Kapadokia He ni Gbɔmɛi Hi Shihilɛhei ni Kɔɔyɔɔ kɛ Nu Fee lɛ Amli

BƆFO Petro wie Kapadokia he. “Gbɔi ni egbɛ eshwã . . . Kapadokia” lɛ fata mɛi ni eŋma eklɛŋklɛŋ wolo ni jɛ mumɔŋ lɛ eyaha lɛ ahe. (1 Petro 1:1) Te Kapadokia maŋ lɛ shikamɔ yɔɔ ha tɛŋŋ? Mɛni hewɔ maŋbii lɛ hiɔ tɛkploi amli lɛ? Te fee tɛŋŋ ni akɛ Kristojamɔ tee jɛmɛ?

Britania gbɛfalɔ W. F. Ainsworth ni yasara Kapadokia yɛ afi 1840 afii lɛ amli lɛ wie akɛ: “Trukaa kɛkɛ ni wɔyaje shikpɔŋ ko ni tɛi wuji kɛ amɛyiteŋ piɔpiɔ tamɔ gbɔtsui ni tɛsaai babaoo yɔɔ nɔ ni haa mɔ naa kpɛɔ ehe lɛ nɔ.” Shikpɔŋ lɛ shikamɔ ni yɔɔ srɔto lɛ kã he ehaa ŋmɛnɛŋmɛnɛ beaŋ saralɔi ni yasaraa nɛkɛ kpokpaa nɛɛ yɛ Turkey lɛ anaa kpɛɔ amɛhe. Tɛi “kakadaji ni mamɔ shi” ni yɔɔ naakpɛɛ ni amɛtsaratsaraa nɔ tamɔ asraafoi ni eshɔ̃ kɛdamɔ shi yɔɔ Kapadokia jɔɔi lɛ amli. Ekomɛi tamɔ mɔji wuji ni lasu tsɔɔ mli ni kɛlɛmɔ ji mitai 30 loo nɔ ni fe nakai. Ekrokomɛi ashimaamɔ tamɔ gbɔtsui wuji, tɛ akulashiŋ, loo mlɛ.

Kwɛ bɔ ni hulu kpɛmɔ ni shwieɔ tɛi nɛɛ anɔ yɛ gbi lɛ mli lɛ, haa amɛnɔ kpɛlɛɔ sui srɔtoisrɔtoi ni yɔɔ fɛo waa! Yɛ leebi maŋkpa lɛ, amɛsu baa tamɔ etsuru. Shwane mli lɛ, amɛsu tsakeɔ kɛtsɔɔ eyɛŋ, ni yɛ hulushinyɔɔ mli lɛ, amɛsu lɛ tsakeɔ kɛtsɔɔ wuɔfɔ. Mɛni kɛ “tɛi ni tamɔ gbɔtsui kɛ tɛsaai ni mamɔ shi babaoo” nɛɛ ba? Ni mɛni hewɔ mɛi ni yɔɔ kpokpaa nɛɛ nɔ lɛ kɛfeɔ amɛwɔɔhei lɛ?

Kɔɔyɔɔ kɛ Nu Kpɛ́ Tɛsaai lɛ Amli

Kapadokia yɛ Anatolia Ŋshɔkpɔ ni yɔɔ Asia kɛ Europa teŋ lɛ teŋ tuuntu. Eji jeee lasu gɔji enyɔ ni fɛlɛ yɛ nɛkɛ kpokpaa nɛɛ nɔ kulɛ, ebafee shikpɔŋ grɔŋŋ kɛ eyiteŋ trɛnɛɛ. Afii akpei abɔ ni eho lɛ, lasu gɔji enyɔ ni fɛlɛ lɛ ha tɛsaai srɔtoi enyɔ jie amɛhe kpo—tɛsaa ni wa kɛ tɛsaa ni waaa, ni ji tɛsaa yɛŋ ni ba kɛjɛ lasu gɔŋ mli lamulu ni ewa mli.

Be mli ni faai, nugbɔ, kɛ kɔɔyɔɔ yeɔ tɛsaai ni waaa lɛ ahe fiofio lɛ, eha jɔɔi ni mli kwɔlɔ jie amɛhe kpo yɛ mli. Yɛ be ko sɛɛ lɛ, tɛsaai gɔgɔmeei ni yɔɔ nɛkɛ jɔɔi ni mli kwɔlɔ waa nɛɛ atoi lɛ amli gbalagbalaa fiofio kɛtsɔmɔ tɛsaai babaoo ni tamɔ gbɔtsui wuji, ni eha jɛmɛ shikpɔŋ lɛ nɔ fee fɛo kɛ nibii ni ashɔ̃shɔ̃i ni anaaa yɛ shikpɔŋ lɛ nɔ he ko kwraa. Tɛsaai ni tamɔ gbɔtsui wuji lɛ ateŋ ekomɛi ahe gbulɔ bui, ni eha amɛsu batsɔ tamɔ wo agbakui. Maŋbii lɛ kpɛ́ tɛsaa ni waaa lɛ mli kɛfee wɔɔhei, ni be mli ni weku lɛ daa lɛ, amɛkpɛ́ɔ wɔɔhei lɛ babaoo amɛfataa he. Nɛkɛ shihilɛhei nɛɛ amli jɔɔ yɛ hulutsoo be mli ni amɛmli feɔ kulɔkulɔ yɛ fɛ̃i be mli kɛhaa amɛ.

Shihilɛ yɛ Hiŋmɛigbelemɔ Gbɛŋta ko He

Eji jeee hiŋmɛigbelemɔ gbɛŋta ko ni maŋbii ni yɔɔ Kapadokia ni hiɔ tɛkploi amli lɛ yɔɔ he kulɛ, mɛi fioo ko pɛ amɛkɛ  baaná sharamɔ. Silk Road (Sliki Gbɛjegbɛ) ni ehe gbɛi waa, ni ji jarayeli gbɛ ni jɛkɛmɔ ji kilomitai 6,500 ni tsɔɔ Roma Nɔyelihei lɛ kɛ China maŋ lɛ mli lɛ tsɔɔ Kapadokia maŋ lɛ mli kɛhoɔ. Yɛ jarayelɔi lɛ asɛɛ lɛ, Persia asraafoi, Hela asraafoi, kɛ Roma asraafoi fã gbɛ kɛtsɔ gbɛ nɛɛ nɔ. Nɛkɛ gbɛfalɔi nɛɛ kɛ jamɔŋ susumɔi heei ba.

Beni shɛɔ klɛŋklɛŋ afii 200 Ŋ.B. lɛ, no mli lɛ ayɛ Yudafoi ashihilɛhei yɛ Kapadokia. Ni Yudafoi ni jɛ nɛkɛ kpokpaa nɛɛ nɔ tee Yerusalem yɛ afi 33 Ŋ.B. Amɛtee jɛmɛ koni amɛyaye Pentekoste Gbijurɔ lɛ. No hewɔ lɛ, beni afɔse mumɔ krɔŋkrɔŋ lɛ ashwie mɛi lɛ anɔ sɛɛ lɛ, bɔfo Petro shiɛ etsɔɔ Yudafoi ni jɛ Kapadokia lɛ. (Bɔfoi lɛ Asaji 2:1-9) Eka shi faŋŋ akɛ amɛteŋ mɛi komɛi here Petro shɛɛ sane lɛ nɔ ni amɛkɛ hemɔkɛyeli hee ni amɛná lɛ ku amɛsɛɛ kɛtee amɛmaŋ. No hewɔ lɛ, Petro ŋma Kristofoi ni yɔɔ Kapadokia lɛ yɛ eklɛŋklɛŋ wolo lɛ mli.

Shi kɛlɛ, beni be shwieɔ mli lɛ, wɔŋjalɔi ajeŋ nileei bɔi Kristofoi ni yɔɔ Kapadokia lɛ anɔ hewalɛ namɔ. Kapadokia sɔlemɔ lɛ mli hiɛnyiɛlɔi onukpai etɛ ni hi shi yɛ klɛŋklɛŋ afii 400 lɛ mli lɛ po kɛ hiɛdɔɔ fã Triniti tsɔɔmɔ ni damɔɔɔ ŋmalɛ nɔ lɛ he. Amɛji Gregory ni jɛ Nazianzus, Basil Kpeteŋkpele lɛ, kɛ enyɛmi nuu Gregory ni jɛ Nyssa.

Basil Kpeteŋkpele lɛ wo mɔ kome shihilɛ hu he hewalɛ. Tɛsaai ni akpɛ́ mli ni Kapadokiabii lɛ hiɔ mli lɛ bafee shihilɛhei ni sa jogbaŋŋ kɛha henaatsilɔi ashihilɛ ni ejie yi lɛ. Be mli ni mɔ kome shihilɔi lɛ ayi faa lɛ, akpɛ́ tɛi wuji ni tamɔ gbɔtsui lɛ ekomɛi amli kɛfee sɔlemɔtsui. Beni shɛɔ afii ohai 13 lɛ, no mli lɛ akpɛ́ sɔlemɔtsui aaafee ohai etɛ yɛ tɛsaa lɛ mli. Ábaa nɛkɛ sɔlemɔtsui nɛɛ ateŋ babaoo yi kɛbashi ŋmɛnɛ.

Eyɛ mli akɛ akɛ sɔlemɔtsui lɛ kɛ mɔ kome shihilɔi ashihilɛhei nɛɛ tsuuu nii dɔŋŋ moŋ, shi mɛi ni yɔɔ jɛmɛ lɛ ashihilɛ tsakeko tsɔ yɛ afii ohai abɔ ni eho lɛ amli. Tɛkploi babaoo kã he amɛji shihilɛhei lolo. Mɛi babaoo ni yasaraa Kapadokia maŋ lɛ anaa kpɛɔ amɛhe yɛ bɔ ni maŋbii ni hiɛ wa kɛ nitsumɔ lɛ etsake adebɔɔ naa nibii ni ba lɛ kɛfee shihilɛhei diɛŋtsɛ amɛha lɛ he.

[Shikpɔŋ he mfoniri ni yɔɔ baafa 24, 25]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

KAPADOKIA

CHINA (Cathay)