Wolo ko ni Aŋma Kɛyaha Noa

“SUƆLƆ Noa, mikane bo kɛ bɔ ni okpɛ adeka ni akɛhere okɛ oweku lɛ yiwala yɛ Nu Afua lɛ mli lɛ he sane shii abɔ yɛ Biblia lɛ mli.”

Nɛkɛ ji bɔ ni oblayoo ko ni eye afii 15 ni atsɛɔ lɛ Minnamaria lɛ je wolo ko ni eŋma kɛha woloŋmaa he akaŋshii ni ato he gbɛjianɔ kɛha nikaselɔi ni eye kɛjɛ afii 14 kɛyashi afii 21 lɛ shishi. Finland nitsumɔhe ni kwɛɔ woji kɛ majemɔ nɔ, Tsɔɔlɔi Akuu ni Tsɔɔ Finland Wiemɔ, kɛ Kuu ni Kwɛɔ Finland Woji Anɔ lɛ to akaŋshii nɛɛ he gbɛjianɔ. Abi koni mɛi ni baaná mli gbɛfaŋnɔ lɛ aŋma nɔ ko ni kɔɔ wolo ko he. Abaanyɛ aŋma nii lɛ aha wolo lɛ ŋmalɔ lɛ loo mɔ ko ni awie ehe yɛ wolo lɛ mli. Tsɔɔlɔi lɛ hala woji ni nikaselɔi lɛ ŋmala lɛ ateŋ nɔ ni fa fe 1,400 ni amɛkɛmaje mɛi ni baakwɛ woji lɛ amli lɛ. No sɛɛ lɛ mɛi ni kwɛ mli lɛ hala woji lɛ ateŋ nɔ ni fe fɛɛ, nyɔŋma ni ye gbɛhe ni ji enyɔ, kɛ nyɔŋma ni ye gbɛhe ni ji etɛ. Minnamaria mii shɛ ehe akɛ ahala wolo ni eŋma lɛ afata kuu ni ji etɛ lɛ he.

Mɛni hewɔ Minnamaria, ni ji nikaselɔ ni eye afii 15 lɛ ŋma ewolo lɛ kɛyaha Noa, ni ji nuu ko ni hi shi aaafee afii 5,000 ni eho nɛ lɛ? Ekɛɛ akɛ: “Biblia lɛ ji nɔ̃ klɛŋklɛŋ ni ba mijwɛŋmɔ mli. Mile gbɔmɛi ni awie amɛhe yɛ Biblia lɛ mli lɛ jogbaŋŋ. Mikane amɛhe saji babaoo aahu akɛ amɛtamɔ mɛi ni yɔɔ wala mli kɛha mi. Mihala Noa ejaakɛ eshihilɛ haa mináa miishɛɛ, ni eyɛ srɔto yɛ minɔ lɛ he.”

Minnamaria kɛ wiemɔi nɛɛ mu wolo ni eŋma kɛha Noa lɛ naa akɛ: “Okã he oji hemɔkɛyeli kɛ toiboo he nɔkwɛmɔnɔ lolo. Oshihilɛ gbɛ lɛ woɔ mɛi fɛɛ ni kaneɔ Biblia lɛ hewalɛ koni amɛtsu amɛhemɔkɛyeli lɛ he nii.”

Wolo nɛɛ ni oblayoo fioo ko ni kaneɔ Biblia lɛ ŋma lɛ ji nɔkwɛmɔnɔ ni sa ni tsɔɔ akɛ Biblia lɛ “hiɛ kã ni eyɛ hewalɛ” yɛ gbɔmɛi, ni ji gbekɛbii kɛ mɛi ni edara fɛɛ anɔ lɛɛlɛŋ.—Hebribii 4:12.