Gbɛfãa Kɛmiiya Saba

BE KO ni eho lɛ, Saba ŋshɔkpɔ ni Dutchbii yeɔ nɔ lɛ ji he ko ni julɔi ni kɛ lɛji nyiɛɔ Caribbean Ŋshɔ lɛ hiɛ kɛtaoɔ lɛji krokomɛi koni amɛju amɛmli nibii lɛ téeɔ amɛhe yɛ. Ŋmɛnɛ, nɛkɛ ŋshɔkpɔ bibioo nɛɛ ni kɛ Puerto Rico bokagbɛ jɛkɛmɔ feɔ kilomitai 240 lɛ ji maŋ ko ni mɛi aaafee 1,600 yɔɔ mli, ni Yehowa Odasefoi 5 fata he. Shi, nɛkɛ sɔɔlɔi ni yɔɔ ekãa nɛɛ miitao nɔ ko ni jara wa kwraa fe haanii. Amɛkɛ mɔdɛŋbɔɔ miitao “mɛi abɔ ní ajie ato naanɔ wala lɛ” asɛɛ gbɛ.—Bɔfoi lɛ Asaji 13:48.

Maŋtsɛyeli lɛ he sanekpakpa lɛ yashɛ ŋshɔkpɔ nɛɛ nɔ klɛŋklɛŋ kwraa yɛ June 22, afi 1952 beni Yehowa Odasefoi alɛlɛ ni atsɛ́ɔ lɛ Sibia ni dalɛ ji mitai 18 lɛ yakpeleke yɛ Saba ŋshɔ lɛ naa lɛ. (Mateo 24:14) Gust Maki kɛ Stanley Carter ni ji maŋsɛɛ sanekpakpa shiɛlɔi lɛ kwɔ The Ladder, ni ji atrakpoi ni fe 500 ni akɛ tɛi fee lɛ kɛtee The Bottom akrowa ni ji Saba ŋshɔkpɔ lɛ maŋtiase lɛ mli. * Gbɛ fintɔŋŋ nɛɛ ehi shi afii ohai abɔ akɛ gbɛ pɛ ni atsɔɔ nɔ kɛyaa ŋshɔkpɔ nɛɛ nɔ.

Kristofoi ashiɛmɔ nitsumɔ ni atsu yɛ Saba lɛ he amaniɛbɔɔ ní akala klɛŋklɛŋ kwraa lɛ je kpo yɛ afi 1966 Yearbook of Jehovah’s Witnesses wolo lɛ mli. Taakɛ nakai amaniɛbɔɔ lɛ tsɔɔ lɛ, no mli lɛ Odasefonyo kome pɛ yɔɔ ŋshɔkpɔ lɛ nɔ. Sɛɛ mli lɛ, weku ko ni jɛ Canada bahi jɛi, ni amɛkɛ afii pii shiɛ sanekpakpa lɛ yɛ jɛmɛ. Nyɛsɛɛ nɛɛ, Russel kɛ Kathy ni ji gbalashihilɛ mli hefatalɔi ni jɛ United States ní amɛba nitsumɔ mli hejɔɔmɔ lɛ tee Saba ni amɛyashiɛ yɛ jɛmɛ. Bo toi beni amɛgbaa wɔ jɛmɛ sane lɛ.

Saba Ŋshɔkpɔ lɛ Saramɔ

Mi kɛ miŋa kɛ kɔɔyɔŋ lɛlɛ yashɛ jɛmɛ, ni wɔyato Ronald, ní lɛ pɛ ji Odasefonyo ni yɔɔ ŋshɔkpɔ nɛɛ nɔ lɛ yɛ afi 1990 afii lɛ amli. No mli lɛ, Ronald miimɛ wɔ yɛ kɔɔyɔŋ lɛjiadaamɔhe  lɛ. Akɛni afeee ŋmɔji agboi yɛ ŋshɔkpɔ lɛ nɔ hewɔ lɛ, enya ŋmɔshi nibii fioo ni wɔkɛwo adeka bibioo ko mli kɛbake lɛ lɛ he waa diɛŋtsɛ. No sɛɛ lɛ, wɔbote tsɔne bibioo ko mli ni wɔlɔgɔ shi blɛoo kɛkwɔ Scenery Gɔŋ lɛ kɛtee gɔŋ nɛɛ ni tsutsu ko lɛ efɛ́ɔ kɛ lasu lɛ yiteŋ.

Wɔwa wɔdamɔ shi fioo yɛ Hell’s Gate akrowa lɛ mli, ni Ronald yakwɛ maŋ lɛ adafitswaa tao lɛ nɔ kɛji ákɛ akɛ wolo ni akɛmiifɔ̃ mɛi anine kɛmiiba maŋshiɛmɔ ni abaaha Hɔgbaa lɛ eyakpɛtɛ nɔ lo. Wɔná miishɛɛ waa beni wɔna akɛ akɛkpɛtɛ nɔ lɛ. Ebote tsɔne lɛ mli ni wɔtsa wɔgbɛfaa lɛ nɔ kɛtee Windwardside, ni ji ŋshɔkpɔ lɛ nɔ akrowa ni da fe fɛɛ lɛ mli. Taakɛ blɔfo gbɛi nɛɛ shishinumɔ tsɔɔ lɛ, blema akrowa fɛfɛo nɛɛ yɛ ŋshɔkpɔ lɛ nɔ he ni ahum tswaa kɛjɛɔ lɛ, ni he ni eyɔɔ lɛ kwɔ fe ŋshɔ hiɛ kwɔlɛ aaafee mitai 400. Beni eshwɛ fioo ni wɔbaashɛ Ronald shia lɛ, wɔna niŋmaa fɛfɛo ko yɛ ablanaa lɛ nɔ ni miitsɔɔ akɛ jɛmɛ ji he ni Yehowa Odasefoi a-Maŋtsɛyeli Asa lɛ yɔɔ.

Beni wɔyeɔ nii shwane lɛ, mibi nɔ ni ha wɔba Saba saramɔ lɛ he sane ko akɛ, “Te fee tɛŋŋ ni obatsɔ Maŋtsɛyeli shiɛlɔ yɛ Saba?”

Ronald ha hetoo akɛ: “Beni agbe Yehowa Odasefoi anitsumɔhe nine ni yɔɔ Puerto Rico lɛ maa naa yɛ afi 1993 mli lɛ, mi kɛ miŋa fɛɛ baná he miishɛɛ akɛ wɔɔkã he wɔhi maŋsɛɛ sɔɔmɔ nitsumɔ lɛ mli. Wɔkɛ nyɛmi nuu ko kɛ eŋa, ni amɛji gbɛgbalɔi lɛ eba Saba dã, ni nakai beaŋ wɔná wɔle akɛ, Odasefonyo ko kwraa bɛ maŋbii 1,400 ni yɔɔ ŋshɔkpɔ lɛ nɔ yɛ nakai beaŋ lɛ ateŋ. Enɛ hewɔ lɛ, wɔkɛ Puerto Rico Nitsumɔhe Nine lɛ Ajinafoi Akuu lɛ susu wɔ biɛ baa he.

“Nibii tee nɔ taakɛ wɔkpaa gbɛ lɛ, ni yɛ naagbee lɛ, akpɛlɛ nɔ akɛ wɔfã kɛba. Mɔbɔ sane ji akɛ, no sɛɛ afii enyɔ lɛ, hela gbonyo ko bamɔ miŋa, ni no ha wɔku wɔsɛɛ kɛtee California. Yɛ egbele sɛɛ lɛ, miku misɛɛ kɛba Saba. Nɔ hewɔ ji akɛ, misumɔɔɔ ni maje nɔ ko shishi ni ehiii mi naagbee.”

Shia-kɛ-Shia Odaseyeli yɛ Saba

Asa ni yɔɔ Ronald tsũ ni eye afii 100 lɛ mli lɛ nɔŋŋ ji nɔ ni akɛtsuɔ nii akɛ Maŋtsɛyeli Asa. * Beni wɔyeɔ leebi niyenii dani wɔya shiɛmɔ lɛ, nugbɔ bɔi nɛmɔ ni eha kpata ni ahako yiteŋ lɛ shishi fɛɛ fɔ. Yɛ niyeli lɛ sɛɛ beni nugbɔ lɛ ekpa lɛ, wɔje shia-kɛ-shia odaseyeli shishi yɛ The Bottom akrowa lɛ mli. Shia fɛɛ shia mli ni wɔɔbote lɛ, Ronald tsɛ́ɔ shiatsɛ lɛ kɛ egbɛi, ni eŋaa lɛ. Wɔkɛ ŋshɔkpɔ lɛ nɔ adafitswaa mli sane ko ni ba etsɛko jeɔ sanegbaa shishi. Amɛteaŋ mɛi pii le Ronald kɛ shiɛmɔ nitsumɔ ni etsuɔ lɛ he sane momo, ni amɛsumɔɔ Biblia kasemɔ woji lɛ waa.

Ákɛ oooŋmala mɛi ni jieɔ miishɛɛ kpo yɛ Maŋtsɛyeli shɛɛ sane lɛ he lɛ ahe saji oshwie shi yɛ wolo nɔ lɛ baanyɛ afee nɔ ko ni efeemɔ wa waa kɛji oleee akrowa lɛ mli bii lɛ. Mɛni hewɔ? Ronald tsɔɔ nɔ hewɔ lɛ mli akɛ: “Mla lɛ biɔ ni apɛnte shia fɛɛ shia kɛ su kometoo lɛ nɔŋŋ.” Miyɔse anɔkwale ni enɛ ji lɛ beni mikwɛ mihe kɛkpe ni mina akɛ, asha shiai fɛɛ ni yɔɔ Saba lɛ ahe eyɛŋ kɛ tsui lɛ ayiteŋ hu etsuru lɛ.

Kɛ́ wɔgbe Biblia mli sanegbaa lɛ naa lɛ, wɔfɔ̃ɔ shiatsɛ lɛ nine ni ebabo Biblia mli maŋshiɛmɔ ni abaaha yɛ Hɔgbaa yɛ Maŋtsɛyeli Asa lɛ nɔ lɛ toi. Kɛji Ronald efãko gbɛ lɛ, ehaa maŋshiɛmɔ daa otsi. Amrɔ nɛɛ, afeɔ Biblia mli nikasemɔi 17 yɛ Saba. Mɛi 20 ba afi 2004 Kristo gbele lɛ Kaimɔ lɛ shishi. Eyɛ mli akɛ etamɔ nɔ ni yibɔ nɛɛ faaa kwraa moŋ, shi efeɔ maŋbii fɛɛ ni yɔɔ Saba lɛ ayifalɛ 100 mlijaa 1.

Eji anɔkwale akɛ, Yehowa Odasefoi miibɔ mɔdɛŋ waa koni amɛkɛ Nyɔŋmɔ shɛɛ sane ni hereɔ mɔ yiwala lɛ ayaha mɛi babaoo bɔ ni amɛaanyɛ. Yehowa Odasefoi kɛ anɔkwayeli miitsu nitsumɔ ákɛ ‘afee jeŋmaji fɛɛ kaselɔi’ lɛ he nii yɛ ŋshɔkpɔi bibii tamɔ Saba kɛ yɛ shikpɔji wuji ni maji babaoo yɔɔ nɔ lɛ fɛɛ anɔ.—Mateo 28:19.

Dɔlɛ sane ji akɛ, etsɛɛɛ kɛkɛ ni wɔkɛ wɔ saramɔ lɛ ba naagbee. Be mli ni wɔboteɔ wɔ kɔɔyɔŋ lɛlɛ lɛ mli lɛ, wɔfɔ̃ mɛi anine. Wɔhiɛ kpaŋ gbɛ ni wɔfã kɛtee Saba ŋshɔkpɔ lɛ nɔ, kɛ be ni wɔye be mli ni wɔfãa gbɛ kɛyaa The Bottom akrowa lɛ mli lɛ anɔ kɔkɔɔkɔ!

[Shishigbɛ niŋmai]

[Shikpɔŋ he mfonirii babaoo ni yɔɔ baafa 10]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

PUERTO RICO

[He ni Mfoniri ni yɔɔ baafa 10 lɛ Jɛ]

Faa kɛ enaa tsei: www.sabatourism.com