Ani Ŋaawoo Kpakpa He Miihia?

ŊMƐNƐ, mɛi pii heɔ amɛyeɔ akɛ amɛyɛ nyɛmɔ ni akɛkpaa ekpakpa kɛ efɔŋ mli, ni ákɛ amɛyɛ hegbɛ ni amɛfeɔ nɔ fɛɛ nɔ ni amɛsumɔɔ. Mɛi krokomɛi kɛɔ akɛ nɔ fɛɛ nɔ hi shii abɔ ni ehaa mɔ mii shɛɔ ehe. Gbalashihilɛ kɛ weku shihilɛ ni akɛ afii babaoo esusu akɛ nomɛi ji gbɛjianɔtoi titri ni adesai aweku lɛ damɔ nɔ lɛ miifite kwraa.—1 Mose 3:5.

Susumɔ Verónica, * ni yɔɔ Mexico lɛ he okwɛ. Ebɔ amaniɛ akɛ: “Beni eshwɛ fioo ni wɔbaaná afii 15 yɛ wɔgbalashihilɛ lɛ mli lɛ, miwu kɛɛ mi akɛ ekɛ yoo kroko yɛ. Ekɛɛ akɛni yoo nɛɛ ji oblayoo ni ehaa emii shɛɔ ehe hewɔ lɛ, eshiŋ lɛ. Minaa kpɛ mihe waa beni misusu he akɛ minaanyo ni misumɔɔ esane fe fɛɛ lɛ baashi mi ni ehiŋ mimasɛi dɔŋŋ lɛ. Kulɛ misusuɔ akɛ wɔsuɔlɔi agbele ji sane ni dɔɔ mɔ waa fe nɔ fɛɛ nɔ. Shi yɛ migbɛfaŋ lɛ, gbalafitemɔ yɛ dɔlɛ kwraa fe no, ejaakɛ jeee akɛ mɔ ni misumɔɔ lɛ lɛ shi mi kɛkɛ, shi etee nɔ efee mi dɔlɛ nii.”

Agbɛnɛ, nuu ko ni eye afii 22 ni etse gbala mli momo ni eyɛ binuu shi esumɔɔɔ ni etsuɔ tsɛ gbɛnaa nii ni kã enɔ lɛ he nii lɛ hu sane lɛ yɛ. Eekpa gbɛ akɛ enyɛ akwɛ lɛ kɛ ebinuu lɛ. Kɛ enyɛ haaa lɛ nibii fɛɛ ni ebiɔ lɛ lɛ, emli woɔ la ni ejɛɔ lɛ tamɔ gbekɛ ni ebuuu mɔ feɔ enii lɛ. Kɛ enyɛ kɛ nifeemɔ ni bɛ hiŋmɛi nɔ ni tamɔ nɛkɛ kpe lɛ, ehaa enuɔ he akɛ enyɛɛɛ ehe nɔ ko efee.

Enɛɛmɛi jeee saji ni yɔɔ srɔto. Mligbalamɔ kɛ gbalamlitsemɔ yɛ mla naa miiya nɔ babaoo yɛ he fɛɛ he. Gbekɛbii pii naa beni amɛfɔlɔi lɛ ateŋ mɔ kome shiɔ shia koni eyaje shihilɛ hee shishi lɛ. Gbekɛbii komɛi elaaje bulɛ fɛɛ ni amɛyɔɔ kɛha mɛi krokomɛi ní amɛfɔlɔi hu fata he lɛ, ni amɛkɛ amɛhe woɔ jeŋbai komɛi ni jwɛŋmɔ shɛɛɛ he yɛ be ni eho lɛ mli lɛ amli.  He ni akɛwoɔ bɔlɛnamɔ mli akɛ aaka akwɛ, tsofai ni akɛtsuɔ nii yɛ gbɛ fɔŋ nɔ, tutuamɔ ni oblahii kɛ oblayei tutuaa mɛi, kɛ gbekɛbii ni gbeɔ amɛtsɔɔlɔi loo amɛfɔlɔi lɛ ebafee nibii ni miiya nɔ babaoo yɛ shikpɔji pii anɔ. Ni ekolɛ okadi akɛ jeee bii atsɔsemɔ kɛ gbalashihilɛi amli pɛ akɛ naagbai kpeɔ yɛ je lɛŋ ŋmɛnɛ.

Be mli ni wɔnaa nibii ni yaa nɔ nɛɛ, ekolɛ wɔbaasusu nɔ ni eba adesai ashihilɛ nɔ lɛ he. Kɛ eji anɔkwale akɛ gbɔmɛi le ekpakpa kɛ efɔŋ mlikpamɔ lɛ, mɛni hewɔ naagbai babaoo yɔɔ ni anáko amɛnaa tsabaa lɛ? Ani ŋaawoo kpakpa he miihia? Ani he ko yɛ ni abaanyɛ aná ŋaawoo ni he yɔɔ sɛɛnamɔ ni tamɔ nɛkɛ kɛjɛ, ni ji jɛɛhe ko ni anyɛɔ akɛ he fɔ̃ɔ nɔ? Eyɛ mli akɛ mɛi pii kɛɔ akɛ amɛheɔ Nyɔŋmɔ kɛ e-Wiemɔ ni aŋma lɛ nɔ amɛyeɔ moŋ, shi etamɔ nɔ ni enɛ náaa amɛyiŋkpɛi anɔ hewalɛ. Shi, mɛɛ sɛɛnamɔi wɔbaanyɛ wɔná kɛji wɔtao ŋaawoo kɛjɛ Nyɔŋmɔ ŋɔɔ ni wɔkpɛlɛ eŋaawoo lɛ nɔ? Nyɛhaa wɔsusua enɛ he yɛ sane ni nyiɛ sɛɛ lɛ mli.

[Shishigbɛ niŋmaa]