Ekɛ Eklasbii lɛ Gba Ehemɔkɛyeli lɛ He Sane

ANI obaasumɔ ni oye obua oklasbii lɛ koni amɛnu ohemɔkɛyeli ni damɔ Biblia lɛ nɔ lɛ shishi jogbaŋŋ? Magdalena ni eye afii 18, ni ji nikaselɔ ko yɛ nɔtsamɔ skul ko ni yɔɔ Poland, ni eji Yehowa Odasefoi lɛ ateŋ mɔ kome lɛ fɔɔ eklasbii lɛ ehemɔkɛyelii lɛ ahe sanegbaa. No hewɔ lɛ, afɔɔ lɛ saji ni tamɔ enɛɛmɛi bimɔ akɛ, ‘Ákɛ aaatsɔ Yehowa Odasefoi lɛ ateŋ mɔ kome lɛ tsɔɔ mɛni?’ kɛ ‘Ani nyɛheee Yesu Kristo nɔ nyɛyeee?’ Mɛɛ gbɛ nɔ eeetsɔ eha eklasbii lɛ hetoo? Magdalena sɔle ebi Yehowa koni etsɔɔ lɛ gbɛ, ni etsu nɔ ni ebiɔ lɛ he nii.—Yakobo 1:5.

Gbi ko lɛ, Magdalena kɛfɔ tsɔɔlɔ ko ni yɔɔ bulɛ kɛha ehemɔkɛyeli lɛ hiɛ koni eŋmɛ lɛ gbɛ ni ebajie vidio ni ji Jehovah’s Witnesses—The Organization Behind the Name. * lɛ etsɔɔ eklasbii lɛ. Tsɔɔlɔ lɛ kpɛlɛ nɔ. No sɛɛ lɛ Magdalena kɛɛ eklasbii lɛ akɛ: “Miito gbɛjianɔ koni minaanyo ko abatsu nifeemɔ ko ni baahe minitii 90 he nii etsɔɔ klas lɛ. Wɔbaajie vidio ko, ni wɔbaagba sane ko ni kɔɔ Yehowa Odasefoi ahe yɛ mli. Ani nyɛbaasumɔ ni nyɛba?” Mɔ fɛɛ mɔ ha hetoo akɛ hɛɛ. Magdalena kɛ Wojciech, ni ji be-fɛɛ shiɛlɔ ko ni yɔɔ niiashikpamɔ lɛ bɔi amɛhesaamɔ kɛha nifeemɔ lɛ.

Amɛto gbɛjianɔ akɛ amɛbaaha wiemɔ ko ni heɔ miniti 20 ni damɔ wolo bibioo ni ji Yehowa Odasefoi—Namɛi Ni? Mɛni Amɛheɔ Amɛyeɔ? * lɛ nɔ lɛ kɛje shishi, ni no sɛɛ lɛ sanebimɔ kɛ hetoo he sanegbaa baanyiɛ sɛɛ. Enɛ sɛɛ lɛ amɛbaajie vidio lɛ yɛ skul lɛ wojiatoohe lɛ mli. Abaaha nikaselɔ fɛɛ nikaselɔ ni yɔɔ klas lɛ nikeenii ko—wolo kotoku agbo ko ni Questions Young People Ask—Answers That Work, * wolo lɛ, kɛ dɛhiɛmɔ woji kɛ woji tɛtrɛbii komɛi yɛ mli.

Beni gbi ni abaafee nii lɛ shɛ lɛ, klasbii 14, tsɔɔlɔ lɛ, kɛ nikaselɔi 4 krokomɛi ni yɔɔ wojiatoohe lɛ yɛ nakai beaŋ lɛ ba. Klɛŋklɛŋ lɛ Wojciech tsɔɔ mli akɛ Poland lalafoo wiemɔ ŋmalɔi kɛ niŋmalɔi, kɛ Nyɔŋmɔ gbɛi ni ji Yehowa lɛ tsu nii yɛ amɛwoji lɛ amli. Etsĩ Katolik woji memeji komɛi hu ni Nyɔŋmɔ gbɛi lɛ yɔɔ mli atã. Beni etsɔɔ Yehowa Odasefoi aŋmɛnɛŋmɛnɛ beaŋ nitsumɔ lɛ mli lɛ, ekɛ nitsumɔhe niji srɔtoi ahe woji bibii kɛ Kpee Asai ahe mfonirii babaoo tsɔɔ.

Sanegbaa ni yɔɔ miishɛɛ nyiɛ sɛɛ. Magdalena kɛ Wojciech kɛ Biblia lɛ ha sanebimɔi lɛ ahetoo. Enɛ ha toibolɔi lɛ anaa kpɛ amɛhe ni etsɔ amɛyiŋ akɛ Yehowa Odasefoi eshiɛɛɛ amɛ diɛŋtsɛ amɛsusumɔi. Mɛni ji sanebimɔi lɛ ekomɛi, ni te aha hetoo aha tɛŋŋ?

Sanebimɔ: Biblia lɛ mli eyi obɔ kɛ wiemɔi ni shishinumɔ wa, okadifeemɔ wiemɔi, kɛ saji ni abaanyɛ atsɔɔ shishi yɛ gbɛ̀i srɔtoi anɔ. Te aaafee tɛŋŋ anyɛ ahi shi yɛ nɔ ni Biblia lɛ kɛɔ lɛ naa lɛ?

Hetoo: Mɛi komɛi kɛɔ akɛ Biblia lɛ tamɔ kpãa saŋku ní obaanyɛ otswa lala fɛɛ lala yɛ nɔ. Shi susumɔ he okwɛ: Kɛ́ ootao ole nɔ ni niŋmalɔ ko wiemɔ tsɔɔ lɛ, ani efeŋ nɔ ni hi jogbaŋŋ akɛ ooobi lɛ? Ákɛ mɔ ni tamɔɔɔ adesai niŋmalɔi ni egboi lɛ, Yehowa Nyɔŋmɔ ni ji Biblia lɛ Ŋmalɔ lɛ hiɛ kã. (Romabii 1:20; 1 Korintobii  8:5, 6) Wiemɔi ni tsɔɔ ŋmalɛ ko hiɛ kɛ nɔ ni nyiɛɔ ŋmalɛ ko sɛɛ lɛ baanyɛ atsɔɔ eshishinumɔ ni ja. Kɛfata he lɛ, bei pii lɛ Biblia lɛ wieɔ sane komɛ too lɛ nɔŋŋ he yɛ hei srɔtoi, no hewɔ lɛ enɛɛmɛi ni akɛaato he akwɛ lɛ baaye abua. Wɔbaanyɛ wɔtsɔ enɛ nɔ wɔha Nyɔŋmɔ akudɔ wɔsusumɔi, tamɔ nɔ ni lɛ diɛŋtsɛ eegbála ŋmalɛ lɛ mli kɛmiitsɔɔ wɔ. Kɛ́ wɔfee nakai lɛ, wɔbaanyɛ wɔle esuɔmɔnaa nii ni yɔɔ Biblia lɛ mli lɛ ni wɔhi shi yɛ naa, ani wɔnyɛŋ nakai wɔfee?

Sanebimɔ: Mɛɛ srɔtofeemɔ yɔɔ Kristofoi kɛ Yehowa Odasefoi ateŋ?

Hetoo: Kristofoi ji wɔ! Shi yɛ nɔ najiaŋ ni Yehowa Odasefoi aaakɛɛ kɛkɛ akɛ Kristofoi ji amɛ lɛ, amɛbɔɔ mɔdɛŋ koni amɛhi shi yɛ nɔ ni amɛheɔ amɛyeɔ lɛ kɛ nɔ ni Nyɔŋmɔ tsɔɔ amɛ kɛha amɛsɛɛnamɔ lɛ naa. (Yesaia 48:17, 18) Akɛni amɛ nitsɔɔmɔi lɛ fɛɛ damɔ Biblia lɛ nɔ hewɔ lɛ, amɛle akɛ amɛji mɛi ni hiɛ anɔkwale lɛ.—Mateo 7:13, 14, 21-23.

Sanebimɔ: Mɛni hewɔ nyɛyaa mɛi ni nyɛleee amɛ kwraa lɛ aŋɔɔ ni nyɛmaa nɔ mi doo akɛ nyɛkɛ amɛ baawie lɛ? Ani no etsɔɔɔ akɛ nyɛkɛ nyɛhemɔkɛyeli lɛ miifĩ mɛi krokomɛi anɔ?

Hetoo: Ani osusuɔ akɛ eji tɔmɔ akɛ mɔ ko ni okɛkpe yɛ gbɛjegbɛ nɔ lɛ aaajɛ bulɛ mli ekɛbo awie, ni ebi ojwɛŋmɔ yɛ sane ko he? (Yeremia 5:1; Zefania 2:2, 3) (No sɛɛ lɛ, Wojciech kɛ Magdalena fee bɔ ni amɛbi mɛi ni hoɔ lɛ kɛji akɛ Nyɔŋmɔ susuɔ mɛi ni na nɔ yɛ nu afua ni ba Poland nyɛsɛɛ nɛɛ ahe lɛ he nɔkwɛmɔnɔ.) Kɛ́ mɔ lɛ tsɔɔ wɔ esusumɔ lɛ, wɔtsɔɔ lɛ nɔ ni Biblia lɛ yɔɔ kɛɛmɔ yɛ he. Kɛ́ mɔ ko sumɔɔɔ ni ekɛ wɔ wieɔ lɛ, wɔshiɔ lɛ ni wɔtsaa nɔ. (Mateo 10:11-14) Ani enɛ tsɔɔ akɛ wɔmiinyɛ mɛi krokomɛi anɔ koni wɔkɛ amɛ agba sane? Aloo esaaa akɛ gbɔmɛi gbaa sane dɔŋŋ?

Sanebimɔ: Mɛni hewɔ nyɛyeee gbijuji lɛ?

Hetoo: Wɔyeɔ gbijurɔ pɛ ni Biblia lɛ efã wɔ akɛ wɔye lɛ—Yesu Kristo gbele lɛ Kaimɔ lɛ. (1 Korintobii 11:23-26) Yɛ gbijurɔyelii agbɛfaŋ lɛ, obaanyɛ okane ensaiklopediai srɔtoi kɛ woji krokomɛi ni ayɔɔ hekɛnɔfɔɔ yɛ mli lɛ koni ona heni amɛjɛ. Kɛ́ ofee nakai lɛ, ewaŋ kɛhaŋ bo kwraa akɛ ooole nɔ hewɔ ni wɔyeee gbijuji ni tamɔ enɛɛmɛi lɛ.—2 Korintobii 6:14-18.

Abi saji krokomɛi babaoo ni aha hetoo. Sanegbaa lɛ hé be babaoo aahu akɛ atsi vidio lɛ jiemɔ ato.

Te nikaselɔi lɛ fee amɛnii amɛha tɛŋŋ? Ha Magdalena agba wɔ: “Efee mi naakpɛɛ akɛ nikaselɔi komɛi ni fɔɔ buului anifeemɔ ni amɛyeɔ mɛi krokomɛi ahe fɛo lɛ bi saji ni yɔɔ hiɛdɔɔ. Eyɛ mli akɛ amɛkɛɔ akɛ amɛheee amɛyeee akɛ Nyɔŋmɔ yɛ moŋ, shi beni sanegbaa lɛ yaa nɔ lɛ amɛná hemɔkɛyeli yɛ Nyɔŋmɔ mli!” Mɛi ni ba lɛ kɛ miishɛɛ ŋɔ nikeenii ni akɛha amɛ lɛ—aha amɛ woji 35, woji bibii 63, kɛ woji tɛtrɛbii 34.

Kwɛ yibiiwoo ni yɔɔ naakpɛɛ ni jɛ skul nifeemɔ ko mli kɛba! Jeee akɛ eye ebua Magdalena klasbii lɛ ni amɛle Yehowa Odasefoi lɛ ni amɛnu amɛ shishi jogbaŋŋ kɛkɛ, shi moŋ ewo oblahii kɛ oblayei babaoo hewalɛ koni amɛjwɛŋ yiŋtoo ni yɔɔ amɛshihilɛ mli lɛ he. Mɛni hewɔ obɔɔɔ mɔdɛŋ koni oye obua oklasbii lɛ ni amɛkase nɔ ni oheɔ oyeɔ lɛ he nii babaoo?

[Shishigbɛ niŋmaa]

[Mfoniri ni yɔɔ baafa 31]

Magdalena kɛ Wojciech ni miisaa amɛhe kɛha nifeemɔ lɛ