Maŋtsɛyeli Jajelɔi Bɔ Amaniɛ

Mɛi ni Sa lɛ Ataomɔ yɛ Australia Maŋ ko ni Etse Ehe Banee lɛ Mli

ALE kpokpaa wulu ko ni yɔɔ Australia teŋgbɛ lɛ akɛ maŋ ni etse ehe banee. Hei komɛi yɛ kpokpaa ni etse ehe banee nɛɛ nɔ ni ashiɛko yɛ jɛmɛ afii 12. Enɛ hewɔ lɛ, Yehowa Odasefoi ni yɔɔ Darwin ni ji Kooyigbɛ Kpokpaa lɛ maŋtiase lɛ mli lɛ, to gbɛjianɔ ni amɛkɛ gbii nɛɛhu shiɛ jogbaŋŋ ni amɛkɛtao mɛi sa lɛ yɛ jɛmɛ.—Mateo 10:11.

Aje shishi ato gbɛjianɔ kpakpa diɛŋtsɛ nyɔji 12 sɛɛ dani tafãa be lɛ shɛ, ni nɔ ni fata he ji shikpɔŋkuku ni abaatsu mli nii ni da fe kilomitai 800,000—ni tamɔ New Zealand maŋ lɛ toi etɛ lɛ tɛŋmɔ yɛ woji anɔ. Bɔni afee ni ona bɔ ni kpokpaa wulu nɛɛ etse ehe banee eha lɛ, feemɔ he mfoniri yɛ ojwɛŋmɔ mli okwɛ, kɛjɛ gbɛjegbɛ ni yɔɔ tsinai alɛɛhe ko lɛ kɛyaa shia lɛ agbó lɛ naa lɛ jɛkɛ fe kilomitai 30! Kɛfata he lɛ, tsinai alɛɛhei nɛɛ ekomɛi ateŋ jɛkɛmɔ shɛɔ kilomitai 300 loo nɔ ni fe nakai.

Odasefoi 145 ji mɛi ni kɛ amɛhe wo tafãa lɛ mli. Mɛi komɛi jɛ Tasmania tɔ̃ɔ kɛba. Mɛi komɛi tara tsɔji amli kɛba ni amɛhiɛ nibii ni amɛkɛbaashi buui, tsɔji asaamɔ he nibii kɛ pɛtro. Mɛi krokomɛi hu kɛ amɛnibii wo shwiilii ni tsɔji gbalaa lɛ amli kɛba. Kɛfata he lɛ, ato bɔɔs enyɔ ni eko fɛɛ eko woɔ mɛi 22 he gbɛjianɔ aha mɛi ni bɛ tsɔji ni sa kɛha gbɛfaa nɛɛ. Mɛi ni tara bɔɔs lɛ mli lɛ ye mɛi ni yɔɔ maji bibii lɛ amli lɛ odase titri, yɛ shikpɔŋkuku ni ahala lɛ mli.

Dani gbɛfaa be lɛ aaashɛ lɛ, nyɛmimɛi hii lɛ ha wiemɔi ni amɛfee nɔkwɛmɔnii kɛtsɔɔ gbɛ̀i anɔ ni abaatsɔ ni ashiɛ sanekpakpa lɛ yɛ shikpɔŋkuku ni etse ehe banee nɛɛ mli. Ákɛ nɔkwɛmɔnɔ lɛ, kɛji akɛ aaanyɛ ashiɛ jogbaŋŋ kɛmɔ shi yɛ Australia shikwɛ̃ɛbii akutsei amli lɛ, bei pii lɛ ehe hiaa ni ale amɛkusumii, ni agbɛnɛ akase amɛnifeemɔi komɛi. Agbala jwɛŋmɔ hu kɛtee nibii ni ebɔle amɛhe lɛ anɔ, koni akakpata kooloi kɛ tsei lɛ ahiɛ.

Shiɛlɔi lɛ ná niiashikpamɔi babaoo ni yɔɔ miishɛɛ. Ákɛ nɔkwɛmɔnɔ lɛ, nyɛmimɛi lɛ to gbɛjianɔ koni amɛha maŋshiɛmɔ ko ni damɔ Biblia lɛ  nɔ, yɛ Australia shikwɛ̃ɛbii lɛ akutso ko mli. Maŋnyɛ ni yɔɔ akutso lɛ mli lɛ diɛŋtsɛ yiŋ etee eyabɔ ekutsoŋbii lɛ amaniɛ. Beni agbe kpee lɛ naa lɛ, aha mɛi ni babo wiemɔ lɛ toi lɛ woji wuji 5, kɛ woji bibii 41. Yɛ akutso kroko mli lɛ, amɛkɛ Australia shikwɛ̃ɛnyo ko gba sane. Eyɛ lɛ diɛŋtsɛ e-Biblia po, ni ji King James Version, shi egbɔ ni etserɛ hu. Beni abi lɛ akɛ ele Nyɔŋmɔi gbɛi lo lɛ, ekpɛlɛ nɔ akɛ hɛɛ, ni amrɔ nɔŋŋ lɛ ejie Blɔfo Buu-Mɔɔ momo ko kpo kɛjɛ ekootu lɛ mli. Ekane Marko 12:30 ni aŋma emli wiemɔi lɛ yɛ wolo tɛtrɛɛ lɛ mli lɛ, nɔ ni kɛɔ akɛ: “Suɔmɔ Nuŋtsɔ [Yehowa, NW] o-Nyɔŋmɔ lɛ kɛ otsui fɛɛ.” Ekɛɛ akɛ, “Misumɔɔ nɛkɛ ŋmalɛ nɛɛ waa.” Beni akɛ lɛ gba Biblia lɛ mli sane ni mɔɔ shi waa sɛɛ lɛ, aha lɛ Biblia hee kɛ Biblia kasemɔ woji krokomɛi.

Yɛ Carpentaria Ŋshɔnine lɛ masɛi lɛ, onukpa ni kwɛɔ tsinai alɛɛhe ni edalɛ aaafee hɛkta 400, 000 lɛ ná Maŋtsɛyeli sane lɛ he miishɛɛ. Beni akɛ Mi-Wolo ni Gbaa Biblia Mli Saji kɛ Nilee Ni Kɛ Mɔ Yaa Naanɔ Wala Mli, * woji lɛ tsɔɔ lɛ sɛɛ lɛ, ebi kɛji akɛ abaaná woji lɛ eko yɛ Kriol wiemɔ mli aha lɛ. Enɛ fee amɛ naakpɛɛ, ejaakɛ Australia shikwɛ̃ɛbii fioo pɛ nyɛɔ amɛkaneɔ Kriol wiemɔ lɛ, eyɛ mli akɛ mɛi saŋŋ nyɛɔ amɛwieɔ moŋ. Yɛ naagbee lɛ, amɛyɔse akɛ nitsulɔi 50 ni yɔɔ tsinai alɛɛhe lɛ fɛɛ nyɛɔ Kriol wiemɔ lɛ amɛkaneɔ. Beni aha onukpa lɛ Biblia kasemɔ woji ni yɔɔ Kriol wiemɔ mli lɛ, emii shɛ ehe waa, ni ekɛ etɛlifoŋ nɔmba ha bɔni afee ni nine anyɛ ashɛ enɔ.

Yɛ gbii nɛɛhu ni shiɛlɔi lɛ kɛshiɛ jogbaŋŋ lɛ mli lɛ, amɛha Bibliai 120, woji wuji 770, woji tɛtrɛbii 705, kɛ woji bibii 1,965. Kɛfata he lɛ, amɛfee sɛɛkuu-kɛsaramɔi 720, ni amɛje Biblia mli nikasemɔi 215 shishi.

Hɛɛ, mɛi babaoo ni sa ni mumɔŋ hɔmɔ yeɔ amɛ yɛ nɛkɛ kpokpaa wulu nɛɛ nɔ lɛ miiná niyenii agbɛnɛ.—Mateo 5:6.

[Shishigbɛ niŋmaa]

[Shikpɔŋ he mfoniri ni yɔɔ baafa 30]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

AUSTRALIA

KOOYIGBƐ KPOKPAA

Darwin

Carpentaria Ŋshɔnine

Sydney

TASMANIA