Sanebimɔi ni Jɛ Kanelɔi Adɛŋ

Te Kristofoi asafo lɛ buɔ fufeemɔ ehaa tɛŋŋ?

Nyɔŋmɔ Wiemɔ lɛ buɔ dãatɔɔ kɛ fufeemɔ fɛɛ fɔ́ akɛ nifeemɔi ni esaaa mɛi ni sɔmɔɔ Nyɔŋmɔ. No hewɔ lɛ, Kristofoi asafo lɛ buɔ fulɔ ni tsakeee etsui lɛ tamɔ bɔ ni ebuɔ dãatɔlɔ lɛ nɔŋŋ. Dãatɔlɔ loo fulɔ nyɛŋ efee Kristofoi asafo lɛ mlinyo.

Abɛi 23:20, 21 lɛ kɛɔ akɛ: “Kaaŋɔ ohe ofutu dãatɔlɔi kɛ mɛi ni feɔ loo he fú lɛ! Ejaakɛ dãatɔlɔ kɛ fulɔ lɛ, amɛaaye ohia, ni wɔdɔ̃iwɔɔ aaaha mɔ abu mamashwɛi.” Wɔkaneɔ mɔ ko ni ji “kaniŋkajelɔ kɛ atuatselɔ” ni sa gbele yɛ Mose Mla lɛ shishi lɛ he sane yɛ 5 Mose 21:20. Taakɛ kuku nɛɛ tsɔɔ lɛ, subaŋi enyɔ ni kadiɔ nakai atuatselɔ ni tsakeee etsui lɛ ji akɛ mɔ lɛ ji “nyenyeŋtswibɔlɔ [loo fulɔ] kɛ dãatɔlɔ.” Eyɛ faŋŋ akɛ, abu fufeemɔ akɛ nifeemɔ ko ni esaaa akɛ mɛi ni sumɔɔ ni amɛsɔmɔ Nyɔŋmɔ yɛ blema Israel lɛ kɛ amɛhe awo mli.

Shi kɛlɛ, mɛni ji fufeemɔ, ni mɛni Kristofoi a-Hela Ŋmalɛi lɛ kɛɔ yɛ sane nɛɛ he? Fulɔ ji “mɔ ko ni kɛ hiɛjoomɔ kɛ ŋmaayeli kɛ dãanumɔ efee esu.” No hewɔ lɛ, nɔ kome ji akɛ, fufeemɔ ji hiɛjoomɔ henɔ ko, ni Nyɔŋmɔ Wiemɔ lɛ kɛɔ wɔ akɛ “hiɛjoolɔi” anine shɛŋ Nyɔŋmɔ Maŋtsɛyeli lɛ nɔ. (1 Korintobii 6:9, 10; Filipibii 3:18, 19; 1 Petro 4:3) Kɛfata he lɛ, be ni bɔfo Paulo bɔ Kristofoi kɔkɔ yɛ amɛhe ni  amɛkɛaawo “heloo lɛ nitsumɔi lɛ” lɛ amli lɛ he lɛ, etsĩ “dãatɔɔi, shwɛmɔ fɔŋ kɛ nii ni tamɔ enɛɛmɛi lɛ” atã. (Galatabii 5:19-21) Bei pii lɛ, nii ni ayeɔ kɛtekeɔ nɔ lɛ fataa dãatɔɔi kɛ shwɛmɔ fɔŋ he. Agbɛnɛ hu, ekã shi faŋŋ akɛ fufeemɔ fata Paulo wiemɔ ni ji “nii ni tamɔ enɛɛmɛi lɛ” ahe. Taakɛ eji yɛ “heloo lɛ nitsumɔi” krokomɛi agbɛfaŋ lɛ, esa akɛ ajie Kristofonyo ko ni ale lɛ jogbaŋŋ akɛ eji fulɔ ni kɛ kuɛŋtimɔ kpoɔ akɛ eeetsake hiɛjoomɔ su ni eyɔɔ lɛ kɛjɛ asafo lɛ mli.—1 Korintobii 5:11, 13. *

Eyɛ mli akɛ Nyɔŋmɔ Wiemɔ lɛ buɔ dãatɔɔ kɛ fufeemɔ akɛ nɔ kometoo lɛ nɔŋŋ moŋ, shi eyɛ mlɛo akɛ aaayɔse dãatɔlɔ fe fulɔ. Bei pii lɛ anyɛɔ anaa dãatɔɔ he okadii faŋŋ. Shi kɛlɛ, akɛni anyɛŋ adamɔ kponɔgbɛ okadii kɛkɛ anɔ atsɔɔ kɛji akɛ mɔ ko kɛ fufeemɔ efee esu hewɔ lɛ, enamɔ wa waa. Enɛ hewɔ lɛ, ebiɔ ni onukpai ni yɔɔ asafo lɛ mli lɛ kɛ henɔkwɛmɔ kɛ sɛɛyoomɔ babaoo atsu nii yɛ saji ni kɔɔ enɛ he lɛ ahe nitsumɔ mli.

Ákɛ nɔkwɛmɔnɔ lɛ, shwi ni ashwiɔ tsɔ fe nine baanyɛ afee fufeemɔ he okadi, shi enyɛŋ efee nakai be fɛɛ be. Ekolɛ, hela ní gbaa mɔ ko naa lɛ baaha ni eshwi agbo. Weku ni mɔ ko jɛ mli lɛ baanyɛ aha mɔ lɛ ashwi agbo. Esa akɛ wɔha ehi wɔjwɛŋmɔ mli hu akɛ, shwi ni ashwiɔ agbo lɛ ji gbɔmɔtsoŋ shihilɛ, yɛ be mli ni fufeemɔ ji jwɛŋmɔŋ su ni anáa. Shwi ni ashwiɔ agbo lɛ ji “shihilɛ ko ni haa fɔ ni yɔɔ gbɔmɔtso lɛ mli lɛ faa babaoo,” yɛ be mli ni fufeemɔ ji “hiɛjoomɔ loo nii ni ayeɔ tsɔ fe nine.” No hewɔ lɛ, akɛ bɔ ni mɔ ko gbɔmɔtsoŋ dalɛ yɔɔ ha lɛ ebuuu lɛ akɛ fulɔ, shi moŋ su ni eyɔɔ yɛ niyeli he. Mɔ ko dalɛ baanyɛ afee nɔ ni sa loo ekolɛ afee bibioo po, shi kɛlɛ eji fulɔ. Kɛfata he lɛ, mɔ ko tsiimɔ loo edalɛ ni akpɛlɛɔ akɛ eji nɔ ni sa lɛ yɛ srɔto yɛ he fɛɛ he.

Mɛni ji fufeemɔ he okadii? Fulɔ yaa nɔ ejieɔ ehe kpo akɛ enyɛɛɛ ehe nɔ eye, ni eyaa nɔ po ekɛ hiɛjoomɔ yeɔ nii babaoo kɛyashiɔ he ni enyɛɛɛ emu loo hela mɔɔ lɛ. Henɔyeli ni ebɛ lɛ tsɔɔ akɛ esusuuu heguɔgbee ni ekɛbaa Yehowa kɛ E-webii lɛ agbɛi kpakpa lɛ nɔ lɛ he kwraa. (1 Korintobii 10:31) Yɛ gbɛ kroko nɔ lɛ, anyɛŋ abu mɔ ko ni yeɔ nii fe nine yɛ bei fioo komɛi amli lɛ doo akɛ eji “hiɛjoolɔ.” (Efesobii 5:5) Kɛlɛ, yɛ Galatabii 6:1 lɛ naa lɛ, yelikɛbuamɔ he baahia Kristofonyo ni tamɔ nɛkɛ. Paulo wie akɛ: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ní nyɛji mumɔŋ gbɔmɛi lɛ nyɛsáa nakai mɔ lɛ ekoŋŋ yɛ mlijɔlɛ mumɔ mli.”

Mɛni hewɔ Biblia mli ŋaawoo akɛ atsi he kɛjɛ nii ni aaaye fe nine lɛ he lɛ he hiaa ŋmɛnɛ lɛ? Ejaakɛ, Yesu bɔ kɔkɔ yɛ wɔgbii nɛɛ ahe titri akɛ: “Nyɛhiɛ ahia nyɛhe nɔ, koni fufeemɔ kɛ dãatɔɔ kɛ daaŋ-ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa . . . tamɔ tsɔne.” (Luka 21:34, 35) Gbɛ kome ni he hiaa ni wɔɔtsɔ nɔ wɔkwa shihilɛ gbɛ ni yeɔ mɔ awui yɛ mumɔŋ lɛ ji ni wɔtsi wɔhe kɛjɛ nii ni ayeɔ kɛtekeɔ nɔ lɛ he.

Hiɛshikamɔ ni akɛ feɔ nii lɛ ji Kristofoi ajeŋba. (1 Timoteo 3:2, 11) No hewɔ lɛ, yɛ anɔkwale mli lɛ, Yehowa baaye abua mɛi fɛɛ ni bɔɔ mɔdɛŋ ni amɛkɛ Biblia mli ŋaawoo ni kɔɔ niyeli kɛ ninumɔ yɛ hiɛshikamɔ mli lɛ he lɛ atsu nii lɛ.—Hebribii 4:16.

[Shishigbɛ niŋmaa]