Ani Aafee Nyɔŋmɔ Suɔmɔnaa Nii?

“Afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”​—Mateo 6:10.

JULIO kɛ Christina miikwɛ beni amɛbii ejwɛ shã yɛ la mli aahu kɛbote gbele mli yɛ gbɛ ni yɔɔ gbeyei waa nɔ. Tsɔne kudɔlɔ ko ni etɔ dãa lɛ kɛ etsɔne yatutua amɛkar ni ma shi lɛ, ni ehere kɛ la. Ahere amɛbi ni ji enumɔ, ni ji Marcos yiwala kɛjɛ la ni tsoɔ grigri lɛ mli, shi la lɛ shã egbɔmɔtso, ni ehewolo tsake bɔ ni ehiii nɔ ko kwraa feemɔ. No mli lɛ, eye afii nɛɛhu. Etsɛ tsui kumɔ kɛ awerɛhoyeli. Ekɛ wiemɔ nɛɛ shɛje eweku lɛ mii akɛ: “Esa akɛ wɔnu shishi akɛ, Nyɔŋmɔ suɔmɔnaa nii nɛ, kɛ eji nɔ kpakpa, nɔ fɔŋ, loo nɔ kroko jio.”

Kɛji oshara ni naa wa ni tamɔ nɛkɛ ba lɛ, mɛi babaoo feɔ amɛnii yɛ nakai gbɛ nɔŋŋ nɔ. Amɛsusuɔ akɛ, ‘Kɛji akɛ Nyɔŋmɔ ji mɔ ko ni yɔɔ hewalɛ fe fɛɛ ni esusuɔ wɔ he lɛ, no lɛ, yɛ gbɛ ko nɔ lɛ esa akɛ nɔ ni baa lɛ aba kɛha wɔhilɛ-kɛhamɔ, eyɛ mli akɛ ekolɛ eshishinumɔ baawa kɛha wɔ moŋ.’ Ani okpɛlɛɔ nɔ nakai?

Bei pii lɛ, adamɔɔ Yesu wiemɔi ni yɔɔ nɔ ni atsɛɔ lɛ akɛ Nuŋtsɔ lɛ Sɔlemɔ lɛ mli, ni awie he yɛ yiteŋgbɛ lɛ nɔ asusuɔ akɛ nɔ fɛɛ nɔ ni baa lɛ jieɔ Nyɔŋmɔ suɔmɔnaa nii akpo, kɛ́ eji nɔ kpakpa loo nɔ fɔŋ jio. Aafee Nyɔŋmɔ suɔmɔnaa nii yɛ ŋwɛi, aloo jeee nakai? Ani sɔlemɔ ni wɔsɔleɔ akɛ “afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ,” etsɔɔɔ akɛ wɔmiikpɛlɛ nɔ akɛ nibii ni baa yɛ shikpɔŋ nɔ lɛ ji Nyɔŋmɔ suɔmɔnaa nii?

Mɛi pii ayiŋ feɔ amɛ kɔshikɔshi yɛ susumɔ nɛɛ he. Kɛha amɛ lɛ, ehaa Nyɔŋmɔ bafeɔ mɔ ni susuuu ebɔɔnii ni ji adesai lɛ ahenumɔi ahe. Amɛbiɔ akɛ, ‘Te aaafee tɛŋŋ ni Nyɔŋmɔ ni yɔɔ suɔmɔ lɛ aaasumɔ akɛ nibii ni yɔɔ gbeyei aba gbɔmɛi ni efeko nɔ ko lɛ anɔ lɛ? Kɛji akɛ nɔ ko yɛ ni Nyɔŋmɔ miisumɔ ni wɔkase kɛjɛ nibii fɔji ni baa lɛ amli lɛ, no lɛ mɛɛ nikasemɔ nɛkɛ ebaanyɛ eji?’ Ekolɛ nakai ji bɔ ni onuɔ he.

Kaselɔ Yakobo, ni eji Yesu nyɛbi lɛ, ŋma kɛkɔ enɛ he akɛ: “Kɛji aaka mɔ ko lɛ, ekakɛɛ akɛ: Nyɔŋmɔ ŋɔɔ ajɛ aka mi. Ejaakɛ Nyɔŋmɔ lɛ akaaa lɛ yɛ nifɔji agbɛfaŋ, ni lɛ diɛŋtsɛ hu ekaaa mɔ ko.” (Yakobo 1:13) Jeee Nyɔŋmɔ ŋɔɔ nibii fɔji jɛɔ kɛbaa. Belɛ, eka shi faŋŋ akɛ, jeee nɔ fɛɛ nɔ ni baa yɛ shikpɔŋ nɔ ŋmɛnɛ lɛ ji Nyɔŋmɔ suɔmɔnaa nii. Ŋmalɛi lɛ hu wieɔ adesai asuɔmɔnaa nii, jeŋmajiaŋbii asuɔmɔnaa nii, kɛ Abonsam po suɔmɔnaa nii ahe. (Yohane 1:13; 2 Timoteo 2:26; 1 Petro 4:3) Ani okpɛlɛɔ nɔ akɛ nɔ ni ba Julio kɛ Christina weku lɛ nɔ lɛ nyɛŋ afee nɔ ko ni ŋwɛi Tsɛ ni yɔɔ suɔmɔ lɛ sumɔɔ ni eba?

Belɛ, mɛni Yesu tsɔɔ beni etsɔɔ ekaselɔi lɛ koni amɛsɔle akɛ: “Afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ”? Ani eji nibimɔ ko kɛkɛ akɛ Nyɔŋmɔ kɛ ehe awo shihilɛi pɔtɛɛ komɛi amli, loo ani Yesu miitsɔɔ wɔ koni wɔsɔle kɛha nɔ ko ni he hiaa waa ni hi fe fɛɛ, ni ji tsakemɔ ko ni mɔ fɛɛ mɔ baanyɛ akpa gbɛ? Nyɛhaa wɔpɛia nɔ ni Biblia lɛ yɔɔ kɛɛmɔ yɛ enɛ he lɛ mli.

[Hei ni Mfonirii ni yɔɔ baafa 3 lɛ Jɛ]

Kar: Dominique Faget-STF/AFP/Getty Images; gbekɛ: FAO photo/B. Imevbore