Ekãa Ni Akɛaakpee Shitee-kɛ-woo Naa

BASABASAFEELƆI akuu ko ni mli ewo la lɛ nyɛ Gaio kɛ Aristarko ni ji bɔfo Paulo hefatalɔi enyɔ lɛ anɔ koni amɛbote Efeso shwɛmɔhe lɛ. Kuu ni mli ewo la lɛ bolɔ ŋmɛlɛtswai enyɔ sɔŋŋ yɛ jɛmɛ akɛ: “Efesobii Artemi lɛ kekenam ni!” (Bɔfoi lɛ Asaji 19:28, 29, 34) Ani Paulo hefatalɔi nitsulɔi lɛ damɔ shi shiŋŋ kɛkpee shitee-kɛ-woo nɛɛ naa? Ni mɛni kwraa ji nɔ ni kɛ shihilɛ ni tamɔ nɛkɛ ba?

Paulo kɛ aaafee afii etɛ eshiɛ yɛ omanyeyeli mli yɛ Efeso maŋtiase lɛ mli. Enɛ hewɔ lɛ, Efesobii babaoo ekpa wɔji ajamɔ. (Bɔfoi lɛ Asaji 19:26; 20:31) Wɔŋ titri ni ajáa yɛ Efeso lɛ ji Artemi ni ji fɔmɔ nyɔŋmɔyoo, ni eji wɔŋ bibioo ko ni akɛ jwiɛtɛi fee lɛ, ni nyɔŋmɔyoo nɛɛ sɔlemɔtsu kpeteŋkpele lɛ yɛ maŋtiase lɛ gɔŋ nɔ. Akɛ wɔji bibii nɛɛ ni damɔ shi kɛha sɔlemɔtsu lɛ ŋmɔɔ hɛ ákɛ sɛbɛi loo atoɔ amamɔɔ shi yɛ shiai amli. Shi eji anɔkwale akɛ, Kristofoi heee nɛkɛ wɔji nɛɛ.—1 Yohane 5:21.

Demetrio, ni ji jwiɛtɛiŋaalɔi lɛ ateŋ mɔ kome lɛ hé eye akɛ Paulo sɔɔmɔ nitsumɔ lɛ miihe afite amɛjarayeli nitsumɔ ni amɛnáa he sɛɛ babaoo lɛ. Ekɛ amale fã-kɛ-fã kɛ saji ni awo he tsu nii ni ekɛkɔne enanemɛi ŋaalɔi lɛ ayiŋ akɛ gbɔmɛi ni yɔɔ Asia Bibioo lɛ mli he fɛɛ he lɛ baakpa Artemi jamɔ. Trukaa beni jwiɛtɛiŋaalɔi ni mli ewo la lɛ bɔi bolɔmɔ kɛmiijie Artemi yi lɛ, hoofeemɔ ko bate shi, ni maŋ muu lɛ fɛɛ bɔi basabasafeemɔ.—Bɔfoi lɛ Asaji 19:24-29.

Gbɔmɛi akpei abɔ bua amɛhe naa yɛ shwɛmɔhe ni baanyɛ awo nikwɛlɔi 25,000 lɛ. Paulo kɛ ehe ha koni ekɛ basabasafeemɔ kuu lɛ awie, shi onukpai komɛi ni sumɔɔ esane lɛ wo lɛ ŋaa koni ekafee nakai. Yɛ naagbee lɛ, maŋsɔɔlɔ nukpa lɛ nyɛ eha gbɔmɛi akuu lɛ fee dioo, ni Gaio kɛ Aristarko jo foi shweshweeshwe.—Bɔfoi lɛ Asaji 19:35-41.

Ŋmɛnɛ, ekolɛ Nyɔŋmɔ webii hu kɛ shitee-kɛ-woo baakpe ni ekolɛ basabasafeelɔi baate shi awo amɛ po yɛ amɛshiɛmɔ nitsumɔ lɛ mli. Bei pii lɛ, amɛshiɛɔ sanekpakpa lɛ yɛ maŋtiasei ni wɔŋjamɔ, jeŋba shara kɛ yiwalɛ nifeemɔ fá babaoo yɛ mli lɛ amli. Fɛɛ sɛɛ lɛ, amɛkɛ ekãa kaseɔ bɔfo Paulo ni ‘shiuuu nitsɔɔmɔ nɔ yɛ faŋŋ kɛ shia fɛɛ shia’ yɛ Efeso maŋtiase lɛ mli lɛ. (Bɔfoi lɛ Asaji 20:20) Ni amɛ hu amɛmli filiɔ amɛ kɛ́ amɛna akɛ ‘Yehowa wiemɔ lɛ miida ni eená hewalɛ lɛ.’—Bɔfoi lɛ Asaji 19:20.

[Mfoniri ni yɔɔ baafa 30]

Shwɛmɔhe ni yɔɔ Efeso lɛ ni efite