Ani Esa Akɛ Afee Ekpakpa, Aloo Atsi He Kɛjɛ Efɔŋfeemɔ He Kɛkɛ?

“NƆ NI osumɔɔɔ akɛ akɛfeɔ bo lɛ, kɛkafee mɛi krokomɛi.” Mɛi kɛɔ akɛ Confucius ni ji China tsɔɔlɔ ni he esa, ni eji jeŋ nilelɔ hu lɛ ji mɔ ni wie wiemɔ ni kɔɔ jeŋba he nɛɛ. Ŋmɛnɛ, aaafee afii 2,500 sɛɛ lɛ, mɛi babaoo heɔ amɛyeɔ lolo akɛ kɛ́ mɔ ko efeee nibii ni baaye mɛi krokomɛi awui lɛ, belɛ eji gbɔmɔ kpakpa.

Yɛ anɔkwale mli lɛ, sɛɛnamɔi komɛi yɛ Confucius jeŋba he mla lɛ he. Yɛ gbɛ kroko nɔ lɛ, Biblia lɛ tsɔɔ nɔ kroko hu ni kɔɔ adesai ajeŋba kɛ sui ahe. Kɛfata nɔ ni abaanyɛ atsɛ lɛ akɛ esha ni afeɔ ashiɔ mɔ, ni ji eshai ni afeɔ ashiɔ nanemɛi adesai lɛ he lɛ, Biblia lɛ wieɔ ekpakpa ni ale shi afeee lɛ hu he. Kristofonyo kaselɔ Yakobo ŋma akɛ: “Mɔ ni le ekpakpafeemɔ ni efeee lɛ, esha ji no ha lɛ.” (Yakobo 4:17) Yɛ nɔ najiaŋ ni Yesu Kristo baawo Kristofoi aŋaa kɛkɛ koni amɛkafee mɛi krokomɛi efɔŋ lɛ, ekɛ ŋaawoo nɛɛ ha akɛ: “Nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.”—Mateo 7:12.

Nyɔŋmɔ shishijee yiŋtoo ji akɛ adesai fɛɛ kɛ amɛhe aye tamɔ bɔ ni amɛbaasumɔ ni mɛi krokomɛi kɛ amɛ aye. Efee bɔ ni asusuɔ mɛi krokomɛi ahilɛ-kɛhamɔ he lɛ he nɔkwɛmɔnɔ ni nɔ bɛ efɔ shi yɛ bɔ ni ebɔ adesai eha lɛ mli: “Nyɔŋmɔ bɔ gbɔmɔ yɛ esubaŋ lɛ nɔ, Nyɔŋmɔ subaŋ lɛ nɔ ebɔ lɛ yɛ; nuu kɛ yoo ebɔ amɛ.” (1 Mose 1:27) Enɛ tsɔɔ akɛ Nyɔŋmɔ jɛ esuɔmɔ mli eha adesai henilee, nɔ ni kɛ́ amɛtsɔse lɛ jogbaŋŋ lɛ, ebaakudɔ amɛ koni amɛkɛ mɛi krokomɛi aye yɛ gbɛ ni amɛ diɛŋtsɛ amɛbaasumɔ ni akɛ amɛ aye lɛ nɔ.

Ŋmɛnɛ, pɛsɛmkunyatsɛmɛi ni susuuu mɛi krokomɛi ahe lɛ eha mɛi babaoo miina nɔ̃ ni amɛbɛ hiɛnɔkamɔ kɛ yelikɛbuamɔ ko. Eka shi faŋŋ akɛ, he kɛkɛ ni aaatsi kɛjɛ efɔŋ kɛ nibii ni yeɔ mɛi krokomɛi awui he lɛ jeee nɔ ni he hiaa amɛ titri, shi moŋ ni afee nɔ ni hi ni baaye abua amɛ. Enɛ hewɔ lɛ, Yehowa Odasefoi jɛɔ amɛsuɔmɔ mli amɛkɛ amɛhe haa koni amɛtsu nɔ ko pɔtɛɛ yɛ enɛ he, koni eye ebua mɛi krokomɛi ni amɛkase hiɛnɔkamɔ ni yɔɔ nyam ni yɔɔ Nyɔŋmɔ Wiemɔ lɛ mli lɛ he nii. Amɛjɛɔ suɔmɔ mli amɛkɛ sanekpakpa ni yɔɔ Biblia lɛ mli lɛ yaa amɛkutsoŋbii aŋɔɔ, ni amɛfeɔ nɔ ni amɛtaoɔ akɛ mɛi krokomɛi afee aha amɛ lɛ amɛhaa mɛi krokomɛi.