Eyeɔ Ebuaa Yɛ Woji Ashishitsɔɔmɔ Mli

YEHOWA NYƆŊMƆ ni ji Biblia lɛ Ŋmalɔ lɛ miisumɔ ni ashiɛ Maŋtsɛyeli lɛ he sanekpakpa lɛ atsɔɔ “jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ.” (Kpojiemɔ 14:6) Eesumɔ koni adesai fɛɛ anine ashɛ e-Wiemɔ ni aŋma lɛ eko nɔ. Bɔni afee ni anyɛ atsu enɛ he nii lɛ, atsɔɔ Biblia lɛ shishi kɛtee wiemɔi babaoo amli fe woji krokomɛi fɛɛ ni yɔɔ je lɛ mli. Woji ashishitsɔɔlɔi akpei abɔ kɛ mɔdɛŋbɔɔ kɛ be babaoo etsu nii koni amɛtsɔɔ Nyɔŋmɔ susumɔi lɛ ashishi kɛjɛ maŋ nɔ wiemɔ kome mli kɛya ekroko mli.

Shi kɛlɛ, Biblia lɛ jeee wolo ko ni atsɔɔ shishi pɛ kɛkɛ. Yɛ be babaoo mli lɛ, akwɛɔ nɔ akɛtsɔɔ wiemɔi krokomɛi ashishi. Woji ashishitsɔɔlɔi babaoo kɛ bɔ ni atsɔɔ Biblia mli wiemɔi komɛi ashishi aha yɛ maŋ nɔ wiemɔ ko mli lɛ toɔ bɔ ni eyɔɔ yɛ wiemɔi krokomɛi amli lɛ ahe, ni enɛ yeɔ ebuaa amɛ ni amɛtsɔɔ wiemɔi komɛi ashishi yɛ gbɛ ni ja nɔ. Amrɔ nɛɛ akɛ Biblia lɛ miitsu nii yɛ kɔmpiuta ni akɛtsɔɔ woji ashishi lɛ hu mli.

Ewa waa akɛ kɔmpiuta aaatsɔɔ wiemɔi ashishi jogbaŋŋ. Nilelɔi komɛi nuɔ he akɛ woji ashishitsɔɔmɔ ji nɔ ko ni kɔmpiuta nyɛŋ afee. Mɛni hewɔ? Jeee wiemɔi komɛi ni atsara kɛkɛ feɔ wiemɔ ni shishinumɔ yɔɔ he. Maŋ fɛɛ maŋ nɔ wiemɔ yɛ gbɛ nɔ ni atsaraa lɛ ahaa, eko fɛɛ eko yɛ ehe mlai, kɛ hei ni mlai nɛɛ tsuɔ nii kɛyashɛɔ, ni eko fɛɛ eko yɛ agwaseaŋ wiemɔi kɛ abɛbuai. Mɔdɛŋ fɛɛ ni abɔ koni ato kɔmpiuta lɛ he gbɛjianɔ ni enyɛ etsu enɛɛmɛi fɛɛ ahe nii lɛ yeee omanye. Woji babaoo ni kɔmpiuta tsɔɔ shishi lɛ ashishinumɔ wa waa.

Shi kɛlɛ, amrɔ nɛɛ kɔmpiuta he nilelɔi miitao gbɛ̀i heei ni amɛaatsɔ nɔ amɛto kɔmpiuta lɛ he gbɛjianɔ kɛha woji ashishitsɔɔmɔ. Kɔmpiuta ni akɛtsɔɔ woji ashishi he nilelɔ kpanaa ni ji Franz Josef Och wie akɛ: “Kɔmpiuta ni wɔfeɔ lɛ kɛ akɔntaabuu gbɛ̀i tsuɔ nii kɛtaoɔ gbɛ ni hi fe fɛɛ ni ebaanyɛ etsɔɔ wiemɔ pɔtɛɛ ko shishi.” Ŋɔɔ lɛ akɛ ootao otsɔɔ wolo ko ni yɔɔ Blɔfo wiemɔ mli shishi kɛba Ga mli. Klɛŋklɛŋ lɛ, taomɔ wolo pɔtɛɛ ko ni áŋma yɛ wiemɔi enyɔ nɛɛ fɛɛ amli. No sɛɛ lɛ, tswaa enyɔ lɛ fɛɛ mli saji lɛ owo kɔmpiuta mli. Kɔmpiuta lɛ kɛ bɔ ni atsɔɔ Blɔfo wiemɔ lɛ shishi kɛba Ga mli aha lɛ baato he. Ákɛ nɔkwɛmɔnɔ lɛ, kɛji kɔmpiuta lɛ kadi akɛ Blɔfo wiemɔ pɔtɛɛ ko jeɔ kpo shii abɔ yɛ wolo lɛ mli, ni ákɛ be fɛɛ be ni epueɔ lɛ, Ga wiemɔ ni ji “shia” ji nɔ ni akɛtsɔɔ shishi lɛ, no lɛ kɔmpiuta lɛ muɔ sane naa akɛ nakai Blɔfo wiemɔ lɛ shishi yɛ  Ga mli ji “shia.” Ni eeenyɛ eba akɛ, wiemɔ sutsɔɔlɔi tamɔ “agbo,” “bibioo,” “emomo,” aloo “ehee” fata Ga wiemɔ ni ji “shia” lɛ he. Kɔmpiuta lɛ tsɔɔ nɛkɛ gbɛ nɔ ebuaa wiemɔi kɛ amɛ shishitsɔɔmɔi anaa kɛtoɔ. Beni kɔmpiuta lɛ kɛ gbii aloo otsii fioo komɛi “ebua wiemɔi anaa eto” sɛɛ lɛ, ebaanyɛ ekɛ nɔ ni “ekɛto” lɛ atsu nii kɛtsɔɔ woji heei ashishi. Eyɛ mli akɛ ekolɛ shishitsɔɔmɔ ni abaaná lɛ kɛ wiemɔ mli ní atsɔɔ shishi kɛtee lɛ he mlai lɛ enyiɛŋ pɛpɛɛpɛ moŋ, shi bei pii lɛ ehiɔ kanemɔ bɔ ni mɔ baanyɛ anu shishi ni ekadi saji otii ni yɔɔ mli lɛ.

Kɛji shishitsɔɔmɔ lɛ baafee nɔ ni hi jogbaŋŋ lɛ, no lɛ titri damɔ wiemɔ falɛ ni atswa awo kɔmpiuta lɛ mli klɛŋklɛŋ kwraa, kɛ bɔ ni wiemɔi nɛɛ ashishitsɔɔmɔ ja jogbaŋŋ ha lɛ anɔ. Biɛ ji he ni anaa sɛɛnamɔ ni yɔɔ Biblia lɛ he lɛ yɛ. Áje gbɛ atsɔɔ shishi jogbaŋŋ kɛtee maji anɔ wiemɔi babaoo amli, ni ewaaa akɛ nine aaashɛ eko nɔ, ni wiemɔi ni fa saŋŋ yɛ mli. No hewɔ lɛ, Biblia lɛ ji klɛŋklɛŋ wolo ni niiamlipɛilɔ lɛ tswa emli wiemɔi lɛ ewo kɔmpiuta mli bɔni afee ni ekɛ emli wiemɔi lɛ ato ni enyɛ ejɛ no mli ekɛtsɔɔ wolo hee ko shishi.