Ani Be ko Baaba ni Wɔbaahi Shi Shweshweeshwe Diɛŋtsɛ?

NAMƆ naaa he miishɛɛ kɛ́ ena akɛ gbekɛbii kɛ amɛfɔlɔi ni yɔɔ suɔmɔ lɛ miishwɛ kɛ miishɛɛ? Gbekɛbii ni yɔɔ nakai shihilɛ mli lɛ nuɔ he akɛ amɛyɛ shweshweeshwe yɛ amɛfɔlɔi akwɛmɔ shishi. Shi kɛlɛ, ewa kɛha gbekɛbii babaoo akɛ amɛaaná shihilɛ ni miishɛɛ yɔɔ mli ni tamɔ nɛkɛ. Yɛ no najiaŋ lɛ, he ni gbekɛbii komɛi baaná ni amɛkɛ amɛyitso afɔ̃ lɛ haoɔ amɛ daa gbi. Ani hiɛnɔkamɔ ko yɛ kɛha gbekɛbii ni bɛ shia ni amɛwɔɔ mli, kɛ mɛi krokomɛi ni yɔɔ hei ni bɛ shweshweeshwe lɛ?

Eyɛ mli akɛ ekolɛ ebaafee tamɔ nɔ ni hiɛnɔkamɔ bɛ kɛha wɔsɛɛ moŋ, shi Nyɔŋmɔ Wiemɔ lɛ kɛ hiɛnɔkamɔ haa. Gbalɔ Yesaia gba akɛ, be ko baaba ni mɔ fɛɛ mɔ baahi shi yɛ shweshweeshwe shihilɛ mli diɛŋtsɛ. Eŋma akɛ: “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye.”—Yesaia 65:21, 22.

Shi ani hiɛnɔkamɔ nɛɛ ji hiɛnɔkamɔ ni ma shi shiŋŋ? Kɛha mɛi komɛi lɛ, wiemɔ “hiɛnɔkamɔ” lɛ etsɔɔɔ be fɛɛ be akɛ nɔ ni akɛ hiɛ fɔɔ nɔ lɛ baaba mli. Ákɛ nɔkwɛmɔnɔ lɛ, yɛ Brazil lɛ, afɔɔ wiemɔ akɛ: “A esperança é a última que morre.” Eshishinumɔ diɛŋtsɛ ji, “Hiɛnɔkamɔ ji naagbee nii ni gboɔ.” Enɛ tsɔɔ akɛ mɛi babaoo yaa nɔ amɛnáa hiɛnɔkamɔ kɛji akɛ amɛbɛ nɔ ni amɛbaadamɔ nɔ amɛná hiɛnɔkamɔ po. Shi kɛlɛ, hiɛnɔkamɔ ni Nyɔŋmɔ hiɛkalɔ lɛ kɛhaa wɔ lɛ yɛ srɔto. Bɔfo Paulo ŋma akɛ: “Mɔ fɛɛ mɔ ni heɔ enɔ yeɔ lɛ, ehiɛ gboŋ.” (Romabii 10:11) Biblia gbalɛi ni amɛná amɛmli baa momo lɛ haa wɔ hekɛnɔfɔɔ akɛ, shiwooi krokomɛi fɛɛ ni Yehowa Nyɔŋmɔ kɛha lɛ baaba mli anɔkwale. Kɛ́ nakai shiwooi lɛ baaba mli diɛŋtsɛ lɛ, ebaaha shihilɛi ni nyɛɔ gbekɛbii anɔ koni amɛhi shi yɛ gbɛjegbɛi anɔ lɛ sɛɛ afo.

Yɛ ŋmɛnɛŋmɛnɛ beaŋ po lɛ, ŋaawoo ni anyɛɔ atsuɔ he nii ni yɔɔ Biblia lɛ mli lɛ baanyɛ aye abua mɛi ni bɛ hiɛnɔkamɔ lɛ koni amɛshihilɛ aya hiɛ, ni amɛná anɔkwa shihilɛ ni yɔɔ shweshweeshwe. Ani enɛ baanyɛ aba mli? Yehowa Odasefoi ni yɔɔ okutso lɛ mli lɛ baaná he miishɛɛ akɛ amɛaaye amɛbua bo ni oná hetoo kɛha sanebimɔ nɛɛ.