Efe Shwɛmɔ ko Kɛkɛ

GBEKƐBII sumɔɔ shwɛmɔ. Shi, wolo ko ni atsɛɔ lɛ The Developing Child (Gbekɛ Ni Daa Lɛ) tsɔɔ mli akɛ: “Enɛ jeee be ni sɛɛnamɔ bɛ he loo nɔ ni ji nifeemɔ folo ko kɛkɛ. No ji nɔ titri ni haa susumɔ ni gbekɛbii náa yɛ nibii ni ebɔle amɛhe kɛkpe lɛ yaa hiɛ.” Kɛ́ gbekɛbii miishwɛ lɛ, amɛkaseɔ bɔ ni amɛkɛ amɛ henumɔi baatsu nii aha, amɛleɔ shihilɛ ni ebɔle amɛ lɛ jogbaŋŋ, ni amɛkaseɔ bɔ ni amɛkɛ mɛi krokomɛi sharaa haa lɛ hu.

Kɛ́ gbekɛbii ye kɛjɛ afii ejwɛ loo enumɔ kɛyaa lɛ, amɛjeɔ shishi amɛkaseɔ bɔ ni onukpai feɔ amɛnii amɛhaa lɛ yɛ amɛshwɛmɔi amli. Be ko lɛ Yesu wie gbekɛbii ni miishwɛ lɛ ahe. Gbekɛbii lɛ ekomɛi sumɔɔ akɛ amɛfee “ayemforo,” amɛteŋ mɛi komɛi sumɔɔ akɛ amɛfee “yara,” ni taakɛ gbekɛbii komɛi fɔɔ feemɔ lɛ, ŋwanejee baa amɛteŋ akɛni amɛteŋ mɛi komɛi sumɔɔɔ akɛ amɛkɛ amɛhe woɔ shwɛmɔ lɛ mli lɛ hewɔ. (Mateo 11:16, 17) Shwɛmɔ ni tamɔ nɛkɛ lɛ baanyɛ aye abua gbekɛ lɛ, ni etsu gbɛfaŋnɔ ko ni he hiaa he nii yɛ ejwɛŋmɔ mli beni edaa kɛyaa hiɛ lɛ.

Gbekɛbii ni yɔɔ mfoniri lɛ mli lɛ ateŋ mɔ kome miifee enii akɛ Biblia mli nitsɔɔlɔ ni mɔ kroko lɛ hu akɛ nikaselɔ. Amɛnɔ̃ lɛ jeee Biblia mli nikasemɔ diɛŋtsɛ, shi susumɔ ni ayɔɔ akɛ agba Biblia mli shɛɛ sane lɛ yɛ amɛjwɛŋmɔ mli faŋŋ. Ni nɛkɛ nikasemɔ nɛɛ ji nɔ ni he hiaa, ejaakɛ Yesu fa ekaselɔi lɛ fɛɛ koni amɛyafee mɛi kaselɔi ni amɛtsɔɔ mɛi lɛ ni amɛye nii fɛɛ ni ekɛɛ amɛ lɛ nɔ.—Mateo 28:19, 20.

Fɔlɔi ni amɛbii sumɔɔ shwɛmɔ akɛ mɛi ni miifee Biblia mli nikasemɔ, amɛmiihã maŋshiɛmɔ, loo amɛmiishiɛ yɛ shia kɛ shia lɛ amii baashɛ amɛhe waa. Yɛ adebɔɔ su naa lɛ, gbekɛbii kaseɔ mɛi ni edara ni amɛkɛyɔɔ lɛ anifeemɔi. Biblia mli saji ni gbekɛbii kɛshwɛɔ lɛ ji odaseyeli ni tsɔɔ akɛ, aatsɔse amɛ yɛ “Nuŋtsɔ lɛ tsɔsemɔ kɛ ŋaawoo lɛ mli.”—Efesobii 6:4.

Yehowa miisumɔ koni gbekɛbii aná anɔkwa jamɔ mli gbɛfaŋnɔ. Ekɛɛ Mose koni ekɛ “gbekɛbii lɛ” afata he be mli ni akaneɔ Mla lɛ. (5 Mose 31:12) Kɛ́ gbekɛbii lɛ nu he akɛ amɛhu amɛfata he lɛ, ekã shi faŋŋ akɛ ebaaje kpo yɛ amɛshwɛmɔi amli. Ni gbekɛ ni feɔ ehe Nyɔŋmɔ sɔɔlɔ yɛ shwɛmɔ mli lɛ hu eje shishi eenyiɛ gbɛ ni baaha etsɔ eko lɛ nɔ.