“Koni Nyɛha Ale Yehowa Gbɛi Lɛ”

MƐI ahiɛ sɔɔ Buu-Mɔɔ kɛ wolo tɛtrɛɛ ni fata he, ni ji Awake! lɛ yɛ jeŋ fɛɛ, yɛ mumɔŋ nibii ahe ni amɛwieɔ kɛ mɔ nii ni amɛtsɔɔ lɛ hewɔ. Nyɛsɛɛ nɛɛ, mɔ ko ni yɔɔ France ni kaneɔ woji tɛtrɛbii nɛɛ jie enɛ kpo yɛ wolo ni nyiɛ sɛɛ nɛɛ ni eŋma lɛ mli:

“Oblayoo ji mi, ni afɔ́ mi yɛ Afrika, ni miskulyaa faaa kwraa. Nyɛsɛɛ nɛɛ nɔŋŋ mibɔi nyɛ woji tɛtrɛbii lɛ kanemɔ. Saji ahe ni amɛwieɔ lɛ gbala mi, ni miiyɔse sɛɛnamɔ ni yɔɔ nikanemɔ he. Nyɛwoji tɛtrɛbii lɛ eha wiemɔi komekomei ni mile lɛ etee hiɛ, ni manyɛ maŋma wolo ni tɔmɔi faaa tsɔ̃ yɛ mli.

“Efeɔ mi naakpɛɛ akɛ nyɛkalaa saji fɛɛ ni kɔɔ adesai, wɔshikpɔŋ lɛ, kɛ Bɔlɔ lɛ ahe. Nɛkɛ saji nɛɛ ashishinumɔ yɛ faŋŋ akɛ ehaa mɔ náa ekanemɔ he miishɛɛ. Mɔ ko kwraa bɛ ni yɔɔ nyɛmɔ ni ekɛaatsɔɔ gbɔmɛi srɔtoi fɛɛ anii yɛ be kome too lɛ nɔŋŋ mli akɛ ja nyɛ pɛ.

“Minaa kpɛɔ mihe hu kɛji mikwɛ enɛɛmɛi fɛɛ ni nyɛfeɔ ni jeee yɛ jarayeli sɛɛnamɔ ko hewɔ, shi moŋ koni nyɛha ale Yehowa gbɛi lɛ. Mile akɛ ekpɛlɛɔ nyɛ nɔ, ni miida nyɛ shi hu. Nyɛfainɛ, nyɛyaa nɔ ni nyɛkɛ nyɛhe afɔ̃a Bɔlɔ lɛ nɔ kɛha hewalɛwoo koni nyɛnyɛ nii nyɛtsɔɔ.”

Amrɔ nɛɛ Yehowa Odasefoi miitsu amɛ-Biblia mli tsɔsemɔ nitsumɔ lɛ he nii yɛ shikpɔji 235 nɔ. Akalaa Buu-Mɔɔ yɛ wiemɔi 148 mli kɛ Awake! lɛ yɛ wiemɔi 87 mli. Akalaaa woji tɛtrɛbii nɛɛ kɛha adesa ko yijiemɔ. Ato ŋaawoi ni damɔ Biblia lɛ nɔ kɛ sane ni yɔɔ ebe naa ni yɔɔ woji tɛtrɛbii nɛɛ amli lɛ he gbɛjianɔ koni ewo Bɔlɔ lɛ, mɔ ni kɛɔ akɛ: “Mi ji Yehowa, . . . mɔ ni tsɔɔo nii ni hi hao” lɛ hiɛ nyam. (Yesaia 48:17) Eba akɛ obaaná Ŋmalɛ Krɔŋkrɔŋ lɛ kɛ Biblia kasemɔ he woji nɛɛ ni oookane daa lɛ he sɛɛ.