Bɔ ni Wɔɔfee Wɔha Gbi Fɛɛ Gbi He Aba Sɛɛnamɔ

“TSƆƆMƆ wɔ wɔgbii lɛ kanemɔ, bɔni afee ni wɔná nilee tsui!” (Lala 90:12) Enɛ ji Biblia ŋmalɔ Mose sɔlemɔ ni heshibaa yɔɔ mli. Mɛni pɔtɛɛ ebiɔ lɛ? Ani esa akɛ wɔkɛ bulɛ abi nɔ ko ni tamɔ nɛkɛ?

Yɛ kuku ni ji 10 lɛ mli lɛ, Mose ye bɔ ni adesa wala sɛɛ kɛɛɛ ha lɛ he ŋkɔmɔ. Yɛ be kroko mli lɛ, eŋma Hiob wiemɔ akɛ: “Gbɔmɔ ni yoo fɔ́ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ́ kɛ haomɔ sɔŋŋ” lɛ efɔ̃ shi. (Hiob 14:1) Eka shi faŋŋ akɛ Mose le bɔ ni adesa wala ni yeee emuu lɛ sɛɛ etsɛɛɛ lɛ jogbaŋŋ, ni ehao yɛ he. Enɛ hewɔ lɛ, ebu gbi fɛɛ gbi shihilɛ akɛ nikeenii ni jara wa. Beni Mose sɔleɔ ehaa Nyɔŋmɔ lɛ, etsɔɔ akɛ eesumɔ ni ekɛ ewala gbii ni eshwɛ lɛ ahi shi jogbaŋŋ, yɛ gbɛ ni baasa e-Bɔlɔ lɛ hiɛ lɛ nɔ. Ani esaaa akɛ wɔ hu wɔhiɔ shi yɛ gbɛ ni shishinumɔ yɔɔ mli nɔ? Kɛji akɛ wɔmiitao ni Nyɔŋmɔ akpɛlɛ wɔnɔ bianɛ lɛ, esa akɛ no afee wɔfaishitswaa.

Nɔ kroko hu yɛ ni kanya Mose kɛ Hiob fɛɛ, ni esa akɛ no nɔŋŋ akanya wɔ hu. Nɛkɛ hii enyɔ ni sheɔ Nyɔŋmɔ gbeyei nɛɛ fɛɛ kwɛ wɔsɛɛ be mli nyɔmɔwoo lɛ gbɛ—wala yɛ shikpɔŋ lɛ nɔ yɛ shihilɛi ni hi jogbaŋŋ mli. (Hiob 14:14, 15; Hebribii 11:26) Gbele efoŋ nitsumɔi kpakpai ni mɔ ko tsuɔ lɛ sɛɛ yɛ nakai beaŋ. Wɔ-Bɔlɔ lɛ yiŋtoo ji akɛ anɔkwafoi baahi shi kɛya naanɔ yɛ paradeiso shikpɔŋ nɔ. (Yesaia 65:21-24; Kpojiemɔ 21:3, 4) Kɛ́ ‘okane ogbii lɛ, bɔni afee ni oná nilee tsui lɛ,’ bo hu obaanyɛ oná hiɛnɔkamɔ ni tamɔ nakai.