Nɔ ni Yehowa Heshibaa Lɛ Tsɔɔ Kɛha Wɔ

DAVID ji nuu ko ni na nɔ̃. Maŋtsɛ Saul, ni ji eshaanuu awuŋayelɔ lɛ fee lɛ niseniianii. Saul ka koni ekɛ akpɔlɔ agbe David shii etɛ sɔŋŋ, ni egbɔbi lɛ afii babaoo ni ekpaaa, ni enɛ nyɛ David nɔ ni etsɔ kobɔfo. (1 Samuel 18:11; 19:10; 26:20) Shi kɛlɛ, Yehowa kɛ David yɛ. Yehowa ebuuu ehe kɛjɛɛɛ Saul pɛ he kɛkɛ, shi moŋ kɛjɛ henyɛlɔi krokomɛi hu ahe. No hewɔ lɛ, wɔbaanyɛ wɔnu David henumɔŋ wiemɔi ni ejie lɛ kpo yɛ lala mli lɛ shishi akɛ: “Yehowa ji mitɛsaa kɛ mimɔɔ kɛ miherelɔ. . . . [Yehowa] okɛ oyiwalaheremɔ tsɛŋ lɛ eha mi, ni omlihilɛ [“heshibaa,” NW] lɛ ehã mitsɔ agbo.” (2 Samuel 22:2, 36) David tsɔ gbɔmɔ ni je agbo yɛ Israel. Belɛ, mɛɛ gbɛ nɔ Yehowa heshibaa kɔɔ enɛ he yɛ?

Kɛ́ Ŋmalɛi lɛ wie Yehowa he akɛ ebaa ehe shi lɛ, etsɔɔɔ yɛ gbɛ ko kwraa nɔ akɛ enyɛmɔ faaa loo akɛ eyɛ mɛi krokomɛi ashishi. Yɛ no najiaŋ lɛ, su kpakpa nɛɛ tsɔɔ akɛ eyɛ musuŋtsɔlɛ babaoo kɛha adesai ni bɔɔ mɔdɛŋ ni amɛná enɔkpɛlɛmɔ lɛ, ni enaa amɛ mɔbɔ. Wɔkaneɔ yɛ Lala 113:6, 7 lɛ akɛ: “[Yehowa] maa ehiɛ shi ni ekwɛɔ nii ni yɔɔ ŋwɛi kɛ shikpɔŋ lɛ nɔ fɛɛ . . . . Eteeɔ humi shi kɛjɛɔ su mli.” ‘Ehiɛ shi ni emaa ekwɛɔ nii’ lɛ tsɔɔ akɛ “eeba Ehe shi ekwɛ nii.” (Young’s Literal Translation of the Holy Bible) Enɛ hewɔ lɛ, Yehowa jɛ ŋwɛi ‘ema ehiɛ shi,’ loo ‘eba ehe shi,’ koni efee toiboo eha David, ni eji gbɔmɔ ni yeee emuu shi kɛlɛ eji nuu ni baa ehe shi ni sumɔɔ akɛ esɔmɔ Nyɔŋmɔ lɛ. No hewɔ lɛ, David maa nɔ mi kɛhaa wɔ akɛ: “Yehowa yɛ ŋwɛi shɔŋŋ moŋ, shi kɛlɛ ehiɛ kã heshibalɔ he.” (Lala 138:6) Esa akɛ gbɛ ni Yehowa tsɔ nɔ ekɛ David ye yɛ mɔbɔnalɛ, tsuishitoo, kɛ musuŋtsɔlɛ mli lɛ awo mɛi fɛɛ ni tao akɛ amɛfee Nyɔŋmɔ suɔmɔnaa nii lɛ hewalɛ.

Eyɛ mli akɛ ákɛ Maŋtsɛ lɛ, Yehowa yɛ gbɛhe ni nɔ kwɔ fe fɛɛ yɛ jeŋ muu lɛ fɛɛ mli moŋ, shi esumɔɔ akɛ ekɛ wɔteŋ mɔ fɛɛ mɔ aná sharamɔ. Enɛ haa wɔ nɔmimaa akɛ wɔbaanyɛ wɔkɛ wɔhe afɔ̃ eyelikɛbuamɔ ni sɛɛ efooo lɛ nɔ yɛ shihilɛi ni mli wawai po  amli. Ehe ehiaaa ni wɔshe gbeyei akɛ ehiɛ baakpa wɔnɔ. Awie Yehowa he yɛ gbɛ ni ja nɔ kɛkɔ ewebii ni ji blema Israelbii lɛ ahe akɛ ‘mɔ ni kai amɛ, be ni amɛfee butuu lɛ; ejaakɛ naanɔ emɔbɔnalɛ hiɔ shi kɛyaa.’—Lala 136:23.

Ákɛ ŋmɛnɛŋmɛnɛ beaŋ Yehowa tsuji lɛ, ekolɛ wɔbaana amanehulu tamɔ David. Ekolɛ mɛi ni leee Nyɔŋmɔ lɛ yeɔ wɔhe fɛo, loo ekolɛ wɔkɛ hela miikpe loo wɔsuɔlɔ ko egbo. Ekɔɔɔ he eko bɔ ni shihilɛ lɛ ji lɛ, kɛji akɛ wɔtsui mli tse lɛ, wɔbaanyɛ wɔbɛŋkɛ Yehowa yɛ sɔlemɔ mli, ni wɔkpá emɔbɔnalɛ lɛ he fai. Yehowa ‘baama ehiɛ shi’ ni eyɔse wɔ ni ebo wɔsɔlemɔi lɛ atoi. Lalatsɛ ni akɛ mumɔ tsirɛ lɛ lɛ ŋma akɛ: “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ.” (Lala 34:16) Ani enɛ kanyaaa otsui ni osusu Yehowa heshibaa su ni yɔɔ miishɛɛ lɛ he?

[Mfonirii ni yɔɔ baafa 30]

Ŋmɛnɛ, Yehowa miisumɔ ni ebo wɔsɔlemɔi lɛ atoi, tamɔ bɔ ni ebo David sɔlemɔi lɛ atoi lɛ