Ani Osɔlemɔi lɛ Baanyɛ Ekɛ Tsakemɔ ko Aba?

WƆTEŊ namɔ kɛ shihilɛ ni hiɛdɔɔ yɔɔ mli ni wɔnyɛɛɛ he nɔ ko wɔfee lɛ eko ekpeko pɛŋ? Biblia lɛ tsɔɔ akɛ bɔfo Paulo le akɛ sɔlemɔ baanyɛ aná nɔ ni baajɛ shihilɛi ni tamɔ nɛkɛ mli aba lɛ nɔ hewalɛ.

Beni awo Paulo tsuŋ yɛ Roma yɛ gbɛ ni ejaaa nɔ lɛ, ekɛɛ enanemɛi heyelilɔi lɛ koni amɛsɔle amɛha lɛ, ni ekɛfata he akɛ: “Miikpa nyɛ fai babaoo akɛ nyɛfee nakai, koni akpale mi aha nyɛ oyá.” (Hebribii 13:18, 19) Yɛ be kroko mli lɛ, Paulo tsɔɔ akɛ eyɛ hekɛnɔfɔɔ akɛ Nyɔŋmɔ baabo sɔlemɔi koni ajie lɛ oya lɛ atoi. (Filemon 22) Etsɛɛɛ ni aŋmɛɛ Paulo he, kɛkɛ ni ekɛ ehe wo emaŋsɛɛ sanekpakpa shiɛmɔ nitsumɔ lɛ mli ekoŋŋ.

Shi, ani sɔlemɔ baanyɛ atsake nɔ ni baajɛ onaagbai lɛ amli aba lɛ diɛŋtsɛ? Ekolɛ nakai ni. Shi kɛlɛ, kaimɔ akɛ sɔlemɔ jeee jamɔŋ nifeemɔ ko kɛkɛ. Eji sanegbaa diɛŋtsɛ ni yaa nɔ yɛ wɔ kɛ wɔŋwɛi Tsɛ ni yɔɔ suɔmɔ kɛ hewalɛ lɛ teŋ. Esaaa akɛ wɔsheɔ gbeyei akɛ wɔɔha wɔsɔlemɔi lɛ akɔ nibii pɔtɛɛ ahe, shi no sɛɛ lɛ esa akɛ wɔkɛ tsuishitoo amɛ ni wɔkwɛ bɔ ni Yehowa baaha hetoo aha.

Ekolɛ Nyɔŋmɔ haŋ wɔsɔlemɔi lɛ fɛɛ ahetoo tɛ̃ɛ, loo ni eeeha hetoo be fɛɛ be yɛ gbɛ loo be ni wɔkpaa gbɛ lɛ nɔ. Ákɛ nɔkwɛmɔnɔ lɛ, Paulo sɔle shii abɔ yɛ ‘ŋmei ko ni yɔɔ eheloo mli’ lɛ he. Nyɔŋmɔ ejieee Paulo naagba lɛ kɛyaaa, ekɔɔɔ he eko nɔ̃ pɔtɛɛ ni nakai naagba lɛ ji, shi moŋ eshɛje Paulo mii kɛ hewalɛwoo wiemɔi nɛɛ akɛ: “Miduromɔ lɛ fá hao, ejaakɛ mihewalɛ lɛ, gbedeefeemɔ mli eyeɔ emuu yɛ.”—2 Korintobii 12:7-9.

Wɔ hu wɔbaanyɛ wɔná nɔmimaa akɛ kɛ́ Nyɔŋmɔ ejieee naagba pɔtɛɛ ko ni haoɔ wɔ lɛ kɛyaaa po lɛ, ebaanyɛ ‘eje gbɛ ko eha wɔ koni wɔnyɛ wɔdamɔ naa.’ (1 Korintobii 10:13) Etsɛŋ ni Nyɔŋmɔ baajie amanehului fɛɛ ni adesai kɛkpeɔ lɛ kɛya. Dani nakai be lɛ aaashɛ lɛ, ‘sɔlemɔ Toibolɔ’ lɛ ŋɔɔ ni wɔɔya lɛ baanyɛ ekɛ tsakemɔ aba.—Lala 65:3.