Nyɔŋmɔ Tsuji Tamɔ Tsei Yɛ Mɛɛ Gbɛ̀i Anɔ?

BENI lalatsɛ lɛ wieɔ mɔ ko ni nyáa Biblia shishitoo mlai ahe, ni ekɛtsuɔ nii yɛ ewala shihilɛ mli lɛ he lɛ, eŋma akɛ: “Etamɔ tso ni atɛo yɛ faai atoi, ni woɔ eyibii yɛ ebe lɛ mli, ni eyibaai kpɔŋ, ni nɔ fɛɛ nɔ ni efeɔ lɛ shwereɔ.” (Lala 1:1-3) Mɛni hewɔ esa jogbaŋŋ ákɛ akɛ Nyɔŋmɔ tsuji aaato tsei ahe lɛ?

Tsei baanyɛ ahi shi bei babaoo diɛŋtsɛ. Ákɛ nɔkwɛmɔnɔ lɛ, akɛɔ akɛ mutsei komɛi ni yɔɔ Mediteranea kpokpai lɛ anɔ lɛ eye afii akpe kome kɛmiimɔ afii akpei enyɔ. Nakai nɔŋŋ hu, baobab tsei ni yɔɔ Afrika teŋgbɛ lɛ yeɔ afii babaoo, ni aheɔ ayeɔ akɛ tso ko ni yɔɔ California lɛ hu eye aaafee afii 4,600. Bei pii lɛ, tsei ni dara lɛ ahe baa sɛɛnamɔ kɛhaa tsei krokomɛi ni bɔle amɛ lɛ. Ákɛ nɔkwɛmɔnɔ lɛ, tsei kakadaji lɛ haa tsei ni darako lɛ hɔlɔ, ni enɔ baji ni tsɛrɛɔ shwieɔ shi lɛ haa sũ ni yɔɔ tsei lɛ ashishi lɛ baa nii.

Bei pii lɛ anaa akɛ tsei ni nɔ kwɔlɔ fe fɛɛ yɛ je lɛŋ lɛ kwɛ̃ɔ kutuu yɛ kooi amli, hei ni tsei lɛ yeɔ amɛbuaa amɛhe yɛ lɛ. Akɛni ekolɛ amɛshishifãi baláa amɛhe hewɔ lɛ, tsei babaoo baanyɛ adamɔ ahum naa ákɛ kuu fe bɔ ni tso ko ni yɔɔ jwɛifɔ shikpɔŋ nɔ lɛ baanyɛ afee. Tsei ashishifã babaoo lɛ hu yeɔ ebuaa tso ko, koni ená nu falɛ ni sa, kɛ niyenii kpakpa ni jɛɔ sũ lɛ mli lɛ. Yɛ shihilɛi komɛi amli lɛ, shishifãi lɛ gbuɔ shi kɛyaa shikpɔŋ lɛ shishi shɔŋŋ fe tso lɛ kɛlɛ, loo shishifãi lɛ baanyɛ ni amɛlɛɛ fe niji ni tso lɛ egbála lɛ.

Ekolɛ bɔfo Paulo miiwie tso ko he yɛ gbɛ ni bɛ tɛ̃ɛ nɔ, beni etsɔɔ mli akɛ esa akɛ Kristofoi ‘aya nɔ amɛnyiɛ yɛ Kristo mli, ní amɛshishifãi amɔmɔ shi, ni amamɔ amɛ yɛ enɔ, ní amɛfĩ shi yɛ hemɔkɛyeli lɛ mli’ lɛ. (Kolosebii 2:6, 7) Yɛ anɔkwale mli lɛ, Kristofoi baanyɛ ni amɛdamɔ shi shiŋŋ, kɛji akɛ amɛshishifãi mɔ shi jogbaŋŋ yɛ Kristo mli.—1 Petro 2:21.

Mɛɛ gbɛ̀i krokomɛi anɔ ekolɛ abaanyɛ ni akɛ Nyɔŋmɔ tsuji ato tsei ahe yɛ? Ojogbaŋŋ, taakɛ bɔ ni tsei ni ebua amɛhe naa yɛ hekome lɛ náa yelikɛbuamɔ kɛjɛɔ tsei ni bɛŋkɛ lɛ aŋɔɔ lɛ, nakai nɔŋŋ mɛi fɛɛ ni kɛ Kristofoi asafo lɛ bɔɔ gbagbalii lɛ anine shɛɔ yelikɛbuamɔ nɔ kɛjɛɔ nanemɛi heyelilɔi adɛŋ. (Galatabii 6:2) Kristofoi anɔkwafoi ni edara yɛ mumɔŋ, ni yɔɔ mumɔŋ shishifãi ni yaa shɔŋŋ lɛ yeɔ amɛbuaa heyelilɔi heei koni amɛkã he amɛfi shi shiŋŋ yɛ hemɔkɛyeli lɛ mli, yɛ be mli ni amɛkɛ shitee-kɛ-woo ni tamɔ ahum po kpeɔ lɛ mli. (Romabii 1:11, 12) Mɛi heei ni ebatsɔmɔ Kristofoi lɛ baanyɛ amɛya amɛhiɛ yɛ Nyɔŋmɔ tsuji ni yɔɔ niiashikpamɔ babaoo lɛ “ahɔ̃ɔŋ” shishi. (Romabii 15:1) Ni jeŋ muu fɛɛ Kristofoi asafo lɛ mlibii lɛ baanyɛ aná mumɔŋ niyenii kpakpa ni wajeɔ mɔ, ní “jalɛ tsei” ni ji shwɛɛnii ni afɔ amɛ mu lɛ kɛhaa lɛ he sɛɛ.—Yesaia 61:3.

Kwɛ miishɛɛ ni eji akɛ Nyɔŋmɔ tsuji fɛɛ yɛ gbɛkpamɔ akɛ amɛaaná shiwoo ni yɔɔ Yesaia 65:22 ni kɛɔ akɛ: “Mimaŋ lɛ gbii aaatamɔ tsei agbii” lɛ amlibaa mli niiashikpamɔ.

[He ni Mfoniri ni yɔɔ baafa 28 lɛ Jɛ]

Godo-Foto