Kɛtsɔ Yelikɛbuamɔ Ni Ená Kɛjɛ Biblia Lɛ Mli Lɛ Nɔ Lɛ, Edamɔ Kaa Naa

Kaai fa babaoo yɛ je lɛŋ ŋmɛnɛ. Biblia mli mlai amli hiɛmɔ bɛ mlɛo. Akɛ nɔkwɛmɔnɔ lɛ, ebaanyɛ efee kaa akɛ aaabo Biblia mli ŋaawoo akɛ: “Nyɛjoa ajwamaŋbɔɔ naa foi” lɛ toi.—1 Korintobii 6:18.

Yehowa Odasefoi lɛ ateŋ mɔ kome, ni wɔbaatsɛ lɛ Sebastian lɛ tsu nii yɛ Scandinaviabii anitsumɔhe ko yɛ Poland. Esa akɛ ebɔ mɔdɛŋ waa koni ehiɛ emuuyeli mli.

Abale Sebastian akɛ Yehowa Odasefoi lɛ ateŋ mɔ kome. Akɛni enitsumɔ nɔkwɛlɔi lɛ ahiɛ sɔ emɔdɛŋbɔɔ kɛ ejeŋba kpakpa lɛ hewɔ lɛ, amɛha lɛ hegbɛi srɔtoi babaoo. Shi kɛlɛ, eba lɛ akɛ nɔ ni fata hegbɛi nɛɛ ahe ji ni eya nitsumɔ mli kpeei ni hiɛtserɛjiemɔ mli jeŋba shara fata he.

Etsɛɛɛ ni Sebastian yiŋ bɔi lɛ kɔshikɔshi feemɔ. “Minitsumɔ nɔkwɛlɔ lɛ le akɛ miji Yehowa Odasefoi lɛ ateŋ mɔ kome. No hewɔ ni eheɔ mi eyeɔ ni eyɔɔ hekɛnɔfɔɔ yɛ mi mli lɛ. Kɛ́ mikpoo akɛ mikɛ mihe aaawo mli lɛ, minitsumɔ ni námɔ wa lɛ baaje midɛŋ. Ni kɛ́ mikwɛɔ, shi mikɛ mihe wooo mli hu?”

Kɛkɛ ni Sebastian ná ele nɔ ni abaakpa gbɛ kɛjɛ edɛŋ lɛ he nii babaoo. Abaakpa gbɛ akɛ “ebaakwɛ” kpelɔi ni jɛ maŋsɛɛ lɛ ni etao “yei” eha amɛ gbɛkɛ kɛha jeŋba shara nifeemɔi. Mɛni ebaafee?

Sebastian kpɛ eyiŋ akɛ ebaakai enɔkwɛlɔ lɛ yɛ enifeemɔ ni damɔ Biblia lɛ nɔ yɛ jeŋba shara he lɛ he. Etsɛɛɛ ni ebafee faŋŋ akɛ enyɛŋ nii lɛ etsu, ni ákɛ naagbee mli lɛ esa akɛ ekpa nitsumɔ nɛɛ. Ená nitsumɔ kroko ni nyɔmɔwoo faaa, shi kaai ni tamɔ nakai fataaa he. Amrɔ nɛɛ eyɛ henilee ni mli tse.

Mɛni obaafee kɛ́ mɔ ko nyɛ onɔ ni okɛ ohe awo jeŋba shara mli loo okpɛlɛ nɔ? Ani obaasumɔ ni ofee tsakemɔ ni sa kadimɔ? Nakai ji nɔ ni Yosef yɛ Biblia beaŋ lɛ fee, taakɛ abɔ he amaniɛ yɛ 1 Mose 39:7-12.