Sanebimɔi ni Jɛ Kanelɔi Adɛŋ

Ani hiɛ-mãa-aboloo ni David kɛ ewebii lɛ ye lɛ tsɔɔ akɛ abaanyɛ aku Nyɔŋmɔ mla mli ní agbalaaa he toi beni akɛ shihilɛ ni mli wa ekpe?—1 Samuel 21:2-7.

Taakɛ 3 Mose 24:5-9 tsɔɔ lɛ, osɔfoi lɛ pɛ yeɔ hiɛ-mãa-aboloo ni daa Hejɔɔmɔ Gbi nɔ lɛ akɛ ehee yamaa shi lɛ. Nɔ hewɔ ji akɛ, aboloi nɛɛ yɛ krɔŋkrɔŋ ni atoɔ he gbɛjianɔ koni etsɔ hii ni tsuɔ Nyɔŋmɔ sɔɔmɔ he nii, ni ji osɔfoi lɛ aniyenii. Aboloi nɛɛ ni akɛaaha nitsulɔ ko kɛkɛ loo ni mɔ aaaye ni ekɛjie ehiɛtserɛ lɛ ejaaa. Shi kɛlɛ, ejeee tɔ̃mɔ akɛ osɔfo Ahimelek aaaha David kɛ ewebii lɛ hiɛ-mãa-aboloo lɛ eko ni amɛye.

No mli lɛ, etamɔ nɔ ni David miitsu nitsumɔ krɛdɛɛ ko ni Maŋtsɛ Saul kɛwo edɛŋ lɛ he nii. Hɔmɔ miiye David kɛ ewebii lɛ. Ahimelek kwɛ ni ena akɛ amɛhe tse yɛ jamɔ gbɛfaŋ. Eyɛ mli akɛ yɛ mla naa lɛ, hiɛ-mãa-aboloo lɛ eko ni amɛye lɛ ejaaa gbɛ moŋ, shi ekɛ bɔ ni átsɔɔ ákɛ akɛ aboloo krɔŋkrɔŋ lɛ atsu nii aha lɛ kpãa gbee. Enɛ hewɔ Ahimelek ŋmɛ amɛ gbɛ ni amɛye lɛ. Yesu Kristo diɛŋtsɛ kɛ nɔ ni ba nɛɛ tsu nii ni ekɛtsɔɔ bɔ ni shɛii ni Farisifoi lɛ feɔ yɛ mla ni kɔɔ Hejɔɔmɔ Gbi lɛ yeli he yɛ bɔ ni amɛtsɔɔ shishi amɛhaa lɛ naa lɛ ejaaa kwraa ha lɛ mli.—Mateo 12:1-8.

Shi kɛlɛ, saji ni wɔsusu he kɛtsɔ hiɛ nɛɛ etsɔɔɔ akɛ abaanyɛ aku Nyɔŋmɔ mla mli kɛji ákɛ akɛ shihilɛi ni mli wawai kpe. Ákɛ nɔkwɛmɔnɔ lɛ, shihilɛ ko ni jaraa ni tamɔ enɛ te shi be ni Israel asraafoi lɛ kɛ Filistibii lɛ wuɔ lɛ. No mli lɛ, Maŋtsɛ Saul ekɛɛ akɛ: “Alomɔ mɔ fɛɛ mɔ ni aaaye nɔ ko dani je aaana, koni atɔ mihe owele yɛ mihenyɛlɔi lɛ anɔ!” Biblia lɛ kɛɔ akɛ: “Ni nakai gbi lɛ amɛgbe Filistibii lɛ.” Etɔ asraafoi lɛ butuu yɛ ta lɛ mli, ni hɔmɔ miiye amɛ, ‘kɛkɛ ni maŋ lɛ gbe kooloi yɛ shikpɔŋ ni amɛye kɛ lá lɛ.’ (1 Samuel 14:24, 31-33) Amɛfee esha amɛshi Yehowa akɛni amɛku emla ni kɔɔ lá he lɛ mli lɛ hewɔ. Amɛ nifeemɔ lɛ kɛ nɔ̃ pɛ ni Nyɔŋmɔ etsɔɔ ákɛ akɛ lá afee, ni ji “koni aŋɔkpãtã” yɛ eshai ahewɔ lɛ kpãaa gbee. (3 Mose 17:10-12; 1 Mose 9:3, 4) Yehowa jɛ mɔbɔnalɛ mli ekpɛlɛ afɔlei krɛdɛɛi komɛi ni mɛi ni efee esha lɛ shã lɛ nɔ.—1 Samuel 14:34, 35.

Hɛɛ, Yehowa miikpa gbɛ akɛ wɔbaabo emlai atoi yɛ shihilɛ fɛɛ shihilɛ mli. Bɔfo Yohane kɛɔ wɔ akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ.”—1 Yohane 5:3.

[Mfoniri ni yɔɔ baafa 30]

Daa Hejɔɔmɔ Gbi nɔ lɛ, akɛ hiɛ-mãa-abolooi heei yamaa shi yɛ kpee buu lɛ mli