Gbijurɔyeli ko ní Saa Ohe

BENI Yesu Kristo yɔɔ shikpɔŋ nɔ lɛ, eto gbijurɔyeli ko ni woɔ Nyɔŋmɔ hiɛ nyam lɛ shishi. Enɛ pɛ ji jamɔ mli nifeemɔ ni efã esɛɛnyiɛlɔi lɛ tɛ̃ɛ akɛ amɛye. No ji Nuŋtsɔ lɛ Gbɛkɛnaashi Niyenii lɛ, ni ale lɛ hu akɛ Naagbee Gbɛkɛnaashi Niyenii lɛ.

Feemɔ he mfoniri ni ookwɛ nifeemɔi ni tsɔ nakai be lɛ hiɛ ni anaaa bo. Yesu kɛ ebɔfoi lɛ eba ŋwɛitsu ko ni yɔɔ Yerusalem lɛ mli koni amɛbaye Yudafoi a-Hehoo gbijurɔ lɛ. Amɛgbe amɛ kusum naa Hehoo niyenii, ni nibii ni fata he ji toobi ni asha, shwiebaa ni joɔ, aboloo ni masha bɛ mli kɛ wein tsuru lɛ yeli naa. Ashwie bɔfo Yuda Iskariot ni yeee anɔkwa lɛ, ni etsɛŋ ni ebaatsɔɔ e-Nuŋtsɔ lɛ sɛɛgbɛ. (Mateo 26:17-25; Yohane 13:21, 26-30) Eshwɛ Yesu kɛ ebɔfoi anɔkwafoi 11 lɛ pɛ. Amɛteŋ mɔ kome ji Mateo.

Taakɛ sane ni Mateo kɛ ehiŋmɛi ye he odase lɛ tsɔɔ lɛ, nɛkɛ ji bɔ ni Yesu to Nuŋtsɔ lɛ Gbɛkɛnaashi Niyenii lɛ shishi: “Yesu kɔ aboloo [ni masha bɛ mli], ni ejɔɔ nɔ ni ekumɔ mli, ni eŋɔha ekaselɔi lɛ, ni ekɛɛ: Nyɛhea, nyɛyea! Enɛ ji migbɔmɔtso lɛ. Ni ewó kpulu [ni wein yɔɔ mli] lɛ, ni eda shi, ni eŋɔha amɛ ni ekɛɛ: Nyɛ fɛɛ nyɛnua eko! ejaakɛ enɛ ji milá ni ji kpaŋmɔ hee lɛ nɔ̃ lɛ, ní afɔse ashwie shi yɛ mɛi pii ahewɔ ha eshaifaa lɛ.”—Mateo 26:26-28.

Mɛni hewɔ Yesu to Nuŋtsɔ lɛ Gbɛkɛnaashi Niyenii lɛ shishi? Beni efeɔ nakai lɛ, mɛni hewɔ ekɛ aboloo ni masha bɛ mli kɛ wein tsuru tsu nii lɛ? Ani esa akɛ Kristo sɛɛnyiɛlɔi lɛ fɛɛ aye okadi nibii nɛɛ eko? Shii enyiɛ esa akɛ aye niyenii nɛɛ? Ni ani shishinumɔ diɛŋtsɛ yɛ he kɛha bo?