‘Nyɛtaoa Mɛi ni Sa Lɛ’

DAMASKO ji maŋtiase ko ni shwere waa yɛ wɔ-Ŋmɛnɛŋmɛnɛ Beaŋ klɛŋklɛŋ afii 100 lɛ mli. Akɛni aduawa tsei ebɔle maŋ lɛ hewɔ lɛ, ebafee tamɔ hejɔɔmɔhe ko kɛha gbɛfalɔi ni jɛɔ shikpɔji ni yɔɔ Damasko bokagbɛ lɛ anɔ. Yɛ Yesu Kristo gbele sɛɛ etsɛɛɛ nɔŋŋ ni ato Kristofoi asafo ko shishi yɛ Damasko. Asafo lɛ mlibii lɛ ateŋ mɛi komɛi ji Yudafoi ni ekolɛ amɛbatsɔmɔ Yesu sɛɛnyiɛlɔi beni ayeɔ Pentekoste Gbi Jurɔ lɛ yɛ Yerusalem yɛ afi 33 Ŋ.B. (Bɔfoi lɛ Asaji 2:5, 41) Ekolɛ kaselɔi komɛi ni yɔɔ Yudea lɛ shi kɛtee Damasko beni yiwaa te shi yɛ tɛi ni atswia Stefano lɛ sɛɛ lɛ.—Bɔfoi lɛ Asaji 8:1.

Ekolɛ yɛ afi 34 Ŋ.B. lɛ, Kristofonyo ko ni jɛ Damasko ni atsɛɔ lɛ Anania lɛ nine shɛ nitsumɔ ko ni yɔɔ srɔto kwraa nɔ. Nuŋtsɔ lɛ kɛɛ lɛ akɛ: “Tee shi ni oya blohu ni atsɛɔ lɛ Trɔmɔɔ lɛ mli, ni oyabi mɔ ko ni atsɛɔ lɛ Saulo ni jɛ Tarso lɛ shi yɛ Yuda we lɛ; ejaakɛ naa, eesɔle.”—Bɔfoi lɛ Asaji 9:11.

Blohu ni atsɛɔ lɛ Trɔmɔɔ lɛ jɛkɛmɔ aaafee kilomitai 1.5 ni etsɔɔ Damasko maŋ-te-lɛŋ. Ŋaa nii ko ni akpɛ́ yɛ afii ohai 19 ni yɔɔ baafa nɛɛ mli lɛ yeɔ ebuaa wɔ ni wɔnaa bɔ ni blohu lɛ yɔɔ ha yɛ blema beaŋ. Yɛ bɔ ni blohu lɛ shikamɔ yɔɔ ha hewɔ lɛ, ekolɛ ehe bahia ni Anania ahe be ni ekɛtao Yuda we lɛ. Shi kɛlɛ, Anania yana shia lɛ, ni esaramɔ lɛ mli jɛ ni Saulo batsɔ bɔfo Paulo, ni ji sanekpakpa jajelɔ ko ni yɔɔ ekãa lɛ.—Bɔfoi lɛ Asaji 9:12-19.

Yesu tsu ekaselɔi lɛ ni ekɛɛ amɛ koni ‘amɛtao mɛi ni sa’ kɛha sanekpakpa lɛ. (Mateo 10:11) Eka shi faŋŋ akɛ, Anania yatao Saulo. Taakɛ Anania fee lɛ, Yehowa Odasefoi kɛ miishɛɛ taoɔ mɛi ni sa lɛ ni amɛmii shɛɔ amɛhe kɛji mɛi kpɛlɛ Maŋtsɛyeli lɛ he sanekpakpa lɛ nɔ. Amɛnine ni shɛɔ mɛi ni sa lɛ anɔ lɛ haa mɔdɛŋbɔi fɛɛ ni amɛkɛwoɔ mli lɛ bafeɔ nɔ ni sɛɛnamɔ babaoo yɔɔ he.—1 Korintobii 15:58.

[Mfoniri ni yɔɔ baafa 32]

“Blohu ni atsɛɔ lɛ Trɔmɔɔ” lɛ yɛ ŋmɛnɛŋmɛnɛ beaŋ

[He ni Mfoniri ni yɔɔ baafa 32 lɛ Jɛ]

From the book La Tierra Santa, Volume II, 1830