa kɛ́ ená ele esui lɛ, ni emli waa diɛŋtsɛ kɛ́ mɔ lɛ ná ele nɔ ni esumɔɔ, nɔ ni enyɛ̃ɔ, nɔ ni enyãa he, kɛ etaomɔ nii lɛ.

Yehowa ejɛ suɔmɔ mli ekɛ e-Wiemɔ ni ji Biblia ni haa wɔleɔ bɔ ni eji lɛ eha wɔ. Wɔkaseɔ bɔ ni Yehowa tsu shihilɛi srɔtoi ahe nii eha lɛ yɛ mli. Taakɛ bɔ ni wolo ko ni wɔsuɔlɔ ko eŋma wɔ lɛ haa wɔ miishɛɛ babaoo lɛ, nakai nɔŋŋ wɔnáa miishɛɛ kɛ́ wɔna Yehowa sui heei krokomɛi yɛ Biblia lɛ mli lɛ.

Shi kɛlɛ, taakɛ wɔyɔseɔ bei komɛi yɛ wɔshiɛmɔ nitsumɔ lɛ mli lɛ, jeee be fɛɛ be Nyɔŋmɔ he nii ni mɔ ko kaseɔ lɛ haa esumɔɔ lɛ. Yesu kɛɛ Yudafoi komɛi ni hi shi yɛ egbii lɛ amli ni hiɛ esɔɔɔ nii lɛ akɛ: “Nyɛtaoa ŋmalɛi lɛ amli, ejaakɛ nyɛ diɛŋtsɛ nyɛsusuɔ akɛ nomɛi amli nyɛnáa naanɔ wala yɛ, . . . Shi moŋ mikpanyɛ shi akɛ nyɛbɛ Nyɔŋmɔ suɔmɔ yɛ nyɛ mli.” (Yohane 5:39, 42) Mɛi komɛi kɛ afii pii kaseɔ Yehowa suɔmɔ nifeemɔi lɛ ahe nii, shi kɛlɛ suɔmɔ fioo pɛ amɛyɔɔ kɛha lɛ. Mɛni hewɔ? Amɛkɛ hiɛsɔɔ susuuu anɔkwalei ni yɔɔ nɔ ni amɛkaseɔ lɛ amli lɛ ahe. Nɔ ni tamɔɔɔ nakai lɛ, gbɔmɛi anɔkwafoi akpekpei abɔ ni wɔkɛ amɛ kaseɔ Biblia lɛ yɔseɔ akɛ suɔmɔ ni amɛyɔɔ kɛha Nyɔŋmɔ lɛ yaa nɔ edaa. Mɛni hewɔ? Ejaakɛ amɛnyiɛɔ Asaf nɔkwɛmɔnɔ lɛ sɛɛ, tamɔ bɔ nu wɔ hu wɔfee lɛ. Yɛ mɛɛ gbɛ nɔ?

Kɛ Hiɛsɔɔ Ajwɛŋ Nii Anɔ

Asaf tswa efai shi akɛ ebaaná suɔmɔ kɛha Yehowa. Eŋma akɛ: “Mashwie miyiŋ, . . . Matsĩ Yehowa nifeemɔ nii lɛ atã, hɛɛ, makai oblema naakpɛɛ nii lɛ. Majwɛŋ onitsumɔi lɛ fɛɛ he, ni  masusu onifeemɔi lɛ ahe.” (Lala 77:7, 12, 13) Suɔmɔ ni mɔ ko yɔɔ kɛha Nyɔŋmɔ lɛ baafa kɛ́ ejwɛŋ Yehowa gbɛ̀i lɛ ahe taakɛ lalatsɛ lɛ fee lɛ.

Kɛfata he lɛ, niiashikpamɔi ni wɔnáa yɛ Yehowa sɔɔmɔ mli lɛ ni wɔkaiɔ lɛ woɔ wekukpãa ni kã wɔkɛ lɛ teŋ lɛ mli hewalɛ. Bɔfo Paulo kɛɛ akɛ wɔji Nyɔŋmɔ “hefatalɔi nitsulɔi,” ni wekukpãa ni baanyɛ aba nanemɛi ateŋ lɛ ji nɔ ni yɔɔ srɔto kwraa. (1 Korintobii 3:9) Kɛ́ wɔjie suɔmɔ kpo wɔtsɔɔ Yehowa lɛ, ehiɛ sɔɔ no ni ehaa etsui nyɔɔ emli. (Abɛi 27:11) No sɛɛ lɛ, kɛ́ wɔbi Yehowa dɛŋ yelikɛbuamɔ, ni eye ebua wɔ ni wɔtsu naagba pɔtɛɛ ko he nii lɛ, wɔyɔseɔ akɛ ekɛ wɔ yɛ, ni no haa suɔmɔ ni wɔyɔɔ kɛha lɛ lɛ mli kwɔɔ.

Naanyobɔɔ ni yɔɔ mɛi enyɔ ateŋ lɛ mli waa fiofio kɛ́ amɛjie amɛhenumɔi akpo amɛtsɔɔ amɛhe. Nakai nɔŋŋ kɛji akɛ wɔkɛɛ Yehowa nɔ hewɔ ni wɔtuu wɔhe wɔha lɛ lɛ, ewoɔ suɔmɔ ni wɔyɔɔ kɛha lɛ lɛ mli hewalɛ. Ebaaha wɔsusu Yesu wiemɔi akɛ: “Suɔmɔ Nuŋtsɔ o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ! Enɛ ji klɛŋklɛŋ kita” lɛ he. (Marko 12:30) Mɛni wɔbaanyɛ wɔfee koni wɔkɛná nɔmimaa akɛ wɔbaaya nɔ wɔsumɔ Yehowa kɛ wɔtsui fɛɛ, wɔsusuma fɛɛ, wɔjwɛŋmɔ fɛɛ, kɛ wɔnyɛmɔ fɛɛ?

Ní Wɔɔsumɔ Yehowa kɛ Wɔtsui Fɛɛ

Ŋmalɛi lɛ tsiɔ mfonirifeemɔ tsui ni ji mligbɛ gbɔmɔ—ni ji nibii ni wɔshweɔ, wɔsui, kɛ wɔhenumɔi lɛ tã. No hewɔ lɛ wɔtsui muu fɛɛ ni wɔkɛaasumɔ Yehowa lɛ tsɔɔ akɛ, nɔ ni wɔshweɔ titri ji ni wɔsa Nyɔŋmɔ hiɛ. (Lala 86:11) Wɔtsɔɔ akɛ wɔyɛ suɔmɔ ni tamɔ nɛkɛ kɛtsɔ wɔsui ni wɔhaa esaa ehiɛ lɛ nɔ. Wɔbɔɔ mɔdɛŋ koni wɔkase Nyɔŋmɔ kɛtsɔ ‘efɔŋ ni wɔhiɔ kwraa kɛ ekpakpa he ni wɔkpɛtɛɔ’ lɛ nɔ.—Romabii 12:9.

Suɔmɔ ni wɔyɔɔ kɛha Nyɔŋmɔ lɛ náa bɔ ni wɔnuɔ nɔ fɛɛ nɔ he wɔhaa lɛ nɔ hewalɛ. Ákɛ nɔkwɛmɔnɔ lɛ, ekolɛ wɔbaayɔse akɛ wɔnitsumɔ hi waa loo eheɔ wɔbe babaoo, shi ani no nɔ wɔtsui kã? Dabi. Akɛni wɔsumɔɔ Yehowa kɛ wɔtsui fɛɛ hewɔ lɛ, klɛŋklɛŋ kwraa lɛ wɔji Nyɔŋmɔ tsuji. Agbɛnɛ hu, wɔmiisumɔ ni wɔsa wɔfɔlɔi, gbalashihilɛ mli hefatalɔi, kɛ wɔnitsumɔ mli onukpai ahiɛ, shi wɔjieɔ suɔmɔ ni jɛ tsui muu fɛɛ mli ni wɔyɔɔ kɛha Yehowa kpo kɛtsɔ mɔdɛŋ ni wɔbɔɔ koni wɔsa ehiɛ titri lɛ nɔ. Yɛ fɛɛ mli po lɛ, lɛ esa klɛŋklɛŋ gbɛhe yɛ wɔtsui mli.—Mateo 6:24; 10:37.

Ní Wɔɔsumɔ Yehowa kɛ Wɔsusuma Fɛɛ

Nɔ ni wiemɔ “susuma” lɛ tsɔɔ diɛŋtsɛ yɛ Ŋmalɛi lɛ amli ji wɔgbɔmɔtso muu lɛ fɛɛ kɛ agbɛnɛ hu wɔwala. No hewɔ lɛ wɔsusuma fɛɛ ni wɔkɛsumɔɔ Yehowa lɛ tsɔɔ akɛ, wɔkɛ wɔwala tsuɔ nii kɛjieɔ eyi, ni wɔkɛmaa suɔmɔ ni wɔyɔɔ kɛha lɛ lɛ nɔ mi.

 Yɛ anɔkwale mli lɛ, ekolɛ wɔyɛ nibii komɛi ni wɔnáa he miishɛɛ yɛ shihilɛ mli, tamɔ nitsumɔ kasemɔ, nitsumɔ nɔkwɛmɔ, loo weku kwɛmɔ. Shi yɛ nakai beaŋ nɔŋŋ lɛ, wɔmaa susuma fɛɛ ni wɔkɛsumɔɔ Yehowa lɛ nɔ mi kɛtsɔ nii ni esumɔɔ ni wɔfeɔ kɛ agbɛnɛ kɛtsɔ nibii krokomɛi ni wɔkɛwoɔ gbɛhei ni sa mli yɛ wɔwala shihilɛ mli, ni tsɔɔ akɛ ‘wɔtaoɔ maŋtsɛyeli lɛ kɛ ejalɛ lɛ tsutsu.’ (Mateo 6:33) Susuma fɛɛ jamɔ hu tsɔɔ ekãa ni afeɔ. Wɔhaa Yehowa naa akɛ wɔsumɔɔ lɛ kɛtsɔ ekãa ni wɔkɛshiɛɔ Maŋtsɛyeli shɛɛ sane lɛ, hetoo ni woɔ mɔ hewalɛ ni wɔhaa yɛ kpeei ashishi, loo wɔnyɛmimɛi hii loo yei ni ji Kristofoi lɛ ni wɔyeɔ wɔbuaa amɛ lɛ nɔ. Yɛ nɔ fɛɛ nɔ mli lɛ, wɔyaa nɔ ‘wɔjieɔ wɔmusuŋ wɔfeɔ Nyɔŋmɔ suɔmɔnaa nii.’—Efesobii 6:6.

Yesu jie susuma fɛɛ suɔmɔ ni eyɔɔ kɛha Nyɔŋmɔ lɛ kpo kɛtsɔ ehe ni ekwa lɛ nɔ. Ekɛ Nyɔŋmɔ suɔmɔnaa nii ye klɛŋklɛŋ gbɛhe ni ekɛ ehiamɔ nii lɛ ye gbɛhe ni ji enyɔ. Yesu fɔ̃ esɛɛnyiɛlɔi lɛ anine koni amɛkase enɔkwɛmɔnɔ lɛ. Ekɛɛ akɛ: “Kɛji mɔ ko miisumɔ akɛ enyiɛɔ misɛɛ lɛ, ha ní ekwa ehe ní ewó esɛŋmɔtso lɛ ní enyiɛ misɛɛ.” (Mateo 16:24, 25) Wɔhe ni wɔɔkwa lɛ tsɔɔ wɔhe nɔ ni wɔɔjɔɔ. Etsɔɔ akɛ wɔsumɔɔ Nyɔŋmɔ aahu akɛ wɔkɛ wɔhe haa lɛ koni ekwɛ wɔnɔ, taakɛ bɔ ni Israelnyo ni yɔɔ Biblia bei amli lɛ sumɔɔ enuŋtsɔ waa aahu akɛ lɛ diɛŋtsɛ ekɛ ehe haa lɛ kwraa akɛ nyɔŋ lɛ. (5 Mose 15:16, 17) Wɔhe nɔ ni wɔjɔɔ wɔhaa Yehowa lɛ kɛ odaseyeli ni tsɔɔ mɔ yiŋ haa akɛ wɔsumɔɔ lɛ.

Ní Wɔɔsumɔ Yehowa kɛ Wɔjwɛŋmɔ Fɛɛ

Ni wɔɔsumɔ Yehowa kɛ wɔjwɛŋmɔ fɛɛ lɛ tsɔɔ akɛ wɔbɔɔ mɔdɛŋ fɛɛ ni he hiaa koni wɔnu Yehowa sui, eyiŋtoi, kɛ etaomɔ nii ashishi. (Yohane 17:3; Bɔfoi lɛ Asaji 17:11) Wɔjieɔ suɔmɔ ni wɔyɔɔ kɛha Yehowa lɛ kpo wɔtsɔɔ kɛtsɔ wɔjwɛŋmɔŋ nyɛmɔi fɛɛ ni wɔkɛtsuɔ nii kɛyeɔ wɔbuaa mɛi krokomɛi koni amɛhu amɛsumɔ Yehowa lɛ nɔ, kɛ wɔnitsɔɔmɔ mli hesaai hu ni wɔhaa eyaa hiɛ lɛ nɔ. Bɔfo Petro wo ŋaa akɛ: “Nyɛsaa nyɛjwɛŋmɔi kɛha nitsumɔ.” (1 Petro 1:13, NW) Agbɛnɛ hu, wɔbɔɔ mɔdɛŋ koni wɔná mɛi krokomɛi ahe miishɛɛ, titri lɛ nanemɛi Nyɔŋmɔ tsuji. Wɔyɔseɔ amɛshihilɛi, ni wɔkadiɔ beni esa akɛ wɔjie amɛyi loo beni esa akɛ wɔshɛje amɛmii.

Wɔhaa Yehowa naa akɛ wɔsumɔɔ lɛ kɛ wɔjwɛŋmɔ fɛɛ, kɛtsɔ wɔjwɛŋmɔ mli ni wɔjɛɔ wɔbaa wɔhe shi wɔhaa lɛ lɛ nɔ. Wɔbɔɔ mɔdɛŋ koni wɔná esusumɔi, wɔkai lɛ yɛ wɔyiŋkpɛi afeemɔ amli, ni wɔná hekɛnɔfɔɔ akɛ egbɛ lɛ ji gbɛ ni hi fe fɛɛ. (Abɛi 3:5, 6; Yesaia 55:9; Filipibii 2:3-7) Shi beni wɔyaa nɔ wɔjieɔ suɔmɔ ni wɔyɔɔ kɛha Nyɔŋmɔ lɛ kpo lɛ, mɛɛ gbɛ nɔ wɔbaanyɛ wɔtsɔ wɔkɛ wɔnyɛmɔ atsu nii yɛ?

Ní Wɔɔsumɔ Yehowa kɛ Wɔnyɛmɔ Fɛɛ

Oblahii kɛ oblayei babaoo ni yɔɔ Kristofoi asafo lɛ mli lɛ kɛ amɛnyɛmɔ tsuɔ nii kɛjieɔ Yehowa yi. (Abɛi 20:29; Jajelɔ 12:1) Gbɛ kome ni Kristofoi oblahii kɛ oblayei babaoo tsɔɔ nɔ amɛtsɔɔ akɛ amɛsumɔɔ Yehowa kɛ amɛnyɛmɔ fɛɛ lɛ ji, kɛtsɔ amɛhe ni amɛkɛwoɔ gbɛgbamɔ nitsumɔ ni ji be-fɛɛ sɔɔmɔ lɛ mli lɛ nɔ. Yeifɔyei babaoo kɛ amɛhe woɔ sɔɔmɔ nitsumɔ nɛɛ mli beni amɛbii etee skul. Onukpai anɔkwafoi ni yasaraa nyɛmimɛi lɛ yɛ amɛshiai amli kɛfataa amɛ diɛŋtsɛ amɛwekui ahilɛkɛhamɔ he nii ni amɛtsuɔ lɛ he lɛ tsɔɔ akɛ amɛsumɔɔ Yehowa kɛ amɛnyɛmɔ fɛɛ. (2 Korintobii 12:15) Yehowa haa mɛi ni kɛ amɛhiɛ fɔ̃ɔ enɔ lɛ hewalɛ, bɔni afee ni amɛnyɛ amɛkɛ amɛnyɛmɔ fɛɛ ajie eyi, ni amɛkɛjie suɔmɔ ni amɛyɔɔ kɛha lɛ lɛ kpo amɛtsɔɔ.—Yesaia 40:29; Hebribii 6:11, 12.

Wɔsuɔmɔ lɛ baada kɛ́ wɔná yɛ gbɛ ni ja nɔ. No hewɔ lɛ, wɔyaa nɔ wɔheɔ be ni wɔkɛjwɛŋɔ nii anɔ. Wɔkai nɔ ni Yehowa efee kɛha wɔ lɛ kɛ nɔ hewɔ ni eji mɔ ni sa akɛ wɔtuɔ wɔhe wɔhaa lɛ lɛ. Ákɛ Adam seshibii ni yeee emuu lɛ, wɔnyɛŋ wɔfee mɛi ni sa “nii ni Nyɔŋmɔ esaa eto mɛi ni sumɔɔ lɛ lɛ” kɔkɔɔkɔ, shi wɔbaanyɛ wɔtsɔɔ akɛ wɔsumɔɔ Yehowa kɛ wɔsusuma fɛɛ. Nyɛhaa wɔyaa nɔ wɔfea nakai!—1 Korintobii 2:9.

[Mfoniri ni yɔɔ baafa 20]

Wɔjieɔ suɔmɔ kpo wɔtsɔɔ Nyɔŋmɔ kɛtsɔ nifeemɔi anɔ