Jeŋba Kpakpa ‘Wulaa Nyɔŋmɔ Nitsɔɔmɔ Lɛ’
Jeŋba Kpakpa ‘Wulaa Nyɔŋmɔ Nitsɔɔmɔ Lɛ’
OBLAYOO fioo ko ni atsɛɔ lɛ Maria, ni jɛ Kransnoyarsk, yɛ Russia lɛ he esa kɛ lámɔ aahu akɛ etsɔɔlɔ lɛ kɛ lɛ fata skul lalɔi akuu lɛ he. Etsɛɛɛ kɛkɛ ni Maria tee eyana etsɔɔlɔi lɛ ateŋ mɔ kome, ni ekɛ bulɛ gbála mli etsɔɔ lɛ akɛ enyɛŋ elá lalai pɔtɛɛ komɛi. Mɛni hewɔ? Ejaakɛ jamɔ he lalai ni eeelá lɛ teɔ shi ewoɔ hemɔkɛyeli ni eyɔɔ yɛ Biblia lɛ mli lɛ. Enɛ fee tsɔɔlɔ lɛ naakpɛɛ ni ebi akɛ, ‘Mɛɛ tɔmɔ yɔɔ lala ni aláa kɛjieɔ Nyɔŋmɔ yi lɛ he?’
Bɔni afee ni Maria atsɔɔ nɔ hewɔ ni esumɔŋ akɛ elá lala ko ni kɔɔ Triniti Nyɔŋmɔ ko he lɛ, egbele e-Biblia lɛ, ni etsɔɔ mli akɛ Nyɔŋmɔ kɛ Yesu Kristo jeee Nyɔŋmɔ kome, ni ákɛ mumɔ krɔŋkrɔŋ lɛ ji hewalɛ ni Nyɔŋmɔ kɛtsuɔ nii. (Mateo 26:39; Yohane 14:28; Bɔfoi lɛ Asaji 4:31) Maria wie akɛ: “Tsakpãa ni ka mi kɛ tsɔɔlɔ lɛ teŋ lɛ fiteee. Yɛ fɛɛ mli lɛ, wɔyɛ tsɔɔlɔi ni he esa yɛ wɔ skul lɛ mli. Amɛmiisumɔ koni wɔ fɛɛ wɔye anɔkwa.”
Yɛ afii ni Maria kɛtee skul lɛ mli fɛɛ lɛ, shidaamɔ ni ekɔ lɛ ha tsɔɔlɔi lɛ kɛ eklasbii lɛ ná bulɛ amɛha lɛ. Maria wie akɛ: “Biblia mli shishitoo mlai ye bua mi yɛ mishihilɛ mli. Be ni skul afi lɛ ba naagbee lɛ, aha mi anɔkwayeli kɛ gbɛjianɔtoo kpakpa he jweremɔ nɔ̃, yɛ nakai beaŋ nɔŋŋ lɛ, aŋma wolo kɛjɛ skul lɛ mli kɛda mifɔlɔi ashi yɛ bɔ ni amɛtsɔse mi jogbaŋŋ amɛha lɛ hewɔ.”
Abaptisi Maria yɛ August 18, afi 2001. Ekɛɛ akɛ: “Miyɛ miishɛɛ akɛ manyɛ majá naakpɛɛ Nyɔŋmɔ ni tamɔ nɛkɛ ni ji Yehowa!” Yehowa Odasefoi oblahii kɛ oblayei ni yɔɔ je lɛ mli fɛɛ lɛ hiɔ shi yɛ Tito 2:10 lɛ wiemɔi lɛ anaa, heni wɔkaneɔ yɛ akɛ: ‘Nyɛwulaa Nyɔŋmɔ ni ji wɔyiwalaherelɔ lɛ nitsɔɔmɔ lɛ yɛ nibii fɛɛ mli.’
[Mfoniri ni yɔɔ baafa 32]
Maria kɛ efɔlɔi yɛ be ni abaptisi lɛ sɛɛ lɛ
[Mfoniri ni yɔɔ baafa 32]
Wolo ni aŋma kɛmiitsɔɔ hiɛsɔɔ, kɛ jeŋba kpakpa he yijiemɔ wolo