Sanebimɔi ni Jɛ Kanelɔi Adɛŋ

Mɛni Yesu tsɔɔ beni ekɛɛ ekaselɔi lɛ akɛ: “Mina Satan tamɔ sarawa jɛ ŋwɛi bagbee shi lɛ”?

Yesu ehala ekaselɔi 70 lɛ egbe naa, ni “etsu amɛ enyɔnyɔ kɛtsɔ ehiɛ kɛtee maŋ fɛɛ maŋ kɛ he fɛɛ he ni lɛ diɛŋtsɛ ebaaya lɛ” mli. Beni mɛi 70 lɛ ku amɛsɛɛ kɛba lɛ, amɛná miishɛɛ yɛ omanye ni amɛye yɛ shiɛmɔ nitsumɔ lɛ mli lɛ. Amɛkɛɛ akɛ: “Nuŋtsɔ, ogbɛi lɛ ahewɔ lɛ daimonioi tete baa amɛhe shi amɛhaa wɔ.” Nakai be lɛ mli lɛ Yesu kɛɛ akɛ: “Mina Satan tamɔ sarawa jɛ ŋwɛi bagbee shi.”—Luka 10:1, 17, 18.

Klɛŋklɛŋ lɛ, ekolɛ ebafee tamɔ nɔ ni Yesu miiwie nifeemɔ ko ni eba mli momo lɛ he. Shi kɛlɛ, beni Yesu wie nakai wiemɔi lɛ sɛɛ afii 60 lɛ, bɔfo Yohane ni egbɔ lɛ kɛ nakai wiemɔ lɛ eko nɔŋŋ tsu nii, ni eŋma akɛ: “Ashɛ́ drako kpeteŋkpele lɛ afɔ̃, mɔ ni ji blema onufu lɛ ní atsɛɔ lɛ diabolo (naafolɔlɔ loo abonsam) lɛ kɛ Satan (henyɛlɔ) lɛ ní shishiuɔ jeŋ muu lɛ fɛɛ lɛ, ashɛ́ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.”—Kpojiemɔ 12:9.

Beni Yohane ŋma nakai wiemɔi lɛ, no mli lɛ Satan yɛ ŋwɛi lolo. Te wɔfeɔ tɛŋŋ wɔleɔ enɛ? Ejaakɛ Kpojiemɔ wolo lɛ jeee yinɔsane wolo shi moŋ eji gbalɛ wolo. (Kpojiemɔ 1:1) No hewɔ lɛ, beni Yohane yɔɔ shihilɛ mli lɛ, no mli lɛ ashɛko Satan afɔko shikpɔŋ lɛ nɔ lolo. Yɛ anɔkwale mli lɛ, odaseyeli tsɔɔ akɛ enɛ baaa mli aahu kɛyashi awó Yesu akɛ Nyɔŋmɔ Maŋtsɛyeli lɛ nɔ Maŋtsɛ yɛ afi 1914 sɛɛ nɔŋŋ. *—Kpojiemɔ 12:1-10.

Mɛni hewɔ mɔ, ni Yesu wie Satan shwiemɔ kɛmiijɛ ŋwɛi lɛ he tamɔ nɔ ni eba mli momo lɛ? Woloŋlelɔi komɛi susuɔ akɛ Yesu miikã ekaselɔi lɛ ahiɛ yɛ henɔwomɔ su ni ejaaa ni amɛná lɛ hewɔ. Amɛheɔ amɛyeɔ akɛ, yɛ nɛkɛ gbɛ nɔ lɛ eekɛɛ amɛ akɛ: ‘Nyɛye diamonio lɛ anɔ kunim, shi nyɛkashwãa. Satan wó ehe nɔ, ni no ha eshigbeemɔ lɛ ba oya lɛ.’

Wɔnyɛŋ wɔfee keketee yɛ sane nɛɛ mli. Shi kɛlɛ, etamɔ nɔ ni Yesu kɛ ekaselɔi lɛ miinya, ni eewie Satan shigbeemɔ ni baaba wɔsɛɛ be mli lɛ he. Yesu le bɔ ni Abonsam kɛ mlifu ni naa wa baatsu enɛ he nii aha lɛ he nii fe ekaselɔi lɛ fɛɛ. Susumɔ bɔ ni Yesu baaná miishɛɛ aha beni enu akɛ diamonioi lɛ miiba amɛhe shi amɛmiiha ekaselɔi ni ji adesai ni yeee emuu lɛ he okwɛ! Bɔ ni aye diamonioi nɛɛ anɔ kunim lɛ feɔ wɔsɛɛ be mli ta ni Yesu ni ji bɔfonukpa Mikael kɛ Satan baawuu, ní eshwie lɛ kɛjɛ ŋwɛi kɛba shikpɔŋ lɛ nɔ lɛ he mfoniri bibioo.

Beni Yesu kɛɛ ena Satan “bagbee shi” lɛ, no mli lɛ eema anɔkwale ni eji akɛ Satan baagbee shi lɛ nɔ mi. Enɛ tamɔ Biblia mli gbalɛi krokomɛi ni wieɔ nibii ni baaba yɛ wɔsɛɛ be mli lɛ ahe tamɔ nɔ ni amɛba mli momo lɛ. Ákɛ nɔkwɛmɔnɔ lɛ, kadimɔ bɔ ni akɛ wiemɔi ni kɔɔ nibii ni eba momo kɛ nɔ ni baaba mli yɛ wɔsɛɛ be mli lɛ tsu nii yɛ gbalɛ ni kɔɔ Mesia lɛ he yɛ Yesaia 52:13-53:12 lɛ mli aha. Ekolɛ Yesu miijie hekɛnɔfɔɔ ni eyɔɔ akɛ abaashɛ Satan afɔ kɛjɛ ŋwɛi, ni ebaaba mli taakɛ bɔ ni e-Tsɛ lɛ eto eyiŋ yɛ he lɛ kpo. Yesu yɛ nɔmimaa hu akɛ, yɛ Nyɔŋmɔ be ni eto mli lɛ, abaawo Satan kɛ edaimoniɔii lɛ atsuŋ, ni abaakpata amɛhiɛ kwraa.—Romabii 16:20; Hebribii 2:14; Kpojiemɔ 20:1-3, 7-10.

[Shishigbɛ niŋmaa]