Hewalɛ ni Yesu Ená yɛ Mɛi Anɔ yɛ Jeŋ Fɛɛ

BIBLIA shishitsɔɔlɔ Edgar Goodspeed ŋma akɛ: “Yesu baanyɛ awie saji ni sanekpakpai lɛ bɔ he amaniɛ ákɛ ewie yɛ teemɔŋ kɛ yɛ faŋŋ mli lɛ fɛɛ yɛ ŋmɛlɛtswai enyɔ mli. Ni kɛlɛ, nakai saji fioo ni ewie lɛ taa mɔ tsuiŋ, ekanyaa mɔ, ni enáa mɔ nɔ hewalɛ waa aahu akɛ abaanyɛ akɛɛ akɛ mɔ ko mɔ ko bɛ ni ená mɛi ni yɔɔ je lɛŋ lɛ anɔ hewalɛ waa tamɔ lɛ.”

Beni Yesu Kristo gbe eshikpɔŋ nɔ sɔɔmɔ lɛ naa yɛ afi 33 Ŋ.B. lɛ, no mli lɛ kɛ hooo lɛ esɛɛnyiɛlɔi ni ji hii kɛ yei lɛ ayifalɛ ji 120. (Bɔfoi lɛ Asaji 1:15) Ŋmɛnɛ, ayɛ gbɔmɛi ni fe akpekpei akpei enyɔ ni kɛɛ Kristofoi ji amɛ. Mɛi akpekpei ohai abɔ hu kpɛlɛɔ Yesu nɔ akɛ eji gbalɔ. Etsɔɔmɔi lɛ ená adesai aweku lɛ nɔ hewalɛ yɛ gbɛ ni ekaaa nɔ lɛɛlɛŋ.

Jamɔŋ hiɛnyiɛlɔi ni amɛjeee Kristofoi lɛ po kpɛlɛɔ hewalɛ ni Yesu ená yɛ mɛi anɔ yɛ je lɛŋ fɛɛ lɛ nɔ. Ákɛ nɔkwɛmɔnɔ lɛ, Yudafonyo rabi Hyman Enelow ŋma akɛ: “Yesu ebafee mɔ ko ni ehe gbɛi, mɔ ni akaseɔ ehe nii, kɛ mɔ ni náa mɛi anɔ hewalɛ fe mɛi fɛɛ ni ale yɛ adesai ajamɔŋ yinɔsane mli.” Enelow wie hu akɛ: “Namɔ baanyɛ abu hewalɛ ni Yesu ená yɛ adesai aweku lɛ nɔ lɛ naa? Suɔmɔ ni eha mɛi jieɔ lɛ kpo, mɛi amii ni eshɛje, nibii kpakpai ni efee, hiɛnɔkamɔ kɛ miishɛɛ ni eha aná—mɔ ko kwraa bɛ adesai ayinɔsane mli ni enyɛ etsu nibii nɛɛ fɛɛ. Nibii wuji kɛ nibii kpakpai ni adesai efee lɛ ateŋ  ekome folo ninaaa miishɛɛ ni mɛi yɔɔ yɛ Yesu he kɛ hewalɛ ni enáa yɛ mɛi anɔ yɛ je lɛŋ fɛɛ lɛ he. Ebafee mɔ ni anáa ehe miishɛɛ fe mɛi fɛɛ ni ale yɛ yinɔsane mli.” Ni Hindubii ahiɛnyiɛlɔ Mohandas K. Gandhi kɛɛ akɛ: “Mileee mɔ ko ni efee nibii kpakpai babaoo eha adesai aweku lɛ tamɔ Yesu. Yɛ anɔkwale mli lɛ, tɔmɔ ko kwraa bɛ Kristojamɔ he.” Shi ekɛfata he akɛ: “Nyɛ, ni ji Kristofoi lɛ ahe naagba lɛ yɔɔ. Nyɛhiii shi yɛ nyɛ diɛŋtsɛ nyɛtsɔɔmɔi lɛ anaa.”

Ale Kristendom kɛjɛ blema tɔ̃ɔ akɛ enyɛɛɛ ehi shi yɛ Yesu tsɔɔmɔi lɛ anaa. Kristojamɔ he yinɔsaneŋmalɔ Cecil John Cadoux kɛɛ akɛ, “afi 140 Ŋ.B. tɔ̃ɔ . . . ni Kristojamɔ mli hiɛnyiɛlɔi yɔse akɛ jeŋba kpakpa miigbee shi fiofio yɛ Sɔlemɔ lɛ mli fɛɛ.” Ewie akɛ: “Taakɛ eji lɛ, jeŋba kpakpa ni kulɛ Kristofoi hiɛ mli kpɛŋŋ ni amrɔ nɛɛ ebaa shi lɛ haa amɛfeɔ amɛnii tamɔ jeŋ bii.”

Jeŋba ni gbeɔ shi nɛɛ ba shi waa yɛ klɛŋklɛŋ afii 400 lɛ mli beni Roma Nɔyelɔ Konstantino kpɛlɛ Kristojamɔ nɔ lɛ. Cadoux ŋma akɛ: “Yinɔsaneŋmalɔi ekadi bɔ ni ekome ni Sɔlemɔ lɛ kɛ Konstantino fee lɛ hã Sɔlemɔ lɛ ŋmɛɛ saji ahe kɛsaa yɛ gbɛ ni yɔɔ hiɛdɔɔ nɔ, ni yinɔsaneŋmalɔi lɛ ateŋ mɛi komɛi eyanáaa enɛ he miishɛɛ.” Yɛ afii ohai abɔ ni eho kɛjɛ no sɛɛ kɛbaa nɛɛ mli lɛ, mɛi ni tsɛ́ɔ amɛhe Kristofoi lɛ kɛ amɛhe ewo dujiaŋ nitsumɔi babaoo ni gbeɔ Kristo gbɛi lɛ he guɔ lɛ amli.

Belɛ sanebimɔi ni sa hesusumɔ ji akɛ: Mɛni diɛŋtsɛ ji nɔ ni Yesu tsɔɔ? Ni mɛɛ hewalɛ esa akɛ etsɔɔmɔi lɛ aná yɛ wɔnɔ?

[Mfoniri ni yɔɔ baafa 3]

“Mileee mɔ ko ni efee nibii kpakpai babaoo eha adesai aweku lɛ tamɔ Yesu.”—Mohandas K. Gandhi

[Mfoniri ni yɔɔ baafa 3]

“Mɔ ko mɔ ko bɛ ni ená mɛi ni yɔɔ je lɛŋ lɛ anɔ hewalɛ tamɔ lɛ.”—Edgar Goodspeed

[He ni Sane lɛ Jɛ]

Culver Pictures