Mɛi ni Egbe Gilead Nikasemɔ Naa lɛ Yaa Nɔ akɛ Nikpamɔ Nitsulɔi ni Yɔɔ Ekãa!

“NIKPAMƆ lɛ fá moŋ, shi nitsulɔi lɛ faaa. No hewɔ lɛ nyɛkpaa nikpamɔ nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!” (Mateo 9:37, 38) Nikaselɔi ni gbe Buu-Mɔɔ Biblia Gilead Skul klas ni ji 116 lɛ naa lɛ ná shishinumɔ krɛdɛɛ kɛha nakai wiemɔi lɛ be mli ni amɛsaa amɛhe koni amɛya amɛmaŋsɛɛ sanekpakpa jajemɔ nitsumɔ lɛ mli lɛ.

Yɛ March 13, afi 2004 lɛ, mɛi 6,684 bua amɛhe naa yɛ Watchtower Educational Center ni yɔɔ Patterson, yɛ New York, kɛ hei ni akwɛ skul naagbee nifeemɔ lɛ kɛtsɔ tɛlivishiŋ nɔ, nɔ mli ni akɛ ŋaawoo kɛ hewalɛwoo wiemɔi wo klasbii lɛ agbɛ lɛ. Wɔ fɛɛ wɔbaanyɛ wɔná ŋaawoo ni akɛha amɛ lɛ he sɛɛ be mli ni wɔtsuɔ nii kɛ ekãa yɛ mumɔŋ nikpamɔ nitsumɔ lɛ mli lɛ.

Nifeemɔ lɛ shishijee wiemɔ ni Theodore Jaracz, ni ji Nɔyeli Kuu lɛ mlinyo, ni gbe Gilead klas ni ji kpawo lɛ naa lɛ ha lɛ ma Yesu wiemɔi akɛ: “Nyɛyaa ni nyɛyafea jeŋmaji fɛɛ mikaselɔi” lɛ nɔ mi. (Mateo 28:19, 20) Akɛni aawo mɛi ni egbe nikasemɔ lɛ naa lɛ agbɛ koni amɛyasɔmɔ yɛ maji srɔtoi 20 anɔ hewɔ lɛ, kwɛ bɔ ni nakai wiemɔ lɛ sa jogbaŋŋ ha! Ekai nikaselɔi lɛ akɛ tsɔsemɔ ni jɛ Nyɔŋmɔ Wiemɔ lɛ mli lɛ ewaje amɛ jogbaŋŋ ni amɛtsɔmɔ nitsulɔi ni yɔɔ ekãa yɛ mumɔŋ nikpamɔ nitsumɔ ni he hiaa waa lɛ mli.—Mateo 5:16.

Bɔ ni Aaafee Atsɔmɔ Nikpamɔ Nitsulɔi ni Woɔ Yibii

Robert Wallen, ni kɛ Gilead Skul lɛ eshara afii babaoo lɛ ji klɛŋklɛŋ wielɔ yɛ nifeemɔ lɛ shishi. Beni ewieɔ saneyitso ni ji “Musuŋtsɔlɛ Su ni Fe Fɛɛ” lɛ he lɛ, ekɛɛ nikaselɔi lɛ akɛ: “Musuŋtsɔlɛ ji wiemɔ ko ni toimulɔi po baanyɛ anu ni shwilafoi baanyɛ ana.” Yesu le amanehului ni mɛi krokomɛi naa lɛ jogbaŋŋ ni etao ni ejie kɛya. (Mateo 9:36) Nikaselɔi lɛ baaná hegbɛi babaoo ni amɛkɛaafee nakai nɔŋŋ—yɛ shiɛmɔ nitsumɔ lɛ mli, yɛ asafo lɛ mli, yɛ maŋsɛɛ sanekpakpa jajelɔi ashiai amli, kɛ yɛ amɛ diɛŋtsɛ amɛgbalashihilɛ mli. Wielɔ lɛ wo amɛ hewalɛ akɛ: “Nyɛhaa nɔ ni musuŋtsɔlɛ ji lɛ ajea kpo yɛ nyɛshihilɛi amli beni nyɛsɔmɔɔ mɛi krokomɛi lɛ. Nyɛjeŋba kpakpa lɛ pɛ baaye abua nyɛ ni nyɛhi shi daa yɛ maŋsɛɛ sanekpakpa jajelɔi ashiai lɛ amli. No hewɔ lɛ, nyɛtswaa nyɛfai shi akɛ nyɛbaawo musuŋtsɔlɛ.”—Kolosebii 3:12.

No sɛɛ lɛ, Gerrit Lösch, ni ji Nɔyeli Kuu lɛ mlinyo, ni gbe Gilead klas ni ji 41 lɛ naa lɛ wie saneyitso ni ji “Mɛi ni Shiɛɔ Yiwalaheremɔ” lɛ he. (Yesaia 52:7) Bɔni afee ni ahere gbɔmɛi ayiwala be mli ni akpataa nibii agbɛjianɔtoo nɛɛ hiɛ lɛ, ehe miiha ni amɛná anɔkwa nilee ni jɛ Nyɔŋmɔ Wiemɔ lɛ mli, ni amɛjaje amɛhemɔkɛyeli lɛ amɛtsɔɔ yɛ faŋŋ ni abaptisi amɛ. (Romabii 10:10; 2 Timoteo 3:15; 1 Petro 3:21) Shi kɛlɛ, yiŋtoo titri hewɔ ni ashiɛɔ yiwalaheremɔ lɛ jeee ni ahere gbɔmɛi ayiwala, shi moŋ koni ekɛ yijiemɔ abaha Nyɔŋmɔ. No hewɔ lɛ, Nyɛminuu Lösch wo mɛi ni baatsɔmɔ maŋsɛɛ sanekpakpa  jajelɔi lɛ ŋaa akɛ: “Nyɛkɛ Maŋtsɛyeli shɛɛ sane lɛ ayaa shikpɔŋ lɛ naagbeehei lɛ, ni nyɛfea yiwalaheremɔ he shiɛlɔi ni yɔɔ ekãa ni nyɛkɛwoa Yehowa hiɛ nyam.”—Romabii 10:18.

Lawrence Bowen, ni eji Gilead tsɔɔlɔ lɛ tée sanebimɔ ni ji “Te Okpɛ́ɔ Kaŋkaŋ Ohaa Tɛŋŋ?” lɛ shi. Etsɛ́ Yesu wiemɔi ni aŋma yɛ Mateo 6:22 lɛ yisɛɛ ni ekɛwo nikaselɔi ni egbe nikasemɔ naa lɛ hewalɛ ni amɛha amɛhiŋmɛi nɔ ‘atse’ bɔni afee ni “amɛjie mumɔŋ nibii ahe shishinumɔ ni woɔ Yehowa hiɛ nyam ni ehe baa sɛɛnamɔ kɛhaa nanemɛi adesai lɛ akpo.” Yesu jɛ esɔɔmɔ nitsumɔ lɛ shishijee mli efee enɛ he nɔkwɛmɔnɔ ni yeɔ emuu efɔ̃ shi kɛtsɔ ejwɛŋmɔ ni etee nɔ eha ehi Nyɔŋmɔ suɔmɔnaa nifeemɔ nɔ lɛ nɔ. Nibii ni yɔɔ naakpɛɛ ni Yesu Tsɛ tsɔɔ lɛ yɛ ŋwɛi lɛ anɔjwɛŋmɔ ye ebua lɛ ni edamɔ kaai ni Satan kɛba enɔ yɛ ŋa lɛ nɔ lɛ anaa. (Mateo 3:16; 4:1-11) Yesu tsɔɔ akɛ ekɛ ehe fɔ̃ɔ Yehowa nɔ kwraa yɛ nitsumɔ ni Nyɔŋmɔ kɛwo edɛŋ lɛ he nitsumɔ mli. Nakai nɔŋŋ esa akɛ maŋsɛɛ sanekpakpa shiɛlɔi lɛ aya nɔ amɛhiɛ Biblia kasemɔ sui kpakpai amli ni amɛkɛ amɛhe fɛɛ afɔ̃ Yehowa nɔ bɔni afee ni amɛnyɛ kaai ni jwere amɛhiɛ lɛ anaa amɛdamɔ.

Mark Noumair, ni eji Gilead tsɔɔlɔ ni egbe Gilead klas ni ji 77 lɛ naa lɛ mu wiemɔ ni aha kɛtsara nɔ nɛɛ naa, ewiemɔ lɛ yitso ji “Naa Wɔ Wɔyɛ Odɛŋ.” (Yoshua 9:25) Ewó nikaselɔi lɛ hewalɛ  koni amɛkase Gibeonbii ni hi shi yɛ blema beaŋ lɛ asu lɛ. Eyɛ mli akɛ Gibeon ji “maŋ kpeteŋkpele, . . . ni emli hii lɛ fɛɛ kãkãlɔi sɔŋŋ ni” moŋ, shi Gibeonbii lɛ eyadiii gbɛihemɔ sɛɛ loo ní amɛaakpa gbɛ akɛ aaafee amɛtsui naa nii. (Yoshua 10:2) Amɛjɛ amɛsuɔmɔ mli amɛsɔmɔ yɛ Levibii lɛ ashishi akɛ “laiyalɔi kɛ faaŋyalɔi” kɛfĩ Yehowa jamɔ sɛɛ. (Yoshua 9:27) Yɛ gbɛ ko nɔ lɛ, nikaselɔi ni egbe nikasemɔ naa lɛ miikɛɛ Yoshua Kpeteŋkpele, ni ji Yesu Kristo akɛ, “Naa wɔ, wɔyɛ odɛŋ.” Amrɔ nɛɛ ni amɛyaaje amɛmaŋsɛɛ nitsumɔ lɛ shishi lɛ, ehe miihia ni amɛkpɛlɛ nitsumɔ fɛɛ nitsumɔ ni Yoshua Kpeteŋkpele lɛ kɛaawo amɛdɛŋ ni amɛtsu lɛ nɔ.

Niiashikpamɔi kɛ Sanebimɔi

“Nyɛtsɔɔa Ŋmalɛi lɛ Amli Fitsofitso” ji saneyitso ni Wallace Liverance, ni gbe Gilead klas ni ji 61 lɛ naa, ni eji tsɔɔlɔi lɛ ateŋ mɔ kome hu lɛ kɛ nikaselɔi akuu ko gba he sane. Amɛgba niiashikpamɔi ni amɛná yɛ shiɛmɔ nitsumɔ lɛ mli yɛ be mli ni skul lɛ yaa nɔ lɛ, ni amɛfee he nɔkwɛmɔnii. Eje kpo faŋŋ akɛ hiɛdɔɔ ni amɛkɛkase Ŋmalɛi lɛ yɛ amɛ nyɔji enumɔ tsɔsemɔ lɛ mli lɛ shɛ amɛtsuii ahe ni ekanya amɛ koni amɛha mɛi krokomɛi ale nibii ni amɛkase lɛ. (Luka 24:32) Yɛ nyɔji enumɔ ni akɛtsɔse amɛ lɛ mli lɛ, nikaselɔi lɛ ateŋ mɔ kome nyɛ ekɛ lɛ diɛŋtsɛ eheloonaa nyɛminuu susu nibii ni ekaseɔ lɛ ahe. Enɛ wo enyɛminuu lɛ hewalɛ ni etao asafo ni yɔɔ he ni eyɔɔ lɛ sɛɛgbɛ, ni eje shishi ekase Biblia lɛ lɛ diɛŋtsɛ. Amrɔ nɛɛ eji shiɛlɔ ni abaptisiko lɛ.

Yɛ niiashikpamɔi nɛɛ asɛɛ lɛ, Richard Ashe kɛ John Gibbard bibii Yehowa tsuji ni kɛ afii babaoo esɔmɔ, ní nɔkwɛlɔi gbɛfalɔi ni aaatsɔse amɛ yɛ Watchtower Education Center lɛ fata he lɛ saji. Amɛji mɛi komɛi ni amɛgbe Gilead klas srɔtoi ni tsɔ hiɛ lɛ naa. Amɛteŋ mɔ kome kaiɔ akɛ yɛ be mli amɛklas tsɔsemɔ lɛ yaa nɔ lɛ, Nyɛminuu Knorr wie akɛ: “Nyɛbaakase nii pii yɛ Gilead. Shi kɛ enɛ ha nyɛyitsoŋ fuu nyɛ kɛ henɔwomɔ lɛ, no lɛ wɔnine enyɛ shi. Wɔmiisumɔ ni nyɛgbe tsɔsemɔ lɛ naa akɛ mɛi ni ená tsui ni ja.” Nyɛmimɛi, ni ji nɔkwɛlɔi gbɛfalɔi lɛ wo klasbii ni yɔɔ amrɔ nɛɛ hewalɛ koni amɛfee mɛi ni yɔɔ gbɔmɛi kɛ amɛhiamɔ nii ahe miishɛɛ, ni amɛkɛ mɛi krokomɛi aye tamɔ bɔ ni Kristo kɛ amɛye lɛ, ni amɛkɛ heshibaa akpɛlɛ nitsumɔi fɛɛ ni akɛhaa amɛ lɛ nɔ. Ŋwanejee ko bɛ he akɛ ŋaawoo nɛɛ ni maŋsɛɛ sanekpakpa shiɛlɔi heei nɛɛ kɛbaatsu nii lɛ baaye ebua amɛ koni amɛwo yibii yɛ amɛnitsumɔi lɛ amli.

Nyɛyaa Nɔ akɛ Nikpamɔ Nitsulɔi ni Yɔɔ Ekãa!

Mɛi ni ba nifeemɔ lɛ shishi lɛ ná hegbɛ akɛ amɛaabo Nɔyeli Kuu lɛ mlinyo kroko ni ji Stephen Lett toi. Lɛ ekɛ wiemɔ ni tere nifeemɔ lɛ, ni yitso ji “Nyɛyaa Nɔ akɛ Nikpamɔ Nitsulɔi ni Yɔɔ Ekãa!” lɛ ha. (Mateo 9:38) Bei ni akɛkpaa ŋmɔshi nii yɛ nikpamɔ diɛŋtsɛ mli lɛ faaa. Ehe hiaa ni nikpalɔi lɛ atsu nii waa. Kwɛ bɔ ni enɛ he hiaa babaoo yɛ nɛkɛ nibii agbɛjianɔtoo nɛɛ naagbee mli ha! Wala he ebaje oshara mli yɛ mumɔŋ nikpamɔ nitsumɔ ni da lɛ mli. (Mateo 13:39) Nyɛminuu Lett wo nikaselɔi lɛ hewalɛ ni ‘amɛmɔdɛŋbɔi lɛ anaa akaba shi,’ shi moŋ amɛha amɛhe ‘adɔ la’ ni ‘amɛsɔmɔ Yehowa’ yɛ nɛkɛ nitsumɔ ni akuŋ sɛɛ atsuŋ dɔŋŋ nɛɛ mli. (Romabii 12:11) Wielɔ lɛ tsɛ́ Yesu wiemɔi nɛɛ ayisɛɛ akɛ: “Nyɛholea nyɛhiŋmɛii anɔ ni nyɛkwɛa ŋmɔji lɛ bɔ ni amɛ́gba futaa momo ni sa kpamɔ.” (Yohane 4:35) Kɛkɛ ni ewo nikaselɔi lɛ hewalɛ koni amɛtsɔɔ ekãa ni amɛyɔɔ yɛ nikpamɔ nitsumɔ lɛ mli kɛtsɔ mɔdɛŋ ni amɛaabɔ yɛ anɔkwayeli mli ni amɛnine ashɛ mɛi anɔ yɛ be kɛ he ni amɛbaana amɛ yɛ, kɛ agbɛnɛ kɛtsɔ hegbɛi fɛɛ ni amɛaaná kɛye trukaa odase ni amɛkɛaatsu nii lɛ nɔ. Ní amɛaafee klalo koni amɛfee nii ni baaha amɛná hegbɛ kɛye odase lɛ baanyɛ aye abua ni amɛye odase yɛ gbɛ ni mɔɔ shi nɔ. Yehowa ji Nyɔŋmɔ ni yɔɔ ekãa, ni eekpa gbɛ akɛ wɔ fɛɛ wɔɔkase lɛ ni wɔkɛ ekãa atsu nii waa yɛ mumɔŋ nikpamɔ nitsumɔ lɛ mli.—2 Maŋtsɛmɛi 19:31; Yohane 5:17.

Be mli ni Nyɛminuu Jaracz, ni ji gbɛjianɔtoo lɛ nɔ sɛinɔtalɔ lɛ kɛ nifeemɔ lɛ baa naagbee lɛ, ekane ŋamɔi srɔtoi ni nine shɛ nɔ kɛjɛ nitsumɔhe niji srɔtoi babaoo aŋɔɔ lɛ, ni ekɛ nikaselɔi lɛ ayijiemɔ woji lɛ ha amɛ. Nikaselɔi ni egbe nikasemɔ naa lɛ ateŋ mɔ kome kane wolo ni klasbii lɛ ŋma kɛjie hiɛsɔɔ kpo yɛ tsɔsemɔ ni amɛná lɛ he. Eyɛ faŋŋ akɛ, klas ni ji 116 skul naagbee nifeemɔ lɛ ha mɛi fɛɛ ni ba nifeemɔ lɛ shishi lɛ tswa amɛfai shi waa akɛ amɛbaaya nɔ akɛ nikpamɔ nitsulɔi ni yɔɔ ekãa.

[Akrabatsa ni yɔɔ baafa 25]

KLASBII LƐ AHE SAJI

Maji srɔtoi anɔ ni amɛjɛ kɛba: 6

Maji srɔtoi anɔ ni aha amɛ nitsumɔ yɛ mli: 20

Nikaselɔi lɛ ayifalɛ: 46

Afii abɔ ni amɛye lɛ mlijaa: 34.2

Afii abɔ ni amɛhi anɔkwale lɛ mli lɛ mlijaa: 17.2

Afii abɔ ni amɛkɛsɔmɔ yɛ be fɛɛ sɔɔmɔ nitsumɔ lɛ mli lɛ mlijaa: 13.9

[Mfoniri ni yɔɔ baafa 26]

Buu-Mɔɔ Biblia Gilead Skul Klasbii ni Ji 116 ni Gbe Nikasemɔ Naa

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.