Te Biblia Mli Yinɔsane Ja Eha Tɛŋŋ?

CHAIM HERZOG ni ji ŋmɛnɛŋmɛnɛ Israel maŋ lɛ tsutsu hiɛnyiɛlɔ, kɛ Mordechai Gichon ni ji blema nibii ni atsaa shi ataoɔ ahe nilelɔ kpanaa yɛ Tel Aviv University lɛ ŋma yɛ amɛwolo ni gbɛi ji Battles of the Bible lɛ mli akɛ:

“Bɔ ni atsɔɔ saji ni kɔɔ tai ni Biblia lɛ wieɔ he lɛ amli fitsofitso aha lɛ . . . haŋ anyɛ akɛɛ akɛ amɛji saji ni afo atã yɛ sɛɛ mli. Ákɛ nɔkwɛmɔnɔ lɛ, saji ni kɔɔ ta ni Gideon fã eshi Midianbii kɛ maji ni kɛ amɛ yafee ekome, taakɛ abɔ he amaniɛ yɛ Kojolɔi yitso 6-8 lɛ kɛkɛ fa bɔ ni abaanyɛ akɛto Trojan Tai srɔtoi ni awu ni Homer wie he yɛ ewolo ni ji Iliad lɛ mli lɛ ahe. Yɛ Trojan tai ni awu lɛ agbɛfaŋ lɛ, abaanyɛ akɛ ŋshɔ naa fɛɛ ŋshɔ naa kɛ maŋ ko ni he wa ni bɛŋkɛ lɛ lɛ atsɔɔ akɛ jɛmɛ ji hei ni awu ta lɛ yɛ . . . Shi jeee nakai sane lɛ ji yɛ Biblia mli amaniɛbɔɔ ni kɔɔ Gideon tafãa lɛ he lɛ gbɛfaŋ. Anyɛŋ akɛɛ akɛ nɛkɛ tawuu nɛɛ ni atsɔɔ mli fitsofitso, ní atsĩ nibii pɔtɛɛi komɛi tamɔ gɔji, gɔŋkpɔi, jɔɔi, kɛ faai ni yɔɔ tawuuhe lɛ atã, kɛ bɔ ni kui enyɔ ni kɛ amɛhe wu lɛ fee amɛnii amɛha yɛ tawuuhe ni lɛɛmɔ shɛɔ kilomitai 60 lɛ tee nɔ yɛ he ko kɛkɛ . . . Etamɔ nɔ ni enɛ miinyɛ wɔnɔ koni wɔkpɛlɛ bɔ ni tai ahe amaniɛbɔi ni atsɔɔ mli fitsofitso yɛ Biblia lɛ mli lɛ ji anɔkwale ha lɛ nɔ.”

Obaanyɛ okɛ shikpɔji ahe mfonirii ahe wolo bibioo ni ji ‘Kwɛmɔ Shikpɔŋ Kpakpa Lɛ’ * mli mfoniri ni yɔɔ ebaafa 18 kɛ 19 lɛ akase Gideon tafãa lɛ he nii. Tafãa nɛɛ he sane te shi beni “Midianbii kɛ Amalekbii kɛ bokagbɛbii lɛ fɛɛ bua amɛhe naa, ni amɛfo mli ni amɛyabɔ nsara yɛ Yezreel jɔɔ lɛŋ” lɛ. Gideon fɔ̃ nine etsɛ́ akutsei ni bɛŋkɛ lɛ lɛ kɛha yelikɛbuamɔ. Nibii ni tee nɔ lɛ je shishi yɛ Harod nubu lɛ naa kɛtee More gɔŋkpɔ lɛ he kɛbaho Yordan Jɔɔ lɛŋ. Gideon ye ehenyɛlɔi lɛ anɔ kunim butuu yɛ sɛɛ mli beni etiu amɛ kɛfo Yordan faa lɛ.—Kojolɔi 6:33–8:12.

Anaa maji titrii ni atsĩ amɛtã lɛ kɛ bɔ ni shikpɔji ni awie he yɛ sane lɛ mli lɛ ashikamɔ yɔɔ ha lɛ yɛ nakai shikpɔji ahe mfoniri ni yɔɔ ‘Kwɛmɔ Shikpɔŋ Kpakpa Lɛ’ mli. Shikpɔŋ he mfoniri kroko (ebaafa 15) hu tsɔɔ hei ni Israel akutsei lɛ ashikpɔji lɛ kamɔ. Shikpɔji ahe mfonirii enyɔ lɛ baanyɛ aye abua bo koni onu bɔ ni Biblia mli amaniɛbɔɔ lɛ ja ha lɛ shishi jogbaŋŋ.

Enɛ haa nɔ ni Yohanan Aharoni ni ji nilelɔ kpanaa ni egbo lɛ kɛɛ lɛ bafeɔ faŋŋ akɛ: “Kɛ́ aawie shikpɔji ni Biblia lɛ tsĩɔ tã lɛ ahe lɛ, anyɛŋ akɛ shikpɔji ahe nilee pɛ loo yinɔsane pɛ atsɔɔ mli ní eshishinumɔ afee faŋŋ ákɛ ja akɛ enyɔ lɛ fɛɛ etsu nii.”

[Shishigbɛ niŋmaa]

[He ni Mfoniri ni yɔɔ baafa 32 lɛ Jɛ]

Shikpɔŋ he mfoniri: Based on maps copyrighted by Pictorial Archive (Near Eastern History) Est. and Survey of Israel