Adebɔɔ Gbaa Nyɔŋmɔ Anunyam Lɛ!
Adebɔɔ Gbaa Nyɔŋmɔ Anunyam Lɛ!
“Ŋwɛi gbaa Mawu anunyam lɛ, ni atatu tsɔɔ eninenaa nitsumɔ lɛ.”—LALA 19:2.
1, 2. (a) Mɛni hewɔ adesai nyɛɛɛ amɛkwɛ Nyɔŋmɔ anunyam lɛ tɛ̃ɛ lɛ? (b) Onukpai 24 lɛ kɛ anunyam haa Nyɔŋmɔ yɛ mɛɛ gbɛ nɔ?
“ONYƐŊ mihiɛ ona; shi mɔ ko mɔ ko enaŋ mi, ní eyi aaaná wala.” (2 Mose 33:20) Yehowa kɛ enɛ bɔ Mose kɔkɔ. Akɛni akɛ gbɔmɔtso ni he waaa bɔ adesai hewɔ lɛ, amɛnyɛŋ amɛna Nyɔŋmɔ anunyam lɛ tɛ̃ɛ ni amɛhi wala mli. Shi kɛlɛ, ajie Yehowa ni ta Enunyam maŋtsɛsɛi lɛ nɔ lɛ he ninaa ni yɔɔ naakpɛɛ kpo atsɔɔ bɔfo Yohane.—Kpojiemɔ 4:1-3.
2 Ákɛ mɛi ni tamɔɔɔ adesai lɛ, mumɔŋ bɔɔ nii ni yeɔ anɔkwa lɛ nyɛɔ amɛnaa Yehowa hiɛ. Amɛteŋ mɛi komɛi ji “onukpai nyɔŋmai enyɔ kɛ ejwɛ” lɛ ni damɔ shi kɛha 144,000 lɛ ni yɔɔ ŋwɛi he ninaa ni Yohane na lɛ mli lɛ. (Kpojiemɔ 4:4; 14:1-3) Te amɛfee amɛnii amɛha tɛŋŋ beni amɛna Nyɔŋmɔ anunyam lɛ? Taakɛ Kpojiemɔ 4:11 lɛ tsɔɔ lɛ, amɛjaje akɛ: “Nuŋtsɔ, bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.”
Nɔ Hewɔ ni “Naajiemɔ ko bɛ” Lɛ
3, 4. (a) Mɛni hewɔ hemɔkɛyeli ni aaaná yɛ Nyɔŋmɔ mli lɛ damɔɔɔ jeŋ nilee nɔ lɛ? (b) Yɛ shihilɛi komɛi amli lɛ, mɛni hewɔ mɛi komɛi kpoɔ hemɔkɛyeli ni amɛaaná yɛ Nyɔŋmɔ mli lɛ?
3 Ani nɔ ko tsirɛɔ bo koni okɛ anunyam aha Nyɔŋmɔ? Nɔ ko tsirɛɛɛ adesai ateŋ mɛi babaoo koni amɛkɛ anunyam aha Nyɔŋmɔ, ni mɛi komɛi po kɛɔ akɛ ebɛ. Ákɛ nɔkwɛmɔnɔ lɛ, ŋulamii ahe nilelɔ ko ŋma akɛ: “Ani Nyɔŋmɔ ji mɔ ni bɔ jeŋ muu lɛ fɛɛ yɛ gbɛ ni waaa nɔ koni wɔná he sɛɛ? . . . Eji gbɛkpamɔ ko ni yɔɔ miishɛɛ. Mɔbɔ sane ji akɛ, miheɔ miyeɔ akɛ eji lakamɔ wiemɔ. . . . Ákɛ aaakɛɛ akɛ Nyɔŋmɔ ji mɔ ni bɔ nibii lɛ jeee hetoo ni ja.”
4 Jeŋ nilee niiamlitaomɔ eyaaa shɔŋŋ—ekɔɔ nibii diɛŋtsɛ ni adesai baanyɛ ana loo amɛkase lɛ pɛ ahe. Yɛ gbɛ kroko nɔ lɛ, eji nɔ ko ni akaa yiŋ awieɔ loo yiŋsusumɔ folo kɛkɛ. Akɛni “Nyɔŋmɔ lɛ Mumɔŋ” hewɔ lɛ, anyɛŋ atsɔ jeŋ nilee mli nifeemɔi anɔ ana lɛ ni akase ehe nii. (Yohane 4:24) No hewɔ lɛ, eji henɔwomɔ akɛ aaakpoo hemɔkɛyeli ni aaaná yɛ Nyɔŋmɔ mli lɛ akɛni edamɔɔɔ jeŋ nilee nɔ lɛ hewɔ. Jeŋ nilelɔ Vincent Wigglesworth ni yɔɔ Cambridge University lɛ tsɔɔ mli akɛ jeŋ nilee mli nifeemɔi lɛ diɛŋtsɛ hu “damɔ hemɔkɛyeli nɔ.” Yɛ mɛɛ gbɛ nɔ? “Edamɔ hemɔkɛyeli ni ma shi shiŋŋ ni tsɔɔ akɛ adebɔɔ mli nibii amli ajɛ ni aná ‘adebɔɔ mli mlai’ lɛ anɔ.” No hewɔ lɛ, kɛ́ mɔ ko kpoo hemɔkɛyeli ni eeená yɛ Nyɔŋmɔ mli lɛ, ani no etsɔɔɔ akɛ ekɛ hemɔkɛyeli kroko miiye ekroko najiaŋ? Yɛ shihilɛi komɛi amli lɛ, Nyɔŋmɔ nɔ ni aheee ayeee lɛ bafeɔ tamɔ gbɛ ni ajeɔ akpoɔ akɛ aaakpɛlɛ anɔkwale lɛ nɔ. Lalatsɛ lɛ ŋma akɛ: “Mɔ fɔŋ wóɔ egugɔ nɔ ekɛɔ: ‘Ebiŋ shi!’ Eyiŋ fɛɛ lɛ: ‘Nyɔŋmɔ ko bɛ!’”—Lala 10:4, wɔma efa ko nɔmi.
5. Mɛni hewɔ Nyɔŋmɔ ni aheee lɛ ayeee lɛ jeee naajiemɔ lɛ?
5 Shi kɛlɛ, Nyɔŋmɔ nɔ ni aheɔ ayeɔ lɛ jeee hemɔkɛyeli folo ko kɛkɛ, ejaakɛ odaseyeli babaoo diɛŋtsɛ yɛ ni tsɔɔ akɛ Nyɔŋmɔ yɛ. (Hebribii 11:1) Ŋulamii ahe nilelɔ Allan Sandage kɛɛ akɛ: “Efeee mi kwraa akɛ gbɛjianɔtoo ni tamɔ nɛkɛ [ni yɔɔ jeŋ muu lɛ fɛɛ mli lɛ] ba yɛ heniianaa. Esa akɛ mɔ ko ni to enɛ he gbɛjianɔ lɛ ahi shi. Yɛ migbɛfaŋ lɛ, Nyɔŋmɔ ji teemɔŋ sane ko, shi kɛlɛ lɛ ji hetoo kɛha shihilɛ mli ni ayɔɔ ni yɔɔ naakpɛɛ lɛ, kɛ nɔ hewɔ ni nibii yɔɔ shihilɛ mli lɛ.” Bɔfo Paulo kɛɛ Kristofoi ni yɔɔ Roma lɛ akɛ Nyɔŋmɔ “ehe nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ, no hewɔ lɛ amɛbɛ naajiemɔ ko.” (Romabii 1:20) Kɛjɛ “jeŋbɔɔ mli”—titri lɛ kɛjɛ be mli ni abɔ bɔɔ nii ni ji adesai ni yɔɔ nilee ni baanyɛ ayoo akɛ Nyɔŋmɔ yɛ shihilɛ mli lɛ—ebafee faŋŋ akɛ Bɔlɔ ko ni yɔɔ hewalɛ kpele, ni ji Nyɔŋmɔ ni esa akɛ atuu he aha lɛ lɛ yɛ. Enɛ hewɔ lɛ mɛi ni yɔseee Nyɔŋmɔ anunyam lɛ bɛ naajiemɔ ko. Shi mɛɛ odase adebɔɔ yeɔ?
Jeŋ Muu lɛ Gbaa Nyɔŋmɔ Anunyam Lɛ
6, 7. (a) Ŋwɛi gbaa Nyɔŋmɔ anunyam lɛ yɛ mɛɛ gbɛ nɔ? (b) Mɛɛ yiŋtoo hewɔ ŋwɛi kɛ ‘susumɔ kpãai’ eto he lɛ?
6 Lala 19:2 lɛ haa hetoo akɛ: “Ŋwɛi gbaa Mawu anunyam lɛ, ni atatu tsɔɔ eninenaa nitsumɔ lɛ.” David yoo akɛ ŋulamii lɛ kɛ shibɔlemɔ ŋulami lɛ ni kpɛlɛɔ kɛtsɔɔ “atatu” lɛ loo kɔɔyɔɔ lɛ mli lɛ kɛ odaseyeli ni anyɛŋ aje he ŋwane haa akɛ anunyam Nyɔŋmɔ ko yɛ shihilɛ mli. Etsa nɔ akɛ: “Shwane jajeɔ egbee etsɔɔ shwane, ni nyɔɔŋ hu wieɔ nilee tsɔɔ nyɔɔŋ.” (Lala 19:3) Yɛ shwane fɛɛ shwane, kɛ nyɔɔŋ fɛɛ nyɔɔŋ mli lɛ, ŋwɛi gbaa Nyɔŋmɔ nilee kɛ adebɔɔ hewalɛ lɛ etsɔɔ. Etamɔ nɔ ni ŋwɛi ‘miijaje egbee’ kɛmiijie Nyɔŋmɔ yi.
7 Shi kɛlɛ, ebiɔ sɛɛyoomɔ dani anyɛɔ anuɔ odaseyelii nɛɛ ashishi. “Sane jajemɔ ko bɛ ni wiemɔ ko hu bɛ, ní anuuu amɛgbee yɛ mli.” Kɛlɛ, odase ni ŋwɛi kɛ enifeemɔi yeɔ lɛ yɛ hewalɛ waa. “Ŋwɛi susumɔ kpãa lɛ kpele shikpɔŋ lɛ nɔ fɛɛ, ni ewiemɔi lɛ hu shɛɔ jeŋ naagbeehe.” (Lala 19:4, 5) Etamɔ nɔ ni ŋwɛi kɛ ‘susumɔ kpãai’ eto he bɔni afee ni ekɛná nɔmimaa akɛ odase ni ekɛ enifeemɔi yeɔ lɛ ekpele shikpɔŋ muu lɛ fɛɛ nɔ.
8, 9. Mɛni ji hulu lɛ he saji komɛi ni sa kadimɔ?
8 David saa tsɔɔ Yehowa adebɔɔ nii kroko ni yɔɔ naakpɛɛ lɛ mli akɛ: “Eshi buu yɛ jɛi [atatu lɛ mli] ehã hulu; ni etamɔ ayemforowu ni jeɔ epia mli jeɔ kpo, emli filiɔ lɛ tamɔ ekãalɔ ni yaa ayada foi yɛ tempɔŋ lɛ nɔ. Ejeɔ yɛ ŋwɛi naagbeehe kome, ni ebɔleɔ shi kɛyaa enaagbeehe kroko lɛ, ni nɔ ko nɔ ko eteee ehe kɛjɛɛɛ elatsaa lɛ naa.”—Lala 19:5-7.
9 Kɛ́ akɛ hulu lɛ to ŋulamii krokomɛi ahe lɛ, edalɛ kã teŋ. Kɛlɛ, eji ŋulami ko ni sa kadimɔ waa, ni ehaa shibɔlemɔ ŋulamii ni bɔleɔ ehe lɛ feɔ bibioo kwraa. Wolo ko kɛɛ akɛ etsiimɔ ji “tɔn akpekpei toi akpekpei toi akpekpei toi akpei 2”—ni etsiimɔ lɛ ji hulu ŋulamii akuu lɛ tsiimɔ oha mlijaa 99.9! Enigbalamɔ hewalɛ lɛ haa shikpɔŋ lɛ bɔleɔ ehe yɛ ekɛ hulu lɛ teŋ jɛkɛmɔ ni ji kilomitai akpekpei 150, ni etsiii ehe kɛyaa sɛɛ loo ni eeetsi kɛbɛŋkɛ. Hulu lɛ hewalɛ akpekpe toi akpe kome lɛ mli fã pɛ shɛɔ wɔshibɔlemɔ ŋulami lɛ nɔ, shi no fa bɔ ni sa ni aaaha ahi wala mli.
10. (a) Hulu lɛ yaa ‘ebuu’ lɛ mli ni ejeɔ kpo yɛ mɛɛ gbɛ nɔ? (b) Ejoɔ foi tamɔ “ekãalɔ” yɛ mɛɛ gbɛ nɔ?
10 Lalatsɛ lɛ wie hulu lɛ he yɛ abɛbuaŋ, ni efee he mfoniri akɛ eji “ekãalɔ” ni joɔ foi kɛjɛɔ shikpɔŋ naagbeehe kome kɛyaa naagbeehe kroko lɛ yɛ gbi lɛ mli, ni ekuɔ esɛɛ kɛyaa “buu” lɛ mli kɛ́ je na. Kɛ́ odamɔ shikpɔŋ lɛ nɔ ni ookwɛ ní nakai ŋulami kpeteŋkpele lɛ miinyɔ shi kɛmiiya naagbeehe kroko lɛ, efeɔ tamɔ nɔ ni eeya “buu” mli koni eyajɔɔ ehe. Yɛ leebi mli lɛ, efeɔ tamɔ nɔ ni ejeɔ kpo trukaa, ni ekpɛlɛɔ nyɛramnyɛram ‘tamɔ ayemforowu ni jeɔ epia mli jeɔ kpo.’ Ákɛ tookwɛlɔ lɛ, David le bɔ ni fɛ̃i yeɔ mɔ waa diɛŋtsɛ nyɔɔŋ. (1 Mose 31:40) Ekaiɔ bɔ ni hulu la lɛ haa egbɔmɔtso kɛ he ni eyɔɔ lɛ he dɔɔ la oya lɛ. Eka shi faŋŋ akɛ, etɔɔɔ hulu lɛ yɛ “gbɛ ni efãa” kɛjɛɔ boka kɛyaa anai lɛ mli, shi moŋ etamɔ “ekãalɔ,” ni efee klalo akɛ eeeje egbɛfãa lɛ shishi ekoŋŋ.
Ŋulamii kɛ Ŋulami Kushai Kpele Lɛ
11, 12. (a) Mɛni ji nɔ ni sa kadimɔ yɛ bɔ ni Biblia lɛ kɛ ŋulamii lɛ to ŋshɔnaa shia lɛ he? (b) Te ekolɛ ŋwɛiniiaŋ dalɛ yɔɔ ha tɛŋŋ?
11 Akɛni David ehiɛɛɛ shwɛde hewɔ lɛ, ŋulamii akpei fioo pɛ enyɛ ekɛ ehiŋmɛi na. Shi kɛlɛ, taakɛ niiamlipɛimɔ ko ni afee lɛ tsɔɔ lɛ, ŋulamii ayibɔ ni yɔɔ je lɛ mli ni anyɛɔ akɛ ŋmɛnɛŋmɛnɛ beaŋ shwɛde naa lɛ yibɔ ji sextillion 70—ni ji 7 kɛ esɛɛ zɛroi 22! Yehowa tsɔɔ akɛ ŋulamii lɛ fa waa diɛŋtsɛ, ejaakɛ ekɛ amɛ to “ŋshɔ naa shia” he.—1 Mose 22:17.
12 Yɛ afii babaoo ni eho lɛ amli lɛ, ŋulamii ahe nilelɔi na nɔ ko ni amɛwo lɛ gbɛi akɛ “heko bibioo ni kpɛlɛɔ, ni su yɔɔ tuutuu ni bɛ faŋŋ.” Jeŋ nilelɔi susu akɛ he “kokroo ni kpɛlɛɔ” nɛɛ lɛ ji nibii ni fata wɔ Milky Way ŋulami kusha lɛ he. Shi ayɔse yɛ afi 1924 mli akɛ, he ni kpɛlɛɔ nɛɛ ateŋ nɔ ni bɛŋkɛ fe fɛɛ ni ji Andromeda lɛ diɛŋtsɛ hu ji ŋulami kusha—ni heɔ afii akpekpei akpei enyɔ dani la ni jɛɔ wɔ Milky Way ŋulami kuu lɛ he lɛ yashɛɔ jɛmɛ! * Amrɔ nɛɛ jeŋ nilelɔi tsɔɔ akɛ ayɛ ŋulami kushai akpekpe toi akpei abɔ, ni ŋulamii akpei abɔ—bei komɛi lɛ akpekpe toi akpei abɔ—yɛ eko fɛɛ eko mli. Shi kɛlɛ, Yehowa ‘tsɔɔ ŋulamii lɛ ayibɔ, ni ekɛ amɛteŋ mɔ fɛɛ mɔ gbɛi tsɛɔ lɛ.’—Lala 147:4.
13. (a) Mɛni sa kadimɔ waa yɛ ŋulamii ni su je nɔ ko krɛdɛɛ lɛ ahe? (b) Mɛni tsɔɔ yɛ faŋŋ mli akɛ jeŋ nilelɔi leee “ŋwɛi akpɔi lɛ?”
13 Yehowa bi Hiob akɛ: “Ani ofĩɔ wuɔ kɛ ebii kɛ taŋkpeei? loo ooonyɛ oŋwɛ̃ kpãai lɛ ofɛne?” (Hiob 38:31) Nakai ŋulamii babaoo lɛ ji ŋulami kuu ko ni yɔɔ su ni je nɔ ko krɛdɛɛ ko. Eyɛ mli akɛ gbɛ ni kã ŋulamii lɛ ateŋ lɛ mli baanyɛ ajɛkɛ waa moŋ, shi kɛ́ adamɔ shikpɔŋ lɛ nɔ aakwɛ lɛ, anaa akɛ gbɛ ni kã amɛteŋ lɛ tsakeee kɔkɔɔkɔ. Akɛni ŋulamii lɛ tsiii amɛhe kwraa kɛjɛɛɛ heni amɛyɔɔ lɛ hewɔ lɛ, amɛbafeɔ “gbɛtsɔɔlɔi ni yeɔ buaa yɛ nu hiɛ gbɛfaa, kɔɔyɔŋ lɛji akudɔmɔ, kɛ kɛha ŋulamii ayɔsemɔ mli.” (The Encyclopedia Americana) Shi kɛlɛ, mɔ ko mɔ ko leee “taŋkpeei” ni hiɛ ŋulamii nɛɛ amli lɛ jogbaŋŋ kɛmɔɔɔ shi. Hɛɛ, loloolo lɛ jeŋ nilelɔi nyɛɛɛ amɛha sane ni abi yɛ Hiob 38:33 akɛ: “Ani ole ŋwɛi akpɔi lɛ?” lɛ hetoo.
14. Bɔ ni la kpɛɔ ehaa lɛ ji teemɔŋ sane yɛ mɛɛ gbɛ nɔ?
14 Jeŋ nilelɔi nyɛɛɛ aha sanebimɔ kroko ni abi Hiob lɛ hetoo, akɛ: “Nɛgbɛ gbɛ ní atsɔɔ kɛyaa he ni la jɛɔ kpɛ́ɔ lɛ yɔɔ?” (Hiob 38:24) Niŋmalɔ ko tsɛ́ sane ni abi yɛ la he lɛ akɛ eji “ŋmɛnɛŋmɛnɛ beaŋ jeŋ nilee sanebimɔ ko ni ewa akɛ aaanu shishi.” Nɔ ni tamɔɔɔ nakai lɛ, Hela jeŋ nilelɔi komɛi susu akɛ la jeɔ kpo kɛjɛɔ adesa hiŋmɛi mli. Yɛ ŋmɛnɛŋmɛnɛ beaŋ lɛ, jeŋ nilelɔi ená susumɔ akɛ nibii kuli bibii ji nɔ ni feɔ la. Mɛi krokomɛi hu esusu akɛ la nyiɛɔ tamɔ ŋshɔ ni miiku. Ŋmɛnɛ, jeŋ nilelɔi heɔ amɛyeɔ akɛ la tamɔ ŋshɔ ni miiku, ni etamɔ nibii kuli bibii hu. Shi kɛlɛ, anuko bɔ ni la ji kɛ bɔ ni ‘ekpɛɔ lɛ’ shishi jogbaŋŋ lolo.
15. Taakɛ David ji lɛ, te esa akɛ wɔnu he wɔha tɛŋŋ kɛ́ wɔsusu ŋwɛi he lɛ?
15 Kɛ́ mɔ susu enɛɛmɛi fɛɛ ahe lɛ, etsirɛɔ lɛ koni enu he taakɛ David ni kɛɛ akɛ: “Kɛ́ mikwɛ oŋwɛi lɛ ni ji owaabii anaa nitsumɔi lɛ, nyɔɔŋtsere kɛ ŋulamii ni osaa oto lɛ: Mɛni ji adesa, ní ojwɛŋɔ enɔ? aloo gbɔmɔ bi, ní osaraa lɛ po?” lɛ nu he lɛ.—Lala 8:4, 5.
Shikpɔŋ lɛ kɛ Enɔ Bɔɔ Nii lɛ Woɔ Yehowa Hiɛ Nyam
16, 17. Bɔɔ nii ni yɔɔ “nu shishi tɔ̃ɔ” lɛ jieɔ Yehowa yi yɛ mɛɛ gbɛ nɔ?
16 Lala 148 lɛ tsiɔ gbɛ̀i krokomɛi ni adebɔɔ gbaa Nyɔŋmɔ anunyam lɛ tã. Kuku 7 lɛ kaneɔ akɛ: “Nyɛjɛa shikpɔŋ lɛ nɔ nyɛjiea Yehowa yi, nuŋlooi wuji kɛ bui ní mli kwɔlɔ lɛ fɛɛ.” Hɛɛ, naakpɛɛ nibii ni maa Nyɔŋmɔ nilee kɛ hewalɛ lɛ nɔ mi lɛ eyi “bui ní mli kwɔlɔ lɛ” mli obɔ. Kɛ́ abu naa yɛ kwashiai amli lɛ, bonso tsiimɔ ji tɔn 120—ni etamɔ shwuɔi 30 tsiimɔ! Etsui pɛ tsiimɔ fe kilogram 450, ni enyɛɔ eshiɔ lá aaafee kilogram 6,400 yɛ egbɔmɔtso lɛ mli! Ani ŋshɔŋlooi wuji nɛɛ yɛ blɛoo ni amɛhe tsii amɛ yɛ nu mli? Dabi kwraa. European Cetacean Bycatch Campaign lɛ bɔ amaniɛ akɛ, amɛkɛ foi ni naa wa waa diɛŋtsɛ “fãa gbɛ yɛ ŋshɔ lɛ mli.” Mfoniri shamɔ tsɔne ko ni akɛwo ŋwɛiniiaŋ lɛ tsɔɔ akɛ “bonso ko kɛ nyɔji 10 fã gbɛ ni jɛkɛmɔ fe kilomitai 16,000.
17 Bei pii lɛ atui muɔ mele mitai 45 kɛyaa nu shishi, shi mele ni fe fɛɛ ni atui emu kɛtee nu shishi pɛŋ lɛ ji mitai 547! Mɛɛ gbɛ nɔ atui tsɔɔ ehiɔ wala mli kɛ́ emu mele ni tamɔ nɛkɛ? Kɛ́ emu mele lɛ, etsui shimɔ lɛ naa baa shi, ni elá lɛ yaa etsui, eflufla, kɛ ejwɛŋmɔ mli. Agbɛnɛ hu tsofa ko yɛ efãji amli ni kɛ oxygen toɔ. Nuŋ gbeei kɛ bonso ko hu baanyɛ amu mele kwraa ni fe enɛ. Discover wolo tɛtrɛɛ lɛ kɛɛ akɛ: “Yɛ nɔ najiaŋ ni nuŋ gbeei lɛ kɛ nakai bonso lɛ aaapele amɛhe yɛ nu lɛ hewalɛ lɛ naa lɛ, amɛkpaa muu kɛtsɔ amɛ flufla lɛ mli.” Amɛkɛ oxygen ni he hiaa amɛ lɛ titri toɔ amɛ fãji amli. Eka shi faŋŋ akɛ adebɔɔ nibii nɛɛ ji nibii ni akɛ hiŋmɛi naa ni yeɔ Nyɔŋmɔ ko ni yɔɔ hewalɛ kpele lɛ nilee lɛ he odase!
18. Ŋshɔ jieɔ Yehowa nilee lɛ kpo yɛ mɛɛ gbɛ nɔ?
18 Ŋshɔ po jieɔ Yehowa nilee lɛ kpo faŋŋ. Scientific American lɛ kɛɛ akɛ: “Jwɛi bibii kwraa ni tɔɔ nu hiɛ akpei abɔ yɛ nu kuli fɛɛ nu kuli ni yɔɔ kɛjɛ ŋshɔ lɛ hiɛ kɛmiiya ŋshɔ lɛ mli mitai 100 lɛ mli.” “Koo ni akɛ hiŋmɛi enaaa” nɛɛ haa wɔ kɔɔyɔɔ lɛ mli tseɔ kɛtsɔ carbon dioxide tɔn akpekpe akpei abɔ ni amɛjieɔ kɛjɛɔ kɔɔyɔɔ lɛ mli lɛ nɔ. Jwɛi bibii nɛɛ haa wɔ nɔ ni fe oxygen ni wɔmuɔ lɛ fã.
19. La kɛ snoo haa Yehowa yiŋtoo baa mli yɛ mɛɛ gbɛ nɔ?
19 Lala 148:8 lɛ kɛɔ akɛ: “La kɛ nyɔŋmɔŋtɛ, snoo kɛ lamɔ, ahum ni yeɔ ewiemɔ lɛ nɔ lɛ.” Hɛɛ, Yehowa kɛ adebɔɔ mli hewalɛi ni wala bɛ amɛmli lɛ tsuɔ nii koni ekɛha eyiŋtoo aba mli. Susumɔ la he okwɛ. Yɛ afii nyɔŋmai abɔ ni eho lɛ amli lɛ, abuɔ la ni jeɔ yɛ kooi amli lɛ akɛ nɔ ni kpataa nii ahiɛ pɛ. Shi amrɔ nɛɛ niiamlitaolɔi heɔ amɛyeɔ akɛ la tsuɔ gbɛfaŋnɔ ko ni he hiaa he nii yɛ kwɛ̃ɛ nibii ni yɔɔ shikpɔŋ lɛ nɔ lɛ ahilɛ-kɛhamɔ mli, ni efiteɔ tsei ni etsɛ loo amɛmiigbo lɛ, ehaa dumɔwui babaoo kwɛ̃ɔ, ehaa shikpɔŋ lɛ saa enáa hewalɛ ekoŋŋ, ni ehaaa la afɔ jee yɛ ŋa nɔ. Snoo hu he yɛ sɛɛnamɔ, eshwieɔ shikpɔŋ lɛ nɔ nu ni ehaa enáa hewalɛ ni haa niyenii baa, ni ehaa faai yiɔ, ni ehàa tsei kɛ kooloi ahe koni amɛkatsɔ ais.
20. Adesai náa gɔji kɛ tsei ahe sɛɛ yɛ mɛɛ gbɛ nɔ?
20 Lala 148:9 lɛ kɛɔ akɛ: “Gɔji kɛ gɔŋkpɔi fiaa, tsei ni woɔ yibii kɛ tsenedrui fɛɛ.” Gɔji wuji yeɔ Yehowa hewalɛ kpele lɛ he odase. (Lala 65:7) Shi amɛtsuɔ yiŋtoo ko ni he hiaa waa hu he nii. Amaniɛbɔɔ ko ni jɛ Shikpɔŋ He Nikasemɔhe ni yɔɔ Bern, yɛ Switzerland lɛ kɛɛ akɛ: “Faai wuji fɛɛ ni yɔɔ je lɛ mli lɛ ahiŋmɛi jɛ gɔji amli. Adesai ateŋ fã kpotoo kɛ nu ŋma ni jɛɔ gɔji amli lɛ tsuɔ nii . . . ‘Nu jɛɛhei’ nɛɛ ahe hiaa waa kɛha adesai ahilɛ-kɛhamɔ.” Tso folo ko kɛkɛ po woɔ e-Bɔlɔ lɛ hiɛ nyam. Amaniɛbɔɔ ko ni jɛ United Nations Environment Programme lɛ ŋɔɔ lɛ kɛɛ akɛ tsei “ahe hiaa kɛha adesai ni yɔɔ maji fɛɛ anɔ lɛ ahilɛ-kɛhamɔ . . . Tsei srɔtoi babaoo ahe yɛ sɛɛnamɔ waa kɛha shika he gbɛjianɔtoo, ejaakɛ amɛmli anáa nibii tamɔ ŋmoŋmolo, aduawai, ŋmɛi, amãi kɛ ohɛ́ yɛ. Yɛ je lɛ mli fɛɛ lɛ, gbɔmɛi akpekpei 2 kɛ tsei hoɔ nii ni amɛnáa hewalɛ yɛ mli.”
21. Tsɔɔmɔ bɔ ni baa folo kɛkɛ po yeɔ odase akɛ ŋaalɔ ko yɛ lɛ mli.
21 Anaa odaseyeli ni tsɔɔ akɛ bɔlɔ ko ni yɔɔ nilee yɛ lɛ yɛ bɔ ni ato tso he gbɛjianɔ aha lɛ mli. Susumɔ baa folo kɛkɛ he okwɛ. Nɔ ko fɛtɛfɛtɛ tamɔ wo agbaku hà baa lɛ he koni ekagbĩ. Wala yibii komɛi ni chloroplasts yɔɔ mli lɛ yɛ nɔ ni hà baa lɛ ŋwɛigbɛ lɛ shishi nɔŋŋ. Chlorophyll yɛ enɛɛmɛi amli, ni no gbalaa la hewalɛ. Kɛtsɔ gbɛjianɔtoo ko ni atsɛɔ lɛ akɛ photosynthesis lɛ nɔ lɛ, baai batsɔmɔɔ “nihoomɔ hei.” Tsei ashishifã lɛ gbalaa nu kɛtsɔɔ “paipi he gbɛjianɔtoo” ko ni yɔɔ hwanyaŋŋ lɛ mli ni amɛkɛhaa baai lɛ. “Fɔji” bibii akpei abɔ (ni atsɛɔ amɛ akɛ stomata) yɛ baa lɛ shishi, ni amɛgbeleɔ kɛkɛ lɛ amɛŋa, ni amɛkɛ no gbalaa carbon dioxide amɛwoɔ tso lɛ mli. La haa tso lɛ hewalɛ kɛha nu kɛ carbon dioxide koni efee amɛ ekome kɛná staate. Agbɛnɛ tso lɛ baanyɛ aye niyenii ni lɛ diɛŋtsɛ ehoo lɛ. Ni kɛlɛ, “nitsumɔ hé” nɛɛ yɛ dioo ni eyɛ fɛo. Yɛ nɔ najiaŋ ni eeewo kɔɔyɔɔ lɛ mli muji lɛ, ejieɔ oxygen kɛjɛɔ emli akɛ nɔ ni esumɔɔɔ!
22, 23. (a) Mɛɛ nyɛmɔi ni sa kadimɔ loofɔji kɛ shikpɔŋ nɔ kooloi komɛi yɔɔ? (b) Mɛɛ sanebimɔi ehe hiaa ni wɔsusu he lolo?
22 Lala 148:10 kɛɔ akɛ: “Ŋãŋ kooloi kɛ shia kooloi fɛɛ, waamɔ nibii kɛ fijiatsɛmɛi.” Shikpɔŋ lɛ nɔ kooloi kɛ adebɔɔ nibii ni flikiɔ lɛ jieɔ nyɛmɔi ni yɔɔ naakpɛɛ kpo. Ŋshɔ hiɛ dɔkɔdɔkɔ baanyɛ efliki gbɛ kakadaŋŋ (yɛ shihilɛ ko mli lɛ, kilomitai 40,000 yɛ gbii 90 mli). Loofɔlɔ ko ni atsɛɔ lɛ akɛ blackpoll warbler lɛ fãa gbɛ kɛjɛɔ Amerika Kooyigbɛ kɛyaa Amerika Wuoyigbɛ, ni efilikiɔ ŋmɛlɛtswai 80 ni ewaaa. Afukpɔŋɔ kɛ nu toɔ emusuŋ kotokui lɛ amli, shi jeee efu lɛ mli, taakɛ bɔ ni mɛi babaoo susuɔ lɛ, ni enɛ haa enyɛɔ enyiɛɔ bei babaoo ni kumai yeee lɛ. Belɛ, ebɛ naakpɛɛ mɔ akɛ tsɔnefeelɔi kaseɔ kooloi aje lɛ he nii jogbaŋŋ beni amɛfeɔ tsɔnei loo nɔ ko hee lɛ. Niŋmalɔ Gail Cleere kɛɛ akɛ: “Kɛ́ oootao ofee nɔ ko ni baatsu nii jogbaŋŋ . . . ni egbaŋ shikpɔŋ lɛ nɔ nibii lɛ naa lɛ, obaanyɛ ona ehe nɔkwɛmɔnɔ kpakpa ko yɛ adebɔɔ mli, ni obaanyɛ okwɛ nɔ ni okɛfee nɔ ni otaoɔ ofee lɛ.”
23 Hɛɛ, adebɔɔ nii gbaa Nyɔŋmɔ anunyam lɛ lɛɛlɛŋ! Ŋwɛi ŋulamii, tsei, kɛ kooloi fɛɛ yɛ gbɛ ni amɛ diɛŋtsɛ amɛtsɔɔ nɔ amɛjieɔ amɛ Bɔlɔ lɛ yi. Shi wɔ adesai hu? Mɛɛ gbɛ nɔ wɔɔtsɔ wɔfata adebɔɔ he kɛjie Nyɔŋmɔ yi?
[Shishigbɛ niŋmaa]
^ kk. 12 La fãa gbɛ kilomitai 300,000 yɛ hiŋmɛitswaa fɛɛ hiŋmɛitswaa mli.
Ani Okaiɔ?
• Mɛni hewɔ mɛi ni kɛɔ akɛ Nyɔŋmɔ bɛ lɛ bɛ naajiemɔ ko lɛ?
• Ŋulamii kɛ shibɔlemɔ ŋulamii lɛ woɔ Nyɔŋmɔ hiɛ nyam yɛ mɛɛ gbɛ nɔ?
• Ŋshɔŋ kɛ shikpɔŋ nɔ kooloi yeɔ odase akɛ Bɔlɔ ko ni yɔɔ suɔmɔ yɛ shihilɛ mli yɛ mɛɛ gbɛ nɔ?
• Adebɔɔ mli hewalɛi ni wala bɛ amɛmli lɛ tsuɔ Yehowa yiŋtoo he nii yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 10]
Jeŋ nilelɔi tsɔɔ akɛ ŋulamii ni abaanyɛ ana lɛ yibɔ ji sextillion 70!
[He ni Sane lɛ Jɛ]
Frank Zullo
[Mfoniri ni yɔɔ baafa 12]
Atui
[Mfoniri ni yɔɔ baafa 13]
Snoo-fufuji
[He ni Sane lɛ Jɛ]
snowcrystals.net
[Mfoniri ni yɔɔ baafa 13]
Ŋshɔ hiɛ dɔkɔdɔkɔ ni edako