Ani Nyɔŋmɔ Wiemɔ Lɛ Woɔ Bo Hewalɛ?

KƐ́ OKƐ naagbai kpe lɛ, te otsuɔ he nii ohaa tɛŋŋ? Yɛ Yesu gbɛfaŋ lɛ, ŋmalɛ ko ni sa ni ekai lɛ ye ebua lɛ ni etsu naagbai ni Satan kɛba enɔ lɛ ahe nii. (Mateo 4:1-11) Nakai nɔŋŋ beni Maŋtsɛ David kɛ naagbai ni jɛ lɛ diɛŋtsɛ kpe lɛ, Nyɔŋmɔ Wiemɔ lɛ wo lɛ hewalɛ. Ekɛɛ akɛ: “Kɛ ŋkɔmɔyeli fa babaoo yɛ mimli lɛ, omiishɛjemɔi lɛ haa misusuma mii shɛɔ ehe.”—Lala 94:19.

Nakai nɔŋŋ ŋmalɛ ko ni wɔsumɔɔ ni wɔɔkai lɛ baanyɛ ashɛje wɔmii loo ewo wɔ hewalɛ kɛ́ wɔkɛ naagbai kpe. Ákɛ nɔkwɛmɔnɔ lɛ, Rex ni amrɔ nɛɛ eye afii 89 lɛ je be-fɛɛ sɔɔmɔ nitsumɔ lɛ shishi yɛ afi 1931 mli tɔŋŋ. Shi kɛlɛ, ekɛɛ akɛ: “Kɛ́ aha mi nitsumɔ krɛdɛɛ ko yɛ misɔɔmɔ nitsumɔ lɛ mli lɛ, minuɔ he akɛ minyɛŋ matsu.” Mɛɛ gbɛ nɔ etsɔ etsu he nii? “Mikaiɔ ŋmalɛ ni misumɔɔ waa, ni ji Abɛi 3:5 ni kɛɔ akɛ: ‘Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ’ lɛ. Ŋmalɛ nɛɛ ni mikaiɔ ni mikɛtsuɔ nii lɛ ye ebua mi koni matsu nitsumɔi ni akɛwo midɛŋ lɛ he nii yɛ omanyeyeli mli.”

Gbekɛbii po náa ŋmalɛ ko ni amɛsumɔɔ waa lɛ he sɛɛ. Jack ni eye afii ekpaa lɛ kɛɛ akɛ ŋmalɛ ni esumɔɔ waa ji Mateo 24:14. Ŋmalɛ nɛɛ woɔ lɛ hewalɛ koni ekɛ efɔlɔi aya shiɛmɔ. Ekɛɛ akɛ: “Misumɔɔ shiɛmɔ ni mikɛ awo, ataa, kɛ minyɛmiyoo lɛ yaa daa Hɔɔ lɛ waa.”

Taakɛ Yesu ji lɛ, ani okɛ ohemɔkɛyeli lɛ he kaai ni baa tɛ̃ɛ kpeɔ bei komɛi? Kɛ́ nakai ni lɛ, Filipibii 4:13 lɛ baanyɛ atsɔ ŋmalɛi ni osumɔɔ lɛ ateŋ ekome. Taakɛ Maŋtsɛ David ji lɛ, ani ‘oyeɔ ŋkɔmɔ’? Kɛ́ nakai ni lɛ, Filipibii 4:6, 7 lɛ ni oookai lɛ baanyɛ aye abua bo koni okpee naa. Ani ohaoɔ bei komɛi akɛ sɛɛnamɔ bɛ sɔɔmɔ ni osɔmɔɔ Nyɔŋmɔ lɛ he? Kɛ́ nakai ni lɛ, 1 Korintobii 15:58 lɛ ni oookai lɛ baawo bo hewalɛ.

Kɛ́ wɔkase ŋmalɛi ni sa wɔwo wɔyitsoŋ lɛ, wɔhaa Nyɔŋmɔ Wiemɔ lɛ náa wɔshihilɛi anɔ hewalɛ. (Hebribii 4:12) Ŋmalɛi ni wɔsumɔɔ nɛɛ baanyɛ awo wɔ hewalɛ ni amɛshɛje wɔmii hu.—Romabii 15:4.