“Mɛni Ji Nɔ̃ Diɛŋtsɛ ni Ha Oye Omanye Lɛ?”

MURIEL ni hiɛ bii etɛ lɛ naa kpɛ ehe beni gbɔ ko ni hiɛ efã bi lɛ sane nɛɛ yɛ niyelihe ko lɛ. Muriel kɛ ebii lɛ yana datrɛfoi yɛ be ni amɛto lɛ lɛ naa, shi eshiii amɛŋɔɔ mra. Amɛbaaya Kristofoi akpee, shi be faaa ni no baaha amɛnyɛ amɛya shia ni amɛyaye amɛgbɛkɛnaashi niyenii dani amɛya. No hewɔ lɛ, ekɛ gbekɛbii lɛ tee niyelihe ko ni bɛŋkɛ koni amɛná nɔ ko amɛye.

Beni amɛheɔ amɛgbe amɛniyeli lɛ naa lɛ, nuu ko tsi bɛŋkɛ Muriel ni ekɛɛ: “Kɛjɛ beni nyɛba biɛ beebe ni mibɔi nyɛ kwɛmɔ. Ni miyɔse srɔtofeemɔ agbo yɛ obii lɛ kɛ gbekɛbii ni mifɔɔ amɛkɛkpee lɛ ateŋ. Ebiɔ ni obanaa bɔ ni gbekɛbii lɛ feɔ okpɔlɔi kɛ sɛii lɛ amɛhaa. Amɛkɛ amɛnaji shwieɔ okpɔlɔi lɛ anɔ. Amɛtsirɛɔ sɛii lɛ kɛjɛɔ amɛmaahei lɛ. Shi obii lɛ ahe jɔ ni amɛbaa amɛjeŋ jogbaŋŋ. Mɛni ji nɔ diɛŋtsɛ ni ha oye omanye lɛ?”

Muriel ha hetoo akɛ: “Mi kɛ miwu kɛ wɔbii lɛ kaseɔ Biblia lɛ daa, ni wɔbɔɔ mɔdɛŋ ní wɔkɛ nɔ ni wɔkaseɔ lɛ atsu nii yɛ wɔshihilɛi amli. Yehowa Odasefoi ji wɔ.” Kɛkɛ ni nuu lɛ kɛɛ akɛ: “Yudanyo ji mi, ni mifata mɛi ni je Yudafoi Ashishibulemɔ lɛ mli lɛ ahe. Mikaiɔ akɛ mina Yehowa Odasefoi ni aawa amɛyi yɛ Germany. Yɛ fɛɛ mli po lɛ, amɛjie amɛhe kpo akɛ mɛi ni yɔɔ srɔto. Minya obii lɛ ajeŋba he waa diɛŋtsɛ. Esa akɛ matao nyɛjamɔ lɛ mli jogbaŋŋ.”

Biblia lɛ ji gbɛtsɔɔmɔ wolo ni nɔ bɛ kɛha gbekɛbii atsɔsemɔ. Yehowa Odasefoi yɛ he miishɛɛ waa akɛ amɛaaye amɛbua mɛi krokomɛi ni amɛná gbɛtsɔɔmɔi ni yɔɔ Ŋmalɛi lɛ amli lɛ ahe sɛɛ. Wɔkɛ miishɛɛ miibi koni okpɛlɛ hegbɛ ni akɛhãa bo ni nyiɛ sɛɛ nɛɛ nɔ.