Bɔ ni Aaafee Akpee Nijiaŋwujee Naa

ANI onijiaŋ eje wui? Mɛi babaoo anijiaŋ eje wui yɛ jeŋ ni yiŋkɔshikɔshifeemɔ kɛ béi eyi mli obɔ nɛɛ mli. Nitsumɔ ni mɛi komɛi bɛ lɛ eha amɛnijiaŋ eje wui. Mɛi krokomɛi miikpee nibii ni jɛɔ oshara mli baa lɛ anaa. Mɛi krokomɛi hu yɛ ni miimia amɛhiɛ yɛ weku mli naagbai, hela ko ni mli wa waa, loo shoofeemɔ henumɔi amli.

Nɛgbɛ ji heni obaanyɛ oyatao yelikɛbuamɔ kɛjɛ, kɛ́ onijiaŋ je wui? Mɛi akpekpei abɔ yɛ je lɛŋ he fɛɛ he ni amɛna miishɛɛ kɛtsɔ Nyɔŋmɔ Wiemɔ, ni ji Biblia lɛ ni amɛkaneɔ daa lɛ nɔ. Bɔfo Paulo wiemɔi lɛ haa amɛnáa nɔmimaa, mɔ ni kɛɛ akɛ: “Ajɔɔ Nyɔŋmɔ kɛ wɔ-Nuŋtsɔ Yesu Kristo tsɛ lɛ, mɔ ni ji musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ wɔmanehului lɛ fɛɛ mli.” (2 Korintobii 1:3, 4) Mɛni hewɔ okaneee enɛ, kɛ Biblia mli saji krokomɛi yɛ bo diɛŋtsɛ o-Biblia lɛ mli? Nakai ni ooofee lɛ ‘baaha otse otsui aŋmɛ omli, ni eeewaje bo.’—2 Tesalonikabii 2:17.

Nine baanyɛ ashɛ yelikɛbuamɔ ni akɛaakpee nijiaŋwujee naa lɛ hu nɔ kɛtsɔ mɛi ni sɔmɔɔ Yehowa lɛ ni akɛaabɔ lɛ nɔ. Abɛi 12:25 lɛ kɛɔ akɛ: “Gbɔmɔ tsui mli ŋkɔmɔyeli haa edɔɔ kɔmɔɔ; shi wiemɔ kpakpa haa emii shɛɔ ehe.” Kɛ wɔtee Kristofoi akpeei ashishi lɛ, wɔnuɔ nakai “wiemɔ kpakpa,” ni ‘ŋɔɔ susuma lɛ naa, ni haa wui náa hewalɛ’ lɛ. (Abɛi 16:24) Mɛni hewɔ oyaaa kpee yɛ Yehowa Odasefoi a-Maŋtsɛyeli Asa lɛ nɔ, koni bo diɛŋtsɛ oyɔse bɔ ni henaabuamɔ ni tamɔ nɛkɛ lɛ baana onɔ hewalɛ aha?

Obaanyɛ ona hewalɛ ni yɔɔ sɔlemɔ mli lɛ hu he sɛɛ. Kɛ onu he akɛ shihilɛ mli naagbai lɛ miina onɔ hewalɛ lɛ, okɛ onaagba ni fe fɛɛ lɛ afɔ ‘sɔlemɔ toibolɔ’ lɛ hiɛ. (Lala 65:3) Yehowa Nyɔŋmɔ, ni ji wɔ-Bɔlɔ lɛ nuɔ wɔ shishi babaoo fe wɔ diɛŋtsɛ. Wɔbaanyɛ wɔkɛ wɔhe afɔ eyelikɛbuamɔ lɛ nɔ. E-Wiemɔ lɛ woɔ wɔ shi akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.” (Lala 55:23) Hɛɛ, ‘mɛi ni hiɛ kã Yehowa nɔ lɛ baaná hewalɛ hee.’—Yesaia 40:31.

Yehowa Nyɔŋmɔ kɛ nibii fɛɛ ni baanyɛ aye abua wɔ koni wɔkpee nijiaŋwujee naa yɛ omanyeyeli mli lɛ eha wɔ. Ani okɛbaatsu nii?