‘Miyelikɛbuamɔ Jɛɔ Yehowa Ŋɔɔ’

Be Mli ni Gbɔlɛ Beaŋ Batsɔɔ “Anunyam Akekre”

MURIEL, ni eye afii 101 lɛ kɛɛ akɛ: “Eji wala shihilɛ be ni hi fe fɛɛ.” Theodoros, ni eye afii 70 lɛ tsɔɔ saji amli yɛ nɛkɛ gbɛ nɔ akɛ: “Eji hegbɛ diɛŋtsɛ lɛɛlɛŋ!” Maria, ni eye afii 73 lɛ kɛɛ akɛ: “Gbɛ ni hi fe fɛɛ ni manyɛ matsɔ nɔ mikɛ miwala atsu nii ji enɛ.” Mɛi ni wɔtsĩ amɛtã nɛɛ fɛɛ ji mɛi komɛi ni kɛ amɛwala be fɛɛ sɔmɔ Yehowa Nyɔŋmɔ.

Ayɛ Yehowa jálɔi ni egbɔlɔ babaoo ni yɔɔ ekãa tamɔ mɛnɛɛmɛi yɛ je lɛŋ fɛɛ. Yɛ amɛ afii ni etee hiɛ, gbɔmɔtsoŋ hewalɛnamɔ mli naagbai, kɛ shihilɛi krokomɛi ni mli wawai ni amɛkɛkpeɔ lɛ fɛɛ sɛɛ lɛ, amɛyaa nɔ amɛsɔmɔɔ Yehowa kɛ amɛtsui muu fɛɛ. Anɔkwafoi ni edara nɛɛ ji he ni atuɔ ahaa Nyɔŋmɔjamɔ he nɔkwɛmɔnii kpakpai yɛ Kristofoi asafo lɛ mli. Eyɛ amli akɛ mɛi ni edara lɛ ashihilɛi eŋmɛɛɛ amɛ gbɛ ni amɛtsu babaoo moŋ nɛ, shi kɛlɛ Yehowa hiɛ sɔɔ sɔɔmɔ ni amɛkɛhaa lɛ lɛ waa. *—2 Korintobii 8:12.

Lalai awolo ni yɔɔ Biblia lɛ mli lɛ wie sane ko ni sa jogbaŋŋ yɛ nɔ̃ shihilɛ ni anɔkwafoi ni edara lɛ baanyɛ akpa gbɛ lɛ he. Amɛbaanyɛ amɛhi shi tamɔ tso agbo ko ni etsɛ ni kã he ewoɔ yibii lolo. Beni lalatsɛ lɛ láa kɛkɔɔ anɔkwafoi ni edara lɛ ahe lɛ, elá akɛ: “Amɛaakã he amɛwo yibii yɛ gbɔlɛ mli tete, amɛmli aaahi nu ni amɛaahi frɔ̃frɔ̃.”—Lala 92:15.

Ekolɛ mɛi komɛi baashe gbeyei akɛ abaakpoo amɛ ni akwɛŋ amɛ kɛji akɛ amɛbɔi gbɔjɔmɔ yɛ gbɔlɛ hewɔ. David kpa Nyɔŋmɔ fai akɛ: “Kaashɛ́ mi ofɔ̃ yɛ migbɔlɛ be lɛŋ; kɛ́ mihewalɛ tã lɛ, kaakwa mi!” (Lala 71:9) Mɛni haa esoroɔ mɔ ni hewalɛ miitã yɛ egbɔlɛ beaŋ lɛ yɛ mɔ ni miishwere yɛ egbɔlɛ beaŋ he lɛ? Ní wɔɔfee nibii ni ja taakɛ Nyɔŋmɔ tsɔɔ lɛ baaha wɔshwere moŋ fe nɔ ni wɔhewalɛ aaatã. Lalatsɛ lɛ lá akɛ: “Jalɔ lɛ aaafrɔke tamɔ tɛŋ; eeeda tamɔ Lebanon tseneduru.”—Lala 92:13.

Bei pii lɛ, mɛi ni kɛ amɛwala be fɛɛ sɔmɔɔ Nyɔŋmɔ yɛ anɔkwayeli mli lɛ yaa nɔ amɛwoɔ yibii yɛ amɛgbɔlɛ beaŋ. Yɛ gbɛ ko nɔ lɛ, nibii pii ni amɛfee yɛ amɛshihilɛ mli kɛha amɛ kɛ mɛi krokomɛi asɛɛnamɔ lɛ ewo yibii kpakpai, tamɔ dumɔwui ni edara ni eshɛ amɛkpamɔ. (Galatabii 6:7-10; Kolosebii 1:10) Eji anɔkwale akɛ bei pii lɛ, mɛi ni fiteɔ amɛshihilɛ kɛtsɔ pɛsɛmkunya nibii asɛɛdii nɔ, ní no haa amɛkpooɔ Nyɔŋmɔ gbɛ̀i anɔ nyiɛmɔ lɛ náaa he sɛɛ tsɔ̃ yɛ be mli ni amɛgbɔlɔɔ lɛ.

Asaa ama jalɛnifeemɔi anɔ mi yɛ Abɛi awolo ni yɔɔ Biblia lɛ mli lɛ mli ákɛ nɔ ni haa mɔ hiɛ baa nyam yɛ gbɔlɛ beaŋ. Wɔkaneɔ yɛ nakai wolo lɛ mli akɛ: “Waŋ lɛ, anunyam akekere ni, kɛ́ aná lɛ yɛ jalɛ gbɛ nɔ lɛ.” (Abɛi 16:31) Hɛɛ, jalɛ nii ni mɔ feɔ lɛ jieɔ lɛ kpo akɛ nakai mɔ lɛ yɛ sui kpakpai. Afii pii ni mɔ kɛ diɔ jalɛ gbɛ sɛɛ lɛ haa mɛi náa bulɛ amɛhaa lɛ. (3 Mose 19:32) Kɛji akɛ mɔ ko ni egbɔ ní eje waŋ lɛ wieɔ yɛ nilee mli, ni ejieɔ jeŋba kpakpa kpo lɛ, mɛi kɛ woo haa lɛ.—Hiob 12:12.

Yehowa náa jalɛ shihilɛ gbɛ ni akɛtsuɔ nii yɛ esɔɔmɔ mli lɛ he miishɛɛ waa. Ŋmalɛi lɛ kɛɔ akɛ: “Ni kɛyashi gbɔlɛ mli lɛ, mi [Yehowa] nɔŋŋ ni, ni kɛyashi waŋjee mli hu mi nɔŋŋ matere: mi mifee, ni mi nɔŋŋ mahiɛ, mi nɔŋŋ matere, ni majie.” (Yesaia 46:4) Kwɛ miishɛɛ sane ni eji akɛ wɔɔle akɛ  wɔŋwɛi Tsɛ ni yɔɔ suɔmɔ lɛ ewo enɔkwa tsuji lɛ ashi akɛ ebaakwɛ amɛ ni ebaaye ebua amɛ yɛ amɛgbɔlɛ beaŋ!—Lala 48:15.

Akɛni Yehowa náa anɔkwayeli mli ni ajɛɔ akɛ shihilɛ tsuɔ nii yɛ esɔɔmɔ mli lɛ he miishɛɛ waa hewɔ lɛ, ani esaaa akɛ no nɔŋŋ aha mɛi krokomɛi ajie bulɛ kpo amɛha mɛi ni feɔ nakai lɛ? Kɛ wɔsusu bɔ ni Yehowa buɔ mɛi ni edara lɛ ehaa lɛ he lɛ, ehaa wɔbuɔ nanemɛi heyelilɔi ni edara ni yɔɔ wɔteŋ lɛ akɛ mɛi ni he yɔɔ sɛɛnamɔ. (1 Timoteo 5:1, 2) Belɛ, nyɛhaa wɔtaoa gbɛ̀i kpakpai anɔ ni wɔɔtsɔ wɔjie Kristofoi asuɔmɔ kpo wɔtsɔɔ amɛ kɛtsɔ amɛhiamɔ nii ahe nii ni wɔɔtsu lɛ nɔ.

Jalɛ Gbɛ lɛ nɔ Nyiɛmɔ yɛ Mɔ Gbɔlɛ Beaŋ

Salomo maa nɔ mi kɛhaa wɔ akɛ: “Wala yɔɔ jalɛ gbɛ lɛ nɔ.” (Abɛi 12:28) Mɔ afii ni etee hiɛ etsĩii enaa kɛjɛɛɛ gbɛ nɛɛ nɔ nyiɛmɔ yɛ egbɔlɛ beaŋ. Ákɛ nɔkwɛmɔnɔ lɛ, nuumo ko ni eye afii 99 ni yɔɔ Moldova lɛ kɛ eblahiiaŋ afii lɛ tsu nii ni ekɛha Komunistbii asusumɔi shwere. Epupuuɔ ehe akɛ lɛ diɛŋtsɛ ekɛ Komunist hiɛnyiɛlɔi ni ehe gbɛi waa tamɔ V. I. Lenin egba saji srɔtoi pɛŋ. Shi kɛlɛ, beni Komunist nɔyeli lɛ gbee shi lɛ, nɛkɛ nuumo nɛɛ shihilɛ bafee basaa. Shi, beni Yehowa Odasefoi tsɔɔ lɛ akɛ Nyɔŋmɔ Maŋtsɛyeli lɛ pɛ ji nɔ ni baanyɛ atsu adesai anaagbai lɛ ahe nii diɛŋtsɛ lɛ, ekpɛlɛ Biblia mli anɔkwale lɛ nɔ, ni ebatsɔ mɔ ko ni kɛ hiɛdɔɔ kaseɔ Ŋmalɛi lɛ. Mɔbɔ sane ji akɛ, gbele eyaŋmɛɛɛ lɛ gbɛ ni ebatsɔ Yehowa tsuji ni ejɔɔ amɛhe nɔ lɛ ateŋ mɔ kome.

Beni yoomo ko ni eye afii 81 ni yɔɔ Hungary lɛ kaseɔ Nyɔŋmɔ jeŋba he taomɔ nii lɛ, eyɔse akɛ ehe miihia ni ekɛ nuu ko ni ekɛ lɛ yɔɔ afii babaoo lɛ abote gbalashihilɛ mli yɛ mla naa. Yoomo lɛ kɛ ekãa gbála esusumɔ ni damɔ Biblia lɛ nɔ lɛ mli etsɔɔ nuu nɛɛ ni ekɛ lɛ yɔɔ lɛ. Enaa kpɛ ehe kɛ miishɛɛ beni nuu lɛ kpɛlɛ nɔ akɛ ekɛ lɛ baabote gbalashihilɛ mli yɛ mla naa lɛ. Beni amɛkɛ amɛgbalashihilɛ lɛ yawo mla shishi lɛ, yoomo lɛ tee ehiɛ oyayaayai yɛ mumɔŋ. Yɛ nyɔji kpaanyɔ mli beni akɛ lɛ eje Biblia mli nikasemɔ shishi sɛɛ lɛ, ebatsɔ shiɛlɔ ni abaptisiko lɛ, ni no sɛɛ etsɛɛɛ nɔŋŋ ni abaptisi lɛ. Kwɛ bɔ ni eji anɔkwale akɛ jalɛnifeemɔi baanyɛ ekɛ anunyam diɛŋtsɛ abaha mɛi ni edara lɛ!

Hɛɛ, Kristofoi anɔkwafoi ni edara lɛ baanyɛ aná nɔmimaa akɛ Nyɔŋmɔ yɛ amɛhe miishɛɛ. Yehowa kwaŋ mɛi ni yeɔ lɛ anɔkwa lɛ. Nɔ ni tamɔɔɔ nakai lɛ, ewo shi akɛ ebaabu amɛhe, ebaaye ebua amɛ, ni ebaakwɛ amɛ kɛyashi amɛgbɔlɛ beaŋ tete. Ni amɛyeɔ lalatsɛ lɛ wiemɔi ni ji ‘Miyelikɛbuamɔ jɛɔ Yehowa ŋɔɔ’ lɛ he odase akɛ eji anɔkwale.—Lala 121:2.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 9]

“Waŋ lɛ, anunyam akekere ni, kɛ́ aná lɛ yɛ jalɛ gbɛ nɔ lɛ.”—ABƐI 16:31

[Akrabatsa ni yɔɔ baafa 8]

YEHOWA KWƐƆ ETSUJI NI EDARA LƐ

“Tee shi yɛ yiteŋwajiatsɛ hiɛ, ni owo nuumo hiɛ nyam.”—3 Mose 19:32.

“Ni kɛyashi gbɔlɛ mli lɛ, mi nɔŋŋ ni, ni kɛyashi waŋjee mli hu mi nɔŋŋ matere: mi mifee, ni mi nɔŋŋ mahiɛ, mi nɔŋŋ matere, ni majie.”—Yesaia 46:4.