Sanebimɔi ni Jɛ Kanelɔi Adɛŋ

Mɛni hewɔ Yesu ni atee lɛ shi lɛ ha Toma hegbɛ koni eta ehe, shi kɛlɛ ehaaa Maria Magdaleena afee nakai yɛ be ni tsɔ hiɛ lɛ mli lɛ?

Blema Biblia shishitsɔɔmɔi komɛi haa anuɔ shishi akɛ, Yesu kɛɛ Maria Magdaleena akɛ ekata ehe. Ákɛ nɔkwɛmɔnɔ lɛ, King James Version lɛ tsɔɔ Yesu wiemɔi lɛ ashishi akɛ: “Kaata mihe; ejaakɛ mináko maya ŋwɛi yɛ mitsɛ ŋɔɔ.” (Yohane 20:17) Shi kɛlɛ, Hela feemɔ wiemɔ diɛŋtsɛ ni afɔɔ shishitsɔɔmɔ akɛ “ata he” lɛ shishinumɔ ji “ni akɛ niji amɔ mɔ mli, afuɔ mɔ waa, amɔ mɔ mli waa, akpiti mɔ ko, ahiɛ nɔ ko mli kpɛŋŋ.” Akɛni Yesu ŋmɛ yei krokomɛi ni yɔɔ gbonyobu lɛ naa lɛ agbɛ koni “amɛbamɔmɔ enaji amli” hewɔ lɛ, shishinumɔ yɛ mli akɛ Yesu etsĩii Maria Magdaleena naa yɛ ehe kɛkɛ ni ebaata lɛ hewɔ.—Mateo 28:9.

Ŋmɛnɛŋmɛnɛ beaŋ wiemɔ shishitsɔɔmɔi tamɔ New World Translation of the Holy Scriptures, The New Jerusalem Bible, kɛ The New English Bible lɛ yeɔ kɛbuaa wɔ koni wɔnu Yesu wiemɔi lɛ ashishi diɛŋtsɛ, ejaakɛ amɛtsɔɔ shishi akɛ: “Kaamɔ mi mli odamɔ shi.” Mɛni hewɔ ni Yesu kɛ Maria Magdaleena ni ji enaanyo kpaakpa lɛ wie nakai?—Luka 8:1-3.

Ekã shi faŋŋ akɛ, Maria Magdaleena she gbeyei akɛ Yesu baakwɔ kɛya ŋwɛi ni eshi amɛ. Akɛni eesumɔ diɛŋtsɛ ni ekɛ e-Nuŋtsɔ lɛ ahi he kome hewɔ lɛ, eemɔ̃ Yesu mli kɛmiidamɔ shi koni ekaŋmɛ lɛ gbɛ ni etee. Bɔni afee ni Yesu ama nɔ mi kɛha Maria akɛ eshiŋ kɛyaŋ amrɔ nɔŋŋ lɛ, ewo lɛ ŋaa koni ekpa emli ni emɔɔ kɛdamɔɔ shi lɛ moŋ, koni eyajaje kɛtsɔɔ ekaselɔi lɛ akɛ atee lɛ shi.—Yohane 20:17.

Sanegbaa ni tee nɔ yɛ Yesu kɛ Toma teŋ lɛ yɛ srɔto. Be ni Yesu jie ehe kpo etsɔɔ kaselɔi lɛ ekomɛi lɛ, no mli lɛ Toma bɛ jɛmɛ. Sɛɛ mli lɛ Toma tsɔɔ akɛ eyiŋ feɔ lɛ kɔshikɔshi yɛ Yesu shitee lɛ he, ní ekɛɛ eheŋ eyeŋ akɛ ja ena plɛkoo ni akɛkala Yesu lɛ naa faji lɛ, ní ekɛ enine ewo Yesu ŋmawuiaŋ he ni akɛ akpɔlɔ lɛ tsu lɛ mli dani ebaahe eye. Yɛ gbii kpaanyɔ sɛɛ lɛ, Yesu jie ehe kpo etsɔɔ ekaselɔi lɛ ekoŋŋ. Shi yɛ nɛkɛ be nɛɛ mli lɛ Toma yɛ jɛmɛ, ni Yesu fɔ̃ lɛ nine koni ekɛ enine abata efaji lɛ ahe ekwɛ.—Yohane 20:24-27.

No hewɔ lɛ, yɛ Maria Magdaleena sane lɛ mli lɛ, Yesu miitsu henumɔ ni ejaaa ni ekɛtsiɔ enaa ni ekaya lɛ he nii; ni yɛ Toma sane lɛ mli lɛ, Yesu miiye kɛmiibua mɔ ko ni yiŋ efee lɛ kɔshikɔshi. Yɛ shihilɛi enyɔ lɛ fɛɛ mli lɛ, Yesu yɛ yiŋtoi kpakpai ni eeedamɔ nɔ efee nɔ ni efee lɛ.