Ani Ole Miishɛɛ ni Jɛɔ Nɔ Hamɔ Mli Kɛbaa Lɛ?

KRISTOFONYO yoo anɔkwafo ko kɛ ekãa etsu Kristofoi asɔɔmɔ nitsumɔ lɛ nɔ ni miihe ashɛ afii 50. Eyɛ mli akɛ nibii ni jɛɔ gbɔlɛ mli kɛbaa lɛ eha egbɔjɔ yɛ gbɔmɔtsoŋ moŋ, shi etswa efai shi akɛ, ebaaya Maŋtsɛyeli Asa hee ni ama agbe naa lɛ nɔ. Nyɛminuu ko mɔ enine mli kɛtee Maŋtsɛyeli Asa lɛ nɔ, ni be ni eshɛ jɛmɛ lɛ, enyiɛ blɛoo kɛtee oniatsumɔ adeka—ni ji oti ni yɔɔ ejwɛŋmɔ mli lɛ he. Ekɛ shika fioo ni ekɛtoɔ kɛha nɛkɛ yiŋtoo nɛɛ yawo adeka lɛ mli. Eyɛ mli akɛ enyɛɛɛ ni ekɛ ehewalɛ aye abua kɛha asa lɛ maa moŋ, shi eesumɔ koni eye ebua.

Ekolɛ Kristofonyo yoo nɛɛ baaha okai yoo anɔkwafo kroko—“yoo okulafo ohiafo” lɛ ni Yesu na lɛ akɛ ekɛ leptoi enyɔ miiwo shikatoohe lɛ mli yɛ sɔlemɔwe lɛ. Akɛɛɛ wɔ nɔ shihilɛ mli ni eyɔɔ, shi kɛ́ yoo ko bɛ wu yɛ nakai beaŋ lɛ, ebaanyɛ eye ohia futaa. Yɛ anɔkwale mli lɛ, Yesu musuŋ tsɔ̃ lɛ yɛ ehe, ejaakɛ enu jaramɔ shihilɛ mli ni eyɔɔ lɛ shishi. Be ni egbala jwɛŋmɔ kɛba yoo lɛ nɔ akɛ nɔkwɛmɔnɔ kɛha ekaselɔi lɛ, ewie akɛ enikeenii fioo lɛ ji “nɔ ni eyɔɔ yɛ ehia mli ni ekɛlɛɔ ehe lɛ fɛɛ.”—Marko 12:41-44.

Mɛni hewɔ ohiafo ni tamɔ yoo okulafo nɛɛ sha afɔle ni tamɔ nɛkɛ? Eyɛ faŋŋ akɛ hetuu-kɛhamɔ ni mli kwɔ ni eyɔɔ kɛha Yehowa Nyɔŋmɔ, ni ato ejamɔ shishi ama shi yɛ Yerusalem sɔlemɔwe lɛ hewɔ. Eyɛ mli akɛ enyɛɛɛ efee babaoo moŋ, shi eesumɔ akɛ efi jamɔ krɔŋŋ sɛɛ. Ni ekolɛ nɔ fɛɛ nɔ ni yɔɔ enyɛmɔ mli lɛ ni ekɛbaha lɛ ha ená miishɛɛ.

Nɔ Hamɔ ni Akɛfiɔ Yehowa Nitsumɔ lɛ Sɛɛ

Nibii kɛ shika ni akɛtsuɔ onia lɛ ji anɔkwa jamɔ fã ko ni he hiaa be fɛɛ be, ni ekã he eji miishɛɛ jɛɛhe. (1 Kronika 29:9) Yɛ blema Israel lɛ, jeee sɔlemɔ we lɛ pɛ akɛ onia ni atsuɔ lɛ saa, shi akɛtsuɔ daa gbi nibii fɛɛ ni afeɔ yɛ Yehowa jamɔ mli lɛ ahe nii. Mla lɛ tsɔɔ mli akɛ, Israelbii lɛ kɛ amɛ ŋmɔshi nibii lɛ amlijaa nyɔŋma mli ekome abaha Levibii lɛ ni tsuɔ nii yɛ sɔlemɔwe lɛ mli lɛ, koni amɛkɛfi amɛsɛɛ. Shi esa akɛ Levibii lɛ hu kɛ ŋmɔshi nibii ni amɛnine shɛɔ nɔ lɛ mlijaa nyɔŋma mli ekome aha Yehowa.—4 Mose 18:21-29.

Eyɛ mli akɛ Kristofoi eye amɛhe kɛjɛ nibii ni ataoɔ yɛ Mla kpaŋmɔ lɛ mli lɛ ahe moŋ, shi shishitoo mla ni yɔɔ kɛha Nyɔŋmɔ tsuji akɛ  amɛtsu onia kɛfi anɔkwa jamɔ sɛɛ lɛ tsakeee. (Galatabii 5:1) Kɛfata he lɛ, klɛŋklɛŋ afii 100 lɛ mli Kristofoi lɛ ná miishɛɛ akɛ amɛaatsu onia kɛye kɛbua amɛ nyɛmimɛi ni ehia amɛ lɛ. (Bɔfoi lɛ Asaji 2:45, 46) Bɔfo Paulo kai Kristofoi lɛ akɛ, bɔ ni Nyɔŋmɔ jɛ mlihilɛ mli ekɛ nibii kpakpai ha amɛ lɛ, esa akɛ amɛ hu amɛjɛ mlihilɛ mli amɛfee nakai nɔŋŋ amɛha mɛi krokomɛi. Eŋma akɛ: “Niiatsɛmɛi ni yɔɔ je nɛŋ lɛ, wo amɛ kitã ni amɛkajwɛŋ nii wuji, ni amɛkaŋɔ amɛhiɛ hu amɛfɔ̃ nifalɛ ni bɛ shweshweeshwe lɛ nɔ, shi moŋ Nyɔŋmɔ hiɛkalɔ lɛ nɔ, mɔ hu ni ŋɔɔ nibii fɛɛ ehaa wɔ babaoo, akɛ wɔye mli ŋɔɔmɔ lɛ, ni amɛfee ejurɔ, ni amɛtsɔmɔ niiatsɛmɛi yɛ ejurɔfeemɔi agbɛfaŋ, amɛsumɔ nihamɔ, amɛnine akpɔ, amɛbɔ jwetri amɛha amɛhe, ni efee shishitoo kpakpa eha be ni baaba lɛ, koni amɛmɔ anɔkwa wala lɛ mli.” (1 Timoteo 6:17-19; 2 Korintobii 9:11) Yɛ anɔkwale mli lɛ, Paulo jɛ lɛ diɛŋtsɛ eniiashikpamɔ mli ema Yesu wiemɔi nɛɛ anɔ mi akɛ: “Nɔ hamɔ mli yɛ jɔɔmɔ [“miishɛɛ,” NW] fe hemɔ.”—Bɔfoi lɛ Asaji 20:35.

Kristofoi Anihamɔ Ŋmɛnɛ

Yehowa tsuji ni yɔɔ ŋmɛnɛ lɛ yaa nɔ amɛkɛ nibii ni amɛyɔɔ lɛ tsuɔ nii kɛyeɔ buaa amɛhe, ni amɛkɛfiɔ Nyɔŋmɔ nitsumɔ lɛ sɛɛ hu. Mɛi po ni bɛ nii tsɔ lɛ haa bɔ ni amɛbaanyɛ. “Tsulɔ anɔkwafo kɛ nilelɔ” lɛ le akɛ sɔ̃ ka amɛnɔ yɛ Yehowa hiɛ akɛ amɛkɛ onia ni atsuɔ nɛɛ fɛɛ atsu nii yɛ gbɛ ni hi fe fɛɛ nɔ. (Mateo 24:45) Akɛ shika ni abuaa naa nɛɛ tsuɔ nii kɛkwɛɔ nitsumɔhe niji anɔ, akɛtsɔɔ Biblia kɛ Biblia woji ashishi ni akalaa, akɛtoɔ gbɛjianɔ kɛha Kristofoi akpeei wuji, akɛtsɔseɔ nɔkwɛlɔi gbɛfalɔi kɛ maŋsɛɛ sanekpakpa jajelɔi ni akɛ nitsumɔ woɔ amɛdɛŋ, akɛyeɔ buaa yɛ hei ni oshara eba yɛ, ni akɛtsuɔ yiŋtoi krokomɛi babaoo ni he hiaa lɛ hu ahe nii. Nyɛhaa wɔgbalaa wɔjwɛŋmɔ kɛyaa yiŋtoi nɛɛ ateŋ ekome nɔ—oniatsumɔ kɛha jamɔhei amaamɔ.

Yehowa Odasefoi kpeeɔ shii abɔ daa otsi yɛ amɛ Maŋtsɛyeli Asai anɔ, koni amɛna mumɔŋ tsɔsemɔ kɛ naanyobɔɔ kpakpa he sɛɛ. Kɛlɛ, yɛ maji babaoo amli lɛ, shika helɛtemɔ he naagbai haaa Odasefoi ni yɔɔ jɛmɛ lɛ anyɛ amɛmamɔ Maŋtsɛyeli Asai, ja aye kɛbua amɛ. Enɛ hewɔ lɛ, yɛ afi 1999 mli lɛ, Yehowa Odasefoi je gbɛjianɔtoo ko shishi koni akɛ tooyeli ni jɛ nyɛmimɛi ni yɔɔ maji ni yɔɔ shika lɛ amli lɛ atsu nii kɛmamɔ Maŋtsɛyeli Asai yɛ maji ni  yeɔ ohia lɛ amli. Kɛfata he lɛ, mɛi akpei abɔ kɛ amɛhe eha koni amɛkɛ amɛbe kɛ amɛhesaai atsu nii, titri lɛ yɛ maji nɛɛ amli hei ni etse amɛhe banee lɛ amli. Be ni tsumaa nitsumɔ lɛ yaa nɔ lɛ, Odasefoi ni yɔɔ maji ni amamɔɔ asai lɛ yɛ mli lɛ kaseɔ bɔ ni amaa tsu kɛ bɔ ni akwraa lɛ ahaa, ni Maŋtsɛyeli Asa Tsumaa Fotro lɛ haa anyɛɔ aheɔ tsɔji kɛ nibii ni he hiaa lɛ. Odasefoi ni amrɔ nɛɛ amɛfeɔ kpeei yɛ asai heei ni amamɔ nɛɛ amli lɛ ahiɛ sɔɔ waa akɛ amɛnanemɛi heyelilɔi lɛ kɛ amɛbe kɛ shika tsu nii kɛye abua amɛ. Amɛwoɔ too yɛ nyɔŋ fɛɛ nyɔŋ nɔ koni akɛkwra, ni akɛwo shika ni afite kɛma Maŋtsɛyeli Asa hee nɛɛ hu ahe nyɔmɔ, ni no yeɔ buaa ni amamɔɔ Maŋtsɛyeli Asai babaoo.

Akɛ gbɛ nɔ ni atsɔɔ amaa tsu kɛ tsumaa he nibii ni yɔɔ maŋ ko mli lɛ tsuɔ nii kɛmaa Maŋtsɛyeli Asai lɛ. Eyɛ mli akɛ asai nɛɛ bɛ haŋtsii moŋ, shi amɛyɛ hiŋmɛi nɔ, amɛsa kɛ nitsumɔ, ni amɛmli tamɔ ŋɔɔ. Akɛ maji aaafee 40 ni bɛ shika tsɔ lɛ fata tsumaa he gbɛjianɔtoo nɛɛ he, be ni aje shishi yɛ afi 1999 mli lɛ. Kɛjɛ no sɛɛ kɛbaa nɛɛ, alɛɛ tsumaa he gbɛjianɔtoo nɛɛ mli kɛtee shikpɔji 116 ni tamɔ nɛkɛ lɛ anɔ, ni no bafeɔ Yehowa Odasefoi asafoi ni yɔɔ jeŋ fɛɛ lɛ mli fã kpotoo. Yɛ afii enumɔ ni eho nɛɛ mli lɛ, ajɛ gbɛjianɔtoo nɛɛ mli amamɔ Maŋtsɛyeli Asai ni fa fe 9,000, ni kɛ aja mli lɛ, amamɔɔ maŋtsɛyeli asai heei ni fa fe 5 daa gbi! Shi ehe miihia ni amamɔ Maŋtsɛyeli Asai heei 14,500 lolo yɛ shikpɔji 116 nɛɛ anɔ. Yɛ Yehowa jɔɔmɔ, kɛ suɔmɔ kɛ mlihilɛ mli ni Odasefoi ni yɔɔ je lɛ mli lɛ jɛɔ koni amɛye amɛbua lɛ hewɔ lɛ, hiɛnɔkamɔ yɛ akɛ, abaaná shika bɔ ni sa, ni akɛtsu hiamɔ nɛɛ he nii.—Lala 127:1.

Maŋtsɛyeli Asai Haa Shweremɔ Baa

Mɛɛ hewalɛ mɔdɛŋbɔɔ babaoo ni tamɔ nɛkɛ lɛ ena yɛ maŋbii ni ji Odasefoi lɛ, kɛ Maŋtsɛyeli shiɛmɔ nitsumɔ lɛ nɔ? Yɛ hei babaoo lɛ, kɛ́ ama Maŋtsɛyeli Asa lɛ agbe naa lɛ, mɛi abɔ ni baa kpeei lɛ yaa hiɛ waa diɛŋtsɛ. Anaa enɛ he nɔkwɛmɔnɔ ni sa kadimɔ yɛ amaniɛbɔɔ ni jɛ Burundi lɛ mli akɛ: “Maŋtsɛyeli Asa lɛ yiɔ obɔ kɛ́ ama agbe naa amrɔ nɔŋŋ. Ákɛ nɔkwɛmɔnɔ lɛ, ama Maŋtsɛyeli Asa ko aha asafo ko ní mɛi ni baa kpee lɛ ayifalɛ shɛɔ aaafee 100. Ama amɛ Maŋtsɛyeli Asa hee lɛ ní mɛi 150 akpe yɛ mli. Be ni agbe asa lɛ maa naa lɛ, mɛi 250 ebɔi kpeei baa.”

 Mɛni hewɔ aná nɔyaa ni tamɔ nɛkɛ? Nɔ kome ji akɛ, anáa Maŋtsɛyeli shiɛlɔi akuu ní bɛ he ni amɛkpeɔ yɛ, shi amɛkpeeɔ yɛ tso ko loo kpata ko shishi lɛ ahe jwɛŋmɔ ni ejaaa. Yɛ maŋ ko mli lɛ, akɛ béi ni ba yɛ maŋbii ateŋ lɛ he shwamɔ fɔ̃ jamɔŋ kui bibii ni tamɔ nɛkɛ lɛ anɔ, ni mla lɛ hu biɔ koni afee jamɔŋ kpeei fɛɛ yɛ sɔlemɔtsui amli.

Asai ni Yehowa Odasefoi lɛ diɛŋtsɛ yɔɔ lɛ hu yeɔ ebuaa amɛ koni amɛha akutso lɛ ale akɛ, amɛjeee osɔfo ko sɛɛnyiɛlɔi. Yehowa Odasefoi anitsumɔhe nine ni yɔɔ Zimbabwe lɛ ŋma akɛ: “Tsutsu ko lɛ, nyɛmimɛi ni yɔɔ akutso nɛɛ mli lɛ fɔɔ kpee yɛ mɛi ashiai amli, ni no ha maŋbii lɛ kɛ shiatsɛ lɛ gbɛi tsɛ asafo lɛ. Amɛkɛɔ akɛ nyɛmimɛi lɛ yaa Owula Ashimashi sɔlemɔ lɛ. Enɛɛmɛi fɛɛ miitsake amrɔ nɛɛ, akɛni mɛi miina yɛ faŋŋ mli akɛ, akadi asa fɛɛ asa kɛ niŋmaa nɛɛ akɛ: ‘Yehowa Odasefoi a-Maŋtsɛyeli Asa’ lɛ hewɔ.”

Nihalɔi ni Yɔɔ Miishɛɛ

Bɔfo Paulo ŋma akɛ: “Tsuijurɔnaa halɔ Nyɔŋmɔ sumɔɔ.” (2 Korintobii 9:7) Yɛ anɔkwale  mli lɛ nii ni akeɔ babaoo lɛ yeɔ ebuaa. Shi anáa nikeenii ni akɛhaa ni akɛfiɔ Yehowa Odasefoi anitsumɔ lɛ sɛɛ lɛ kpotoo kɛjɛɔ oniatsumɔ adekai ni yɔɔ Maŋtsɛyeli Asa lɛ nɔ lɛ amli. Kɛ́ onia ni atsuɔ lɛ fa jio, efaaa jio lɛ, akuuu hiɛ ashwieee nɔ, ejaakɛ fɛɛ he miihia. Kaimɔ akɛ Yesu damɔ sɛɛ ni ena yoo okulafo ohiafo lɛ be ni ekɛ kapɛji bibii enyɔ lɛ wo adeka lɛ mli lɛ. Yehowa kɛ ŋwɛibɔfoi lɛ hu na lɛ. Wɔleee yoo okulafo lɛ gbɛi po, shi Yehowa kwɛ koni aŋma enifeemɔ ni pɛsɛmkunya bɛ mli nɛɛ awo Biblia lɛ mli kɛha yinɔi fɛɛ.

Kɛfata Maŋtsɛyeli Asai amaamɔ he lɛ, akɛ wɔtooyeli ni wɔkɛhaa lɛ fiɔ Maŋtsɛyeli nitsumɔi krokomɛi ni he hiaa lɛ asɛɛ. Ekome ni wɔfeɔ yɛ nɛkɛ gbɛ nɔ lɛ haa wɔ yiŋtoo ni wɔɔdamɔ nɔ ni ‘wɔda Nyɔŋmɔ shi babaoo kɛteke nɔ.’ (2 Korintobii 9:12) Wɔnyɛmimɛi Kristofoi ni yɔɔ Benin lɛ bɔ amaniɛ akɛ: “Wɔsɔleɔ kɛdaa Yehowa shi gbi fɛɛ gbi, yɛ shika ní majimaji ateŋ nyɛmifeemɔ lɛ kɛye amɛbua wɔ lɛ hewɔ.” Yɛ nakai beaŋ nɔŋŋ lɛ, wɔteŋ mɛi fɛɛ ni kɛ shika fiɔ Maŋtsɛyeli nitsumɔ lɛ sɛɛ lɛ náa miishɛɛ ni jɛɔ Kristofoi anɔ hamɔ mli kɛbaa lɛ!

[Akrabatsa/Mfoniri ni yɔɔ baafa 22, 23]

Gbɛ̀i ni Mɛi Komɛi Tsɔɔ Nɔ Amɛkeɔ Nii

ONIATSUMƆ KƐHA JEŊ MUU FƐƐ NITSUMƆ LƐ

Mɛi pii kɛ shika ko fɔ̃ɔ shi, loo amɛtoɔ he gbɛjianɔ ni amɛkɛwoɔ oniatsumɔ adekai ni akadi amɛ akɛ “Oniatsumɔ Kɛha Jeŋ Muu Fɛɛ Nitsumɔ Lɛ—Mateo 24:14” lɛ mli.

Daa nyɔŋ nɔ lɛ, asafoi kɛ shika nɛɛ majeɔ kɛyaa Yehowa Odasefoi anitsumɔhe ni yɔɔ maŋ nɔ he ni amɛyɔɔ lɛ. Abaanyɛ akɛ shika ni ataoɔ akɛke lɛ amaje tɛ̃ɛ kɛyaha Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, aloo abaanyɛ akɛya nitsumɔhe nine ni sɔmɔɔ maŋ ni oyɔɔ mli lɛ. Kɛ́ akɛ tsɛk miiha lɛ, esa akɛ aŋma “Watch Tower” yɛ nɔ akɛ mɛi ni aawo shika lɛ aha. Abaanyɛ akɛ jwetrii aloo ojarawa nibii krokomɛi hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ akɛ amɛji nibii ni akɛmiike kwraa.

NIBII NI AKƐHA SHI AKƐKEKO LƐ AHE GBƐJIANƆTOO

Abaanyɛ akɛ shika aha Watch Tower koni ekɛtsu nii. Shi kɛ́ mɔ ni kɛha lɛ miitao lɛ, akɛbaaha lɛ. Kɛha sane nɛɛ mlitsɔɔmɔ lolo lɛ, ofainɛ ŋmaa kɛyabi yɛ Office of the Secretary and Treasurer kɛtsɔ adrɛs ni atsɔɔ yɛ yiteŋgbɛ lɛ nɔ.

EJURƆFEEMƆ NI AKPƐ YIŊ YƐ HE

Kɛfata shika ni akɛkeɔ kwraa lɛ he lɛ, ayɛ gbɛ̀i krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ateŋ ekomɛi ji:

Inshuɔrans: Abaanyɛ aŋma Watch Tower gbɛi akɛ mɛi ni baaná inshuɔrans gbɛjianɔtoo lɛ he sɛɛ yɛ mɔ ni kɛhaa lɛ gbele sɛɛ, aloo mɛi ni baaná enitsumɔ hejɔɔmɔ mli gbɛjianɔtoo lɛ he sɛɛ.

Shika ni Akɛtoɔ Shikatoohe: Abaanyɛ aha shika ni akɛto, shika nɔ woji, aloo nitsumɔ mli hejɔɔmɔ mli shika ato aloo akɛha Watch Tower yɛ mɔ lɛ gbele sɛɛ, yɛ bɔ ni nyɛmaŋ lɛ shikatoohei ŋmɛɔ gbɛ ni afee lɛ naa.

Nitsumɔi Amli Gbɛfaŋnɔ kɛ Shika ni Akɛfaa Shikatoohei kɛ Ehe Kpa: Abaanyɛ akɛ nitsumɔi amli gbɛfaŋnɔ ni ayɔɔ kɛ shika ni akɛfaa shikatoohei kɛ ehe kpa lɛ aha Watch Tower akɛ nibii ni akɛmiike kwraa.

Shikpɔji kɛ Tsũi: Abaanyɛ akɛ shikpɔji kɛ tsũi ni baahi hɔɔmɔ, loo shĩa ko ni mɔ ko yɔɔ mli lɛ aha kɛtsɔ ke kwraa ni akɛaake nɔ, aloo ni abaashi shikpɔŋ loo tsũ lɛ yɛ mɔ ni kɛke lɛ dɛŋ, koni ehi tsũ lɛ mli aloo ekwɛ nɔ aahu kɛyashi be mli ni ebaagbo. Ha nitsumɔhe nine ni yɔɔ maŋ mli he ni oyɔɔ lɛ ale dani okɛ shikpɔŋ loo tsũ ko aha.

Daa Afi Shika ni Anáa yɛ Nikeenii Ahe: Daa afi shika ni anáa yɛ nikeenii ahe ji gbɛjianɔ ko ni atoɔ ni mɔ ko kɛ shika loo nibii ni jara wawai haa koni Watchtower nitsumɔhe nine ko akwɛ nɔ. Yɛ no najiaŋ lɛ, mɔ ni kɛha lɛ, loo mɔ ko ni mɔ ni kɛha lɛ ehala lɛ lɛ nine shɛɔ shika falɛ pɔtɛɛ ko nɔ daa afi yɛ ewala be fɛɛ mli. Atseɔ tóo yɛ shika ni mɔ ni kɛha lɛ nine shɛɔ nɔ daa lɛ nɔ kɛjɛ afi nɔ ni daa afi shika ni anáa lɛ jeɔ nitsumɔ shishi lɛ nɔ.

Shamaŋsheo kɛ Nii ni Ahaa Mɔ Kroko Gbɛi Kãa Nɔ: Abaanyɛ akɛ nibii ni ayɔɔ loo shika ake Watch Tower kɛtsɔ shamaŋsheo ni aŋma yɛ mla naa nɔ, aloo abaanyɛ aha Watch Tower gbɛi akã shika ni akɛto lɛ nɔ akɛ mɔ ni baaná he sɛɛ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa enáa toowoo mli heyelii komɛi.

Taakɛ gbɛi “charitable planning” (ejurɔfeemɔ ni akpɛ yiŋ yɛ he) tsɔɔ lɛ, nɛkɛ nikeei henɔi nɛɛ biɔ gbɛjianɔtoo yɛ mɔ ni kɛ nii keɔ lɛ gbɛfaŋ. Bɔni afee ni akɛye abua aŋkroaŋkroi ni miisumɔ koni amɛye amɛbua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ ejurɔfeemɔ ni akpɛ yiŋ yɛ he nɛɛ ateŋ eko nɔ lɛ, afee wolo bibioo ko yɛ Ŋleshi Blɔfo wiemɔ kɛ Spain wiemɔ mli ni yitso ji Charitable Planning to Benefit Kingdom Service Worldwide (Ejurɔfeemɔ ni Akpɛ Yiŋ yɛ He Koni Ehe Aba Sɛɛnamɔ Kɛha Maŋtsɛyeli Nitsumɔ yɛ Jeŋ Fɛɛ). Aŋma wolo bibioo nɛɛ yɛ sanebimɔi babaoo ni nine eshɛ nɔ ni kɔɔ nikeenii, shamaŋsheoi, kɛ nii ni ahaa mɔ kroko gbɛi kãa nɔ lɛ he lɛ ahetoohamɔ naa. Saji krokomɛi ni kɔɔ tsũi, shika gbɛjianɔtoo, kɛ toowoo gbɛjianɔtoo he lɛ hu yɛ mli. Mɛi babaoo enyɛ eye ebua kɛfi Yehowa Odasefoi anitsumɔ lɛ sɛɛ yɛ jeŋ fɛɛ, yɛ be mli ni amɛkane wolo bibioo lɛ ni amɛkɛ amɛ diɛŋtsɛ amɛmla kɛ toowoo he ŋaawolɔi esusu he lɛ sɛɛ, ni yɛ nakai beaŋ nɔŋŋ lɛ, amɛha sɛɛnamɔi ni amɛnáa yɛ toowoo mli yɛ enɛ feemɔ mli lɛ etee hiɛ. Nine baanyɛ ashɛ wolo bibioo nɛɛ nɔ kɛtsɔ eko ni aaashɛ kɛjɛ Charitable Planning Office lɛ dɛŋ tɛ̃ɛ (Nitsumɔhe ni Kwɛɔ Ejurɔfeemɔ ni Akpɛ Yiŋ yɛ He lɛ Nɔ) lɛ nɔ.

Kɛha enɛ mli tsɔɔmɔ lolo lɛ, obaanyɛ obi kɛjɛ Charitable Planning Office lɛ, kɛtsɔ woloŋmaa loo tɛlifoŋ tswaa nɔ, kɛtsɔ adrɛs ni atsɔɔ yɛ shishigbɛ lɛ loo Yehowa Odasefoi anitsumɔhe ni sɔmɔɔ maŋ ni oyɔɔ mli lɛ nɔ.

Charitable Planning Office

Watch Tower Bible and Tract

Society of Pennsylvania

100 Watchtower Drive,

Patterson, New York 12563-9204

Telephone: (845) 306-0707

[Mfonirii ni yɔɔ baafa 20, 21]

Yehowa Odasefoi akpeehei memeji kɛ nɔ ni amamɔ nyɛsɛɛ nɛɛ

Zambia

Central African Republic