Ani Okaiɔ?

Ani onyã Buu-Mɔɔ srɔtoi ni ba nyɛsɛɛ nɛɛ akanemɔ he? Mɛni hewɔ okwɛɛɛ akɛ obaanyɛ oha sanebimɔi ni nyiɛ sɛɛ nɛɛ ahetoo lo?

• Mɛni ji Complutonbii a-Biblia ni Maji Anɔ Wiemɔi Srɔtoi Yɔɔ Mli lɛ, ni mɛni hewɔ esa kadimɔ waa lɛ?

Eji Biblia ko ni akala ni maji anɔ wiemɔi srɔtoi ni ato naa yɔɔ mli, ní Hebri, Hela, kɛ Latin wiemɔi ni fe fɛɛ lɛ jeɔ kpo yɛ baafai lɛ ashishigbɛ, kɛ fãi komɛi hu ni aŋmala yɛ Aramaik wiemɔ mli. Nɛkɛ Biblia ni maji anɔ wiemɔi srɔtoi yɔɔ mli nɛɛ ji gbɛ ko ni sa jogbaŋŋ ni akɛtsu nii kɛŋmala ŋmalɛi lɛ yɛ gbɛ ni ja nɔ kɛjɛ shishijee wiemɔi ni aŋmala yɛ mli lɛ amli.—4/15, baafa 28-31.

• Adesai baanyɛ amɛha Nyɔŋmɔ aná Miishɛɛ yɛ mɛɛ gbɛ nɔ?

Akɛni Yehowa ji mɔ ko ni yɔɔ diɛŋtsɛ hewɔ lɛ, enyɛɔ esusuɔ nii ahe, efeɔ nibii, ni eyɛ henumɔ. Eji ‘miishɛɛ Nyɔŋmɔ’ ni enáa eyiŋtoi ahe nitsumɔ he miishɛɛ. (1 Timoteo 1:11; Lala 104:31) Babaoo ni wɔleɔ Nyɔŋmɔ henumɔi lɛ, babaoo ni wɔbaleɔ nɔ ni wɔbaanyɛ wɔfee koni wɔkɛha etsui anya ji no.—5/15, baafa 4-7.

• Mɛni hewɔ David ŋmɛ gbɛ koni eŋa Mikal afee mɔ ni yɔɔ amaga lɛ?

Beni Maŋtsɛ Saul tsɔ̃ ŋaa koni egbe David lɛ, Mikal ye ebua lɛ ni ejo foi, ni ekɛ amaga ko ni ekolɛ esu tamɔ gbɔmɔ yafɔ̃ saa lɛ nɔ. Ekolɛ eyɛ amaga ejaakɛ etsui yeee emuu yɛ Nyɔŋmɔ hiɛ. David leee he nɔ ko loo ákɛ eŋmɛ gbɛ ejaakɛ Mikal ji Maŋtsɛ Saul Biyoo. (1 Kronika 16:25, 26)—6/1, baafa 29.

• Mɛni ji nɔ̃ titri ni akpɔ ni Nyɔŋmɔ wo yɛ lá he lɛ gbalaa jwɛŋmɔ kɛyaa nɔ?

Nyɔŋmɔ tsɔ sane ni ejaje yɛ Nu Afua lɛ sɛɛ kɛ nɔ ni yɔɔ Mose Mla lɛ mli, kɛ agbɛnɛ akpɔ ni yɔɔ Bɔfoi lɛ Asaji 15:28, 29 lɛ anɔ egbala jwɛŋmɔ kɛtee Yesu lá ni efɔse eshwie shi ákɛ afɔleshaa lɛ nɔ. Nakai lá lɛ pɛ nɔ wɔbaanyɛ wɔtsɔ wɔná eshaifaa ni toiŋjɔlɛ ahi wɔkɛ Nyɔŋmɔ teŋ. (Kolosebii 1:20)—6/15, baafa 14-19.

• Yesu naakpɛɛ nifeemɔi lɛ enyiɛ atsĩ tã yɛ Biblia lɛ mli?

Saji ni aŋmala ashwie shi yɛ Sanekpakpai lɛ amli lɛ wieɔ Yesu naakpɛɛ nifeemɔi 35 he. Shi atsɔɔɔ Yesu naakpɛɛ nifeemɔi, ni ekrokomɛi ni abɔɔɔ he amaniɛ lɛ fata he lɛ ayibɔ diɛŋtsɛ. (Mateo 14:14)—7/15, baafa 5.