Beni Afeɔ Nyɔŋmɔ Suɔmɔnaa Nii yɛ Shikpɔŋ lɛ Nɔ

BENI Yesu tsɔɔ ekaselɔi lɛ koni amɛsɔle akɛ, “Afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ,” no mli lɛ, eewie akɛ mɔ ko ni kɛ Tsɛ lɛ ehi shi yɛ ŋwɛi. (Mateo 6:10; Yohane 1:18; 3:13; 8:42) Dani Yesu batsɔ adesa lɛ, no mli lɛ ehi shi yɛ be ko ni nɔ fɛɛ nɔ ni baa yɛ ŋwɛi kɛ shikpɔŋ nɔ lɛ ji nibii ni kɛ Nyɔŋmɔ suɔmɔnaa nii kpãa gbee lɛ mli. Eji nitsumɔ be ko ni yɔɔ miishɛɛ ni haa mɔ tsui nyɔɔ emli.—Abɛi 8:27-31.

Nyɔŋmɔ klɛŋklɛŋ nibɔɔ nii lɛ ji mumɔŋ bɔɔnii, ‘ebɔfoi lɛ, hewalɔi ekãalɔi ní yeɔ ewiemɔ lɛ nɔ, ní boɔ ewiemɔ lɛ gbee toi.’ Amɛji “esɔɔlɔi ní feɔ esuɔmɔnaa nii.” (Lala 103:20, 21) Ani amɛteŋ mɔ fɛɛ mɔ yɛ nyɛmɔ ni ekɛaahala nɔ ni lɛ diɛŋtsɛ esumɔɔ? Hɛɛ, ni beni abɔ shikpɔŋ lɛ, nɛkɛ ‘Nyɔŋmɔ bii nɛɛ fɛɛ kwa bɔ oshe.’ (Hiob 38:7) Amɛ oshebɔɔ lɛ jie miishɛɛ ni amɛná yɛ Nyɔŋmɔ yiŋtoi lɛ ahe lɛ kpo, ni amɛha amɛsuɔmɔnaa nii kɛ enɔ lɛ kpã gbee.

Beni Nyɔŋmɔ ebɔ shikpɔŋ lɛ sɛɛ lɛ, esaa nɔ koni adesai ahi nɔ, ni yɛ naagbee lɛ, ebɔ klɛŋklɛŋ nuu kɛ yoo lɛ. (1 Mose, yitso 1) Ani enɛ hu sa oshebɔɔ? Sane ni aŋma afɔ̃ shi ni jɛ mumɔŋ lɛ kɛɔ akɛ: “Ni Nyɔŋmɔ kwɛ nibii fɛɛ ni efee lɛ, ni naa, ehi naakpa,” hɛɛ, tɔmɔ ko kwraa bɛ he, eja kɛmɔ shi.—1 Mose 1:31.

Mɛni ji Nyɔŋmɔ suɔmɔnaa nii kɛha wɔ klɛŋklɛŋ fɔlɔi lɛ kɛ bii ni amɛbaafɔ lɛ? Taakɛ 1 Mose 1:28 lɛ tsɔɔ lɛ, nakai suɔmɔnaa nii lɛ hu ji nɔ̃ kpakpa: “Nyɔŋmɔ jɔɔ amɛ, ni Nyɔŋmɔ kɛɛ amɛ akɛ: Nyɛfɔa ni nyɛyi afáa ni nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.” Bɔni afee ni wɔ klɛŋklɛŋ fɔlɔi lɛ anyɛ atsu nakai nitsumɔ ni yɔɔ naakpɛɛ lɛ he nii lɛ, ebaabi ni amɛya nɔ amɛhi wala mli—kɛya naanɔ—ni nakai nɔŋŋ ebaabi yɛ bii ni amɛbaafɔ lɛ agbɛfaŋ. Nɔ ko nɔ ko bɛ ni tsɔɔ akɛ osharai, jalɛsane ni ayeee, tsui kuumɔ, loo gbele baaba.

Eji be ko ni afee Nyɔŋmɔ suɔmɔnaa nii yɛ ŋwɛi kɛ shikpɔŋ nɔ. Mɛi ni hi shi yɛ gbɛ ni kɛ esuɔmɔnaa nii kpãa gbee lɛ nɔ lɛ, ná miishɛɛ babaoo yɛ no feemɔ mli. Mɛni tɔ̃tɔ?

Mpoatswaa ko ni akpaaa gbɛ, ni kɔɔ Nyɔŋmɔ suɔmɔnaa nii ahe lɛ te shi. Dabi, ejeee sane ko ni anyɛŋ hetoo aha. Kɛlɛ, etee tsui kuumɔ kɛ awerɛhoyeli ni heɔ be kpalaŋŋ, ni kɛ yiŋfutumɔ baa Nyɔŋmɔ suɔmɔnaa nii kɛha adesai lɛ he lɛ shi. Enɛ esa wɔ fɛɛ wɔhe. Mɛni ji nakai mpoatswaa lɛ?

Nyɔŋmɔ Suɔmɔnaa Nii yɛ Atuatsemɔ Be ko Mli

“Nyɔŋmɔ” mumɔŋ “bii” lɛ ateŋ mɔ kome na akɛ ebaanyɛ efite Nyɔŋmɔ yiŋ ni eto kɛha adesai lɛ, ni jwɛŋmɔ ni hɔ enifeemɔ lɛ sɛɛ ji koni lɛ diɛŋtsɛ ená he sɛɛ. Babaoo ni nɛkɛ mumɔŋ bɔɔ nɔ̃ nɛɛ susu nɔ ni etaoɔ efee lɛ he lɛ, babaoo ni esusu akɛ ebaanyɛ etsu he nii, ni babaoo ni ená he miishɛɛ ji no. (Yakobo 1:14, 15) Ekolɛ esusu akɛ, kɛ́ enine nyɛ eshɛ klɛŋklɛŋ hefatalɔi enyɔ lɛ anɔ ni amɛbo lɛ toi moŋ fe nɔ ni amɛaabo Nyɔŋmɔ toi lɛ, no baanyɛ Nyɔŋmɔ nɔ koni ekpɛlɛ maŋtsɛ ko ni kɛ lɛ baashi mple lɛ nɔ. Ekolɛ esusu akɛ Nyɔŋmɔ kpataŋ  amɛhiɛ, ejaakɛ no baatsɔɔ akɛ Nyɔŋmɔ nyɛɛɛ aye omanye yɛ eyiŋtoo lɛ mli. Yɛ no najiaŋ lɛ, ehe bahia ni Yehowa Nyɔŋmɔ atsake eyiŋtoi lɛ ahiɛ, ni eŋmɛ nɛkɛ mumɔŋ bi ni adesai ni E-bɔ amɛ lɛ baafee toiboo amɛha lɛ agbɛnɛ lɛ gbɛ koni eya nɔ ehi gbɛhe ni eyɔɔ mli lɛ mli. Esa jogbaŋŋ akɛ yɛ sɛɛ mli lɛ atsɛ nakai atuatselɔ lɛ akɛ Satan, ni shishi ji, Shitee-kɛ-wolɔ.—Hiob 1:6.

Satan jɛ lɛ diɛŋtsɛ esuɔmɔ mli ni etee yoo lɛ ŋɔɔ. Enyɛ enɔ koni ekpoo Nyɔŋmɔ suɔmɔnaa nii lɛ koni efee mɔ ni baaye lɛ diɛŋtsɛ ehe nɔ, ni ekɛɛ akɛ: “Jeee gboimɔ nyɛaagboi . . . nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” (1 Mose 3:1-5) Kɛha yoo lɛ, enɛ bafee tamɔ heyeli, ni ekpɛlɛ nɔ oookɛɛ eji shihilɛ gbɛ ni hi fe fɛɛ. Yɛ sɛɛ mli lɛ, etsɔ̃ ewu lɛ yiŋ ni lɛ hu ebafata ehe.—1 Mose 3:6.

Jeee enɛ ji Nyɔŋmɔ yiŋtoo kɛha mɛi enyɔ lɛ. No amɛ diɛŋtsɛ amɛsumɔɔ. Ni nɔ ni baajɛ mli aba lɛ ebahiŋ kwraa. Nyɔŋmɔ ekɛɛ amɛ momo akɛ gbɛ ni tamɔ nakai kɛ gbele baaba amɛnɔ. (1 Mose 3:3) Abɔɔɔ amɛ koni amɛye amɛ diɛŋtsɛ amɛhe nɔ yɛ omanyeyeli mli ni Nyɔŋmɔ yelikɛbuamɔ bɛ mli. (Yeremia 10:23) Kɛfata he lɛ, amɛbaatsɔmɔ mɛi ni yeee emuu, ni yɛ no sɛɛ lɛ, amɛkɛ emuu ni ayeee kɛ gbele baatsɛŋe bii ni amɛbaafɔ lɛ. (Romabii 5:12) Satan nyɛɛɛ atsĩ nibii ni baajɛ mli kɛba nɛɛ anaa.

Ani nɛkɛ nibii ni ba nɛɛ tsake Nyɔŋmɔ yiŋtoo, loo esuɔmɔnaa nii kɛha adesai kɛ shikpɔŋ lɛ kwraa? Dabi. (Yesaia 55:9-11) Shi amɛtée sanebimɔi diɛŋtsɛ komɛi ashi ni ehe bahia ni aha hetoo: Ani adesai baanyɛ ‘atsɔ tamɔ Nyɔŋmɔ, ni amɛle ekpakpa kɛ efɔŋ,’ taakɛ Satan kɛɛ lɛ? No ji akɛ, kɛji aŋmɛ gbɛ ni be shwie mli lɛ, ani wɔ diɛŋtsɛ wɔbaanyɛ wɔkpɛ wɔyiŋ yɛ nɔ ni ja kɛ nɔ ni ejaaa he, nɔ ni sɛɛnamɔ yɔɔ he kɛ nɔ ni yeɔ awui he, yɛ shihilɛ gbɛ̀i srɔtoi fɛɛ amli? Ani esa akɛ afee toiboo ni yeɔ emuu aha Nyɔŋmɔ, akɛni gbɛ ni etsɔɔ nɔ eyeɔ nɔ lɛ hi fe fɛɛ lɛ hewɔ? Ani esa akɛ aba he shi kwraa aha esuɔmɔnaa nifeemɔ? Te obaaha saji nɛɛ ahetoo oha tɛŋŋ?

Gbɛ kome pɛ yɔɔ ni abaanyɛ atsɔ nɔ akɛna saji nɛɛ anaa yɛ bɔɔ nii ni yɔɔ nilee lɛ fɛɛ ahiɛ: Ní aŋmɛ mɛi ni sumɔɔ koni amɛye amɛ diɛŋtsɛ amɛhe nɔ lɛ agbɛ koni amɛfee nakai yɛ omanyeyeli mli. Gbe ni aaagbe amɛ kɛkɛ lɛ haŋ ana saji ni atee lɛ shi lɛ anaa. Ní aaaŋmɛ adesai aweku lɛ gbɛ koni amɛya nɔ amɛhi shi kɛyashi be ko ni sa mli lɛ baatsu saji ahe nii ejaakɛ nɔ ni baajɛ mli aba lɛ baafee faŋŋ. Kɛtsɔ kɛɛmɔ ni Nyɔŋmɔ kɛɛ yoo lɛ akɛ ebaafɔ bii lɛ nɔ lɛ, etsɔɔ akɛ nɛkɛ gbɛ nɔ ebaatsɔ etsu saji ahe nii. No hewɔ lɛ, adesai aweku ko baaje shishi. Enɛ hewɔ wɔyɔɔ wala mli ŋmɛnɛ lɛ!—1 Mose 3:16, 20.

Shi kɛlɛ, enɛ etsɔɔɔ akɛ, Nyɔŋmɔ baaŋmɛ adesai kɛ mumɔŋ bi ni tse atua lɛ gbɛ koni amɛfee nɔ fɛɛ nɔ ni amɛsumɔɔ. Nyɔŋmɔ eŋmɛɛɛ ejeŋ muu fɛɛ maŋtsɛ ni eji lɛ he, loo ni eeetsake eyiŋtoo. (Lala 83:19) Eha enɛ fee faŋŋ kɛtsɔ gba ni egba efɔ̃ shi akɛ ebaakpata mɔ ni kɛ atuatsemɔ ba lɛ hiɛ, kɛ nibii gbohii ni baajɛ mli aba lɛ fɛɛ sɛɛ ni ebaafo lɛ nɔ. (1 Mose 3:15) No hewɔ lɛ, kɛjɛ shishijee mli tɔ̃ɔ lɛ, adesai aweku lɛ ná heyeli he shiwoo.

Shi dani nakai be lɛ aaashɛ lɛ, wɔ klɛŋklɛŋ fɔlɔi lɛ etsi amɛ diɛŋtsɛ kɛ bii ni amɛbaafɔ wɔsɛɛ lɛ kɛjɛ Nyɔŋmɔ nɔyeli lɛ shishi. Kɛji akɛ Nyɔŋmɔ baatsĩ nibii ni yɔɔ mɔbɔ ni baajɛ  amɛyiŋkpɛɛ lɛ mli aba lɛ naa lɛ, no lɛ ebaabi ni ekɛ esuɔmɔnaa nii anyɛ amɛnɔ yɛ amɛnifeemɔi fɛɛ amli. Ebaafee tamɔ nɔ ni aŋmɛko amɛgbɛ ni amɛye amɛhe kɛjɛ Nyɔŋmɔ nɔyeli shishi.

Shi kɛlɛ, aŋkroaŋkroi baanyɛ ahala Nyɔŋmɔ nɔyeli. Amɛbaanyɛ amɛkase nɔ ni Nyɔŋmɔ suɔmɔnaa nii ji kɛha mɛi ni yɔɔ yɛ nɛkɛ be nɛɛ mli lɛ he nii koni amɛtiu sɛɛ kpaakpa bɔ in amɛaanyɛ. (Lala 143:10) Kɛlɛ, amɛyeŋ amɛhe kɛjɛŋ naagbai ahe, shii abɔ ni anako sane ni kɔɔ adesai aheyeli kwraa he lɛ naa lɛ.

Mra be mli tɔŋŋ ajɛ ana nibii gbohii ni baajɛ mɔ diɛŋtsɛ yiŋkpɛi afeemɔ mli aba lɛ. Kain, ni ji adesai aweku lɛ kromɔbi lɛ, gbe enyɛmi nuu Habel ejaakɛ “lɛ diɛŋtsɛ enitsumɔi lɛ efɔji ni, shi enyɛmi lɛ nɔ̃ lɛ ja.” (1 Yohane 3:12) Jeee Nyɔŋmɔ suɔmɔnaa nii ji enɛ, ejaakɛ Nyɔŋmɔ bɔ Kain kɔkɔ ni yɛ sɛɛ mli lɛ, egbala etoi. (1 Mose 4:3-12) Kain hala gbɛ ni Satan kɛha, ni ji lɛ diɛŋtsɛ esuɔmɔnaa nii ni eeefee lɛ; no hewɔ lɛ, ‘ejɛ mɔ fɔŋ lɛ mli.’ Mɛi krokomɛi fee nakai nɔŋŋ.

Beni adesai ehi shikpɔŋ lɛ nɔ nɔ ni fa fe afii 1,500 sɛɛ lɛ, ‘Shikpɔŋ lɛ nɔ fite yɛ Nyɔŋmɔ hiɛ, ni awo shikpɔŋ lɛ nɔ obɔ kɛ yiwalɛ.’ (1 Mose 6:11) Ehe bahia ni afee nɔ ko ni akɛbaa shikpɔŋ lɛ yi kɛjɛ fitemɔ mli. Nyɔŋmɔ tsu he nii kɛtsɔ nu afua ni ekɛba je lɛŋ fɛɛ ni ehere weku kome pɛ ni feɔ jalɛ nii lɛ yiwala, be mli ni amɛka he amɛyɔɔ wala mli lolo lɛ nɔ—Noah, eŋa, ebihii, kɛ amɛŋamɛi. (1 Mose 7:1) Wɔ fɛɛ wɔjɛ amɛmli.

Yɛ adesai ayinɔsane be mli kɛjɛ nakai be lɛ kɛbaa nɛɛ, Nyɔŋmɔ kɛ gbɛtsɔɔmɔ eha mɛi ni sumɔɔ akɛ amɛle esuɔmɔnaa nii lɛɛlɛŋ lɛ. Ekɛ mumɔ tsirɛ hii anɔkwafoi koni amɛŋmala ewiemɔi amɛshwie shi amɛha mɔ fɛɛ mɔ ni kwɛɔ lɛ gbɛ kɛha gbɛtsɔɔmɔ lɛ. Aŋmala nɛkɛ wiemɔi nɛɛ ashwie shi yɛ Biblia lɛ mli. (2 Timoteo 3:16) Ejɛ suɔmɔ mli eŋmɛ adesai anɔkwafoi agbɛ ni amɛkɛ lɛ aná wekukpaa, koni amɛtsɔmɔ enanemɛi po. (Yesaia 41:8) Ni ekɛ hewalɛ ni he hiaa amɛ bɔni afee ni amɛnyɛ amɛdamɔ kaai ni mli wa ni adesai kɛkpe yɛ afii akpei abɔ ni amɛkɛhi shi yɛ amɛ diɛŋtsɛ amɛkwɛmɔ shishi lɛ duro amɛ. (Lala 46:2; Filipibii 4:13) Kwɛ bɔ ni wɔbaanyɛ wɔda shi yɛ enɛɛmɛi fɛɛ ahewɔ!

“Afee Nɔ ni Osumɔɔ”—Kɛmɔ Shi

Ani jeee Nyɔŋmɔ suɔmɔnaa nii fɛɛ kɛha adesai lɛ ji nɔ ni efee kɛbashi amrɔ nɛɛ? Kristofonyo bɔfo Petro ŋma akɛ: “Yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Nɛkɛ mfonirifeemɔŋ wiemɔ nɛɛ kɔɔ nɔyeli hewalɛ hee ni baaye adesai anɔ kɛ adesai aweku hee ni baahi nakai nɔyeli lɛ shishi lɛ he.

Gbalɔ Daniel kɛ wiemɔ ni mli ka shi faŋŋ tsu nii ni eŋma akɛ: “Nɛkɛ maŋtsɛmɛi nɛɛ ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, . . . eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” (Daniel 2:44) Nɛkɛ gbalɛ nɛɛ tsɔɔ ŋmɛnɛŋmɛnɛ nibii agbɛjianɔtoo ni nyɛɛɛ aye omanye lɛ naagbee, kɛ Nyɔŋmɔ Maŋtsɛyeli loo nɔyeli ni baaye najiaŋ lɛ. Mɛɛ sanekpakpa po enɛ ji nɛkɛ! Be ko baashɛ ni béi kɛ pɛsɛmkunya ni eyi je lɛŋ ŋmɛnɛ kɛ awuiyeli ni kɛ shikpɔŋ fitemɔ he gbeyeiwoo baa ekoŋŋ lɛ baaho aya.

Mɛɛ be nibii nɛɛ baaba mli? Yesu kaselɔi lɛ bi akɛ: ‘Mɛɛ beyinɔ aaafee nii nɛɛ, ni mɛni ji obaa lɛ kɛ je nɛŋ naagbee lɛ he okadi?’ Yesu kɛɛ kɛfata ehetoo lɛ he akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:3, 14.

Amrɔ nɛɛ aatsu nɛkɛ shiɛmɔ nitsumɔ nɛɛ he nii yɛ je lɛŋ fɛɛ yɛ faŋŋ mli. Ekolɛ ona enɛ yɛ bo diɛŋtsɛ okutso mli he ni oyɔɔ lɛ. Woloŋlelɔ kpanaa Charles S. Braden ŋma yɛ ewolo ni ji These Also Believe lɛ mli akɛ: “Kɛ́ aaawie lɛ, Yehowa Odasefoi kɛ amɛ odaseyeli lɛ ekpele shikpɔŋ lɛ nɔ he fɛɛ he. . . . Jamɔŋ kuu ko kwraa bɛ je lɛŋ ni kɛ ekãafeemɔ kɛ shifimɔ babaoo tsuɔ nii yɛ mɔdɛŋ ni amɛbɔɔ koni amɛgbɛ  Maŋtsɛyeli lɛ he sanekpakpa lɛ amɛshwã lɛ mli fe Yehowa Odasefoi.” Odasefoi lɛ kɛ ekãa miijaje sanekpakpa nɛɛ amɛmiitsɔɔ yɛ shikpɔji ni fa fe 230 anɔ yɛ wiemɔi ni miihe ashɛ 400 amli. Atsuko nitsumɔ ni agba afɔ shi nɛɛ yɛ je lɛŋ fɛɛ tamɔ eji amrɔ nɛɛ dã. Eji odaseyelii babaoo ni yɔɔ ni tsɔɔ akɛ be ni nakai Maŋtsɛyeli lɛ baaye adesai anɔyelii anajiaŋ lɛ ebɛŋkɛ lɛ ateŋ ekome.

Maŋtsɛyeli ni Yesu wie he akɛ abaashiɛ lɛ nɔŋŋ ji nɔ ni etsɔɔ wɔ koni wɔsɔle wɔbi yɛ esɔlemɔ he nɔkwɛmɔnɔ lɛ mli lɛ akɛ: “Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:10) Hɛɛ, nakai Maŋtsɛyeli lɛ nɔ Nyɔŋmɔ baatsɔ koni ekɛha eyiŋtoi, esuɔmɔnaa nii, kɛha adesai kɛ shikpɔŋ lɛ aba mli.

Mɛni no tsɔɔ? Ha Kpojiemɔ 21:3, 4 lɛ aha hetoo: “Minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” No sɛɛ lɛ, abaafee Nyɔŋmɔ suɔmɔnaa nii diɛŋtsɛ yɛ shikpɔŋ nɔ kɛ ŋwɛi—kwraa kɛmɔ shi. * Ani osumɔŋ ni oná mli gbɛfaŋnɔ?

[Shishigbɛ niŋmaa]

[Mfoniri ni yɔɔ baafa 5]

Heyeli kɛmiijɛ Nyɔŋmɔ suɔmɔnaa nii ahe lɛ kɛ oshara ba