Naakpɛɛ Nifeemɔi ni Okɛ Ohiŋmɛi Ena Pɛŋ!

WIEMƆ ni ji “naakpɛɛ nii” lɛ hiɛ shishinumɔ kroko ni ji “nifeemɔ ko, nɔ ko loo nitsumɔ ko ni efɔɔɔ kaa loo esoro lɛ kwraa yɛ ekrokomɛi ahe.” Wɔ fɛɛ wɔna naakpɛɛ nii ni tamɔ enɛ ní Nyɔŋmɔ nine bɛ mli lɛ eko dã.

Akɛni adesai anilee yɛ adebɔɔ he mlai ahe lɛ etee hiɛ waa hewɔ lɛ, amɛnyɛ amɛfee nibii ni be ko ni eho lɛ asusuɔ akɛ anyɛŋ afee kɔkɔɔkɔ lɛ. Ákɛ nɔkwɛmɔnɔ lɛ, ekolɛ mɛi babaoo ni hi shi afii 100 ni eho lɛ baasusu akɛ, nibii ni kɔmpiutai, tɛlivishiŋ, nilee ni aná yɛ ŋwɛiniiaŋ yaa he, kɛ ŋmɛnɛŋmɛnɛ beaŋ hiɛyaai krokomɛi ni aná lɛ eha anyɛɔ afeɔ bianɛ yɛ gbɛ ni yɔɔ mlɛo nɔ lɛ, nyɛŋ aba shihilɛ mli kɔkɔɔkɔ.

 Akɛni jeŋ nilelɔi eyɔse akɛ nilee ni amɛná yɛ Nyɔŋmɔ adebɔɔ nibii ni yɔɔ naakpɛɛ lɛ ahe lɛ faaa hewɔ lɛ, amɛteŋ mɛi pii kpɛlɛɔ nɔ akɛ amɛnyɛŋ amɛkɛɛ kɛ nɔmimaa akɛ nɔ ko nyɛŋ aba shihilɛ mli. Kɛ́ eshi aahu lɛ, nɔ pɛ ni amɛkɛɔ kɛkɛ ji akɛ enyɛŋ efee anɔkwale. Amɛtsɔɔ wiemɔi nɛɛ anɔ amɛhaa aleɔ akɛ jeŋ nilee mli naakpɛɛ nibii komɛi yɛ lolo ni baaba wɔsɛɛ.

Kɛ́ wɔɔwie he yɛ klɛŋklɛŋ shishinumɔ ni “naakpɛɛ nii” hiɛ, ni ji nifeemɔi ni “abaanyɛ akɛɛ akɛ ejɛ hewalɛ ni nɔ kwɔ fe adesai anɔ̃ ŋɔɔ” lɛ naa po lɛ, wɔbaanyɛ wɔkɛɛ akɛ wɔteŋ mɔ fɛɛ mɔ ena naakpɛɛ nii komɛi dã. Ákɛ nɔkwɛmɔnɔ lɛ, wɔnaa hulu, nyɔŋtsere, kɛ ŋulamii—ní fɛɛ ji nibii ni Bɔlɔ lɛ diɛŋtsɛ ni ji “hewalɛ ni nɔ kwɔ fe adesai anɔ̃” lɛ fee. Yɛ enɛ sɛɛ lɛ, namɔ baanyɛ atsɔɔ bɔ ni adesa gbɔmɔtso lɛ tsuɔ nii ehaa, bɔ ni aŋsɔ lɛ tsuɔ nii ehaa, loo bɔ ni feɔ ni lá kuli daa yɛ fɔmɔ kotoku mli kɛbatsɔɔ abifao lɛ amli fitsofitso? Wolo ni ji The Body Machine lɛ tsɔɔ mli akɛ: “Adesa gbɔmɔtso ni aŋsɔ kɛ fãi srɔtoi ji nɔ ni kudɔɔ lɛ lɛ, ji tsɔne ko ni yɔɔ naakpɛɛ ni nuɔ nii ahe, ní lɛ diɛŋtsɛ esáa ehenii ni fiteɔ lɛ, ni eji kɔmpiuta ko ni nyɛɔ ekaiɔ nii shii abɔ—no ji akɛ eji bɔɔ nɔ̃ ko ni yɔɔ gbeyei ni haa mɔ naa kpɛɔ ehe waa.” Lɛɛlɛŋ, Nyɔŋmɔ ni bɔ “adesa gbɔmɔtso” lɛ fee naakpɛɛ nii ni haa wɔnaa kpɛɔ wɔhe kɛbashi bianɛ. Naakpɛɛ nifeemɔi krokomɛi hu yɛ lolo ni okɛ ohiŋmɛi ena pɛŋ, shi ekolɛ obuuu amɛ akɛ nakai amɛji.

Ani Abaanyɛ Ana Wolo ko akɛ Eji Naakpɛɛ Nii?

Wolo ko bɛ ni aja babaoo tamɔ Biblia lɛ. Ani onaa Biblia lɛ akɛ eji naakpɛɛ nii? Ani wɔbaanyɛ wɔkɛɛ akɛ Biblia lɛ jɛ “hewalɛ ni nɔ kwɔ fe adesai anɔ̃ ŋɔɔ”? Eji anɔkwale akɛ, adesai ni ŋmala Biblia lɛ, shi amɛkɛɛɛ akɛ amɛ diɛŋtsɛ amɛsusumɔi amɛŋmala lɛ, shi moŋ Nyɔŋmɔ nɔ̃. (2 Samuel 23:1, 2; 2 Petro 1:20, 21) Susumɔ he okwɛ. Mɛi 40 ní ŋmala lɛ kɛ be jɛkɛmɔ ni fe afii 1,600 hi shi. Amɛjɛ shihilɛi srɔtoi amli, amɛteŋ mɛikomɛi ji tookwɛlɔi, asraafoi, wolɛi, maŋsɔɔlɔi, datrɛfoi, osɔfoi kɛ maŋtsɛmɛi. Ni kɛlɛ, saji ni amɛŋmala ni haa mɔ hiɛnɔkamɔ, ní eji anɔkwale ní eja hu lɛ kɛ amɛhe kpãa gbee.

Biblia lɛ ni Yehowa Odasefoi ekase lɛ jogbaŋŋ lɛ haa amɛkpɛlɛɔ nɔ taakɛ bɔfo Paulo ŋma yɛ he lɛ akɛ, eji “Nyɔŋmɔ wiemɔ, taakɛ bɔ ni eji hu lɛɛlɛŋ lɛ, shi jeee akɛ gbɔmɛi awiemɔ ko.” (1 Tesalonikabii 2:13) Amɛwoji lɛ egbála bɔ ni Biblia mli saji ni akɛɛ amɛteɔ shi woɔ amɛhe lɛ kɛ Biblia mli sane muu lɛ fɛɛ kpãa gbee ehaa lɛ mli yɛ afii ni eho lɛ amli. Emli saji ni kɛ amɛhe kpãa gbee lɛ po ji odaseyeli ni tsɔɔ akɛ Nyɔŋmɔ ji mɔ ni ŋma. *

Wolo ko bɛ ni akɛ hiɛdɔɔ ebɔ mɔdɛŋ waa koni afite lɛ tamɔ Biblia lɛ. Fɛɛ sɛɛ lɛ, anyɛko akpãta Biblia lɛ hiɛ, ni kɛbashi amrɔ nɛɛ, ayɛ Biblia muu lɛ fɛɛ loo kɛ́ hooo kwraa lɛ emli fãi komɛi yɛ wiemɔi fe 2,000 mli. Gbɛ̀i anɔ ni atsɔ abaa wolo lɛ diɛŋtsɛ yi, kɛ bɔ ni akwɛ ni akɛ saji krokomɛi akafutu mli lɛ tsɔɔ akɛ Nyɔŋmɔ nine yɛ mli. Biblia lɛ ji naakpɛɛ nii lɛɛlɛŋ!

Naakpɛɛ Nii ni ‘Hiɛ Kã ni Yɔɔ Hewalɛ’

Naakpɛɛ nifeemɔi—naakpɛɛ tsamɔi kɛ gbohiiashitee—ni tee nɔ yɛ bei ni eho lɛ amli lɛ bɛ dɔŋŋ. Shi wɔyɛ yiŋtoi ni wɔɔdamɔ nɔ wɔná hekɛnɔfɔɔ akɛ abaasaa atsu naakpɛɛ nitsumɔi nɛɛ ekoŋŋ yɛ gbɛ ni da nɔ yɛ Nyɔŋmɔ jeŋ hee ni baa lɛ mli. Nifeemɔi nɛɛ kɛ naanɔ hejɔlɛ ni wɔnyɛŋ wɔnu shishi amrɔ nɛɛ baaba.

 Amrɔ nɛɛ po lɛ, abaanyɛ awie bɔ ni Biblia lɛ ni wɔnine shɛ nɔ yɛ naakpɛɛ gbɛ nɔ lɛ haa mɛi tsakeɔ amɛsubaŋi gbohii lɛ ahe akɛ eji naakpɛɛ nii. (Kwɛmɔ enɛ he nɔkwɛmɔnɔ yɛ akrabatsa ni ji “Hewalɛ ni Nyɔŋmɔ Wiemɔ lɛ Yɔɔ,” ni yɔɔ baafa 8 lɛ mli.) Hebribii 4:12 lɛ kɛɔ akɛ: “Nyɔŋmɔ wiemɔ hiɛ kã ni eyɛ hewalɛ ni enaa ba fe klante kɛ enaa ŋta fɛɛ, ni egbuɔ kɛboteɔ mli kɛyashi beyinɔ ni egbálaa susuma kɛ mumɔ lɛ kɛ talɔi kɛ wuiaŋfɔi lɛ amli, ni eji tsuiiaŋ susumɔi kɛ jwɛŋmɔi lɛ akojolɔ.” Hɛɛ, Biblia lɛ ji nɔ titri ni ye ebua mɛi fe akpekpei ekpaa ni yɔɔ lɛŋ fɛɛ lɛ ni amɛfee tsakemɔi yɛ amɛshihilɛi amli, ni enɛ eha amɛshihilɛi ebafee nɔ ni shishinumɔ yɔɔ he, ni eha amɛná wɔsɛɛ be he hiɛnɔkamɔ ni yɔɔ naakpɛɛ.

Mɛni hewɔ oŋmɛɛɛ Biblia lɛ gbɛ ni efee naakpɛɛ nii yɛ oshihilɛ mli?

[Shishigbɛ niŋmaa]

[Akrabatsa/Mfoniri ni yɔɔ baafa 7]

Ani Egbo Momo Loo Ehiɛ Kã Lolo?

Taakɛ Yohane 19:33, 34 tsɔɔ lɛ, Yesu egbo momo beni “asraafoi lɛ ateŋ mɔ kome kɛ akplɔ tsu eŋmawuiaŋ, ni amrɔ lɛ lá kɛ nu jɛ mli ho” lɛ. Shi kɛlɛ, yɛ Biblia shishitsɔɔmɔi komɛi amli lɛ, Mateo 27:49, 50 tsɔɔ akɛ Yesu hiɛ kã lolo beni nifeemɔ nɛɛ tee nɔ lɛ. Mɛni kɛ srɔtofeemɔ nɛɛ ba?

Mose Mla lɛ eŋmɛɛɛ gbɛ ni ojotswalɔ ni asɛŋ lɛ lɛ gbonyo akã he akpɛtɛ tso ni ma shi jaŋŋ nɔ kɛyashi jetsɛremɔ. (5 Mose 21:22, 23) Enɛ hewɔ lɛ, yɛ Yesu gbii lɛ amli lɛ, kɛ́ asɛŋ ojotswalɔ ko ní kɛyashi gbɛkɛ ní egboko lolo lɛ, afɔɔ enaji kuumɔ koni no aha egbo oya. Enaji ni akumɔɔ lɛ haaa enyɛ emli ekpã dɔŋŋ bɔ ni baaha enyɛ emu jogbaŋŋ. Ojotswalɔi ni asɛŋ amɛ yɛ Yesu masɛi lɛ anaji ni asraafoi lɛ kumɔ ní amɛshi Yesu nɔ̃ lɛ tsɔɔ akɛ amɛsusu akɛ egbo momo. Eeenyɛ efee akɛ asraafonyo lɛ kɛ akplɔ tsu Yesu ŋmawuiaŋ bɔni afee ni amɛkɛna nɔmimaa akɛ egbo, koni ehiɛ akatsɛ̃ sɛɛ mli ni ashiɛ enɛ akɛ gbohiiashitee.

Nɔ ni aŋma yɛ Mateo 27:49, 50 (NW) lɛ to nibii ni tsara nɔ ba lɛ anaa yɛ gbɛ kroko kwraa nɔ. Jɛmɛ kaneɔ akɛ: “Ni mɔ kroko hu kɔ akplɔ ni ekɛtsu eŋmawuiaŋ, ni amrɔ lɛ lá kɛ nu jɛ mli ho. Shi Yesu bo ekoŋŋ kɛ gbee ni wa, ni eŋɔ emumɔ lɛ ehã.” Anaaa wiemɔi ni akpá lɛ afã lɛ yɛ blema Bibliai ni akɛ niji ŋmala lɛ eko eko mli. Woloŋlelɔi pii heɔ amɛyeɔ akɛ, ajie wiemɔi nɛɛ kɛjɛ Yohane Sanekpakpa lɛ mli akɛbafata he yɛ sɛɛ mli, shi akɛwooo gbɛhe ni sa lɛ. Enɛ hewɔ ni Biblia shishitsɔɔmɔi babaoo kɛ wiemɔi nɛɛ woɔ akrabatsa okadi [ ] loo ( ) mli, loo amɛkɛ shishigbɛ niŋmaa ko tsɔɔ he ni ejɛ lɛ mli, loo amɛjieɔ kɛjɛɔ mli kwraa lɛ.

Shishijee Hela Biblia ni akɛ niji ŋmala ni Westcott kɛ Hort fee, ní no titri nɔ akwɛ akɛfee New World Translation Biblia lɛ kɛ wiemɔi nɛɛ wo akrabatsa okadii [[ ]] mli. Nakai blema Hela Biblia lɛ tsɔɔ mli akɛ, “abaanyɛ amu sane naa akɛ woloŋmalɔi komɛi ji mɛi ni kɛ wiemɔi nɛɛ bafutu mli.”

No hewɔ lɛ, odaseyelii fɛɛ tsɔɔ akɛ, nɔ ni aŋma yɛ Yohane 19:33, 34 lɛ ji anɔkwale. Yesu egbo momo dani Roma asraafonyo lɛ kɛ akplɔ lɛ tsu lɛ.

 [Akrabatsa/Mfoniri ni yɔɔ baafa 8]

Hewalɛ Ni Nyɔŋmɔ Wiemɔ Lɛ Yɔɔ

Akɛni Detlef ji oblanyo fioo ni jɛ weku ni mli egbala mli hewɔ lɛ, ekɛ ehe yawo tsofai ni akɛtsuɔ nii yɛ gbɛ fɔŋ nɔ, dãatɔɔ kɛ lalai ni naa wa waa atoiboo mli. * Ebatsɔ Germany awuiyelɔi akuu ko mlinyo, ni eyiwalɛ nifeemɔi lɛ ha polisifoi mɔ lɛ.

Yɛ afi 1992 mli lɛ, awuiyelɔi akuu nɛɛ mli bii 60 kɛ rɔk lalɔi akuu ko mli bii 35 kɛ amɛhe wo atswɛrɛ nɔmɔ ni mli wa waa mli yɛ niyelihe ko yɛ Germany kooyi-bokagbɛ. Apila Thomas, ni ji rɔk lalɔi akuu lɛ mlinyo lɛ waa bɔ ni ehiii he nɔ ko feemɔ, ni etsɛɛɛ kɛkɛ ni egbo. Amɔmɔ kui lɛ amli hiɛnyiɛlɔi lɛ ateŋ mɛi babaoo ni Detlef hu fata he, ni yɛ amɛ kojomɔ yɛ saneyelihe ní adafitswaa nitsumɔhei pii tswa he adafi shii abɔ lɛ sɛɛ lɛ, awo amɛ tsuŋ.

Beni ajie Detlef kɛjɛ tsuŋwoo mli sɛɛ etsɛɛɛ kɛkɛ ni Yehowa Odasefoi kɛ lɛ kpe, ni amɛha lɛ wolo bibioo ko. Wolo bibioo lɛ saneyitso ji “Mɛni Hewɔ Shihilɛ Eyi Obɔ Kɛ Naagbai Nɛkɛ?” Detlef yɔse anɔkwale ni wolo nɛɛ mli sane lɛ ji amrɔ nɔŋŋ, kɛkɛ ni ekɛ Yehowa Odasefoi bɔi Biblia lɛ kasemɔ. Enɛ ha eshihilɛgbɛ batsake kwraa. Ebatsɔ Yehowa Odasefonyo ni yɔɔ ekãa kɛjɛ afi 1996.

Siegfried, ni tsutsu ko lɛ eji rɔk lalɔi akuu lɛ mlinyo lɛ naanyo waa ji Thomas, mɔ ni agbe lɛ lɛ; lɛ hu ebatsɔ Odasefonyo yɛ sɛɛ mli, ni amrɔ nɛɛ eji asafoŋ onukpa. Be ko beni Siegfried tee eyaha wiemɔ yɛ asafo ni Detlef yɔɔ mli lɛ mli lɛ (naakpɛɛ sane ji akɛ, Thomas nyɛ hu baa kpeei yɛ jɛi yɛ be komɛi amli), Detlef fɔ̃ Siegfried nine kɛha niyeli. Aaafee afii nyɔŋma ni eho nɛ lɛ, amɛkɛ amɛhe yeee kwrakwra. Shi amrɔ nɛɛ, anaa nyɛmimɛi asuɔmɔ ni yɔɔ amɛteŋ lɛ yɛ faŋŋ mli.

Detlef kɛ Siegfried fɛɛ miikpa be ni amɛkɛaahere Thomas atuu kɛba wala mli ekoŋŋ yɛ shikpɔŋ nɔ paradeiso mli lɛ gbɛ. Detlef wie akɛ: “Enɛ he susumɔ kɛkɛ haa mihiŋmɛiaŋ kpalaa nu. Mishwa mihe waa yɛ nɔ ni mifee lɛ he.” Mɛi enyɔ lɛ fɛɛ ashwelɛ ji ní amɛye amɛbua Thomas yɛ nakai be lɛ mli, taakɛ bɔ ni amrɔ nɛɛ amɛyeɔ amɛbuaa mɛi krokomɛi koni amɛbale Yehowa, ni amɛnya yɛ hiɛnɔkamɔ ni Biblia lɛ kɛhaa lɛ mli lɛ.

Hɛɛ, Nyɔŋmɔ Wiemɔ lɛ yɛ hewalɛ lɛɛlɛŋ!

[Shishigbɛ niŋmaa]

[Mfoniri ni yɔɔ baafa 6]

Adesa gbɔmɔtso lɛ ji bɔɔ nɔ̃ ko ni yɔɔ naakpɛɛ

[He ni Sane lɛ Jɛ]

Anatomy Improved and Illustrated, London, 1723, Bernardino Genga