Sanebimɔi ni Jɛ Kanelɔi Adɛŋ

Nɛgbɛ daimonioi lɛ baahi yɛ Kristo Afii Akpe Nɔyeli lɛ mli?

Biblia lɛ haaa sanebimɔ nɛɛ hetoo tɛ̃ɛ. Shi kɛlɛ, wɔbaanyɛ wɔmu sane naa yɛ gbɛ ni ja nɔ yɛ nɔ ni kɔɔ he ni daimonioi lɛ baahi yɛ Kristo Afii Akpe Nɔyeli lɛ mli lɛ he.

Beni bɔfo Yohane haa wɔtsɔɔ hiɛ wɔleɔ nibii ni baaba yɛ nakai Afii Akpe lɛ shishijee kɛ enaagbee lɛ, ejaje akɛ: “Mina bɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ kɛ kɔ̃sɔ̃ŋkɔ̃sɔ̃ kpeteŋkpele ko yɛ edɛŋ. Ni emɔ drako lɛ, blema onufu lɛ ni ji diabolo (abonsam) kɛ satan lɛ, ni efi lɛ afii akpe, ni eŋɔ lɛ ewo bu kwɔŋkwɔŋ lɛ mli, ni eŋa eyi ni esɔo naa, koni ekashishiu jeŋmaji lɛ dɔŋŋ kɛyashi beyinɔ ni aaagbe afii akpe lɛ naa; ni no sɛɛ lɛ ja afɛ̃ne lɛ be fioo ko.” (Kpojiemɔ 20:1-3) Satan ní abaamɔ lɛ awo bu kwɔŋkwɔŋ koni yɛ naagbee lɛ aŋmɛɛ ehe be fioo ko lɛ pɛ he saji kukuji nɛɛ wieɔ. Eyɛ mli akɛ atsĩii daimonioi lɛ atã moŋ, shi shishinumɔ yɛ mli akɛ kɛji bɔfo ni hiɛ bu kwɔŋkwɔŋ lɛ naa samfee lɛ—ni ji Yesu Kristo ni awo ehiɛ nyam lɛ—mɔ Abonsam ewo bu kwɔŋkwɔŋ lɛ mli lɛ, ebaamɔmɔ daimonioi lɛ hu ewo mli.—Kpojiemɔ 9:11.

Beni Yesu Kristo batsɔ Maŋtsɛ yɛ ŋwɛi yɛ afi 1914 lɛ, efee nɔ ko ni sa Satan kɛ daimonioi lɛ ahe waa. Kpojiemɔ 12:7-9 lɛ kɛɔ akɛ: “Ta te shi yɛ ŋwɛi: Mikael kɛ ebɔfoi lɛ fã drako lɛ nɔ ta. Ni drako lɛ bɔfoi lɛ [daimonioi lɛ] fata ehe kɛwu, ni amɛnyɛɛɛ, ni asaŋ amɛnáaa gbɛ dɔŋŋ yɛ ŋwɛi. Ni ashɛ́ drako kpeteŋkpele lɛ afɔ̃, mɔ ni ji blema onufu lɛ ní atsɛɔ lɛ diabolo (naafolɔlɔ loo abonsam) lɛ kɛ satan (henyɛlɔ) lɛ ní shishiuɔ jeŋ muu lɛ fɛɛ lɛ, ashɛ́ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.” Kɛjɛ no sɛɛ kɛbaa nɛɛ, atsĩ Satan kɛ edaimonioi lɛ anaa yɛ shikpɔŋ lɛ nɔ. Wɔbaanyɛ wɔsusu yɛ gbɛ ni ja nɔ akɛ kɛji akɛ Yesu Kristo tee nɔ etsĩ Satan nifeemɔi lɛ anaa koni shikpɔŋ lɛ aye ehe kɛjɛ ehewalɛ fɔŋ lɛ shishi lɛ, E-baafee nakai nɔŋŋ eshi daimonioi lɛ.

Susumɔ klɛŋklɛŋ gbalɛ ni Biblia lɛ wie he lɛ hu he okwɛ. Ekaneɔ akɛ: ‘Nyɔŋmɔ kɛ nyɛ̃ɛ aaaŋmɛ Satan kɛ yoo lɛ, ni ji Yehowa ŋwɛi gbɛjianɔtoo lɛ teŋ, kɛ Satan seshi lɛ kɛ yoo lɛ seshi ni ji Yesu Kristo teŋ; Yesu baatswa Satan yitso nɔ̃, ni lɛ hu ebaatswa Yesu nanetsitsi nɔ̃.’ (1 Mose 3:15) Onufu lɛ yitso nɔ̃ ni abaatswa lɛ kɔɔ Satan ni abaatsĩ enaa awo bu kwɔŋkwɔŋ lɛ mli yɛ Kristo Afii Akpe Nɔyeli lɛ mli lɛ he. Gbalɛ lɛ tee nɔ etsɔɔ mli akɛ nyɛ̃ɛ kã Mɔ ni tswaa yitso nɔ̃ lɛ kɛ Satan seshi lɛ teŋ. Mɛi ni fata Satan seshi loo gbɛjianɔtoo lɛ he ji bɔfoi fɔji loo daimonioi ni feɔ egbɛjianɔtoo lɛ fã ni anaaa lɛ. No hewɔ lɛ nilee yɛ mli akɛ aaamu sane naa akɛ, kɛ́ Yesu mɔ Satan ewo bu kwɔŋkwɔŋ lɛ mli lɛ, ebaafimɔ daimonioi lɛ hu ewo mli. Anɔkwale ni eji akɛ mumɔi fɔji lɛ ejie gbeyeishemɔ babaoo kpo yɛ bu kwɔŋkwɔŋ lɛ he lɛ tsɔɔ akɛ amɛle akɛ abaatsĩ amɛnaa awo jɛi wɔsɛɛ.—Luka 8:31.

Shi, ani eeenyɛ efee akɛ Kpojiemɔ 20:1-3 lɛ etsĩii daimonioi lɛ atã akɛni abaakpata amɛhiɛ  kɛfata Satan seshi ni anaa lɛ ahe yɛ Harmagedon lɛ hewɔ? Biblia lɛ tsɔɔ akɛ enɛ nyɛŋ afee anɔkwale. Beni Biblia lɛ wieɔ nɔ ni baaba Satan nɔ yɛ naagbee mli lɛ he lɛ, ekɛɛ akɛ: “Abonsam lɛ ni shishiuɔ amɛ lɛ, aŋɔ lɛ awo la kɛ swɔɔ kpaakpo lɛ mli, he ni kooloo lɛ kɛ amale gbalɔ lɛ hu yɔɔ lɛ. Ni aaapiŋ amɛ nyɔɔŋ kɛ shwane kɛaatee naanɔi anaanɔ.” (Kpojiemɔ 20:10) Kooloo lɛ kɛ amale gbalɔ lɛ ji maŋkwramɔŋ gbɛjianɔtoi, ni amɛfata Satan gbɛjianɔtoo ni anaa lɛ he. (Kpojiemɔ 13:1, 2, 11-14; 16:13, 14) Abaakpata amɛhiɛ yɛ Harmagedon, be mli ni Nyɔŋmɔ Maŋtsɛyeli lɛ jwaraa je lɛŋ maŋtsɛyelii lɛ ni ekpataa amɛhiɛ lɛ. (Daniel 2:44) Biblia lɛ wieɔ “naanɔ la lɛ ni asaa ato abonsam kɛ ebɔfoi lɛ” he. (Mateo 25:41, wɔma efã ko nɔ mi.) Abaashɛrɛ Abonsam kɛ edaimonioi lɛ awo “la kɛ swɔɔ kpaakpo” ní áŋɔ kooloo lɛ kɛ amale gbalɔ lɛ awo mli lɛ nɔŋŋ mli, ni tsɔɔ akɛ amɛ hu abaakpata amɛhiɛ kɛya naanɔ. Eji abaakpata mumɔŋ bɔɔ nii ni yɔɔ hewalɛ waa ni feɔ Satan seshi ni anaaa lɛ fã lɛ ahiɛ yɛ Harmagedon kulɛ, eka shi faŋŋ akɛ abaatsĩ daimonioi lɛ atã akɛ amɛfata kooloo lɛ kɛ amale gbalɔ lɛ he yɛ nakai mfonirifeemɔŋ kpaakpo lɛ mli. Amɛtã ni atsĩii yɛ Kpojiemɔ 20:10 lɛ tsɔɔ akɛ akpataŋ daimonioi lɛ ahiɛ yɛ Harmagedon.

Akɛni atsĩii daimonioi lɛ atã tɛ̃ɛ akɛ áŋɔ amɛ awo bu kwɔŋkwɔŋ lɛ mli hewɔ lɛ, awieee amɛhe tɛ̃ɛ hu akɛ aŋmɛɛ amɛhe kɛjɛ bu lɛŋ. Shi kɛlɛ, nɔ ni baaba Satan nɔ lɛ nɔŋŋ baaba amɛ hu amɛnɔ. Yɛ afii akpe lɛ sɛɛ, be mli ni áŋmɛɛ daimonioi lɛ kɛ Abonsam he ní amɛkɛ lɛ efee ekome yɛ naagbee kaa ni akɛbaaba adesai anɔ lɛ mli lɛ, abaaŋɔ amɛ hu awo la kɛ swɔɔ kpaakpo lɛ mli, ni no baafee amɛnaanɔ hiɛkpatamɔ.—Kpojiemɔ 20:7-9.

No hewɔ lɛ, eyɛ mli akɛ Satan ní abaamɔ lɛ awo bu kwɔŋkwɔŋ, ni ji shihilɛ ko ni akɛ lɛ baawo mli ni haŋ enyɛ nɔ ko efee lɛ pɛ he saji Kpojiemɔ 20:1-3 lɛ wieɔ moŋ, shi wɔbaanyɛ wɔmu sane naa yɛ gbɛ ni ja nɔ akɛ abaafimɔ edaimonioi lɛ hu ni aŋɔ amɛ awo bu kwɔŋkwɔŋ lɛ mli. Aŋmɛŋ Satan loo edaimonioi asafoi lɛ gbɛ ni amɛfite Nyɔŋmɔ yiŋtoo akɛ ebaasaa shikpɔŋ lɛ ni etsɔ paradeiso, ni ekɛ adesai aba emuuyeli mli ekoŋŋ yɛ Kristo Afii Akpe Nɔyeli lɛ mli.