‘Etsɔɔ Wɔ ní Wɔjie Bulɛ Kpo Wɔha Ejamɔ Lɛ’

YEHOWA ODASEFOI lɛ ateŋ mɔ kome ni jɛ Rovigo kpokpaa lɛ nɔ yɛ Italy lɛ ná ele akɛ ená heloo mli fala ni gbooo, ni ákɛ ewala yɛ oshara mli. Beni ekɛ bei babaoo ehi helatsamɔhe, ni ebi koni akɛ lá ni agbalaa awoɔ mɔ mli akatsu nii yɛ etsamɔ mli lɛ sɛɛ lɛ, helatsɛmɛi akwɛlɔi ni jɛ mɛi ni yeɔ kansa hela akwɛmɔhe ni yɔɔ jɛmɛ lɛ ye amɛbua lɛ yɛ shia.

Hemɔkɛyeli ni mli wa ni nɛkɛ helatsɛ ni eye afii 36 nɛɛ yɔɔ kɛ bɔ ni efee klalo akɛ ekɛ tsofafeelɔi lɛ baafee ekome lɛ sa datrɛfoi kɛ helatsɛmɛi akwɛlɔi ni kwɛ lɛ lɛ ahiɛ waa diɛŋtsɛ. Beni eshwɛ fioo ni kansa lɛ baagbe helatsɛ lɛ, helatsɛmɛi akwɛlɔi ni ye amɛbua lɛ lɛ ateŋ mɔ kome ŋma niiashikpamɔ ni ená yɛ helatsɛ ni etsɛ́ lɛ akɛ Angela lɛ he sane yɛ helatsɛmɛi akwɛmɔ wolo tɛtrɛɛ ko mli.

“Angela he yɛ miishɛɛ waa ni eesumɔ ni ehi wala mli. Ele bɔ ni eshihilɛ ji kɛ bɔ ni ehela lɛ yɔɔ gbeyei ha, ni taakɛ wɔteŋ mɔ fɛɛ mɔ baafee lɛ, eetao ehala lɛ naa tsabaa loo ehe tsofa. . . . Fiofio lɛ, wɔ ni ji helatsɛmɛi akwɛlɔi lɛ ná wɔbale lɛ. Ekpooo yelikɛbuamɔ ni wɔkɛhaa lɛ lɛ. Yɛ no najiaŋ lɛ, bɔ ni Angela wieɔ ni ekɛ nɔ ko eteee lɛ ha nibii fee mlɛo kɛha wɔ. Wɔnáa he miishɛɛ akɛ wɔɔkwɛ lɛ, akɛni wɔle akɛ eji bei ni wɔ kɛ mɔ ko ni yeɔ anɔkwa lɛ náa sharamɔ, ni wɔ kɛ lɛ fɛɛ náa he sɛɛ babaoo lɛ hewɔ. . . . Wɔyɔse amrɔ nɔŋŋ akɛ ejamɔ lɛ baafee gbɛtsĩi nii kɛha wɔ yɛ ehelatsamɔ lɛ mli.” Nakai ji niŋmalɔ lɛ susumɔ ejaakɛ enu he akɛ esa akɛ aha Angela lá, shi Angela kpoo.—Bɔfoi lɛ Asaji 15:28, 29.

“Ákɛ mɛi ni atsɔse amɛ koni amɛkwɛ helatsɛmɛi lɛ, wɔkɛɛ Angela akɛ wɔkɛ eyiŋkpɛɛ lɛ kpãaa gbee, shi kɛtsɔ eyelikɛbuamɔ nɔ lɛ wɔbanu bɔ ni ebuɔ wala ehaa lɛ shishi. Wɔnu bɔ ni ejamɔ lɛ he hiaa lɛ kɛ eweku lɛ fɛɛ lɛ hu shishi. Angela nijiaŋ ejeko wui. Eŋmɛɛɛ gbɛ ni hela lɛ aye enɔ. Eyɛ ekãa. Eesumɔ ni ehi shi, eemia ehiɛ koni eya nɔ ehi shi. Eha ale efaishitswaa kɛ hemɔkɛyeli ni eyɔɔ lɛ. Bei pii lɛ wɔnyɛɛɛ wɔtswa wɔfai shi taakɛ efaishitswaa lɛ yɔɔ lɛ, ni wɔhemɔkɛyeli lɛ mli waaa tamɔ enɔ̃ lɛ. . . . Angela etsɔɔ wɔ bɔ ni ehe hiaa ni wɔjie bulɛ kpo wɔha ejamɔ lɛ, ni enɛ ji nɔ ko ni yɔɔ srɔto kwraa yɛ wɔnitsumɔ mli jeŋba he mlai lɛ ahe. . . . Wɔheɔ wɔyeɔ akɛ nɔ ni Angela etsɔɔ wɔ lɛ he yɛ sɛɛnamɔ waa diɛŋtsɛ, ejaakɛ wɔkɛ gbɔmɛi srɔtoi, shihilɛi srɔtoi, kɛ jamɔi srɔtoi amli bii sharaa, ni wɔbaanyɛ wɔkase nii kɛjɛ mli ni wɔkɛye wɔbua mɛi fɛɛ ni wɔkɛsharaa lɛ.”

Kɛkɛ ni sane ni je kpo yɛ wolo tɛtrɛɛ lɛ mli lɛ gbala jwɛŋmɔ kɛtee Italy Helatsɛmɛi Akwɛlɔi lɛ Anitsumɔ Mli Jeŋba He Mlai ni akpɛlɛ nɔ yɛ afi 1999 lɛ mli lɛ nɔ, nɔ ni kɛɔ akɛ: “Helatsɛmɛi akwɛlɔ lɛ tsuɔ enii yɛ be mli ni esusuɔ mɔ aŋkro lɛ jamɔ, ejeŋba, kɛ ekusum nifeemɔi, kɛ agbɛnɛ maŋ nɔ ni ejɛ kɛ ebɔɔ su hu ahe lɛ.” Bei komɛi lɛ, ekolɛ ebaawa kɛha datrɛfoi kɛ helatsɛmɛi akwɛlɔi akɛ amɛkɛ bulɛ aaaha helatsɛ ko jamɔŋ hemɔkɛyelii, ni hiɛ sɔɔ amɛteŋ mɛi ni sumɔɔ akɛ amɛfee nakai lɛ waa diɛŋtsɛ.

Yehowa Odasefoi susuɔ yiŋkpɛi ni amɛfeɔ yɛ amɛgbɔmɔtsoŋ hewalɛnamɔ kɛ tsofafeemɔ he lɛ ahe jogbaŋŋ diɛŋtsɛ. Amɛkɛ hiɛdɔɔ susuɔ nɔ ni Ŋmalɛi lɛ kɛɔ lɛ he, ni taakɛ Angela sane lɛ tsɔɔ lɛ, amɛjeee mɛi ni eye jamɔ he sɛkɛ. (Filipibii 4:5) Yɛ jeŋ fɛɛ lɛ, nitsulɔi ni etee hiɛ yɛ helatsamɔ mli lɛ ateŋ mɛi pii miisumɔ ni amɛkɛ bulɛ aha helatsɛmɛi ni amɛkwɛɔ amɛ ni amɛji Odasefoi lɛ ahenilee.