Ani Esa akɛ Wɔbi Yelikɛbuamɔ yɛ Ŋwɛibɔfoi Adɛŋ?

ANI eja gbɛ akɛ aaabi ŋwɛibɔfoi ayelikɛbuamɔ yɛ haomɔ bei amli? Mɛi pii susuɔ nakai. New Catholic Encyclopedia lɛ kɛɛ yɛ anɔkwale mli akɛ: “Mɔ sɔleɔ ehaa . . . ŋwɛibɔfoi . . . shi efeɔ nakai kɛ shishinumɔ akɛ amɛbaadamɔ mli amɛha wɔ yɛ Nyɔŋmɔ hiɛ.” Ani esa akɛ wɔha ŋwɛibɔfoi adamɔ mli amɛha wɔ?

Nyɔŋmɔ Wiemɔ lɛ tsĩɔ Nyɔŋmɔ ŋwɛibɔfoi anɔkwafoi enyɔ ni ji Michael kɛ Gabriel pɛ agbɛi tã. (Daniel 8:16; 12:1; Luka 1:26; Yuda 9) Akɛni atsĩ gbɛii nɛɛ atã yɛ Biblia lɛ mli hewɔ lɛ, wɔyɔseɔ akɛ ŋwɛibɔfo fɛɛ ŋwɛibɔfo ji mumɔŋ bɔɔ nɔ ni yɔɔ egbɛi, jeee nyɛmɔ loo hewalɛ ko kɛkɛ ni bɛ gbɔmɔtso. Kɛlɛ, ŋwɛibɔfoi komɛi sumɔɔɔ ni ale amɛgbɛi. Ákɛ nɔkwɛmɔnɔ lɛ, beni Yakob bi ŋwɛibɔfo ko ni basara lɛ lɛ koni etsɔɔ lɛ egbɛi lɛ, etsɔɔɔ lɛ. (1 Mose 32:29; Kojolɔi 13:17, 18) Akɛ ŋwɛibɔfoi agbɛi ni ato naa haaa wɔ yɛ Biblia lɛ mli, no hewɔ lɛ etsiɔ adesai anaa koni amɛkagbala amɛjwɛŋmɔ kɛtee amɛnɔ babaoo.

Nɔ ni fata nitsumɔi ni ŋwɛibɔfoi tsuɔ lɛ ahe ji shɛɛ saji ni amɛkɛjɛɔ Nyɔŋmɔ ŋɔɔ kɛyahaa adesai. Yɛ anɔkwale mli lɛ, Hebri kɛ Hela shishijee wiemɔi ni atsɔɔ shishi akɛ “bɔfo” lɛ tsɔɔ “tsulɔ.” Shi kɛlɛ, ŋwɛibɔfoi sɔmɔɔɔ akɛ mlidamɔlɔi ni kɛ adesai asɔlemɔi baa Ŋwɛiflooflonyo lɛ maŋtsɛsɛi lɛ hiɛ. Nyɔŋmɔ ekpɛ eyiŋ ákɛ akɛ sɔlemɔi atsɔ e-Bi Yesu Kristo, mɔ ni kɛɛ akɛ: “Nɔ fɛɛ nɔ he fai ni nyɛaakpa tsɛ lɛ yɛ migbɛi anɔ lɛ eŋɔha nyɛ” lɛ nɔ.—Yohane 15:16; 1 Timoteo 2:5.

Yehowa Nyɔŋmɔ jeee mɔ ni bɛ deka kwraa ni ekɛaabo wɔtoi kɛji akɛ wɔtsi wɔbɛŋkɛ lɛ yɛ gbɛ kpakpa nɔ. Biblia lɛ kɛ nɔmimaa nɛɛ haa akɛ: “Yehowa ebɛŋkɛɔ mɛi fɛɛ ni tsɛɔ lɛ lɛ, mɛi fɛɛ ni tsɛɔ lɛ yɛ anɔkwale mli lɛ.”—Lala 145:18.