Gboshinii ni Jara Wa Fe Fɛɛ ni Yɔɔ

BENI bɔfo Yohane wala shihilɛ bɛŋkɛɔ enaagbee lɛ, eŋma akɛ: ‘Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale lɛ mli.’—3 Yohane 4.

Bɔfo anɔkwafo lɛ miiwie bii ni ená yɛ mumɔŋ shishinumɔ naa lɛ ahe. Shi kɛlɛ, fɔlɔi babaoo baawie nakai nɔŋŋ yɛ amɛbii lɛ ahe. Amɛkɛ mɔdɛŋbɔɔ babaoo etsɔse amɛbii lɛ “yɛ Nuntsɔ lɛ tsɔsemɔ kɛ ŋaawoo lɛ mli,” ni amrɔ nɛɛ amɛnáa miishɛɛ akɛ amɛaana amɛbii ni edara lɛ akɛ ‘amɛnyiɛ anɔkwale lɛ mli.’ (Efesobii 6:4) Yɛ anɔkwale mli lɛ, ni mɔ aaatsɔɔ ebii naanɔ wala gbɛ lɛ kɛ gboshinii ni jara wa fe fɛɛ ni yɔɔ lɛ haa amɛ. Nɔ hewɔ ji akɛ, Nyɔŋmɔ jamɔ hetuu kɛhamɔ, ní nɔ ni fata he ji ni aaahi shi taakɛ Yehowa taoɔ ni Kristofoi ahi shi lɛ ‘yɛ wala ni yɔɔ agbɛnɛ nɛɛ kɛ nɔ ni baaba lɛ he shiwoo.’—1 Timoteo 4:8.

Yehowa, ni ji Tsɛ ni eye emuu lɛ buɔ fɔlɔi ni yɔɔ Nyɔŋmɔ gbeyeishemɔ ni bɔɔ mɔdɛŋ waa koni amɛkɛ mumɔŋ tsɔsemɔ aha amɛbii lɛ akɛ amɛjara wa waa. Kɛ́ gbekɛbii lɛ kpɛlɛ tsɔsemɔ lɛ nɔ lɛ, amɛnáa miishɛɛ waa akɛ amɛkɛ amɛfɔlɔi lɛ aaafee ekome kɛtiu anɔkwa jamɔ sɛɛ. Be mli ni gbekɛbii ni tamɔ nɛkɛ lɛ daraa lɛ, amɛkɛ niiashikpamɔi ni yɔɔ miishɛɛ nɛɛ toɔ amɛjwɛŋmɔ mli. Amɛteŋ mɛi komɛi kɛ miishɛɛ kaiɔ be klɛŋklɛŋ ni amɛkɛ amɛhe wo Teokrase Sɔɔmɔ Skul * lɛ mli lɛ. Aloo ekolɛ amɛkaiɔ be klɛŋklɛŋ ni amɛkɛkane Biblia mli ŋmalɛ ko beni amɛfata amɛfɔlɔi lɛ ateŋ mɔ kome he yɛ shia kɛ shia shiɛmɔ nitsumɔ lɛ mli lɛ. Te aaafee tɛŋŋ ni amɛhiɛ aaakpa saji ni amɛnu ni amɛfɔlɔi lɛ miikane kɛmiijɛ Mi-Wolo ni Gbaa Biblia Mli Saji loo kɛmiijɛ Tsɔɔlɔ Kple lɛ Toiboo woji lɛ amli lɛ nɔ lɛ? * Gabriel kaiɔ nɔ ko ni ebasumɔ waa lɛ, ekɛɛ akɛ: “Beni miye afii ejwɛ pɛ lɛ, minyɛ láa ehaa mi daa gbi kɛ́ eehoo nii. Mikɛ henumɔ ni mli wa kaiɔ Maŋtsɛyeli lala ko lolo. Sɛɛ mli lɛ, Maŋtsɛyeli lala nɛɛ ye ebua mi ni mina sɛɛnamɔ ni yɔɔ Yehowa sɔɔmɔ he.” Ekolɛ bo hu okaiɔ lala ni ŋɔɔ ni Gabriel wieɔ he lɛ. No ji lala 157 ni yɔɔ lala wolo ni ji Sing Praises to Jehovah lɛ mli, ni yitso ji “Worship Jehovah During Youth” (Já Yehowa yɛ Ogbekɛbiiashi).

Lala lɛ jeɔ shishi akɛ: “Abifabii anaabui ejie Nyɔŋmɔ yi pɛŋ;/Amɛwó amɛgbeei anɔ kɛnyá Yesu he.” Yɛ anɔkwale mli lɛ, gbekɛbii komɛi ná hegbɛ akɛ amɛkɛ Yesu aaabɔ, ni eka shi faŋŋ akɛ amɛkɛ amɛnifeemɔi ni yɔɔ miishɛɛ ni anɔkwayeli yɔɔ mli lɛ ha emii shɛ ehe. Yesu kɛ bɔ ni gbekɛbii shweɔ koni atsɔɔ amɛ nii lɛ po fee nɔkwɛmɔnɔ eha ekaselɔi lɛ ni amɛkase. (Mateo 18:3, 4)  No hewɔ lɛ, gbekɛbii tsuɔ gbɛfaŋnɔ ko ni sa he nii yɛ Yehowa jamɔ mli. Yɛ anɔkwale mli lɛ, lala lɛ mli wiemɔi lɛ tsa nɔ akɛ: “Hɛɛ, abifabii aaanyɛ awo amɛ Nyɔŋmɔ.”

Gbekɛbii babaoo etsɔ jeŋba kpakpa ni amɛbaa—yɛ shia, yɛ skul kɛ yɛ hei krokomɛi lɛ—anɔ amɛkɛ woo ebaha Nyɔŋmɔ kɛ amɛwekui lɛ. Mɛɛ jɔɔmɔ po eji kɛha amɛ akɛ amɛaaná “Kristofoi fɔlɔi ní sumɔɔ anɔkwale.” (5 Mose 6:7) Fɔlɔi ni sheɔ Nyɔŋmɔ gbeyei lɛ boɔ Nyɔŋmɔ, ni ji Tsɛ ni yɔɔ suɔmɔ ni tsɔɔ ebɔɔ nii lɛ gbɛ ni sa akɛ amɛnyiɛ nɔ lɛ toi. Ni mɛɛ jɔɔmɔ po amɛnine shɛɔ nɔ nɛkɛ! Be mli ni amɛ hu amɛtsɔɔ gbekɛbii ni darako ni yɔɔ amɛwekui lɛ amli lɛ anii lɛ, kwɛ bɔ ni amɛmii shɛɔ amɛhe akɛ amɛaaná bii ní “boɔ amɛ toi ni haa amɛnáa miishɛɛ”! (Yesaia 48:17, 18) Angélica, ni amrɔ nɛɛ eesɔmɔ yɛ Yehowa Odasefoi anitsumɔhe nine ni yɔɔ Mexico lɛ kɛɛ akɛ: “Mifɔlɔi lɛ bɔɔ mɔdɛŋ koni amɛkɛ Biblia shishitoo mlai atsu nii be fɛɛ be. Enɛ ha mimii shɛ mihe waa yɛ migbekɛbiiashi. Miná miishɛɛ.”

Kristofoi ni tamɔ nɛkɛ lɛ kpɛlɛɔ nɔ akɛ, sɛɛnamɔ yɛ he akɛ ooobu omumɔŋ gboshinii lɛ he jogbaŋŋ. Ekolɛ oji oblanyo loo oblayoo ni akɛ anɔkwa Kristofoi asui kpakpai miitsɔse bo yɛ weku lɛ mli. Kɛ́ nakai ni lɛ, no lɛ nakai lala lɛ nɔŋŋ miiwo bo hewalɛ akɛ: “Oh Kristofoi oblahii kɛ oblayei, nyɛbɔa mɔdɛŋ nyɛhaa nyɛgbɛ he atsea.” Be ko baaba ni bo diɛŋtsɛ obaakpɛ oyiŋ, no hewɔ lɛ, amrɔ nɛɛ “Kpasamɔ Yehowa yɛ oblahiiaŋ./Kaagba ohe naa akɛ ale bo babaoo.”

Kɛ́ okɛ gbɛihemɔ ye klɛŋklɛŋ gbɛhe yɛ oshihilɛ mli yɛ gbɛ ni ejaaa nɔ lɛ, tsɔsemɔi fɛɛ ni akɛha bo lɛ baafee efolo ni obaanyɛ ofite gbɛkpamɔi ni oyɔɔ kɛha wɔsɛɛ lɛ. Bɔ ni oshweɔ akɛ ale bo waa lɛ baanyɛ aha ogbɔjɔ bɔ ni okwɛɔ ohe nɔ jogbaŋŋ ohaa lɛ mli. Enɛ eha mɛi komɛi kɛ mɛi ni etamɔ nɔ ni naagba ko bɛ amɛkɛbɔɔ he, ni ekolɛ amɛhe yɔɔ fɛo loo amɛyɔɔ sui kpakpai po, shi kɛlɛ amɛbɛ Kristofoi ashishitoo mlai ahe miishɛɛ lɛ eyabɔ. Akɛ Tara, ni ji mɔ titri ni akɛ lɛ tsɔɔ nii anaa yɛ vidio ni yitso ji Young People Ask—How Can I Make Real Friends? lɛ mli lɛ fee enɛ he mfoniri. Taakɛ eba lɛ yɛ Tara gbɛfaŋ lɛ, etsɛŋ ni Kristofonyo fɛɛ Kristofonyo oblanyo loo oblayoo ni kɛ mɛi ni bɛ bulɛ ko kɛha anɔkwa jamɔ bɔɔ lɛ baana taakɛ lala lɛ kɛɔ lɛ akɛ, “naanyo fɔŋ fiteɔ su kpakpa.” Eheɔ mɔdɛŋbɔɔ kɛ afii babaoo dani anáa sui kpakpai, shi kɛlɛ abaanyɛ afite amɛ yɛ be kukuoo pɛ mli.

Yɛ anɔkwale mli lɛ, shihilɛ yɛ gbɛ ni tsɔɔ Nyɔŋmɔ gbeyeishemɔ nɔ lɛ bɛ mlɛo. Fɛɛ sɛɛ lɛ, taakɛ lala lɛ yaa nɔ ekɛɔ lɛ, “Kɛ́ okai o-Nyɔŋmɔ  lɛ yɛ oblahiiaŋ,/Ní osɔmɔ Yehowa yɛ mumɔ kɛ anɔkwale mli lɛ,” obaato shishitoo nɔ̃ kpakpa kɛha omanyeyeli diɛŋtsɛ oma shi. Ni “obaaná miishɛɛ pii yɛ odalɛ mli.” Obaaje shishi oyɔse yɛ gbɛ ni da nɔ akɛ, yɛ Yehowa kwɛmɔ ni suɔmɔ yɔɔ mli lɛ shishi lɛ, nɔ ko nɔ ko nyɛŋ onaa atsĩ yɛ nɔ ni sa ehiɛ ni ooofee lɛ mli. Nakai gbɛ nɔ obaatsɔ ni obaada akɛ onukpa ni sheɔ Nyɔŋmɔ gbeyei. Kɛfata he lɛ, nilee mli ni ojɛɔ ni okɛ Kristofoi atsɔsemɔi ni akɛhaa bo lɛ tsuɔ nii lɛ haa onáa hegbɛ koni “oha Nyɔŋmɔ tsui anya kɛ miishɛɛ.” Mɛɛ hegbɛ ni nɔ kwɔ fe enɛ adesa ko aaaná?—Abɛi 27:11.

No hewɔ lɛ, oblahii kɛ oblayei, nyɛhaa bɔ ni tsɔsemɔ ni jɛɔ Yehowa kɛ nyɛfɔlɔi ni ji Kristofoi lɛ aŋɔɔ lɛ ajara wa ha lɛ ahia nyɛjwɛŋmɔ mli be fɛɛ be. Eba akɛ suɔmɔ kpele ni amɛyɔɔ kɛha bo lɛ baakanya bo ni ofee nibii ni saa Yehowa hiɛ. Taakɛ Yesu Kristo kɛ oblanyo fioo anɔkwafo Timoteo fee lɛ, obaaha oŋwɛi Tsɛ lɛ kɛ ofɔlɔi lɛ aná miishɛɛ. Ni kɛ́ bo diɛŋtsɛ obatsɔ fɔlɔ lɛ, ekolɛ okɛ Angélica, ni atsĩ etã kɛtsɔ hiɛ lɛ baakpãa gbee, mɔ ni kɛɛ akɛ: “Kɛ́ mifɔ lɛ, mabɔ mɔdɛŋ waa ni matɛo suɔmɔ kɛha Yehowa mawo etsui mli kɛjɛ egbekɛbiiashi, ni maha enɛ afee edɛhiɛmɔ tso yɛ eshihilɛ mli.” Eji anɔkwale akɛ, gbɛ ni ja ni kɛ mɔ yaa naanɔ wala mli lɛ ji gboshinii ni jara wa fe fɛɛ ni yɔɔ!

[Shishigbɛ niŋmai]