Ani Esa akɛ OhiSɔlemɔ ko Mli?

‘EHE ehiaaa ni mahi sɔlemɔ ko mli loo ni maya sɔlemɔ daa bɔni afee ni maná Nyɔŋmɔ mli hemɔkɛyeli!’ Nakai ji bɔ ni mɛi babaoo nuɔ he yɛ sɔlemɔ loo jamɔ ko mlinyo ni mɔ ko aaji lɛ he. Yɛ anɔkwale mli lɛ, mɛi komɛi kɛɔ akɛ amɛnuɔ he akɛ amɛbɛŋkɛ Nyɔŋmɔ kpaakpa kɛji akɛ amɛmiikwɛ adebɔɔ nibii yɛ agbonaa, fe beni amɛkɛ amɛhe ewo jamɔŋ nifeemɔi amli yɛ sɔlemɔ ko mli. Ŋmɛnɛ, susumɔ ni mɛi babaoo hiɛ ji akɛ, jamɔ kuu loo gbɛjianɔtoo ko ni akɛaabɔ lɛ jeee taomɔ nɔ kɛha Nyɔŋmɔ mli hemɔkɛyeli namɔ.

Shi kɛlɛ, mɛi krokomɛi hu nuɔ he yɛ gbɛ kroko nɔ. Amɛtaa saji anaa akɛ kɛji akɛ mɔ ko baaná Nyɔŋmɔ nɔkpɛlɛmɔ lɛ, belɛ sɔlemɔ mlinyo ni mɔ lɛ aaatsɔ lɛ kɛ sɔlemɔyaa he miihia, ni ehe miihia waa diɛŋtsɛ. No hewɔ lɛ, sane ni tsɔɔ kɛji akɛ sɔlemɔ mlinyo ni mɔ ko aaaji lɛ he hiaa lɛɛlɛŋ lɛ, fe le ni aaale mɛi abɔ ni yaa sɔlemɔ kɛ saji krokomɛi ni kɔɔ he. Yɛ fɛɛ mli lɛ, ani efeŋ nɔ ni ja gbɛ akɛ wɔɔtao bɔ ni Nyɔŋmɔ kwɛɔ sane lɛ ehaa, akɛni ekɔɔ wekukpaa ni kã wɔkɛ Nyɔŋmɔ teŋ lɛ he lɛ? Belɛ, mɛni wɔbaanyɛ wɔkase kɛjɛ e-Wiemɔ ni ji Biblia lɛ mli, yɛ nɛkɛ sane nɛɛ he?

Bɔ ni Nyɔŋmɔ Kɛ Gbɔmɛi Ye Ha yɛ Blema Beaŋ

Yɛ nɔ ni miihe ashɛ afii 4,400 ni eho nɛ lɛ, nu afua ni kpataa nii ahiɛ hà nibii ni yɔɔ shikpɔŋ lɛ nɔ fɛɛ. Hiɛ nyɛŋ akpa nifeemɔ ni tamɔ nɛkɛ lɛ nɔ kɔkɔɔkɔ, akɛni gbɔmɛi ni yɔɔ je lɛ mli he fɛɛ he lɛ yɛ nu afua lɛ he adesã yɛ amɛ blema yinɔsaji amli lɛ hewɔ. Eyɛ mli akɛ srɔtofeemɔ yɛ nɛkɛ adesãi nɛɛ amli moŋ, shi nibii babaoo yɛ mli ni je amɛhe, ní nɔ ni fata he ji anɔkwale ni eji akɛ mɛi fioo kɛ koolooi fioo ko pɛ ayi ná wala yɛ mli lɛ.

Ani mɛi ni yi ná wala yɛ Nu Afua lɛ mli lɛ ji aŋkroaŋkroi kɛkɛ ni he yɔɔ nii babaoo akɛ amɛje hiɛkpatamɔ lɛ mli? Biblia lɛ mli amaniɛbɔɔ tsɔɔ akɛ jeee nakai ji sane lɛ. Nɔ ni sa kadimɔ ji akɛ, Nyɔŋmɔ ekɛɛɛ aŋkroaŋkroi akɛ Nu Afua ko  miiba. Yɛ no najiaŋ lɛ ekɛɛ Noa, ni lɛ hu ebɔ eyinɔbii lɛ kɔkɔ yɛ Nu Afua ni baa lɛ he.—1 Mose 6:13-16; 2 Petro 2:5.

Yibaamɔ damɔ kuu ni ato he gbɛjianɔ jogbaŋŋ nɛɛ ni akɛaabɔ lɛ, kɛ suɔmɔ mli ni abaajɛ koni akpɛlɛ gbɛtsɔɔmɔ ni Nyɔŋmɔ kɛha Noa lɛ nɔ. Koolooi ni yɔɔ adeka lɛ mli ni ná yibaamɔ yɛ Nu Afua lɛ mli lɛ tete po kɛ amɛhe bɔ kuu nɛɛ. Akɛ gbɛtsɔɔmɔi pɔtɛɛ ha Noa koni ekɛto gbɛjianɔ ni sa kɛha koolooi lɛ ayibaamɔ.—1 Mose 6:17–7:8.

Yɛ afii ohai komɛi asɛɛ lɛ, Noa seshibii ni jɛ ebinuu Shem mli lɛ batsɔmɔ nyɔji yɛ Mizraim. Shi kɛlɛ, Nyɔŋmɔ yiŋtoo ji ni eha amɛye amɛhe koni ekɛ amɛ aba shikpɔŋ ni ewo amɛblematsɛ Abraham shi yɛ he lɛ nɔ. Shikome ekoŋŋ lɛ, jeee mɛi fɛɛ ajie enɛ kpo atsɔɔ, shi ajie lɛ kpo klɛŋklɛŋ atsɔɔ mɛi ni ahala koni amɛbatsɔmɔ amɛ hiɛnyiɛlɔi lɛ—Mose kɛ enyɛmi nuu Aaron. (2 Mose 3:7-10; 4:27-31) Beni akpɔ̃ mɛi ni tsutsu ko lɛ amɛji nyɔji lɛ kɛjɛ Mizraim akɛ kuu lɛ, akɛ Nyɔŋmɔ Mla lɛ ha amɛ yɛ Sinai Gɔŋ lɛ nɔ ni amɛbatsɔ Israel maŋ.—2 Mose 19:1-6.

Anyɛ akpɔ̃ Israelbii aŋkroaŋkroi lɛ akɛni amɛkɛ amɛhe bɔ kuu ni ajɛ ŋwɛi ato shishi lɛ, ni amɛnyiɛ nɛkɛ kuu nɛɛ hiɛnyiɛlɔi ni ahala lɛ agbɛtsɔɔmɔ sɛɛ lɛ pɛ hewɔ. Aŋmɛ Mizraimbii aŋkroaŋkroi lɛ po gbɛ koni amɛkɛ kuu ni ŋwanejee ko bɛ he akɛ amɛyɔɔ ŋwɛi nɔkpɛlɛmɔ nɛɛ abɔ. Beni Israelbii lɛ shi Mizraim lɛ, nɛkɛ aŋkroaŋkroi nɛɛ fata amɛhe kɛtee, ni no ha amɛkɛ amɛhe wo shihilɛ ni baaha amɛnine ashɛ Nyɔŋmɔ jɔɔmɔ nɔ lɛ mli.—2 Mose 12:37, 38.

Kɛkɛ ni yɛ klɛŋklɛŋ afii 100 lɛ mli lɛ, Yesu je eshiɛmɔ nitsumɔ lɛ shishi, ni ebɔi mɛi anaabuamɔ akɛ ekaselɔi. Ekɛ amɛ ye akɛ kuu, eyɛ mli akɛ ekɛ gbɛtsɔɔmɔi ni suɔmɔ yɔɔ mli ha aŋkroaŋkroi taakɛ amɛhiamɔ nii ji lɛ anaa. Yesu kɛɛ bɔfoi anɔkwafoi 11 lɛ akɛ: “Nyɛji mɛi ni kɛ mi ehi shi yɛ mikaai lɛ amli; ni mi hu miito maŋtsɛyeli maha nyɛ taakɛ bɔ ni mitsɛ eto eha mi lɛ.” (Luka 22:28, 29) Sɛɛ mli lɛ, Nyɔŋmɔ mumɔ krɔŋkrɔŋ lɛ ba kaselɔi lɛ anɔ beni amɛbua amɛhe naa akɛ kuu lɛ.—Bɔfoi lɛ Asaji 2:1-4.

Nɛkɛ nɔkwɛmɔnii nɛɛ tsɔɔ faŋŋ akɛ yɛ blema beaŋ lɛ Nyɔŋmɔ kɛ ewebii lɛ ye daa akɛ kuu ni ato amɛhe gbɛjianɔ. Aŋkroaŋkroi fioo komɛi ni Nyɔŋmɔ diɛŋtsɛ kɛ amɛná sharamɔ—tamɔ Noa, Mose, Yesu, kɛ mɛi krokomɛi lɛ—ji mɛi ni yɛ anɔkwale mli lɛ Ekɛ amɛ tsu nii koni ekɛ kuu ko ni kɛ amɛhe bɔɔ gbagbalii lɛ awie. Esaaa akɛ wɔheɔ wɔyeɔ akɛ Nyɔŋmɔ kɛ etsuji yeɔ yɛ gbɛ ni yɔɔ srɔto nɔ ŋmɛnɛ. Yɛ anɔkwale mli lɛ enɛ teɔ sanebimɔ kroko shi akɛ: Ani jamɔŋ kuu ko kɛkɛ ni akɛ he aaabɔ lɛ kɛkɛ fa? Wɔbaasusu sanebimɔ ni he hiaa nɛɛ he yɛ sane ni nyiɛ sɛɛ lɛ mli.

[Mfoniri ni yɔɔ baafa 4]

Nyɔŋmɔ ejɛ jeeŋmɔ beebe ekɛ ewebii eye akɛ kuu ni ato amɛhe gbɛjianɔ