“Nyɛsɔlea Nɛkɛ”

ANI ole Nuŋtsɔ lɛ Sɔlemɔ lɛ mli wiemɔi lɛ? Eji sɔlemɔ he nɔkwɛmɔnɔ ni Yesu Kristo tsɔɔ. Yesu wie yɛ e-Gɔŋ nɔ Shiɛmɔ ni ehe gbɛ̀i waa lɛ mli akɛ: “No hewɔ lɛ nyɛsɔlea nɛkɛ.” (Mateo 6:9) Akɛni Yesu ji mɔ ni tsɔɔ sɔlemɔ lɛ hewɔ lɛ, afɔɔ sɔlemɔ nɛɛ tsɛmɔ akɛ Nuŋtsɔ lɛ Sɔlemɔ, ni ale lɛ hu akɛ Wɔ-Tsɛ ni Yɔɔ Ŋwɛi sɔlemɔ.—Latin, Paternoster.

Mɛi akpekpei abɔ ni yɔɔ jeŋ fɛɛ lɛ ekase Nuŋtsɔ lɛ Sɔlemɔ lɛ amɛwo amɛyitsoŋ ni amɛtĩɔ mli shii abɔ, ekolɛ daa gbi po. Yɛ nyɛsɛɛ afii nɛɛ amli lɛ, mɛi babaoo ekɛɛ nɛkɛ sɔlemɔ nɛɛ yɛ skul kɛ maŋ nifeemɔi ashishi. Mɛni hewɔ akɛ bulɛ ni mli kwɔ waa haa Nuŋtsɔ lɛ Sɔlemɔ lɛ nakai lɛ?

Cyprian, ni eji Nyɔŋmɔjamɔ he nilelɔ ni hi shi yɛ klɛŋklɛŋ afii 300 lɛ mli lɛ ŋma akɛ: “Mɛɛ sɔlemɔ baanyɛ afee mumɔŋ nɔ̃ fe nɔ ni Kristo kɛha wɔ lɛ . . . ? Mɛɛ sɔlemɔ ni asɔleɔ kɛhaa Tsɛ lɛ baanyɛ afee nɔ ni anɔkwayeli yɔɔ mli fe nɔ ni Bi lɛ ni ji Anɔkwale lɛ kɛha wɔ lɛ?”—Yohane 14:6.

Yɛ Roma Katolik Sɔlemɔ lɛ jamɔŋ wolo ni afee koni akɛgbála etsɔɔmɔi lɛ amli lɛ mli lɛ, abuɔ Nuŋtsɔ lɛ Sɔlemɔ lɛ akɛ eji “Kristofoi asɔlemɔ titri.” The World Book Encyclopedia lɛ kpɛlɛɔ gbɛhe ni he hiaa ni nɛkɛ sɔlemɔ nɛɛ yɔɔ  yɛ Kristendom jamɔi lɛ fɛɛ amli lɛ nɔ, ni ewieɔ he akɛ eji “Kristofoi ahemɔkɛyeli lɛ he shishijee sane jajemɔi” lɛ ateŋ ekome.

Shi kɛlɛ, esa akɛ wɔkpɛlɛ nɔ akɛ mɛi babaoo ni kɛɔ Nuŋtsɔ lɛ Sɔlemɔ lɛ nuuu shishi jogbaŋŋ. Canada adafitswaa wolo ni ji Ottawa Citizen lɛ kɛɛ akɛ: “Kɛ atsɔse bo akɛ Kristofonyo lɛ, ekolɛ onyɛɔ okɛɔ Nuŋtsɔ lɛ Sɔlemɔ lɛ ni omiii osɛŋ nu, shi ekolɛ ebaawa kɛha bo akɛ oooto otsui shi ni okɛɛ kɛ shishinumɔ.”

Ani ehe hiaa diɛŋtsɛ akɛ wɔnu sɔlemɔi ni wɔsɔleɔ wɔhaa Nyɔŋmɔ lɛ ashishi? Mɛni hewɔ Yesu kɛ Nuŋtsɔ lɛ Sɔlemɔ lɛ ha wɔ lɛ? Mɛni etsɔɔ kɛha bo? Nyɛhaa wɔsusua sanebimɔi nɛɛ ahe agbɛnɛ.