“Wɔbaasumɔ ni Wɔkɛɛ, ‘Hɛɛ!’”

YEHOWA ODASEFOI anitsumɔhe nine ni yɔɔ Nigeria lɛ nine shɛ wolo ko nɔ, ni nɔ ni aŋma yɛ mli lɛ fã ko kɛɔ nɔ ni nyiɛ sɛɛ nɛɛ:

“Wɔbinuu Anderson gbo beni eye afii 14. Dani ebaagbo lɛ, no mli eelɛ wuɔbii enyɔ. Eesumɔ ni ehɔɔ amɛ koni ekɛ shika lɛ amaje nitsumɔhe nine lɛ akɛ tooyeli kɛha jeŋ muu fɛɛ shiɛmɔ nitsumɔ lɛ. Shi egbo dani amɛshɛ hɔɔmɔ.

“Yɛ eshwelɛ akɛ ekɛ shika lɛ baamaje asafo lɛ nitsumɔhe nine lɛ hewɔ lɛ, wɔ akɛ efɔlɔi lɛ, lɛ̀ wuɔbii lɛ ni wɔhɔɔ amɛ. Wɔkɛ shika lɛ miimaje nyɛ akɛ Anderson tooyeli. Yɛ Yehowa shiwoo lɛ naa lɛ, wɔyɛ hekɛnɔfɔɔ akɛ etsɛŋ—etsɛŋ kwraa—ni wɔbaana Anderson ekoŋŋ. Kɛji akɛ ebi akɛ wɔhɔɔ wuɔ lɛ ni wɔkɛ shika lɛ maje nitsumɔhe nine lɛ, wɔbaasumɔ ni wɔkɛɛ, ‘Hɛɛ!’ Yɛ anɔkwale mli lɛ, jeee Anderson pɛ kɛkɛ gbɛ wɔkpaa, shi moŋ wɔmiikpa ‘odasefoi babaoo tamɔ atatu’ ni abaatee amɛshi lɛ hu agbɛ.”— Hebribii 12:1; Yohane 5:28, 29.

Taakɛ eje kpo faŋŋ yɛ wolo ni yɔɔ yiteŋ gbɛ lɛ mli lɛ, hemɔkɛyeli ni ayɔɔ yɛ gbohiiashitee lɛ mli lɛ ji hiɛnɔkamɔ ni woɔ anɔkwa Kristofoi hewalɛ. Taakɛ Anderson weku lɛ ji lɛ, mɛɛ miishɛɛ wekui akpekpei abɔ baaná mli ŋɔɔmɔ nɛkɛ, beni amɛhereɔ amɛsuɔlɔi ni egboi lɛ atuu lɛ!—1 Korintobii 15:24-26.

Nyɔŋmɔ Wiemɔ lɛ kɛ gbohiiashitee he hiɛnɔkamɔ ni shɛjeɔ mɔ mii ni fata nibii babaoo ni yɔɔ naakpɛɛ ni etsɛŋ ni baaba mli yɛ jalɛ jeŋ hee lɛ mli, yɛ Nyɔŋmɔ Maŋtsɛyeli lɛ shishi lɛ haa. (2 Petro 3:13) Beni Biblia lɛ wieɔ nɔ ni Nyɔŋmɔ baafee aha gbɔmɛi yɛ nakai beaŋ lɛ he lɛ, ekɛɛ akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.